Keremiyaxi 13
13
Rinu hɨiyameyari
1Yawé mɨpaɨ kanetiniutahɨawe: «Rinu hɨiyameyari keneu'ananairi kena'ahɨa kɨmana, peru pepɨka'itahawiyani».
2Yawé kemɨnetiuta'aitɨakai, hɨiyame nekaniunaneni kɨmana nekanayɨhɨani. 3Hikɨ Yawé hutarieka mɨpaɨ kanetiniutahɨawe: 4«Hɨiyame pemunanai pemenakuteka kenahurietɨ, Perati paitɨ kenemie, mana keneti'awieta 'aita mukataritɨkata». 5Hikɨ nekaneyani Perati paitɨ nekaneiti'awieta, Yawé kemɨnerahɨawekai.
6Mɨixa tukari 'anukayaku, Yawé mɨpaɨ kanetiniutahɨawe: «Perati kenemie hɨiyame kenewaumie nemetsi'uta'aitɨa pemeiti'awietakɨ muwa». 7Perati nekaneyani, hakewa hɨiyame nemeti'awietakai nekanewatihurieni, peru 'axani'anekaitɨniri kanipɨnikaitɨni tixaɨtɨkɨ pɨkatiyunaki'eriekairi.
8Hikɨ Yawé mɨpaɨ tawari kanetiniutahɨawe: 9«Mɨpaɨ kanaineni Yawé: “Mɨkɨ kemɨ'ane mɨpaɨ nekatiniwaka'uniriemɨkɨ Kura xiɨyarimama kememɨteyuti'ɨre metatsiere Kerutsareme kiekatari. 10'Ikɨ teɨteri 'axamemɨte'u'iyari, memɨkayuwaɨriya yamemɨtekakɨnekɨ kenemɨti'aita, yu'iyari mukaheu'ena memuweiya meta hipame kakaɨyarixi memɨwarayexeiya, 'ikɨ hɨiyame tixaɨtɨ mɨkatiyunaki'erie hepaɨ mepɨyɨni. 11Tewi hɨiyame kemɨranakuteika, mɨpaɨ nepɨtiwareuyehɨakai hurawa 'Ixaheri teɨteriyari meta Kura nuiwarimama —Yawé mɨpaɨ kanaineni— neteɨterima memɨhɨkɨtɨnikɨ meta memɨnetsihekɨatanikɨ, nemariweme meta witsine'anemekɨ nemɨxeiyariekakɨ. Perutsɨ yamepɨkatekakɨ”.
Xarite mɨtatari
12»Mɨpaɨtatsiere ketiniwarutahɨawi: “Yawé mɨpaɨ kanaineni, 'Ixaheri Kakaɨyarieya: ‘Naitɨ xarite winukɨ kanitihɨniyariemɨkɨ’. Xɨka mɨkɨ mɨpaɨ memete'utahɨawe: ‘¿Tekate'akumatekuta panatsi naitɨ xarite winukɨ ka'utihɨniyarɨwa?’, 13hikɨ 'ana mɨpaɨ pekatiniwata'eiyamɨkɨ, Yawé mɨpaɨ kanaineni: ‘Winukɨ nekaniwatihɨniyamɨkɨ memɨtitarɨwenikɨ yunaime teɨteri 'ena kiekatari: ti'aitame Rawiri 'uwenieyatsie memayaxike, mawari wewiwamete meta yunaime Kerutsaremetari. 14Yanekatiniwapitɨamɨkɨ memuyutikwinikɨ yunaitɨ, wapaapama meta waniwema 'ukitsi yaxeikɨa. Ne nepɨkawatinenimayata matsi nepɨxeka'una nekaxeheunenimayatɨ’. Yawé mɨpaɨ kanaineni”».
Mari'itɨarika
15Xekeneneu'eni, yemekɨ xekeneu'enana.
Mariweme xepɨkahayuyeitɨwani, Yawé mɨpaɨ kanaineni.
16Yawé yukakaɨyari 'aixɨa xeketenahɨaweni,
mexi'akɨxi yɨriya kaheyenɨ'awe
meta 'akuxi xeme hɨri mɨ'e'etɨtsie xekahekaxɨriwawe.
Xeme hekɨariya xepɨtakwewie,
peru mɨkɨ kanipatamɨkɨ yɨriya 'amayetsuyekɨ,
'ɨyuwime kanayeitɨamɨkɨ.
17Peru xɨka xeme xekahanu'enanani,
'awie nekanitatsuamɨkɨ
xeme xemuyuti'ɨrekɨ,
nehɨxita 'ukai
panexɨani hatsiwimekɨ,
Yawé muxatsimama
'ateewa memanuhapanienikɨ kayukwieyaritsie.
18Mɨpaɨ ketineutahɨawi ti'aitame meta ti'aitame maamaya:
«Tixaɨtɨ xekatehɨkɨtɨme xekenayuyeitɨa, kwiepa xekenetiyaxi,
yumu'utsieri kuruna xepɨkahana'uitɨaka,
kuruna witsimɨtixawawatɨ».
19Nekexi kiekariyaritsie pɨreuname,
xewitɨ pumawe mɨreuyepieni.
Yunaitɨ Kura xiɨyarimama mekanehapanieni,
yunaitɨ mekananutaxɨriyani yemekɨ.
20Xekeneutanenieri xekeniwaruxeiya
tayeta memayehu.
¿Hakewari muxatsi pemɨhɨritɨarie,
muxatsi wahetsiemieme pemuyuta'ɨrekai?
21¿Kepetayɨni xɨka Yawé mɨkɨ memanuyetenikɨ waru'uitɨani
'iya kemɨ'ane 'ekɨ pemɨtiwaruti'ɨkitɨa
'iya 'aixɨa pemɨtiwamaikai?
¿Yemekɨ kamerekwine 'ukaratsi mɨniwene
kukuiniyaya hepaɨ?
22Xɨkata pe'ata'iwawiya:
«¿Titayari mɨya neranuyemie?»,
waɨkawa 'axapepɨtiuyuri
'a'iwi pekaniutatsaniyarieni
meta pekaniukumayɨiyani penanaimarietɨ.
23¿Kamɨtsɨ 'etiupe tewiyari yunawiyari mupata tiyɨwe,
yatɨni tiyɨwe tɨwe meupitu muyutayeitɨani?
Yaxeikɨata xeme 'aixɨa xemɨte'uyurieni xepɨkayɨwawe,
xepɨ'iyamate 'axaxemɨteyuriekakɨ xeikɨa.
24«'Ɨxa hepaɨ nepɨxetawiwiexɨani
'eka kemɨrei'enitsitɨwa makumawetsie.
25'Ikɨ mɨyati'anetɨ 'ahetsie katiniunake,
'ahetsiemieme nemi'inɨatakai
—Yawé mɨpaɨ kanaineni—.
Metsɨri pekanenatɨmaiya,
'itarikatsie pɨta pekatiniuwiya,
26neta 'a'iwi teikɨ nekanitihanimɨkɨ
'ahɨxie paitɨ nekamaneukunamɨkɨ
nekatinihekɨatamɨkɨ 'atewiyarika.
27Nepɨniere hipame wahamatɨa kepemɨtihune,
pemutatsuaka yewa hepaɨ,
peka'akatewiyatɨ hipame pewakumaɨwatɨ,
meta kemɨtixani'eriwakɨ yapetiyurienetɨ 'ahetsie,
yeuta paitɨ meta hɨritetsie.
Xɨa'ui 'ahetsie, Kerutsareme.
¿Kepaukake tamɨ pepɨtihayewa peka'itiyatɨ pehɨkɨtɨtɨ?»
Currently Selected:
Keremiyaxi 13: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
