'Itsɨkate 15
15
Tsanitsuni kemɨtiuyɨkɨhɨa
1Mɨixa tukari 'anukayaku, tɨriku 'itsanarienekaku, Tsanitsuni tsipu nunutsi 'uwiyaka yu'ɨya hetsɨa kaneyani.
Heta'aka mɨkɨ mɨpaɨ kaniutayɨni:
―Ne'ɨya kiita nepeutɨa.
Peru 'uka paapaya pɨka'ipitɨa meutahanikɨ, 2mɨpaɨ katinitahɨawe:
―Ne mɨpaɨ nepɨtimaikai, kename pe'ixani'eriekai, 'ahamiku nepuwitɨtɨa. ¿Matsi waɨkawa taruya kametinake? Kenanuwitɨki, kurieyatsie mieme.
3Tsanitsuni mɨpaɨ kaniutayɨni:
―Hikɨrixɨa heitserie nepexeiya tsepa piritsiteutsixi kenemɨwaruyuri.
4Hikɨ kaneyani yeuta kaniwaretiwiya haika tsienituyari kauxaitsi, kaniwarakatapiexɨani wakwaxitsie yuhuhutatame, hikɨta 'utsi tatɨkaime kaniwaranawɨtɨiriexɨani, 5hikɨ 'utsi kaniutaiyaxɨani kauxaitsi kaniwarutatuani piritsiteutsixi wa'etsita. Tɨriku naitsarie kanayetaixɨani mukuha'aritsiekairi meta 'akuxi 'amɨti'ukai, naitɨ kaxie meta huriwa.
6Kepauka piritsiteutsixi memuti'iwautɨkɨ: «¿Kemɨ'ane pɨtiuyuri?», mɨkɨ mɨpaɨ mekateniutahɨawarieni: «Tsanitsuni katiniuyurieni, Timinati kiekame munieya, 'ɨyaya minawairikɨ hamikuya pɨta muwitɨtɨakɨ».
'Ayumieme piritsiteutsixi 'ɨyayatɨkai mekaniutataiya meta paapaya. 7Peru Tsanitsuni mɨpaɨ katiniwarutahɨawe: «Mɨya xemɨte'uyurikɨ, nepɨkaka'uxipieni xete'ayukatuayuke». 8Hikɨ kwinimieme tiha'atɨ kaniwarutakwini, yuwaɨkawame kaniwareuyehɨani. Mɨyatiuyurieka kaneyani terɨta 'Etami 'aiyaritsie.
9Piritsiteutsixi mekanekɨne Kura kwieyaritsie mekanitiyaxe, Rehi 'aurie. 10Teɨteri Kura kwieyaritsie kiekatari mɨpaɨ meteniwaruta'iwawiya:
―¿Titayari xetatekwiku tame?
Mɨkɨ mɨpaɨ mekaniutiyuani:
―Tame Tsanitsuni tepukuwautɨwe temenutahɨanikɨ, yaxeikɨa temiyurienikɨ kemɨtatsiheyuri mɨkɨ tame.
11Hikɨ Kura kwieyaritsie kiekatari haika miriyari teɨteri mekanekɨne terɨta 'Etami 'aiyaritsie mɨpaɨ Tsanitsuni mekateniutahɨawe:
―¿Pekatimate piritsiteutsixi memɨtate'aitɨa? ¿Titayari mɨya petiyuriene?
Mɨkɨ mɨpaɨ kaniutayɨni:
―Matsi ne kememɨnetsiheyuri mɨpaɨ xeikɨata ne nepɨwareyuri.
12Mɨkɨta mɨpaɨ mekaniutiyuani:
―Tame tematsihɨanike tepeyekɨ, tematsiyetuanike piritsiteutsixi wahetsɨa.
Tsanitsuni mɨpaɨ kaniutayɨni:
―Yaxekeneutiyuakatsɨ xɨka xeme xekanetsihemiekuni.
13Mɨkɨ mɨpaɨ mekaniutiyuani:
―Kamɨtsɨ mɨpaɨ pɨ'aneni, tematsihɨani xeikɨa, wahetsɨa tematsiheyetuani. Tepɨkamatsihemieni.
Hikɨ mekanihɨani kaunari hutamekɨ hehekwamekɨ, terɨta mekanewayehana. 14Rehi 'aye'aximekaku, piritsiteutsixi mekanayekɨne me'enukunakeke memɨte'ayu'iwani hepaɨ mete'uhiwatɨ. 'Ana Yawé 'iyarieya hetsiena kaninuani tɨrɨkaɨyetɨ, kaunarikɨ mɨhɨakai mamayatsie rinu mɨtata'ini hepaɨ kaniutiyɨni, yumamatsie mɨhɨakai kaniuxɨne. 15Puxu 'ayekwaiya hekwame 'utaxeiyaka mɨkɨkɨ kaniwarukwini xeimiriyari.
16Hikɨ Tsanitsuni mɨpaɨ kaniutayɨni:
«Puxu 'ayekwaiyakɨ
kaxarite kwinieneme nepɨwaruke.
Puxu 'ayekwaiyakɨ
xeimiriyari teɨteri nepɨwarukwi».
17Kepauka mɨtiutahayewaxɨ mɨpaɨ tikuxatatɨ 'ayekwai nehɨani mana katiniuterɨwa Xamati-Rehi. #15:17 Hepɨrayukɨ Xamati-Rehi panuyɨne yemuri puxu 'ayekuaiya manuka. 18Waɨkawa meuharimɨkɨkaikɨ, Yawé kaniutahɨawe karima: «'Ekɨ pepɨtiuyuri 'ikɨ mati'uximayatsiriwame mɨrayu'iwakɨ. ¿Kamɨtsɨta hikɨ hariyakɨ netimɨni, 'ikɨ xitekiya 'inɨariyari memɨkahexeiya wapɨretsu nerayani?» 19Hikɨ Kakaɨyari kwiepa haa kanetinetɨani Rehi kemɨti'ane, muwa haa kanitinetɨani watixawakaku. Kepauka Tsanitsuni mutihari, kaniutatɨrɨkaxɨani 'aixɨa katineka'erietɨyani. 'Ayumieme mɨkɨ haixa hikɨ mana 'akuxi Rehi mɨtinena, «Kemɨ'ane mutahiwaxɨ haixaya» katiniuterɨwarieni.
20Tsanitsuni manuyehaitɨa kanihɨkɨtɨkaitɨni xeitewiyari wiyari 'ixaheritsixi wahetsie, kepauka piritsiteutsixi 'ixaheritsixi memɨtewa'aitɨakai.
Currently Selected:
'Itsɨkate 15: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
