'Etsekieri 31
31
Kariuxa Riwanu mieme
1Tamamata heimana xewi wiyari 'anuyemiekaku, hairieka metseriyaritsie, mexɨakame tukaritsie, Yawé mɨpaɨ kanetiniutahɨawe: 2«Tewi pemunu'aya, Parahuni mɨpaɨ ketineutahɨawi meta teɨterimama yunaime:
»“Kemɨ'ane 'ahepaɨ timariwetɨ payuyeitɨawe,
3'Atsiriya hetsie kene'a'ɨwiya,
kariuxa Riwanu mieme kanihɨkɨtɨkaitɨni,
witsitiyuxexeiyatɨ, waɨkawa tsiɨraɨye 'anuwietɨ,
kɨtsimeyari hai kanikuyuitɨwakaitɨni.
4Haa kanitaweriya,
haa waɨkawa muhapanekɨ kaniutawere.
Haixate nanariteya 'aurie kaniuhapanekaitɨni,
hipame kɨyexite kemɨtihatuiyakai.
5Mɨpaɨ kariuxa katiniutawere
'a'utewitɨ matsi kanayani hipame kɨyexi wara'iwatɨ.
Pamɨpariyutsi haa waɨkawa pemexeiya,
waɨkawa tsiɨraɨye pepanuwierixɨ.
6Yunaitɨ memɨte'awɨwawe
'amamatetsie mepuyuti'ituatɨa.
Yunaitɨ yeutari
'ahetɨa mepɨtiniweyakai.
Yunaitɨ nuiwarite
'a'etɨritɨa mepu'uwakai.
7Kɨye mɨtɨrɨkaɨye meta mɨmariwe pɨhɨkɨtɨkai,
yumamatekɨ 'ayeutɨ panuyemakai,
nanariteya 'upaitɨ peukayuyunekai
haa tetɨata mɨyematsie.
8Nixewitɨ kariuxa Kakaɨyari harawerita
mɨpaɨ 'anetɨ pumawekai,
nixewitɨ huku mɨpaɨ pɨkarexawarikai,
mɨpaɨ pɨkatimariwekai.
Nixewitɨ kɨye Kakaɨyari harawerita mieme
hepaɨ witsipɨka'anekai.
9Ne witsitiyuxexeiyame nekanayeitɨani
tsiɨraɨyetɨ manuwiekakɨ mariwetɨ.
'Ereni, Kakaɨyari harawerita
yunaitɨ kɨyexite mepi'ɨtetsaiyakai.
10»”'Ayumieme Yawé naimekɨmɨyɨwe mɨpaɨ kanaineni: ‘'Iteɨri waɨkawa mutawerixɨkɨ 'a'utewitɨ, kaniuyuta'ɨre, yɨkɨtsimeyarikɨ hai mukuyuitɨwakaikɨ, 11ne nekaneihɨani, manuyeka hetsɨa nekaniyetuani, ke'axamɨtiuka'iyari yamɨ'itɨarienikɨ. 12Teewatari kwinimieme 'axamemɨte'u'iyari mekanewiteni, mekaniku'eirieni hawitekiekame. Xawarieya hɨritsie kaniukawiwieni, mayeweweritsie, naitsarie 'aki manuyehapanetsie tsatsanitɨ kaniukawiwieni. Mekaniuyuta'una mekaniku'eirieni yunaitɨ nuiwarite, 'etɨrieyatɨa memuyu'awietakai. 13Hikɨ memɨte'awɨwawe mawitekie kɨyeyaritsie mepayaxike, meta yeutari xawaritsata mepeutahake. 14'Ikɨ kani'ayumiemetɨni tawarita xewitɨ 'iteɨri hatetsita 'utiwetɨ kwinimieme mɨkatiwerenikɨ, para xewitɨ tawarita 'iteɨri 'aixɨa tihatuiyarietɨ, yukɨtsimeyarikɨ hai mɨkakuyuitɨwanikɨ. Yunaitɨ mekanikwikuni, yunaitɨ kwieta meukatewatsie mekanikayunikuni, meukatewatsie memɨkayuyuipike wahamatɨa.
15»” ’Yawé naimekɨmɨyɨwe mɨpaɨ kanaineni: Kepauka kariuxa meukatewatsie mɨkayunixɨ, ne haramara kwieta mieme mɨkawanikɨ yanepɨtiuyuri, hiwerika mɨ'inɨariyaritɨnikɨ. Haa muhapane pukawaxɨa meta 'akite 'amatayeyeu, mɨkɨkɨ hiwerika Riwanu nepupitɨa, meta naitɨ 'iteɨrite yeuta timieme pɨtiutiwa. 16Kepauka meukatewatsie nemeikanɨ'a, muwa memɨkayuyuipike wahamatɨa, kepauka matiwetsie tɨranarieyakɨ nuiwarite nepɨwarutimariu. Yunaitɨ 'iteɨrite 'Ereni miemete meta 'aixɨa mɨ'anene witsimɨ'anene Riwanu mieme, kemɨ'ane 'aixɨa memɨtehatuiyariekai, kwie hetɨa paitɨ mekaniyunɨtɨakuni. 17Kemɨ'ane nuiwarite meminɨkai, kemɨ'ane memuyu'awietakai 'etɨriyayatɨa mɨkɨ hamatɨana mekanikayune meukatewatsie, meta kemɨ'ane 'ixiparakɨ memukwi'iwaxɨ. 18Nixewitɨ 'iteɨri 'Ereni mieme mɨpaɨ pɨka'anekai kemɨtimariwekai. Peru mɨyatɨtɨ, kwieta kanikayune 'iteɨrite 'Ereni miemete wahamatɨa. Muwa kaniyuhayewa watsata, xitekiya 'inɨariyari memɨkahexeiya wahamatɨa, 'ixiparakɨ memukwi'iwaxɨ wahamatɨa. Mɨpaɨta Parahuni katinimɨmɨkɨ meta yunaitɨ meminɨ'ɨ. Yawé naimekɨmɨyɨwe mɨpaɨ kanaineni’ ”».
Currently Selected:
'Etsekieri 31: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
