Kitsariyaxi 55
55
Memeuhariku kememɨte'inierie
1»Xekenakɨni haa mayema
yunaitɨ kemɨ'ane xemeuhariku.
Xekenakɨni xeketenananaiyu meta xeketenakwaiyu
kemɨ'ane tumini xemɨka'umana.
Xekenakɨni, winu xekeneunanai meta retsi
xekateyutuatɨ.
2¿Titayari tumini xetexɨtɨa paa kahɨkɨtɨmetsie,
meta yu'iwarika tita mɨkatihuxaiyatsie?
'Aixɨa xekeneteneu'eni, xekatenitikwaikuni tita 'aixɨa mɨti'ane,
meta 'aixɨa xekateniku'eriwakuni witsira'aneme xetekwatɨ.
3Kayuwatɨ xekeneneu'eni, nehetsɨa xekeneu'axɨa,
xekeneneu'eni, 'axekaniu'uwakuni.
Xehamatɨa tɨratu nepɨwewieni yuheyemekɨ mieme,
Rawiri nemɨnaki'eriekɨ.
4Ne nepenukake teɨteri wahetsiemieme munierixɨ mɨhɨkɨtɨnikɨ,
wa'ukiyari mɨmariwe hepaɨ.
5Mɨpaɨ pepɨtiyurieni hipame nuiwarite pekaniwata'inimɨkɨ,
pemɨkawamatekai,
meta nuiwarite memɨkamatsimatekai
'ahepa mepɨtinautsa,
pamɨpariyutsitsɨ Yawé 'akakaɨyari,
Mɨpatsie 'Ixaheri hetsiemieme,
waɨkawa 'aixɨa petixeiyariekame mɨmatsi'ayeitɨa».
6Yawé xekeneutiwawa mexi yuwaɨriya xemikaxeiyakɨ,
xekeneutahɨawi mexi 'ahurawa 'uyeika.
7'Axatiyuruwame yuhuye ke'uku'eirieni,
meta 'axamɨtiyuriene 'axatiku'eriwatɨ ketiuhayewa.
Yawé hetsɨa kenuani, takakaɨyari hetsɨa,
mɨkɨ puyuwaɨriya mɨreuyehɨwirienikɨ,
nenimayatsikaya hetsiena pɨtinake.
8«Karikɨ xeme kexemɨteku'eriwa ne mɨpaɨ nepɨkatiku'eriwa,
kexemɨte'u'uwa ne mɨpaɨ nepɨkatiuyeika
―Yawé mɨpaɨ kanaineni―.
9Nehuye meta kenemɨtiku'eriwa
matsi 'apeutitetewa keyuri xehuye meta kexemɨteku'eriwa,
matsi waɨkawa peutitewa keyuri muyuawitsie kemeutitewa.
10Wiyeri meta 'ɨwi muyuawitsie
kemɨrakaneika,
kwitɨwa pɨka'anutinunuwa kwiepa kakahatuawetɨ,
mɨtiyɨratɨakakɨ,
kemɨ'ane muka'etsa 'imɨari mexeiyanikɨ
meta paa mexeiyanikɨ kemɨ'ane mɨtikwa'a,
11mɨpaɨta pɨ'ane neniuki neteta mayeneika:
Nehetsɨa pɨkanuani 'atsikatiyuriwetɨ,
matsi yapɨtiyurieni meri kemɨnetinake,
pɨraye'atɨani kenemɨtiku'eriwa.
12Xeme xepayekɨne xeyutemamawietɨ
meta xepanuwitɨkieni yuhuyeta kayuwatɨ.
Xe'uhukaku, hɨri 'etsimɨtɨtɨ meta 'amɨtɨtɨ
mepɨtihiwa karima meyutemamawietɨ,
meta mepɨtetapini yunaitɨ kɨyexi yeuta miemete.
13'Ɨtsi muxuyatɨka hetsiemieme huku mɨxexeurawi pɨtiwawere,
kieká hetsiemieme tsikwai kanitixuawerimɨkɨ.
'Ana Yawé 'aixɨa pɨtitahɨawarieni,
mɨkɨ 'inɨarieya payani yuheyemekɨ».
Currently Selected:
Kitsariyaxi 55: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
