2 Tsamuheri 1
1
Tsahuri kemɨtiumɨ niukiyari
(2Tsam 1:4-12 – 1Tsam 31:1-13, 1Kem 10:1-12)
1Merikɨtsɨ Tsahuri hemieriekuri, Rawiri Tsikɨraki mɨrakutewatsie huta tukari kaniuyurieni meta 'amarekitsixi wara'iwakari. 2Hairieka tukaritsie xewitɨ tewi heyuta'unaka Tsikɨraki kaninuani, Tsahuri kuyaximama mematitekai heyeyaka. Kamixaya peukatsanikai meta mu'unaximatɨ kemɨtiyuhiweriekai mɨkɨ pɨ'inɨariyaritɨkai, mana Rawiri hɨxie nuaka kaniukatunumakeni kwiepa.
3Rawiri mɨpaɨ katinita'iwawiya:
—¿Hakewapai pepeyetɨa?
Kuya mɨpaɨ katinita'eiya:
—Nepeyuta'unaxɨ 'ixaheritsixi memakuteitsie.
4Rawiri mɨpaɨ katinita'iwawiya:
—Kenetineutaxatɨa naime kemɨreyɨ.
Mɨkɨ tewi mɨpaɨ katinita'eiya:
—Matsi 'ipaɨ pɨreyɨ takuyaxima mepeyuta'unaxɨa mɨrayukwitɨnetsie meta yuwaɨkawatɨ mekanekwi'iwa. Mɨkɨ Tsahuri meta nu'aya Kunatani mepekwi'iwaxɨ.
5Hikɨ Rawiri niuki mi'atɨiri mɨpaɨ katiniuta'iwawiya:
—¿Kehapaɨtɨtɨri 'ekɨ yapepɨtimate kename Tsahuri meta nu'aya Kunatani mehekwi?
6Mɨpaɨ katinita'eiya niuki mi'atɨiri:
—Ne 'atsinekatimaitɨ Kiriwuha yemuriyaritsie nekaneyeikakaitɨni. Ne nekaneixeiya kepauka Tsahuri yupitsikatsie meyukaxui, hikɨ kuyaxi kaxetatetsie me'utetɨ memeye'unie mekanehuraweiyakaitɨni meta kawayutsixi wahetsie me'utetɨ. 7Tsahuri kananakuniere kanenexeiya. Hikɨ kanenetahɨawe, kemɨnereta'aitɨa yanekatinekayani. 8Hikɨ kaneneta'iwawiya, kemɨ'ane nemɨhɨkɨtɨkai, ne mɨpaɨ nekatineita'eiya: “'Amareki tewiyari nepɨhɨkɨ”. 9Hikɨ kanenetawawirieni 'ahurawa nemuyanikɨ, mɨpaɨ kanetineta'aitɨani: “Ximɨxi keneneumi'a, nepɨtiuka'eniwa xeikɨa nepɨkamɨwe”. 10Ne 'ahurawa ne'uyaka nekaneimieni, mɨpaɨ neretimaika mɨkatawikwenikekaikɨri. Hikɨ kuruna menakekai nekanenutihanirieni meta matsɨwaya mɨraye'axe, para 'ekɨ pɨta neti'aitɨwame nemɨmatsiyetuirienikɨ.
11Hikɨ Rawiri meta hamatɨana memɨti'ukai me'u'enanaka, yukamixa mekaneukatsanaxɨani hiwerikakɨ. 12Meyuhiwerietɨ meta meyuhakietɨ mekaniukutaikaiyarieni, Tsahuri meta nu'aya Kunatani 'ixiparakɨ memekwi'iwakaikɨ, yaxeikɨata Yawé kuyaximama wahekɨ meta 'Ixaheri nuiwariyari wahetsiemieme.
13Merikɨtsɨ Rawiri temaikɨ kaniuta'iwawiya niuki mi'atɨiri:
—¿Hakewa pepekiekame?
Mɨpaɨ katinita'eiya:
—Teewatanaka nekanihɨkɨtɨni 'amareki tewiyari.
14Rawiri mɨpaɨ katinitatieni:
—¿Kari 'ekɨ mɨya pepɨreyuri Yawé menayexei pepemi?
15Hikɨ tewi xeime yuhetsɨa mieme 'uta'inieka mɨpaɨ katinita'aitɨani:
—Kenanuhanaka kenemi'a.
Kemɨtiuta'aitɨariekai 'iya kaneye'atɨani kanimieni. 16Rawiri mɨpaɨ kaniutayɨni:
—'Akɨmana 'ahetsie pekatinahɨani pekaniuyumieni peyutahekɨataka Yawé menayexei pememikɨ.
Rawiri kemɨtiyuhiweriekai Tsahuri meta Kunatani wahekɨ
17Merikɨtsɨ Rawiri 'ikɨ hiwerika kwikariyari kaniutakwika Tsahuri meta nu'aya Kunatani wahepaɨtsita mieme. 18«Tuupi kwikariyari» katiniterɨwa. Meta katiniuta'aita mɨkɨ kwikari Kura kiekatari memɨta'ɨkitɨarienikɨ. Mɨpaɨ katine'uka Katsexi xapayatsie:
19«Xɨa'ui 'Ixaheri. Wakɨmana pemɨ'ata'ɨrekai
mekwikwi'itɨ yemuritsie mekanekuheni.
Yuwaɨkawatɨ kuyaxi memɨtɨrɨkawi hikɨ mekanekwi'iwa.
20»Kahati kiekariyaritsie xepɨkaheikuxatani
meta 'Atsikaruni kayeyari 'utɨa mɨpaɨ xepɨkatehehiwani,
'ukari piritsiteutsixi memɨkaheyutemamawiekakɨ
'ixɨarari memɨkahewewiekakɨ mɨkɨ xitekiya 'inɨariyari memɨkahexeiya waniwema.
21»Xɨa'ui, Kiriwuha hɨriyarite,
xeme xehetsɨa pɨka'ukawiwiyeni meta pɨka'ukuhaɨtsiyatani.
Tɨriku pɨka'utixuxuawereni mawari mayanikɨ.
Tsahuri mana mukahɨiyakɨ kɨmana muyukunarɨma 'a'ɨtɨ:
memɨte'ayu'iwa kɨmana memɨyukunarɨma mana mepeihɨa.
22Kunatani 'ɨrɨya
yapɨtixuxurekai,
yaxeikɨa Tsahuri 'ixiparaya yapɨtixurekai
memɨwaraye'unie waxuriyakɨ.
23»Tsahuri Kunatani matɨa. 'Aixɨa mepɨte'u'iyarikai.
Mɨkɨ 'aixɨa mepɨtenaki'eriwakai,
'axeikɨa yunaitɨ mekaniukwini.
Mɨkɨ kwinimieme mekatenanautsawawekaitɨni keyuri kwixɨ,
meta waɨkawa mekanitɨrɨkawikaitɨni keyuri mayetsi.
24»Xɨa'ui, 'ukarawetsixi 'Ixaheri kwieyaritsie kiekatari. Xekeneutitsuanani Tsahuri hetsiemieme,
mɨxekemaritɨakai 'ixuriki witsimɨ'anekɨ kwimɨxetakɨ,
meta witsimɨxekuyuruwakai huru kukateyarikɨ.
25»Xɨa'ui kuyaxi memɨtɨrɨkawi hikɨ mekanekwi'iwa
Kunatani yemuri 'amanutitewatsie kanekani mɨkitɨ.
26Kunatani, 'ahetsiemieme waɨkawa nepɨneheiwerie,
ne'iwa hepaɨ nepɨmatinaki'eriekai.
Matsi waɨkawamekɨ nepɨmatsinaki'erikai
keyuri 'ukarawetsixi ketemɨtewanaki'erie.
27»Yuwaɨkawatɨ kuyaxi memɨtɨrɨkawi hikɨ mekanekwi'iwa
Yu'ixipara me'utinawaiyarieka mana mekanekuheni mekwikwi'itɨ».
Currently Selected:
2 Tsamuheri 1: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
