2 Te'aitamete 3
3
Muhawitsixi mewaraye'unietɨ 'ixaheritsixi kememɨte'akɨ
1Merikɨtsɨ tamamata heimana 'atahaika wiyari, Kutsapati katini'aitametɨkaitɨni Kura kwieyaritsie. 'Ana Kurami 'Akawi nu'aya kanitsutɨani ti'aitatɨ 'Ixaheri kwieyaritsie Tsamariya kiekariyaritsie, katiniuta'aita tamamata heimana huta wiyari. 2Kurami Yawé kemɨkatinake katiniuyurieni, peru matsi yemekɨ paapaya meta warutsieya 'axamepɨte'uyuri, Kurami katiniuta'aita tete mɨwayehɨiyanikɨ, paapaya 'amitakekai Wahari hetsiemieme. 3Matsi Kurami 'axakatiniyurienekaitɨni Keruwuhani hepaɨ Nawati nu'aya, mɨkɨ ke'axameteyuriekame muwarayeitɨa 'ixaheritsixi teɨteriyari, mɨkɨ Kurami 'axamɨti'ane pɨkatiuhayewaxɨ ke'axamɨtiyurienekai.
4Hikɨ Metsaha ti'aitame Muhawi kwieyaritsie muxatsi kaniwamɨiriyakaitɨni, mɨkɨ xeiwiyari 'aye'axekaku katiniyetuayakaitɨni 'Ixaheri kwieyaritsie ti'aitame hetsɨa, mɨpaɨ mɨtikwetatɨakaikɨ, xeitsienituyari miriyari muxatsi, meta xeitsienituyari miriyari muxatsi temari wahuxariyari. 5Peru kepauka 'Akawi mumɨ, Muhawi kwieyaritsie ti'aitame yapɨkatikatɨa, 'ixaheritsixi teɨteriyari kaniwarutakwini. 6Merikɨte Kurami ti'aitame Tsamariya kiekariyaritsie kanayeyani, meta kuyaxi 'ixaheritsixi kaniwarukuxeɨrieni. 7Kurami Kutsapati niuki kanenɨ'airieni, Kura kwieyaritsie ti'aitame mɨpaɨ katinitahɨawe:
—Muhawi kwieyaritsie ti'aitame pɨkayuwaɨriyari nemɨti'aitɨakakɨ. 'Ayumieme, ¿peti'awaɨriya pemɨnetsiparewienikɨ temɨwatakwinikɨ Muhawi kiekatari?
Kutsapati mɨpaɨ katinita'eiya:
—Huu, nepɨnewaɨriya. Kepemɨtiku'eriwa neta mɨpaɨ nepɨtinekɨhɨawe, yaxeikɨata nekuyaxima, nekawayutsixi tepɨmatsiparewiwamete. 8¿Keteteheuyune xeikɨa?
Mɨpaɨ katinita'eiya Kurami:
—Kauka makumawetsie 'Erumi kwieyaritsie.
9Hikɨ te'aitamete 'Ixaheri hetsiemieme, Kura hetsiemieme meta 'Erumi hetsiemieme yunaitɨ mekanekɨne. Mɨkɨ 'atahuta tukari mekaniuhukaitɨni makumawetsie. 'Anari kuyaxi meta kawayutsixi yuhaa mepuxɨ.
10Hikɨ 'Ixaheri kwieyaritsie ti'aitame mɨpaɨ kaniutayɨni:
—Xɨa'ui, Yawé kataniukuxeɨrieni teyuhaikame te'aitamete, mɨtatsiyetuanikɨ muhawitsixi wahetsɨa.
11Peru Kutsapati mɨpaɨ katiniuta'iwauni:
—¿Xewitɨ 'ena katiuyeika Yawé niukameyatɨtɨ, mɨkɨ Yawé mɨta'iwawiyakɨ tahetsiemieme kemɨtiyɨni?
Xewitɨ 'Ixaheri kwieyaritsie ti'aitame parewiwameya mɨpaɨ kaniutayɨni:
—'Ena hurawa kaniuyeikani, 'Eritseu titewatɨ, Tsapati nu'aya, 'Eriyaxi mɨparewiwameyatɨkai.
12Mɨpaɨ kaniutayɨni Kutsapati:
—Mɨkɨ xɨari pɨtatitaxatɨani Yawé niukieyakɨ.
Hikɨ 'Ixaheri kwieyaritsie ti'aitame 'Eritseu hetsɨa kaneyani heita'iwawiyake, warawitɨtɨ ti'aitame Kutsapati meta 'Erumi kwieyaritsie ti'aitame. 13Peru 'Eritseu 'Ixaheritsie ti'aitame mɨpaɨ katiniutahɨawe:
—¿Ne tixaɨtɨ nepɨkarayexeiya 'ahepaɨtsita? Kenemie keniwareta'iwawiya 'apaapa meta 'amaama wakakaɨyarixi waniukamete.
Mɨpaɨ katinita'eiya 'Ixaheri kwieyaritsie ti'aitame:
—Hawaikɨ, Yawé pɨtatsi'ukwamanaxɨ, kataniukuxeɨrieni teyuhaikame para mɨtatsiyetuanikɨ muhawitsixi wahetsɨa.
14'Eritseu mɨpaɨ kaniutayɨni:
—Yurikɨ mɨpaɨ nekanaineni, Yawé mayeyurikɨ Naimekɨmɨtɨrɨkaɨye ne nemeyexeiya, xɨka Kutsapati Kura kwieyaritsie ti'aitame kahayewenike, nitɨma 'ahɨxie nepɨka'utinierekekai. 15Kamɨtsɨ kanareru xekenene'atɨiri.
Mexi kanareru kanariwiekai, Yawé tɨrɨkariyaya kaninuani 'Eritsehu hetsie, 16hikɨ mɨpaɨ kaniutayɨni:
—Yawé mɨpaɨ kanaineni: “'Akite xekenanuye'inixɨa 'ikɨ mayeweritsie”. 17Yawé mɨpaɨ kanaineni: “Tsepanetɨ wiyeri xemɨkaxeiyani meta 'eka, naitsarie haa kanitihɨnimɨkɨ mayeweritsie, xeme xekaniyɨwawekuni mana xemɨtiharenikɨ meta xetewama”. 18Peru 'ikɨ Yawé hepaɨtsita tixaɨtɨ pɨkatihɨkɨ, matsi 'akuxi kaniwayetuamɨkɨ muhawitsixi xeme xemɨwaka'unakɨ. 19Xeme naime kiekarite yukuraru 'amatitetewa memexeiya xekaniwaka'unakuni meta kiekarite haitɨakate memɨhɨkɨ. Kɨyexi 'aixɨa mɨ'anene xekanitiwitekuni, haixate naime xekananukanaxɨakuni, meta memaka'etsatsie tetexi xekanayeitɨakuni.
20'Uxa'arieka ximeri kepauka maye'a mawari matiwewiwatsie, naitsarie haa kaniutahɨne, 'Erumi kwieyaritsie hakaneikakaku. 21Hikɨ kepauka muhawitsixi mɨpaɨ memɨtehetima kename te'aitamete meyuhaikatɨ mehayekɨnekai wahepa mewatakwinike, mɨkɨta mekaniwarukuha'aritɨani yunaime teɨteri kuyakɨ memɨyɨwawekai, hikɨ wakwie manuye'atɨkatsie mekanikuyaxe. 22Kepauka mɨkɨ ximeri memanuku'ui, tau hapa kanikakɨxekaitɨni, muhawitsixi mɨpaɨ mekateniuneniere haa kanixetakaitɨni xuriya hepaɨ. 23Muhawitari mɨpaɨ mekaniutiyuani: «Kamɨ xuriya kanihɨkɨtɨni. Mɨkɨ te'aitamete xɨari mepuyutakwi, mepuyukwi yuxaɨta. Muhawitsixi, hikɨmɨtɨka tepɨtetɨyu wapiini».
24Kepauka muhawitsixi memuta'axɨa 'ixaheritsixi mematiteitsie, 'ixaheritsixi mepɨwarutakwi hikɨ mekaniwara'iwa. Hipatɨ mekaniyuta'unakaitɨni peru 'ixaheritsixi mekaniwaranukuweiya mekaniwarekwini, 25meta wakiekarite mekaniuka'unaxɨani. Yuxexuitɨ 'ixaheritsixi xexuime tetexi mekaniutituani kwie 'aixɨa mɨ'anetsie mekanitihɨniya, meta haixate mekananuteukixɨani meta kɨyexi mekanakuwiteni 'aixɨa mɨ'anenekai. Kiekari Kixi-Karetseti xeikɨa kaniyuhayewakaitɨni, peru texupamekɨ tetuaxamete mekanaketɨkɨne, hikɨ mekanikemakaxɨani mekanika'una.
26Muhawi kwieyaritsie ti'aitame 'uniereka kemɨra'iwarieximekai, kuyaxi kaniwaruta'inieni 'atahuta tsienituyari 'Erumi kwieyaritsie ti'aitame hetsɨa paitɨ mɨye'anikɨ, peru puyutatexi. 27Hikɨ 'ayumieme yuniwe mexɨakame kaniumieni, mɨkɨ nu'aya ti'aitame mayanikekai 'utɨmana, hikɨ kuraru 'amatitewatsie kɨmana mawari taiyariyari kaniuwewieni. Mɨpaɨ tiuyɨku 'Ixaheritsixi wahetsiemieme waɨkawa mekaniuyeha'ani, 'anari mɨkɨ yukiekaritsie mekanekɨne.
Currently Selected:
2 Te'aitamete 3: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
