'Amuxi 6
6
1Xɨa'ui xeme Kerutsareme xemɨtama kayuwatɨ xemexeiya,
xɨa'ui meta xeme Tsamariya hɨriyaritsie xemɨtama 'aixɨa 'iyari xemu'uwa.
Xɨa'ui xeme xemɨmamariwawe 'ikɨ kwieyaritsie xemu'uwa,
teɨteri 'ixaheritsixi memɨxe'ayexeiya xeikɨa.
2Karine xekenehu, xekenexeiya,
manata Kamati mɨmariwe hetsie xekenehu,
metatsiere Kahati xekenehu piritsiteutsixi wakiekaritsie.
¿Kamɨtsɨ xeme matsi waɨkawa xetemamariwawe keyuri mɨkɨ te'aitamete,
matsi xekwieyari 'atiyewa?
3Xeme mɨpaɨ xepɨtemate 'uximatɨarika tukariyari xe'uku'eirieme xepuyu'erie,
matsi te'aitamete memɨxekwinikɨ hurawa xekaniuhuni.
4Xeme hupume witsimɨ'anenetsie xemahipite 'eripanite 'awateyakɨ ra'utɨkaime,
xe'uheitɨ xepaka'iyuniwa,
muxatsi 'aixɨa memɨ'anene xemɨwakwa'a
meta tsikerutsixi memɨwaiyatɨarietɨka,
5Rawiri hepaɨ xeikɨa,
kwikari xepɨ'aita kaitsa hayuanekaku,
meta xepinetɨa tiyuitɨwamete yukɨ 'aneneme,
6winu xepɨye'e watsu 'amɨneneta
meta witsimu'ɨa xepɨyutiwiriwa 'aixɨa mɨ'ane,
xekayu'iyaritɨatɨ Kutse kemɨtika'unarieni,
7xeme meri xe'anuyetetɨ xekananuhapaniekuni,
mɨpaɨ katineutiparimɨkɨ 'ikwai memuxuawitɨa 'atsimekateyurietɨ.
8Yawé naimekɨmɨyɨwe mɨpaɨ kaniutayɨni yɨhɨritɨatɨ,
Yawé Kakaɨyari Naimekɨmɨtɨrɨkaɨye mɨpaɨ kanaineni:
«'Ixaheritsixi kememɨteyuti'ɨre nepɨxani'erie,
waparatsiyu nepu'uxiwe'erie,
'ayumieme wakiekari nepɨyetuani mɨwaraye'unie hetsɨa,
meta naime mana mɨtiyepine».
9Mɨpaɨ katiniyɨmɨkɨ xɨka xeikiiyarita tamamata teɨteri meyuhayewa, mɨkɨ yunaitɨ mekanikwikuni. 10Kepauka memɨ'axɨani mɨkite mewaku'ɨtɨwetɨ mewatitaiyake, xewitɨ mɨpaɨ katinitahɨawimɨkɨ yu'iwa: «¿Xewitɨ 'akuxi 'ahamatɨa tiuyeika?» 'Iya mɨpaɨ katinita'eiyamɨkɨ: «Hawaikɨ». Hikɨta mɨpaɨ katinitahɨawimɨkɨ: «Kayuwatɨ». Yawé kemɨtitewa tepɨka'ikuxatani».
11Neuxei, Yawé katini'aitani
mɨta'unarienikɨ kii 'amɨpa 'etsipepetɨ kanitaxɨriexɨamɨkɨ
meta kii 'etsimupepe kanika'unamɨkɨ.
12¿Kamɨtsɨ kawayutsixi 'aitsie mete'utinanautsa yatɨni
'ayeparitsie tuurutsixi metekwietsana?
Peru xeme 'aixɨa mɨti'ane 'uaye mumɨya xepayeitɨa,
meta tita mɨtiheitserie 'ikwaxi hatsiwime xepayeitɨa.
13Xeme xepɨyutemamawie Ru-Rewaxi kiekariyari xema'iwaxɨkɨ,
mɨpaɨ xeputiyuane: «¿Tatɨrɨkariyakɨ tepɨte'uyuri
Kaxinahini tema'iwaxɨ?»
14«'Ayumieme, 'ixaheritsixi
xehetsɨa xeime nepanunɨ'ani
mɨmatita'aitɨanikɨ waɨriyarika Rewu-Kamati xeyeta,
meta 'Arawa 'akiyari manuyeka xehetɨapai ye'atɨkaime»,
Yawé mɨpaɨ kanaineni, Kakaɨyari Naimekɨmɨtɨrɨkaɨye.
Currently Selected:
'Amuxi 6: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
