Mateu 21

Kerutsareme hetsie kemɨreutaha

(Mat 21:1-9 – Mar 11:1-10, Ruk 19:29-38, Wa 12:12-15)

1Kepauka Kerutsareme mehurakairi, meta Wetɨpake mɨrakutewatsie memu'axɨa, Huriwa Mati'u yemuriyari hetɨa, Ketsutsi teyɨ'ɨkitɨwamete yuhutame kaniwarutanɨ'ani, 2mɨpaɨ tiwarutahɨaweka: «Kiekari 'anutaɨye mukumatsie xekenehu, kwitɨwa mana xekaneitaxeiyakuni puxu 'akuwiekame meta puxu temaikɨ hamatɨana. Xewarakuxɨname xekeniwarahapani nehetsɨa. 3Xewitɨ xɨka yɨkɨ tixehetahɨawe, mɨpaɨ xepɨteheitahɨawe: Ti'aitame pɨwareuyehɨwa, kwitɨwata pɨwaranɨ'ani».

4Mɨpaɨ katiniuyɨni maye'anikɨ Kakaɨyari niukameya kemutayɨ:

5«Mɨpaɨ xeketenetahɨawi Tsiyuni mɨrakutewa kiekame:

“Neuxei, mati'aitɨwame 'ahetsɨa kanamieni,

tixaɨtɨ karayuyeitɨatɨ meta puxutsie 'anakaitɨ,

puxu temaikɨ hetsie, ti'ikatɨariwame nu'ayatsie”».

6Hikɨ teyɨ'ɨkitɨwamete mekanekɨne meta mɨpaɨ mekatenikakɨne kemɨtiwaru'aitɨa Ketsutsi. 7Puxu mekaneyehana meta nu'aya temaikɨ, hikɨ yɨ'ɨkarite me'anuti'itaku, Ketsutsi kananutiyerɨni. 8Yumɨiretɨ teɨteri huyeta mekani'itɨaximekaitɨni yɨ'ɨkarite, hipatɨ kɨye meheukuwiteketɨ mekani'itɨaximekaitɨni huyeta. 9Teɨteri yumɨiretɨ memanuyetekai meta wa'utɨa memuhukai mekaniutihiwakaitɨni mɨpaɨ me'utiyuatɨ:

—'Ari ketaneutawikweitsitɨa Rawiri Nu'aya.

—'Aixɨa ke'itɨarieka kemɨ'ane 'umamie Ti'aitame hetsɨa miemetɨtɨ.

—'Ari ketaneutawikweitsitɨa taheima pemakawe.

10Kepauka Ketsutsi Kerutsareme meutaha, yunaitɨ kiekatari mekananuku'uni, mɨpaɨ me'utiyuatɨ:

—¿Kemɨ'aneta pɨyɨane 'ikɨ?

11Teɨteri mɨpaɨ mekateniwaku'eiyakaitɨni:

—'Ikɨ Ketsutsi Kakaɨyari niukameya kaniyɨaneni, Natsareti kiekame Karereya kwieyaritsie.

Ketsutsi tuki manuwe

(Mat 21:12-16 – Mar 11:15-18, Ruk 19:45-47)

12Ketsutsi Kakaɨyari tukieya kuraruyarita kaneutahani, hikɨ muwa kaniwarayeweiya yunaime memɨtenanekai meta memɨtetuakai. Tumini patamete wamexate kanatixɨrieni meta kukuruxi watuayamete wa'ɨpari. 13Mɨpaɨ katiniwarutahɨawe: «'Ipaɨ katine'uka: “Nekitsɨ mɨpaɨ katinitewakamɨkɨ nenewieri kiyari”. Peru xeme “tenawayamete waterɨ” xekanayeitɨani».

14Hikɨ tuki kuraruyarita 'uyeikakaku, memɨkaheunenierekai meta memɨhurietɨkatei hetsɨana mekaniu'axɨani, hikɨ mɨkɨ 'aixɨa me'aneneme kaniwarayeitɨani. 15Hikɨ mawari wewiwamete tewa'aitɨwamete meta 'inɨarikɨ memɨte'ɨkitakai me'ixeiyaka mariwemekɨ kemɨtiyurienekai, meta mewaxeiyatɨ tɨɨri mɨpaɨ memɨte'uhiwakai tuki manuwe: «'Ari ketaneutawikweitsitɨa Rawiri Nu'aya». Mɨkɨ mekaniuyeha'ani.

16Mɨpaɨ mekatenitahɨawe:

—¿Petiwa'enie 'iya kememutiyuane?

Ketsutsi mɨpaɨ katiniwarutahɨawe:

—Huu, ¿kamɨtsɨ xeme xekate'ekaterɨwawawe 'ikɨ:

»“Tɨɨri 'etsimemutɨtɨ

meta tɨɨri memɨtsitsewe

pepɨwarupitɨa 'ahepaɨtsita 'aixɨa memaitɨkanikɨ”?»

17Hikɨ kaniwaruku'eirieni, kiekaritsie kanayeyani, Wetaniya paitɨ kananuhuni.

Xapa mutawa

(Mat 21:18-22 – Mar 11:12-14, 20-24)

18Hikɨ ximeri paitɨ, tawari kiekaritsie yemieximetɨ, neuhakamɨkɨkaitɨni. 19Xapa kɨyeyari 'uxeiyaka huye tetsita 'uweme, hepana kaneyani, peru tixaɨtɨ hetsiena pɨkatiukaxei xawari xeikɨa, hikɨ mɨpaɨ xapa katiniutahɨawe:

—Tawari pepɨkatakaka.

Hikɨ yapauka kaniutawani xapa.

20Me'ixeiyaka teyɨ'ɨkitɨwamete mekanimamakaitɨni, mɨpaɨ me'utiyuatɨ:

—¿Kepaɨtɨtɨri yapauka tiutawa xapa?

21Ketsutsi mɨpaɨ katiniwarutahɨawe:

—Yurikɨ mɨpaɨ nepɨxerahɨawe, xɨka yuri xete'erieka, xɨka xe'iyari kahutani, 'ikɨ xapa hepaɨtsita kenemɨtiuyuri mɨpaɨ xeikɨa xepɨkateyurieni, matsi xepɨyɨwaweni 'ikɨ hɨri mɨpaɨ xemɨte'utahɨawe: “Keneu'apata, haramaratsie keneukawetsi”, hikɨ mɨpaɨ pɨtiyɨni. 22Meta tita xeme, xeyunenewietɨ, yuri xete'erietɨ xemɨteta'iwauni, mɨkɨ xepɨteyetuiriyarieni.

Ketsutsi heitserie kemɨrexeiyakai

(Mat 21:23-27 – Mar 11:27-33, Ruk 20:1-8)

23Hikɨ Ketsutsi tuki manuwe kaneutahani, mexi ti'ɨkitakai, mawari wewiwamete tewa'aitɨwamete meta teɨteri wa'ukiyarima hetsɨana 'ahurawa mekaniukɨne, mɨpaɨ mekatenita'iwawiya:

—¿Hakewa miemekɨ heitserie pehexeiyatɨ mɨya pepɨtiyuriene? ¿Kemɨ'ane mɨkɨ heitserie pɨmatsi'upitɨa?

24Ketsutsi mɨpaɨ katiniwaruta'eiya:

—Netatsiere nepɨxeta'iwawiya. Xɨka xenetsi'uta'eiya, neta yanepɨtixetahɨawe kemɨ'ane heitserie mɨnetsi'upitɨa yanemɨtiyurienenikɨ 'ikɨ naime. 25Wani kepauka mɨti'ɨyanekai, ¿hakewa pemiemetɨkai 'ɨyarikaya? ¿Taheima makawe tipitɨa, nutsu teɨteri mepipitɨa?

Hikɨ mɨkɨ niuki mekaniutixɨatɨatɨkɨne mɨpaɨ meteyɨkɨhɨawetɨ yunaitɨ: «Xɨka tame mɨpaɨ te'utiyuani: “Taheima makawe pipitɨakai”, mɨkɨ mɨpaɨ pɨtatitahɨawe: “Merikɨte, ¿titayari yuri xekate'ita'eriri?” 26Xɨkata mɨpaɨ te'utiyuani: “Teɨteri mepipitɨakai”, tepɨwamakaxe teɨteri, yunaitɨ Wani Kakaɨyari niukameya mepɨ'eriekai». Hikɨ Ketsutsi mɨpaɨ mekateniuta'eiya:

27—'Atsitepɨkatemate.

Mɨkɨta mɨpaɨ katiniwarutahɨawe:

—Merikɨte, neta 'atsinepɨkatixetahɨawe kemɨ'ane heitserie mɨnetsi'upitɨa yanemɨtiyurienenikɨ 'ikɨ naime.

Tewi yuniwema yuhutame kemɨtiwarutahɨawixɨ

28»¿Kexeteku'eriwa 'ikɨ hepaɨtsita? Tewi yuniwema kaniwarexeiyakaitɨni yuhutame. Xeime hetsɨa nuaka mɨpaɨ katinitahɨawe: “Neniwe, hikɨ ketine'uximayatamie kaxie haraweriyarita”. 29Nu'aya rehɨawe: “Ne nepɨkaheuyeimɨkɨ”. Peru 'arikeke yɨkɨtiyutihɨaweka kaneyani. 30Hikɨ wapaapa yuniwe xeime hetsɨa pɨtata nuaka yaxeikɨa katinitahɨawe. Mɨkɨ mɨpaɨ katinita'eiya: “'Au, nepaapa”, peru pɨkahetɨa. 31Merikɨte, ¿kemɨ'ane mɨkɨ yapɨtikatɨa paapaya kemɨtinakekai?»

Mɨkɨ mɨpaɨ mekatenitahɨawe:

—Matɨari mutanɨ'arie.

Ketsutsi mɨpaɨ katiniwarutahɨawe:

—Yurikɨ mɨpaɨ nepɨxerahɨawe, mɨkɨ kuwiyexinu hetsiemieme tewawamete meta 'ukari tuminikɨ memɨyuwitɨnɨa meri mepeutahaxɨani Kakaɨyari mɨra'aitatsie keyuri xeme. 32Karikɨ Wani xehetsɨa kaninuani huye xexeitsitɨanike, mɨtixetaxatɨanikɨ kemɨtiheitserie yaxemɨtekahunikɨ, xeme yuri xepɨkate'uta'eri hetsiena, peru mɨkɨ tewawamete meta 'ukari tuminikɨ memɨyuwitɨnɨa yuri mekateniuta'erieni hetsiena. Meta mɨkɨ xewaruxeiyakatɨtɨ, xemeta xepɨkate'uhayewaxɨ yuri xemɨteta'erienikɨ hetsiena.

Te'ɨwiyamete 'axamemɨte'u'iyarikai

(Mat 21:33-46 – Mar 12:1-12, Ruk 20:9-19)

33»Xeimeta 'ɨxatsi xekeneu'eni 'inɨarikɨ mɨtikuxata: Merikɨtsɨ xewitɨ kiekame kaxie haraweriyari kaniutawewieni. Kanikurarutɨiya, kaxie pɨname kaniwati'inieni, tuxiyu kaniutawewieni ti'ɨwiyame hetsiemieme.

Hikɨ te'ɨwiyamete waruhɨritɨaka wakwetatɨatɨ, 'ateewa kaneyani. 34Kepauka tukari maye'a matikwakwaxetsie, yuhetsɨa miemete te'uximayatamete kaniwarenɨ'ani te'ɨwiyamete wahetsɨa memenutɨnikɨ 'ikwaxi kutsiyari hetsiemieme kepaɨmetɨ mɨtinakekai. 35Te'ɨwiyamete matsi mekaniwarutiwiya mɨkɨ te'uximayatamete, xeime mekaneutiwaxɨani, xeimeta mete'umi, meta xeime meteheutituaxixɨa. 36'Arike tawarita hipame kaniwareyenɨ'ani te'uximayatamete, yumɨireme matsi, mɨkɨta yaxeikɨa mepɨwaruyuri.

37»'Imatɨrieka, kaniwarenɨ'airieni yuniwe, mɨpaɨ 'utaitɨ: “Neniwe hɨrixɨa mekanetimakakuni”. 38Peru, kepauka te'ɨwiyamete nu'aya memuxei, mɨpaɨ mekateniuxata: “'Ikɨ hetsie 'arike katininakimɨkɨ kutsiyari tipiinieya. Hikɨmɨ tepimieni, tahetsie temɨtehɨnikɨ tita hetsiena mɨtinakekekai”. 39Hikɨ mekaniwiya, haraweri warie mekaneikahɨani meta mekanimieni.

40»Merikɨte, kepauka munuani haraweri kutsiyari, ¿kewayurieni mɨkɨ te'ɨwiyamete?»

41Mɨpaɨ mekatenitahɨawe:

—Mɨkɨ 'axamemɨte'u'iyari kaniwakwimɨkɨ kawanenimayatɨ, meta hipame pɨta kaniwahɨritɨamɨkɨ te'ɨwiyamete, 'ikwaxiyari kutsiyari memɨyetuirieni kepauka tukarieya maye'ani.

42Hikɨ Ketsutsi mɨpaɨ katiniwarutahɨawe:

—¿Xekate'ekaterɨwawawe 'utɨarika xapayaritsie:

»“Mɨkɨ teté memitixani'eri kii wewiwamete

mɨkɨ teté 'itsikina mieme kanayani,

Ti'aitame mɨya katiniuyurieni,

meta kanimariweni ketemɨte'ixeiya”?

43»'Ayumieme mɨpaɨ nepɨtixekɨhɨawe, xeme xepɨnawaiyarieni Kakaɨyari kemɨti'aita, hikɨ hipatɨ pɨta teɨteri mekaniyetuiriyariekuni 'ikwaxi memɨtixuawitɨani hetsiena mieme. 44Xɨka xewitɨ 'iya tetetsie 'ukaweni pɨtanexɨani, xɨka mɨkɨ teté xeime hetsie 'ukaweni, kwauni xeikɨa pɨtanexɨani».

45Hikɨ mawari wewiwamete tewa'aitɨwamete meta paritseutsixi me'i'enieka 'ɨxatsieya, mɨpaɨ mekatenetimani mɨwaxatakaikɨ mɨkɨ. 46Hikɨ mekatenikuwautɨwekaitɨni kememɨte'iwiyakɨ, peru 'atsimepɨkate'uyuri mewamakatɨ teɨteri, mɨkɨ mɨpaɨ memɨteku'eriwakaikɨ kename Kakaɨyari niukameya hɨkɨtɨkai Ketsutsi.

Currently Selected:

Mateu 21: hch

Highlight

Compare

Copy