2 Tsamuheri 24
24
Rawiri kuyaxi kemɨtiwaruti'inɨataxɨ
(2Tsam 24:1-17 – 1Kem 21:1-17)
1Merikɨtsɨ Yawé 'ixaheritsixi wahetsiemieme tawarita kaniuyeha'ani, Rawiri mɨpaɨ katiniu'eritɨani teɨteri wahetsiemieme mɨpaɨ mɨtayɨnikɨ: «'Ixaheri kwieyaritsie kiekatari meta Kura kwieyaritsie kiekatari kuyaxi xekeniwaruti'inɨata». 2Hikɨ Rawiri ti'aitame, Kuhawi kuyaxi tiwa'aitɨwame mɨpaɨ katiniutahɨawe:
—'Ixaheri kwieyaritsie naitsarie xekenehu, Rani mɨtiyetewatsie xekaneikatsutɨakuni Weritsewa paitɨ 'uye'atɨkaime, kuyaxi xekeniwaraka'utɨa, ne yanemɨretimanikɨ keyupaɨmetɨ memakɨne memɨyutakwini.
3Kuhawi mɨpaɨ katinita'eiya:
—Yawé 'akakaɨyari xeitsienituyari paɨmexɨa kewarutimɨiriya 'ekɨ 'akuyaxima, meta kematsi'upitɨani pemɨwaxeiyakɨ. Matsi ¿'ekɨ ti'aitame ketitayarikuta mɨyapetiutaine?
4Matsi ti'aitame kemainekai yakatiniuyɨni, Kuhawi meta kuyaxi tewa'aitɨwamete kememaitɨkatei yapɨkatiuyɨ, hikɨ mekanayekɨne 'ixaheritsixi kuyaxiyari mewaraka'utɨanike. 5Kurutani hatuxameyaritsie me'ukɨneka 'Aruhexi mɨrakutewa hetɨa mekanikuyaxe mayeweri, mana memɨyekɨta Kahari meta Katsexi kwieyaritetsie mekaniu'axɨani. 6Karaha mekanekɨne meta Takitini Kuhutsi kwieyaritsie, Rani Kahani meye'axɨanike meta Tsiruni 'aurie mamanetɨkatsie. 7Kiekari Tiru mɨtɨrɨkaɨyetsie mekanekɨne, naitsarie heweutsixi meta kananeutsixi wakiekaritetsie mekaniye'axɨani. 'Imatɨrieka, Weritsewa makumawetsie Kura kwieyaritsie mekaniye'axɨani.
8'Atanauka metseri heimana xeitewiyari tukari metehauyetereka mekanakunuaxɨani Kerutsareme, naitsarie me'akukexiyaka 'Ixaheri kwieyaritsie. 9Kuhawi kuyaxi keyupaɨmeme memɨwaraka'utɨakai ti'aitame kaniyetuirieni: 'Ixaheri kwieyaritsie 'atahaika tsienituyari miriyari kuyaxi mekanakɨne 'ixiparakɨ memauyutakwiwawe meta Kura kwieyaritsie kiekatari 'auxɨwime tsienituyari miriyari mekaniyupaɨmekaitɨni.
10Hikɨ Rawiri 'anake katinetimani ke'axamɨtiuyuri kuyaxi mɨwaruti'inɨataxɨkɨ, hikɨ Yawé mɨpaɨ katiniutahɨawe: «Waɨkawa yemekɨ 'axanepɨtiuyuri. 'Atsimɨkatimate hepaɨ nepɨtiuyuri. Yawé, ne waɨkawa nepɨmatsiwawirie, kenetineuyehɨwiri kwerietɨ».
11Hikɨ kwiximeri paitɨ, Rawiri ka'anukukewekaku 'akuxi, Yawé niukieya Kakaɨyari niukameya Kahari hetsɨa kaninuani, Rawiri hetsiemieme mɨtixeiya: 12«Rawiri hetsɨa kenemie mɨpaɨ ketinetahɨawi: “Yawé mɨpaɨ kanaineni: ‘Nepɨmatsipitɨa 'ikɨ haikame 'uximatɨarikatsie xeime pemanayexeiyakɨ, yakenetineutahɨawi ke'aneme nepɨmatsipitɨani.’ ”» 13Hikɨ Kahari Rawiri hetsɨa nuaka mɨpaɨ katinita'iwawiya:
—¿Kemɨ'ane pepeuyehɨwa: haika wiyari haakaxa takwiepa titaweni, nutsu memɨmatsi'aye'unie haika metseri mepɨmatsimietɨweni 'ekɨta pemɨ'aku'unanenikɨ, nutsu haika tukari kwiniya pɨtaweni takwieyaritsie? Keneutimaixɨa meta yakenetineutahɨawi yanemɨreitahɨawekɨ mɨnetsiheyenɨ'a.
14Rawiri Kahari mɨpaɨ katiniuta'eiya:
—Yemekɨ nepɨtsaipɨne yanemutayɨni nepɨkayɨwe. Matsi 'aixɨa pɨ'ane Yawé mɨtatsi'uximatɨani, matsi naki'eriyaya mɨmariwekɨ, 'aixɨa pɨka'ane teɨteri xɨka menetsi'u'uximatɨani.
15Yawé, 'ayumieme 'Ixaheri kwieyaritsie kwiniya kaneyenɨ'ani, mɨkɨ ximeriyaritsie kanitsutɨani kemɨreku'inɨarikai mɨpaɨ katineutere, naitsarie kwiepa haika tewiyari heimana tamamata miriyari teɨteri mekaniukwini Rani meta Weritsewa paitɨ meye'atɨkaitɨ. 16Hikɨ niuki tuayame Yawé hetsɨa mieme kaniyukuha'aritɨani Kerutsareme mɨka'unakɨ. Peru Yawé 'anatɨtɨ pɨwarutinenimayataxɨ kwiniya hepaɨtsita muwarenɨ'airiekai. Mɨpaɨ niuki tuayame katiniutahɨawe: «'Ariri ketineuhayewa». Mɨpaɨ pɨtiuyɨ 'Arahuna kewutseu tewiyari tɨriku matihena 'aurie, hakewa niuki tuayame mewekai.
17Hikɨ Rawiri kepauka niuki tuayame muxei kemɨtiwakwikai, Yawé nenewieri mɨpaɨ katiniupitɨani: «'Ikɨ teɨteri 'axamepɨkate'uyuri muxatsi wahepaɨ mepɨ'ane. Ne pɨta nekanihɨkɨtɨni 'axati'aneme nemɨreutiwiwiexɨa meta 'axanemɨtiuyuri. Nepɨta 'axamɨti'ane nehetsie ketiunake meta netɨɨriyama wahetsie».
Rawiri mawari taiyame kemɨtiutawewi
(2Tsam 24:18-25 – 1Kem 21:18-26)
18Hikɨ 'ana tukariyaritsie, Kahari Rawiri hetsɨa kaneyani meta mɨpaɨ katineitahɨawe: «Kenanutiyaka, mawari taiyame Yawé hetsiemieme keneutawewi, 'Arahuna kewutseu tewiyari kwieyatsie tɨriku matihenakai».
19Hikɨ Yawé Kahari mɨpaɨ tiutahɨaweku, Rawiri hetsɨa kaneyani. 20Kepauka 'Arahuna mɨwaruxei ti'aitame meta te'i'uximayatsiriwamete 'ame'atihume, kanayeyani hɨxiena kaniutihɨximakeni.
21'Arahuna mɨpaɨ kaniutayɨni:
—'Ekɨ ti'aitame, ¿ketitakɨ petinua nehetsɨa?
Rawiri mɨpaɨ katinita'eiya:
—'Akwie tɨriku pematihenatsie nepɨmatsikunanairiene, mana mawari taiyame Yawé hetsiemieme nemɨtawewienikɨ, kwiniya teɨteri wa'uximatɨatɨ mɨtihayewakɨ.
22Hikɨ 'Arahuna ti'aitame mɨpaɨ katiniuta'eiya:
—Tita mɨmatinake ketineutimawa. 'Ena mekanixuaweni tuurutsixi mawari memayanikɨ, kɨyexi meta tɨriku 'uwame mahete meta yukute. 23'Ikɨ naime 'ekɨ nekamatiniyetuirieka. Yawé 'akakaɨyari 'aixɨa 'anemekɨ mɨmatsixeiyanikɨ.
24Hikɨ Rawiri 'Arahuna mɨpaɨ katiniuta'eiya:
—Mɨpaɨ 'aixɨa pɨkayɨni. Yawé nekakaɨyari mawari taiyariyari nemɨwewirieka tixaɨtɨkɨ nekareuyuyehɨame. Naime nekamatinitinanairiemɨkɨ kemɨraye'atɨka.
Mɨpaɨ katiniuyɨni Rawiri kwie kaniunaneni meta túurutsixi, huta tewiyari heimana tamamata pɨrata rahetemekɨ katiniuyutuani. 25Mana mawari taiyame kaniutawewieni Yawé hetsiemieme, hikɨ mana mawari taiyariyari kaniuwewieni meta 'aixɨa memɨteyuxeiyanikɨ mawariyari. 'Anake Yawé teɨteri kaniwarutinenimayata, hikɨ kwiniya katiniuhayewa 'ixaheritsixi wakwitɨ.
Currently Selected:
2 Tsamuheri 24: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
