Kitsariyaxi 59
59
'Axakemɨtiuyurienikɨ, hekɨatsika meta wikweitsitɨarika
1Yawé tɨrɨkariyaya
'etsipɨkatewi mɨratawikweitsitɨanikɨ,
meta mɨkaheu'ena pɨkahɨkɨ.
2'Axaxemɨte'uyuri kanihɨkɨtɨni
xekakaɨyari hetsɨa 'ateewa mɨxeti'uitɨa.
Mɨkɨ 'axamɨti'ane katiniyurieneni
nierikaya meukunama mɨkaxe'eniekakɨ.
3Xeme yumamatetsie xepeuxuxure,
meta yu'itɨwametetsie 'axamɨti'anekɨ xepɨteheuwetɨka.
Xeteni 'itarika pɨtikuxata,
meta xeneni 'axa'anemekɨ pɨtikuxata.
4Nixewitɨ pɨkahahiwa tita mɨtiheitserie rawawatɨ,
nixewitɨ yuri mɨrainekɨ pɨkarataxaneta.
'Itarikatsie xepɨtewiya,
yunaitɨ xepɨteyu'itaiyatɨwe.
'Axamɨti'anekɨ xepɨtihukata
'axamɨtiuka'iyari xepɨtiniweya xeikɨa.
5Kuterixi watawári xepɨtsiniya
meta tukatsi wawiniyari xepɨwewie.
Kemɨ'ane mɨkɨ tawári mutakwani pɨmɨni,
xɨka xewitɨ mɨkɨ tawári 'utare, kuu kanayenemɨkɨ.
6Yu'itsari xemiwewie xemenakatɨni pɨkayɨwe,
tita xemɨtewewiekɨ xemeuyukunani xepɨkayɨwawe.
Wawewiya, 'axatiyurɨwame wewiyaya xeikɨa katinihɨkɨtɨni,
wamamate 'axamɨti'ane xeikɨa katininetɨaka.
7Wa'ɨkate kaniyumexɨitɨaka 'axamɨtiyurienikɨ hepaɨtsita,
mepuyumexɨitɨa 'atsimɨkatiuka'iyari xuririyaya memɨtayeurienikɨ.
'Axa'aneme xeikɨa 'iyari mekaniwewieka,
yuhuyeta mekateniu'unani meta ti'u'unime mekatenikuhayeikawani.
8Kayuwatɨ muyeikanikɨ mɨ'ayumieme huyeyari mepɨkamate,
'aixɨa ti'anetɨ wahuyeta katiniumaweni,
Huye tutunime mekaniwewietɨweni,
kemɨ'ane mɨkɨ 'utɨa mumie kayuwatɨ muyeikani pɨkamate.
9'Ayumieme tita 'aixɨa mɨti'ane tahetsɨa 'ateewa puyeika,
meta tita mɨtiheitserie temɨkaheuta'axetsie puyeika.
Hekɨariya tepɨtakwewiekai, peru naitɨ yɨriya xeikɨa pɨhɨkɨ,
hekɨaripa te'u'uwatɨtɨ, yɨriya 'a'ayetsuikame tsata tepu'uwa.
10Memɨkaheuneniere wahepaɨ 'ixumeritsie tekumetɨwetɨ tekaniuhuni,
ta'itsɨkɨ xeikɨa teteheutsetɨwetɨ tekaniu'uwani memɨka'uhɨxi wahepaɨ.
Tsepa tuka tepekaxɨrɨwe mɨyɨwini hepaɨ,
tsepanetɨ 'aixɨa temɨteheu'erie, mɨkite wahepaɨ tepɨ'anene.
11Teyunaitɨ tame hutseri wahepaɨ teputiyuane,
kukuruxi memeutuxa wahepaɨ teputiyuane.
Mɨtiheitserie tepɨtetakwewiekai, peru pɨkanua,
mɨtatsitixɨna 'akuxi 'ateewa 'apuyeika.
12'Ekɨ pepɨtimate waɨkawamekɨ temɨtehayuye'uniekɨ,
tita 'axatemɨte'uyuri pɨtatsixaneta.
Temɨtehayuye'unie tahamatɨa 'apuyeika,
'axatemɨte'uyuri tepɨmate.
13Temɨkaheu'enana tepɨhɨkɨ, Yawé tepɨka'anu'eni.
Takakaɨyari tepuwarixiwiyaxɨ.
Teɨteri tepuwananaima meta tepɨwakwamana,
'itarikakɨ tepɨtekuxata ta'iyaritsie mayeneikakɨ.
14Mɨpaɨ te'anetɨ 'aixɨa mɨti'ane tepɨkuwarixiwiya,
meta tita mɨtiheitserie 'ateewa puyeika,
teɨteri memayukuxexeɨriwatsie tita yuri mɨraine mepekahɨpa,
heitserie yatepɨkateyurie.
15Yuri mɨraine hawaikɨ pɨkahematsiɨkɨ,
kemɨ'ane 'axamɨti'ane memuku'e'eiriwa tinaime yupiinite mepɨtekunawaiyarɨwa.
Yawé pixei matsi pɨka'inakixɨ
tita mɨtiheitserie mumawekɨ.
16Kanixeiyani, kanihɨxiyaka
mumawekɨ wahetsiemieme haniutɨ.
'Ayumieme yɨkɨmana kanayenemɨkɨ muwatawikweitsitɨanikɨ,
mɨtiheitserie hetsɨanamieme kaniwatuikakamɨkɨ.
17Tita mɨtiheitserie yuhetsie nunuwame hepaɨ panutikeni,
meta yumu'utsie kananuyukanani kuya xupureruya tiyuwikweitsitɨwamekɨ,
mɨtiwarakapitɨanikɨ kamixayari panakatɨni,
meta yu'ɨtetsarika matayarikɨ puyuta'eima.
18Yapɨtiwapitɨani kememɨte'uyuri,
'ateewa haramara tetsita kiekatari yapɨwayurieni:
waɨkawa ha'atɨ memeye'unie wahepaɨtsita,
meta pɨtiwarakapitɨani.
19Tau makayuyuipike hepa kiekatari Yawé kemɨtitewakɨ mepɨtimakani,
meta tau manatineikatsie kiekatari mumariwe mepeu'enieka.
Karikɨ kaninuamɨkɨ haa tɨrɨkaɨyetɨ muwayeneika hepaɨ,
Yawé hɨtsierieyakɨ muwayenexɨa.
20«Tiyuwikweitsitɨwame Tsiyuni kaninuamɨkɨ,
yunaime Kakuwu hetsɨa miemete wahetsɨa kaninuamɨkɨ
'axamete'u'iyaritɨ mekete'uhayewa.
―Yawé mɨpaɨ kanaineni―.
21Yawé mɨpaɨ kanaineni:
«'Ikɨ netɨratu kanihɨkɨtɨni xehamatɨa nemiwewie:
Ne'iyari xehetsie mɨyeka,
meta neniuki nemɨmatsi'upitɨa pemekaterɨwakɨ 'ape'uyuatɨ,
hatsuaku pɨkamatsiku'eirieni,
meta 'aniwema wahetsie meta 'anuiwarima wahetsie,
hikɨtɨtɨ meta yuheyemekɨ
―Yawé mɨpaɨ kanaineni―.
Currently Selected:
Kitsariyaxi 59: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
