Memeyekɨ 6
6
1Yawé mɨpaɨ katinita'eiya:
—Patsɨ pekaninierimɨkɨ kenemɨtiyurieni Parahuni hetsɨa. Netɨrɨkariya xeikɨa kanixepitɨamɨkɨ xemɨyehukɨ, netɨrɨkariyakɨ xeikɨa mɨkɨ kwieyaritsie xekanayeweiyariekuni.
2Hutarieka, Kakaɨyari Muitsexi hamatɨa katiniutaxata mɨpaɨ katinitahɨawe: «Ne Yawé nepɨhɨkɨ. 3Ne nepɨnehekɨataxɨ 'Apɨrahami, 'Itsahaki, meta Kakuwu wahɨxie, ne Kakaɨyari Naimekɨmɨtɨrɨkaɨye, peru kenemɨtitewa yemekɨ nepɨkawarutaxatɨa, Yawé nemɨtitewa. 4Metatsiere tɨratu tepuwewi kwie Kanani miemekɨ wahetsiemieme mayanikɨ, meripaitɨ memakutekaitsie 'ateewa kiekatari wahepaɨ me'anetɨ. 5Meta nepɨwa'enie 'ixaheritsixi kememɨte'uka'eniwa, 'ekipitutari waɨriyarika te'uximayatamete memɨwarayeitɨakɨ, nepaye'eri tɨratu kenemɨtiuwewi. 6'Ayumieme kenemie mɨpaɨ ketiniwaretahɨawi 'ixaheritsixi: “Ne Yawé nepɨhɨkɨ, ne nepɨxexɨna 'ekipitutari kememɨtexe'uximatɨa, ne nepɨxexɨna kexemɨte'uximayatamete, ne nepɨxexɨna waɨkawa 'inɨari newewietɨ meta mamariwawemekɨ 'aixɨa nepɨtiyurieni. 7Ne, xeme nekiekari nepɨxe'ayeitɨani, neta xekakaɨyari. Mɨpaɨ 'ana mepɨtehetimani, kename ne Yawé nexekakaɨyari, nemɨxe'ɨxɨnaxɨ 'ekipitutari kememɨtexe'uximatɨakai. 8Nekanixe'anuwitɨmɨkɨ kwietsie mɨpaɨ kenemɨtinehɨritɨa 'Apɨrahami, 'Itsahaki, Kakuwu, nemɨwayetuirienikekai, ne Yawé, nepɨxeyetuirieni mɨkɨ kwie mana xemɨtitenikɨ”».
9Muitsexi, 'ikɨ naime tiniwarutaxatɨani 'ixaheritsixi peru memutiwaɨripiekaikɨri, mete'uka'eniwatɨ mete'aitɨarietɨ 'ayumieme mepɨka'i'eni. 10Hikɨ Yawé mɨpaɨ Muitsexi katiniutahɨawe:
11—Kenemie Parahuni hɨxie ti'aitame 'Ekipitu kwieyaritsie. Mɨpaɨ ketinetahɨawi, kewarupitɨani memɨyehukɨ 'ixaheritsixi mɨkɨ kwieyaritsie.
12Peru Muitsexi Yawé mɨpaɨ katiniutahɨawe:
—'Ixaheritsixi matsi mepɨkanetsiheu'enieri Parahuni kenetiu'enieni meta 'aixɨa nepɨkatiuxaxata.
13Hutarieka Yawé Muitsexi 'Aruni mame kaniwarutahɨawe, 'ixaheritsixi wahetsiemieme meta Parahuni ti'aitame hetsiemieme katiniwarutaxatɨani, mɨpaɨta katiniwaruta'aitɨani 'ixaheritsixi 'Ekipitu memɨwarayewitɨnikɨ.
Muitsexi 'Aruni wa'ukiyarima
14'Ikɨ mepakɨ 'ixaheritsixi wa'ukiyarima:
Xuweni niwemama 'Ixaheri matɨarieya: Kanuki, Paru, Ketsiruni meta Karimi. Mɨkɨ mepɨhɨkɨ Xuweni nuiwarimama.
15Tsimehuni niwemama: Kemueri, Kamini, 'Uhari, Kakini, Tsukaxi, meta Tsahuri maamaya kananeu tewiyari pɨhɨkɨtɨkai. Mɨkɨ mepɨhɨkɨ Tsimehuni nuiwarimama.
16Kememɨteheuku'uxa mɨkɨ nuiwari memaka'utɨarietsie, 'ikɨ Rewi niwemama mepɨhɨkɨ: Keritsuni, Kuhati meta Merari. Xeitsienituyari heimana xeitewiyari heimana tamamata heimana 'atahuta wiyari puyuri.
17Keritsuni niwemama wanuiwaritsie: Riwini meta Tsimi.
18Kuhati niwemama: 'Amirani, 'Itsaxi, Hewuruni meta 'Utsiheri. Xeitsienituyari heimana xeitewiyari heimana tamamata heimana haika wiyari puyuri.
19Merari niwemama: Makiri meta Mutsihí.
'Ikɨ Rewi nuiwarimama mepɨhɨkɨ kememɨteheku'uxa.
20'Amirani, xeitsienituyari heimana xeitewiyari heimana tamamata heimana 'atahuta wiyari puyuri, yutetei kaniutiwitɨni Kukaweri titewakame, mɨkɨ yuhutame mekaniwarayexeiya tɨɨri: 'Aruni meta Muitsexi.
21'Itsaxi niwemama: Kure, Nepeki meta Tsikɨri.
22'Utsiheri niwemama: Mitsaheri, 'Eritsapani, meta Tsitiri.
23'Aruni 'Eritsaweti kaniutiwitɨni, 'Aminarawi nu'aya Nahatsuni 'iwaya, mɨkɨ yunaukame mekaniwarayexeiya tɨɨri: Narawi, 'Awihu, 'Eriyatsaxi meta 'Itamaxi.
24Kure niwemama: 'Atsixi, 'Erikana meta 'Awiyatsahapi. Mɨkɨ Kure nuiwarimama mekanihɨkɨtɨni.
25'Eriyatsaxi 'Aruni nu'aya xeime kaniutiwitɨni Putiheri niweya, xeime nunutsi mekanayexeiya Pinexi mekateniterɨwa.
'Ikɨ Rewi nuiwarimama wa'ukiyarima mepakɨ, kememɨteheku'uxa memaka'utɨarietsie.
26'Aruni meta Muitsexi, mɨkɨ mepɨhɨkɨtɨkai Yawé mɨwanɨ'akai 'ixaheritsixi memɨwarayewitɨnikɨ 'Ekipitu kwieyaritsie yayupapaɨmeme. 27'Ikɨ mepɨhɨkɨ Parahuni hɨxie memutiniu, ti'aitame 'Ekipitu kiekame hetsɨa, memɨwarayewitɨnikɨ 'ixaheritsixi 'Ekipitu kwieyaritsie.
'Aruni, Muitsexi niukameya
28Kepauka Yawé Muitsexi hamatɨa mɨtiutaxa 'Ekipitu, 29mɨpaɨ katinitahɨawe:
—Ne Yawé nekanihɨkɨtɨni. Parahuni ti'aitame 'Ekipitu kiekame naime ketinetaxatɨa kenemɨmatitahɨawe.
30Peru Muitsexi Yawé mɨpaɨ katiniutahɨawe:
—¿Neranu'enienikuta Parahuni, ne 'aixɨa nepɨkatiuxaxata?
Currently Selected:
Memeyekɨ 6: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
