Keremiyaxi 23
23
Ti'aitame 'aixɨa mɨtiuka'iyari
1«Xɨa'ui muxatsi wahɨwemete memɨteyuka'una meta nemuxatsi memɨtehatikwa'atsie yeuta pɨta memuwatanɨ'awa», Yawé mɨpaɨ kanaineni. 2'Ayumieme Yawé mɨpaɨ kanaineni, 'Ixaheri Kakaɨyarieya, teɨteri memɨhɨritɨarie wahetsiemieme: «Xeme neteɨterima xepɨwareutaxɨriexɨa, xepɨwareutaweiyaxɨa yemekɨ xepɨkawa'ɨwiya. 'Ayumieme, ne nekatinixekwinitɨamɨkɨ 'axakexemɨte'uyurikɨ —mɨpaɨ kanaineni Yawé—. 3Keyupaɨmetɨ memuyuhayewatɨwe neteɨterima nekaniwakuxeɨrimɨkɨ kemɨ'ane kwieyaritsie nemɨwareutanɨ'axɨa nekaniwarakunuitɨamɨkɨ wakwietsie, mematiwaweretsie memayutimɨiriyatsie. 4Muxatsi wahɨwemete wahetsiemieme nekaniwaranuka'uitɨamɨkɨ memɨwa'ɨwiyanikɨ, mekamamatɨ mekanakɨnikuni meka'utimariutsiwatɨ, nixewitɨ tɨma heuyewetɨ pɨkahayani —Yawé mɨpaɨ kanaineni—.
5Yawé mɨpaɨ kanaineni:
«Tukari kanamieni,
kepauka Rawiri nuiwarieyatsie
xeime 'aixɨa tiuka'iyarime nemanukuketɨanikɨ,
mɨkɨ katinita'aitamɨkɨ timaiwetɨ 'ikɨ kwieyaritsie,
yakatiniyurienemɨkɨ tita mɨtiheitserie meta 'aixɨa mɨti'ane.
6Mɨkɨ tukaritsie Kura kwieyari kanitawikweitsitɨariemɨkɨ,
'ixaheritsixi yu'iyarikɨ mekaniu'uwakuni.
'Ipaɨ pɨtitaterɨwarieni:
“Yawé tatsiwikweitsitɨwame pɨhɨkɨ”».
7Yawé mɨpaɨ kanaineni: «'Ayumieme, tukari paye'ani kepaukari mɨpaɨ memɨka'utiyuaneni: “Yawé ke'ayeyurini, 'ixaheritsixi muwarayewitɨ 'Ekipitu kwieyaritsie”, 8matsi pɨta: “Yawé ke'ayeyurini, 'ixaheritsixi mɨwarayewitɨ kiekari tayeta mukumatsie meta naitsarie kwieyaritsie kemɨtiwareutanɨ'axɨakai”. Hikɨ yukwieyaritsie metitetɨ mekanakɨnikuni».
Kakaɨyari niukametemama memɨte'itawa
9Kakaɨyari niukametemama wahetsiemieme:
Ne'iyari pɨnetsi'ukukuine
meta ne'umeyari pɨnetsitikukuine.
Yawé hetsiemiemekɨ
meta niukieya mɨpatsiekɨ,
tawekame hepaɨ nepɨtinexexeiya,
winu mitawaitɨa hepaɨ.
10'Axamemɨ'itɨariekɨ,
kayu'ɨitama wahamatɨa memɨhitɨwe mepɨhɨne 'ikɨ kwieyaritsie,
'ikɨ kwieyari puyuhiwerie
meta makumawetsie 'ɨxa putiwa.
Kakaɨyari niukametemama 'axamepɨteyurie,
yutɨrɨkariyakɨ tita mɨkatiheitseriekɨ mepɨteyurie.
11«Memɨka'itiyatɨka mepɨhɨkɨ Kakaɨyari niukametemama meta mawari wewiwamete:
netukita 'urawa 'axakememɨte'uyuri nepɨtiukaxei
—Yawé mɨpaɨ kanaineni—.
12»'Ayumieme wahuye haruanitɨ kanayeimɨkɨ,
yɨwita meneukataimariekuni,
mɨkɨtsie mekaneuyunixɨakuni».
Yawé mɨpaɨ kanaineni:
«Ne wahetsie 'uximatɨarika nekanikawiwimɨkɨ kepauka nemɨtiwaka'enitsitɨiya wiyari maye'anitsie.
13»Kwinimieme 'axati'aneme nepɨtixeiya
Kakaɨyari niukametemama Tsamariyatari wahetsie:
mekatenihekɨatani Wahari hetsiemieme,
mɨpaɨ neteɨterima 'ixaheritsixi mekateniwareuyexɨrieni.
14Meta Kakaɨyari niukametemama Kerutsareme kiekatari
'axamɨti'ane wahetsie nepɨtixeiya:
kayɨ'ɨitama wahamatɨa mepɨhitɨwe, mete'itawatɨ mepu'uwa,
'axateyuruwamete waheima mepunua,
nixewitɨ pɨkatihayewawe 'axatiyurienetɨ.
Mɨkɨ yunaitɨ Tsuruma hepaɨ mekani'aneni nehepaɨtsita,
meta Kerutsaremetari Kumuxa hepaɨ mekani'aneni».
15'Ayumieme mɨpaɨ kanaineni Yawé Naimekɨmɨtɨrɨkaɨye Kakaɨyari niukametemama wahetsiemieme:
«Ratsitsiwime memɨtetikwanikɨ yanekatiniyurimɨkɨ
meta haa memanuharenikɨ 'uayemakame,
Kakaɨyari niukametemama Kerutsareme kiekatari
memɨte'utahɨniyaxɨkɨ 'axamɨti'ane 'ikɨ kwieyaritsie».
16Yawé mɨpaɨ kanaineni Naimekɨmɨtɨrɨkaɨye:
«Kakaɨyari niukametemama kememutiyuane xepɨkawa'enieka,
yakɨ xemɨtetakwewiekaku mepɨtexekuxaxatɨwa,
kememɨte'unenierixɨ yakɨ mepɨtekuxata mɨpaɨ xeikɨa meteku'eriwatɨ,
Yawé teta kahayeneku.
17Kemɨ'ane memɨnetsixani'erie mɨpaɨ mepɨtewakuxaxatɨwa
kename 'aixɨa 'iyari me'u'uwani kename ne nehaine,
kemɨ'ane yu'iyari mɨkaheu'ena memeu'enie
mɨpaɨ mepɨtewakuxaxatɨwa kename 'axamɨti'ane wahetsie katinuani.
18Nixewitɨ mɨkɨ Yawé 'ɨxatsieya pɨka'eniwe.
Nixewitɨ mɨkɨ niuki pɨkataxatɨariewe meta pɨkatahekɨatsitɨiyariewe.
Nixewitɨ mɨkɨ yapɨkatikayeiwe meta niukieya pɨka'anu'eniwe.
19Yawé 'ekaya kanayeyani waɨkawa ha'atɨ,
haikɨri tiyumemiwatɨ kanayeyani
'axamemɨte'u'iyari wahetsie mɨye'anikɨ.
20Yawé haxɨaya pɨkaheunuani
kepaukake 'aixɨa mɨtiyurieni naime
'iyarieya kemɨtiku'eriwa.
'Imatɨrieka tukaritsieke
xekaneitimaitɨkɨnikuni hekɨakamekɨ.
21Ne mɨkɨ Kakaɨyari niukametemama nepɨkawarenɨ'a,
peru mɨkɨ xeiya mekanenautsatɨkɨne,
ne nepɨkawarutahɨawixɨ,
peru mɨkɨ mekatenihekɨatani.
22Xɨka ne newaruta'uxatsitɨanike,
neniuki mekanitaxatakekaitɨni neteɨterima wahetsɨa,
huye 'aixɨa mɨ'anetsie mekaniwara'uitɨanikekaitɨni
meta 'aixɨa meteyuriekame mekaniwarayeitɨanikekaitɨni.
23»¿Kamɨtsɨ hurawa Kakaɨyari xeikɨa netihɨkɨ?
¿'Ateewata Kakaɨyari nekatihɨkɨ?
—Yawé mɨpaɨ kanaineni—.
24¿Kamɨtsɨ tewi tiyɨwe muyuti'awietakɨ hakewa
nemɨkaheitaxeiyanikɨ?
—Yawé mɨpaɨ kanaineni—.
¿Ne nekatihɨkɨ naitsarie muyuawi meta kwie nemɨhɨniya?
—Yawé mɨpaɨ kanaineni—.
25»Kakaɨyari niukametemama nepuwa'enie kememutiyuane 'itarika mepɨnaki'erie yakɨ metexatakutɨ nehetsiemieme, mɨpaɨ mekaniutiyuaneni: “Nepɨtiuheinɨ, nepɨtiuheinɨ”. 26¿Kepaukake mepɨtehayewa 'itarika kwinie yuri mete'eririetɨ meta kwamanarikakɨ meteku'eriwatɨ? 27Yuheinɨtsika mekuxatatɨ neteɨterima memɨnetsihatɨmaiyakɨ mekaniutiyuaneni, watutsima kememɨnetehatɨmai Wahari mehayexeiyatɨ mehakɨneka. 28Kemɨ'ane Kakaɨyari niukameya mɨtiuheinɨ ke'itaxata, peru kemɨ'ane neniuki mɨ'enieni, ke'itaxata 'aixɨa 'anemekɨ. ¿Kerayexeiya kuxari 'ikú hamatɨa? —mɨpaɨ kanaineni Yawé—. 29Neniuki tai hepaɨ kani'aneni, meta titsuname hepaɨ tetexi mɨti'una —Yawé mɨpaɨ kanaineni—.
30»'Ayumieme ne Kakaɨyari niukamememama nepuwaraye'unie neniuki memɨnawatɨwekɨ yuxexuitɨ —Yawé mɨpaɨ kanaineni—. 31Ne Kakaɨyari niukametemama nepuwaraye'unie yuneni memɨtatua memeuniukɨkɨ xeikɨa memutiniuka —Yawé mɨpaɨ kanaineni—. 32Ne Kakaɨyari niukametemama nepɨwaraye'unie 'itarika heinɨtsiyarikɨ memɨtekuxata, meta kepauka memutekuxatatsie neteɨterima memeuyexɨrienikɨ xeikɨa memɨteyurie wa'itarikakɨ wa'ɨrikakɨ —Yawé mɨpaɨ kanaineni—. Ne nepɨkawarenɨ'awe meta tixaɨtɨ nepɨkatiwata'aitɨawe. Tixaɨtɨkɨ mepɨkateyunaki'erie 'ikɨ teɨteri wahetsiemieme —Yawé mɨpaɨ kanaineni—.
'Itarika xatsikayari
33»Xɨka 'ikɨ teɨteri, ya xewitɨ Kakaɨyari niukameya, yatɨni mawari wewiwame, xɨka mɨpaɨ mera'iwawiyani: “¿Ke'aneme Yawé niukieya pepɨtatsitaxatɨani?”, 'ekɨ mɨpaɨ pepɨtiwata'eiya: “¿Ke'aneme niuki xepɨxata?” Ne nepɨxeku'eirieni —Yawé kanaineni—. 34Xɨka xewitɨ Kakaɨyari niukameya, yatɨni xewitɨ mawari wewiwame, yatɨni xewitɨ tewi, mɨpaɨ haineni: “'Ikɨ Yawé niukieya kanihɨkɨtɨni”, ne mɨkɨ tewi nekatinika'enitsitɨamɨkɨ meta yunaime kiena kiekatari. 35Peuyewetse mɨpaɨ memɨteyɨkɨhɨawenikɨ yuhamikumatɨ meta yu'iwamatɨ: “¿Yawé ke'utayɨ?”, yatɨni “¿Yawé kehaine?” 36Peru tawari mɨpaɨ mepɨka'utiyuaneni: “Yawé niukieya”, karikɨ mɨkɨ xexuimekɨ niuki kemɨtikuxata yuniuki kaniyurienemɨkɨ, xeme xekanititunaxɨani Kakaɨyari mayeyuri niukieya, Yawé Naimekɨmɨtɨrɨkaɨye takakaɨyari. 37Mɨpaɨ petiniwakɨhɨawemɨkɨ Kakaɨyari niukametemama: “¿Yawé kexetiku'eiya? ¿Ketixehahɨawe?” 38Peru xeme xɨka mɨpaɨ xe'utiyuani: “Yawé niukieya”, 'ayumieme Yawé mɨpaɨ kanaineni: “Xeme mɨpaɨ xemutiyuakɨ: ‘Yawé niukieya’, mɨpaɨ xemɨka'utiyuanenikɨ nexeha'imaiyakakutɨtɨ. 39'Ayumieme hikɨ nekanixehatɨmaiyamɨkɨ nekanixetaxɨriexɨamɨkɨ nehɨxie xemɨka'u'uwanikɨ, 'ikɨ kiekari nemɨxeyetuiri meta xetutsima mame. 40Meta nekanixe'uximatɨamɨkɨ yuheyemekɨ xemuyuriyariekakɨ, meta xepuyutewiwiyani mɨkɨ hatsuaku pɨkahatɨmaiyarieni”».
Currently Selected:
Keremiyaxi 23: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
