Wani 4
4
Ketsutsi meta 'ukaratsi tsamariyatanaka
1Merikɨtsɨ Ti'aitame katiniutamarieni paritseutsixi memu'enanakɨ kename Ketsutsi yumɨireme teyɨ'ɨkitɨwamete warayeitɨwakai meta wa'ɨyanekai, Wani yakɨ meyɨpaɨmeme xeikɨa wa'ɨyanekaku. 2(Ketsutsi yɨkɨmana pɨkawaruka'ɨyakai, teyɨ'ɨkitɨwametemama pɨta mepɨwaruka'ɨyakai). 3Mɨpaɨ tiumarieka Kureya kanayeyani, hutarieka Karereya kaninuani.
4Kaneuyewekaitɨni Tsamariya kwieyaritsie meutayunekɨ. 5Hikɨ kiekaritsie kaninuani Tsamariya kwieyaritsie Tsikari mɨtiuyetewatsie, mana kanehurakaitɨni kwie Kakuwu yuniwe Kutse mɨyetuiritsie. 6Putsu Kakuwu mɨwati'inixɨ mana kanitinierekaitɨni. Merikɨtsɨ Ketsutsi 'uxetɨ yeiyakɨ mana kanayerɨni putsu 'aurie tuka. Tuka 'ayeiximekaku. 7-8Teyɨ'ɨkitɨwametemama kiekari hixɨapa mekane'uwakaitɨni 'ikwai meheunanaiyuka.
Merikɨtsɨ 'ukaratsi mana kaninuani Tsamariya kiekame kuhanɨnetɨ, hikɨ Ketsutsi mɨpaɨ katinitahɨawe:
—'Etsiwa keneneuharitɨa.
9Huriyutsixi tsamariyatari wahamatɨa 'aixɨa memɨkateyuxeiyakaikɨ. 'Ayumieme 'ukaratsi tsamariyatanaka mɨpaɨ katinitahɨawe:
—¿Kehepaɨtɨtɨri 'ekɨ pehuriyutɨtɨ, neta 'ukaratsi nemɨtsamariyatanaka, haa pepɨnetsiwawirie?
10Hikɨ Ketsutsi mɨpaɨ katinita'eiya:
—Xɨka pe'imatenike tita Kakaɨyari mɨtiyumikwa, meta xɨka pe'imaikake kepaikɨ haa mɨmetsiwawirie, 'ekɨtsɨ pɨta pepɨnetsitawawirienikeyu, nepɨmatsiharitɨanikeyu haa muhanetsie mieme.
11'Ukaratsi mɨpaɨ katinitahɨawe:
—Neuxei, hanɨweme pepɨkahexeiya, putsu 'apeukatewa, ¿hakewa pepeixeiya mɨkɨ haa tukari mɨtiyupitɨwa? 12Tapaapa Kakuwu kanimariwekaitɨni 'ikɨ putsu mɨtatsi'umi, 'ena kanitiharewekaitɨni mɨkɨ meta niwemama meta tewamama. ¿'Ekɨ matsi kepetimariwe keyuri mɨkɨ?
13Ketsutsi mɨpaɨ katinita'eiya:
—Yunaitɨ 'ikɨ haa memɨtihareni tawarita mepeuharikuni, 14peru kemɨ'ane manuhareni ne ne'iharitɨayu tawariri hatsuaku pɨkaheuharimɨkɨni, matsi mɨkɨ haa nemiharitɨani, mɨkɨ haixa kanayeimɨkɨ hetsiena 'atineikatɨ tukari mɨkaxɨwe 'ipitɨatɨ.
15'Ukaratsi mɨpaɨ katinitahɨawe:
—Ti'aitame, mɨkɨ haa keneneuharitɨa tawari nemɨkaheuharimɨkɨnikɨ, 'uwa paitɨ nemɨkahanɨnenikɨ.
16Ketsutsi mɨpaɨ katinitahɨawe:
—Merikɨte, 'akɨna kene'inimie, 'ena xekenakɨni.
17'Ukaratsi mɨpaɨ katinita'eiya:
—Nepɨkarekakɨna.
Ketsutsi mɨpaɨ katinitahɨawe:
—Herite, 'aixɨa pekanaineni nepɨkarekakɨna pemaine. 18Yu'auxɨwime pepɨwarexeiyakai 'akɨnama. Mɨkɨ meta, hikɨ pemeixeiya, mɨkɨ pɨka'akɨna. 'Ayumieme yurikɨ peputaine.
19'Ukaratsi mɨpaɨ katinitahɨawe:
—Ti'aitame, nekamenetimaniri 'ekɨ Kakaɨyari niukameya pekanihɨkɨtɨni. 20Tame tatutsima 'ikɨ yemuritsie mekaniyutinenewiwakaitɨni. Peru xeme huriyutsixi xekaniutiyuaneni kename heuyewetse Kerutsareme temuyutinenewiwanikɨ.
21Ketsutsi mɨpaɨ katinita'eiya:
—Neuxei 'ukaratsi, yuri kenetine'eririeka, tukari kanaye'amɨkɨ kepaukari nenewieri xemɨka'ipitɨaka yu'ukiyari 'ikɨ yemuritsie meta Kerutsareme. 22Xeme nenewieri xepipitɨa kemɨ'ane xemɨkamate. Tame pɨta nenewieri tekanipitɨaka kemɨ'ane temɨmate, wikweitsitɨarika mayeneikakɨ huriyutsixi tahetsie. 23Matsi tukari kanaye'amɨkɨ, hikɨ kanaye'aniri, kepauka mɨkɨ yurikɨ memɨyutinenewiwa nenewieri memipitɨani yu'ukiyari yu'iyarikɨ yuri me'utiyuatɨ. Mɨkɨ meta, ne'ukiyari mɨya me'aneneme kaniwakuwauneni nenewieri memipitɨanikɨ. 24Kakaɨyari kani'iyaritɨni, kaneuyeweka mɨkɨ nenewieri memipitɨa yu'iyarikɨ memipitɨanikɨ yuri me'utiyuatɨ.
25'Ukaratsi mɨpaɨ katinitahɨawe:
—Ne nekatinimaika kename 'uhamie Metsiyaxi, Kɨritsitu mɨtitewa. Kepauka mɨkɨ munuani, naime katatinitahekɨatɨamɨkɨ.
26Ketsutsi mɨpaɨ katinita'eiya:
—Netsɨ nekanihɨkɨtɨni 'ahamatɨa nemɨtikuxata.
27Hikɨ teyɨ'ɨkitɨwamete mekaniu'axɨani, mekaniuhɨxiyani 'ukaratsi hamatɨa mɨtikuxatakaikɨ. Nixewitɨ mɨpaɨ pɨkatitahɨawixɨ: «¿Ketitakɨ petiku'iwawiya?» yatɨni «¿Ketitakɨ petikuxata hamatɨana?»
28Hikɨ 'ukaratsi yuye'ɨ 'uku'eirieka kiekaritsie kaneyani, teɨteri mɨpaɨ katiniwaretahɨawe:
29—Xekenakɨni xekenexeiyayu tewi mɨneretahekɨatɨa naime kenemɨtiuyuri. ¿Katikɨritsitu 'ikɨ?
30Teɨteri kiekaritsie mekanayekɨne, hepana mekanahukaitɨni. 31Merikɨtsɨ mexi 'ame'ahukai, teyɨ'ɨkitɨwamete mekanita'inieni mɨpaɨ me'utiyuatɨ:
—Ti'ɨkitame, ketineukwakari.
32Ketsutsi mɨpaɨ katiniwarutahɨawe:
—Ne 'ikwai nekanexeiyani xemɨka'imate xeme.
33'Ayumieme mɨpaɨ mekateniyɨkɨhɨawekaitɨni teyɨ'ɨkitɨwamete: «Xewitɨ kati'atɨiri katiukwairi».
34Ketsutsi mɨpaɨ katiniwarutahɨawe:
—Kenemɨtikamie tita mɨtinake 'iya mɨnetsiheyenɨ'a, 'uximayatsikaya kenemɨtinɨxime, mɨkɨ kanine'ikwaitɨni. 35¿Xeme mɨpaɨ xekate'utiyuane: “Nauka metseri tixɨyu 'itsanaxa kanaye'amɨkɨ”? Kamɨ mɨpaɨ nepɨtixekɨhɨawe: Xekeneutanierixɨa, waxa xekeneuxeiya. Kaniwawakiniri xemɨka'itsanakɨ. 36Hikɨ 'itsaname katini'iwaneniri, kanikuxeɨrieni tita mɨtiutixuawerixɨ, tukari mɨkaxɨwe memexeiyanikɨ, 'etsame 'itsaname hamatɨa yaxeikɨa memɨyutemamawiekakɨ. 37'Ikɨ hepaɨtsita niuki yuri paine: “Xewitɨ kani'etsametɨni, xewitɨta ti'itsaname”. 38Ne nepɨxeheutanɨ'axɨa xemɨka'itsanakɨ xemɨkateha'uximayakaitsie. Hipatɨ mekateni'uximayakaitɨni. Wa'uximayatsika xehetsie katiniunake.
39Merikɨtsɨ yumɨiretɨ mana kiekatari Tsamariyatari yuri mekateniuta'erieni hetsiena 'ukaratsi tiutahekɨataku yuniukikɨ mɨpaɨ 'utaitɨ: «Naime kenemɨtiuyuri kanetiniutahekɨatɨani». 40'Ayumieme Tsamariyatari hetsɨana me'u'axɨaka mekanita'inieni wahetsɨa muyuhayewakɨ. Mana huta tukari kaniyuhayewa. 41Hipatɨta yumɨiretɨ yuri mekateniuta'erieni niukieyakɨ.
42Mɨpaɨ 'ukaratsi mekateniutahɨawe:
—Hikɨrixɨa 'aniukikɨ xeikɨa yuri tepɨkate'erie, tameri tekani'enieni, tekatenimaika 'ikɨ yurikɨ kwiepa memɨtama wawikweitsitɨwame mɨhɨkɨkɨ.
Ketsutsi kemɨrenayehɨa ti'aitame parewiwameya nu'aya
43Merikɨtsɨ huta tukari 'anukayaku mana kaniyeyani, Karereya kaninuani. 44(Ketsutsi yɨkɨmana katiniutahekɨata kename nixewitɨ Kakaɨyari niukameya yukwiepa 'aixɨa katixeiyarie). 45Peru kepauka Karereya munua Karereyatari mekanitanaki'erieni naime mete'uxeiyaka kemɨreyurienekai Kerutsareme 'ixɨararipa. Mɨkɨta memeku'ixɨarakaikɨ.
46Merikɨtsɨ hutarieka Kanahatsie kaninuani Karereya kwieyaritsie haa kaxie winuyari mayeitɨatsie. Xewitɨ kwiepa ti'aitame mɨparewiwameyatɨkai mana kaniuyeikakaitɨni, nu'aya katinekuyekaitɨni Kaperunaumetsie. 47Tiutamarieka kename Ketsutsi Kureya heyeyaka Karereya nuakai, hetsɨana kaneyani, kanitawawirieni meukayanikɨ nu'aya 'aixɨa reu'eriekame mayeitɨanikɨ. Mɨkɨ kanemɨximekaitɨni. 48Ketsutsi 'ayumieme mɨpaɨ katinitahɨawe:
—Xɨka 'inɨarite xeka'uxeiya, mamariwaweme, yuri xepɨkateta'erieni.
49Mɨkɨ ti'aitame parewiwameya mɨpaɨ katinitahɨawe:
—Ti'aitame, mana keneukayuni neniwe mexi 'akuxi kahemɨwe.
50Ketsutsi mɨpaɨ katinitahɨawe:
—Kenemie, 'aniwe kanayeniereniri.
Hikɨ mɨkɨ tewi yuri katiniuta'erieni niukieyatsie Ketsutsi kemɨtitahɨawixɨ. Kaneyani. 51Mana heukamiekaku te'uximayatametemama mekanenukunake mɨpaɨ mekatenitahɨawe kename nu'aya 'ayenierekairi. 52Mɨkɨ kaniuta'iwauni ya'utaitɨ ke'upaukakaku 'aixɨa reu'erietɨ matɨa. Mɨkɨ mɨpaɨ mekatenitahɨawe:
—Takai tau 'etsiwa kɨa heuwiekaku kahɨiyatɨ kanayani.
53Hikɨ paapaya katinetimani 'ana mɨya'upaukakaku Ketsutsi mɨpaɨ mɨreitahɨawixɨ: «'Aniwe kanayeniereniri». Hikɨ mɨkɨ yuri katiniuta'erieni, meta yunaitɨ kiena kiekatari.
54'Ipaɨ hutarieka 'inɨari katiniuwewieni Ketsutsi Kureya heyeyaka Karereya nuaka.
Currently Selected:
Wani 4: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.