Keremiyaxi 1
1
1'Ikɨ Keremiyaxi niukieya kanihɨkɨtɨni Kirikiyaxi nu'aya. Keremiyaxi 'Anatuti kiekatari mawari wewiwamete wanuiwaritsie pumiemetɨkai, kiekari Wenikamini kwieyaritsie mukumakai. 2Yawé niukieya Keremiyaxi hetsɨa kaninuani, tamamata heimana haika wiyari Kutsiyaxi 'Amuni nu'aya ti'aitakaku Kura kwieyaritsie. 3Metatsiere hetsɨana kaninuani Kuhatsimi Kutsiyaxi nu'aya ti'aitakaku Kura kwieyaritsie, meta 'imatɨrieka wiyaritsie Tserekiyaxi Kutsiyaxi nu'aya ti'aitakaku Kura kwieyaritsie, tatsɨari tamamata heimana xeiwiyari heimana 'auxɨwime metseriyaritsie, kepauka Kerutsaremetari memehapanietsie.
Keremiyaxi kemɨranayexeiyarie
4Merikɨtsɨ Yawé mɨpaɨ kanetiniutahɨawe:
5«Meripaitɨ 'amaamatsie 'akuxi nekamatsikayewetɨ nepumatsimatekai,
nepɨmatsi'anayexeiyakairi,
pekatinuiwawekaku 'akuxi,
nepɨmatsi'anuyewaukairi,
Neniukame nepɨmatsi'ayeitɨakairi nuiwarite wahetsiemieme».
6Ne mɨpaɨ nepɨtita'ei:
«Yawé nekakaɨyari. Xɨa'ui 'akuxi 'aixɨa nepɨkareutaxatawe meta temaikɨ nepɨhɨkɨ yakɨnepɨnemate».
7Peru Yawé mɨpaɨ pɨnetiutahɨawixɨ:
«Mɨpaɨ pepɨkahaineni: “Temaikɨ nepɨhɨkɨ yakɨnepɨnemate”, matsi hikɨ ne hakewa nemɨmatsihetanɨ'ani pekanimieni, kenemɨmatitahɨawe naimekɨ yapekanitayɨmɨkɨ. 8Ne 'ahamatɨa nepuyeikani 'aheima nemɨtanuanikɨ, nixeimetɨma pepɨkahaumakaka». Yawé mɨpaɨ nekanaineni.
9Hikɨ Yawé netenitsie kaneniutamayɨani, mɨpaɨ kanetiniutahɨawe:
«Hikɨ 'atenitsie neniuki nekamaniupitɨani pemeutaniuwenikɨ. 10Neuxei, ne hikɨ heitserie nekamanipitɨaka nuiwarite meta te'aitamete wahetsie,
»pemɨwarahunanikɨ meta pemɨwaka'unanikɨ,
pemɨwareuyehɨpanikɨ meta pemuwaratixɨrɨwanikɨ,
pemɨwaranuku'uitɨwanikɨ meta pemɨtika'iteɨtakɨ».
11Yawé niukieya nehetsɨa kaninuani mɨpaɨ kanetiniutahɨawe:
«Keremiyaxi, ¿ketita petixeiya?»
Mɨpaɨ nekatinita'eiya:
«'Arimenituru 'iteɨriyari xeimamayari nepɨxeiya».
12Yawé mɨpaɨ kaniutayɨni:
«'Aixɨa pepɨtiunierixɨ, neta mɨpaɨ nepɨtita'ɨwiya neniuki maye'atɨarienikɨ».#1:12 'Arimenituru 'iteɨriyari hepɨrayutsixi waniukikɨ nepɨtita'ɨwiya hepaɨ pɨti'eniɨriɨkɨ.
13Hutarieka, Yawé niukieya nehetsɨa kaninuani mɨpaɨ kanetiniutahɨawe:
«¿Tita 'aku petixeiya?»
Mɨpaɨ nekatinita'eiya: «Xari nekanixeiyani 'ukwakeme tayeta hakayeuriweme».
14Hikɨ Yawé mɨpaɨ kanetiniutahɨawe:
«Yunaime 'ikɨ kwieyaritsie memɨtama wahetsie 'uximatɨarika nekananunɨ'amɨkɨ, xeyeta kanakayuamɨkɨ. 15Ne nekaniwata'inimɨkɨ te'aitamete xeyeta miemete —ne Yawé mɨpaɨ nekanaineni—.
»Mekani'axɨakuni, yu'uweni mekani'atɨaxɨakuni
Kerutsareme mɨranutahakitɨretsie mekanikuyaxikuni,
kuraruyari naime mekanika'unakuni,
meta naime Kura kiekariyarite mekaniwatakwikuni.
16Ne neteɨterima wahetsiemieme yanepɨtayɨni nemɨtiwaka'enitsitɨanikɨ,
waɨkawa 'axamemɨte'uyurikɨ,
memɨnetsi'uku'eirikɨ,
hipame kakaɨyarixi pɨta 'ɨkwa memɨwatairietɨwekaikɨ,
meta yumamatekɨ mete'utiwewieka memɨte'ayexeiyakaikɨ.
17»Peru 'ekɨ keneuyukuha'aritɨa. Kenemie yaketiniwaretahɨawi naime ne kenematitahɨawe. Pepɨka'utimamaweni mɨkɨ wahɨxie, xɨka pe'utimani marika wahɨxie matsi nekamanipitɨamɨkɨ. 18Ne hikɨ kiekari yukuraru 'a'atitewame mexeiya hepaɨ nekamatiniupitɨani, tepɨa 'apatɨ 'amuwe hepaɨ meta wurunitse tepɨayari kuraruyari hepaɨ, naime 'ikɨ kwieyaritsie hepaɨtsita, Kura kwieyaritsie te'aitamete wahepaɨtsita, 'itsɨkate meta mawari wewiwamete metatsiere yunaitɨ 'ikɨ kwieyaritsie kiekatari wahepaɨtsita. 19Mepɨmatsitamieni peru mepɨkamatsikemakaxɨani, karikɨ ne 'ahamatɨa nekaniuyeikamɨkɨ nematsixɨnake», Yawé mɨpaɨ nekanaineni.
Currently Selected:
Keremiyaxi 1: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
