1 Tsamuheri 28

Tsahuri 'Enituhuxi kiekame mɨtimaiwe hamatɨa

1Merikɨtsɨ 'iya tukariyaritsie, piritsiteutsixi yukuyaxima mekaniwarukuxeɨriexɨani 'ixaheritsixi memɨwakwiyukɨ. 'Ayumieme 'Akihitsi Rawiri mɨpaɨ katiniutahɨawe:

—Mɨpaɨ ketinemaika 'ekɨ meta 'akuyaxima nehamatɨa tekanitakwiyuni tanaitɨ.

2Hikɨ Rawiri mɨpaɨ katinita'eiya:

—'Aixɨa kaniyɨmɨkɨ, yapekatinetimaimɨkɨ 'ekɨ neti'aitɨwame, ne mati'uximayatsiriwame kenemɨtiyɨwe.

'Akihitsi mɨpaɨ kaniutayɨni:

—Xɨka mɨpaɨ 'aneni, 'ena mɨtiyehane netsihɨweme pekanayeimɨkɨ.

3Merikɨte kepauka Tsamuheri mumɨ, 'ixaheritsixi yunaitɨ mepɨyuheiwerietɨkatei hetsiena mieme, Xamatsie menikateuku mana mɨkiekarieyatɨkaikɨ. Tsahuri mɨkɨ kwieyaritsie, memɨtemaikai mɨkite wahamatɨa memɨtekuxata meta memɨteyukewaiya kaniwarayeweiyaxɨakaitɨni.

4Hikɨ piritsiteutsixi me'uyukuxeurieka Tsuneni mɨrakutewatsie mekanikuyaxe. Meta Tsahuri 'ixaheritsixi warukuxeɨrieka mekanekɨne, Kiriwuha paitɨ mekanitiyaxe. 5Peru kepauka Tsahuri piritsiteutsixi mɨwaruxei, kaniutimani waɨkawa yu'iyaritsie kaneuyuyehɨani. 6'Ayumieme Yawé kaniutahɨawe, peru mɨkɨ pɨka'ita'ei, niheinɨtsitana ni'inɨari mupatsie Yawé hetsiemieme meta Kakaɨyari niukametemama waniuki. 7Merikɨte 'ayumieme Tsahuri kuyaxi tewa'aitɨwamete, mɨpaɨ katiniwaruta'aitɨani:

—Mɨtimaiwe xekenenekuwawiri mɨkite wahamatɨa mɨtikuxata, para nemumiekɨ nemeita'iwawiyakɨ.

Mɨpaɨ mekatenita'eiya:

—Xewitɨ 'Eniruxi kiekariyaritsie kanekani.

8Hikɨ Tsahuri kemarite yukɨ 'anenekame 'anakatɨxɨaka, teɨteri yuhutatɨ mekaneiweiya 'uyɨwikaku 'ukaratsi hetsɨa. Tsahuri mɨpaɨ katinitahɨawe:

—'Iyari kene'atɨa mɨyuhekɨatakɨ nemixeiyakɨ. Mɨpaɨ ketineuyuri kemɨ'ane nemɨmatsitaxatɨani.

9Merikɨte 'ukaratsi mɨpaɨ kaniutayɨni:

—¿Xɨari 'atsipepɨkatimate Tsahuri kemɨtiuyuri? 'Ikɨ kwieyaritsie mɨkite wahamatɨa memɨtekuxata meta memɨteyukewaiya kaniwarayeweiyaxɨani. 'Ekɨ penetsiwiniyamɨtɨ xeikɨa pekaniutaineni nemɨmierienikɨ.

10Merikɨte Tsahuri mɨpaɨ katinita'eiya:

—Kaniyuritɨni Yawé kemɨrayeniere, yurikɨ ne nematinikuhɨaweni nixewitɨ matsi pɨkamatikwinitɨani 'ikɨ hepaɨtsita.

11'Ukaratsi mɨpaɨ kaniutayɨni:

—¿Kemɨ'anekuta pepɨxeiyamɨkɨ?

Tsahuri mɨpaɨ katinita'eiya:

—Tsamuheri nekanixatani.

12Hikɨ 'ukaratsi Tsamuheri 'uxeiyaka kaniutahiwa marikakɨ. Mɨpaɨ katinitahɨawe:

—Kari 'ekɨ Tsahuri pepɨyɨane. ¿Titayari peneti'itaiyane?

13Hikɨ ti'aitame mɨpaɨ katinitahɨawe:

—Hawaikɨ pepɨkaheumaka. Tita pemɨtiuxei kenetineutaxatɨa.

Mɨkɨ mɨpaɨ katinita'eiya:

—'Iyari kwieta maukatewatsie 'atimieme nepɨxeiya.

14Tsahuri mɨpaɨ katinita'iwawiya:

—¿Kehapaɨ tiyuxexeiya?

Mɨkɨ mɨpaɨ katinitahɨawe:

—Kani'ukiratsitɨni matakɨ kaniyu'eimani kwieta maukatewatsie kanatimieni.

Tsahuri mɨpaɨ retimaika Tsamuheri mɨyɨanekaikɨ, kaniutihɨximakeni titunumawetɨ kwiepa.

15Hikɨ Tsamuheri Tsahuri mɨpaɨ katiniutahɨawe:

—¿Titayari peneti'uximatɨa tawarita nemɨnuanikɨ?

Tsahuri mɨpaɨ katinita'eiya:

—Waɨkawa matsi nekanine'iyaritɨaka piritsiteutsixi mekanenimietɨweni meta Kakaɨyari kaneniuku'eirieni. Pɨkanetsiku'eiya nineheinɨtsikatsie meta Kakaɨyari niukametemama wahetsie. 'Ayumieme nemɨmatsitahɨawekɨ nekaninewaɨriya, kenemɨtiyurieni yapemɨnetitahɨawekɨ.

16Hikɨ Tsamuheri mɨpaɨ katinita'eiya:

—Kamɨtsɨ xɨka Yawé matsi'uku'eirieni matsi'aye'unietɨ pɨta xɨka yuhayewa, ¿Titayari ne penera'iwawiya? 17Matsi Yawé yakatinaye'atɨani kemutayɨkai meripaitɨ: Mɨkɨ matsi kamaniunawairieni kepemɨti'aitametɨkai, Rawiri pɨta kaniyetuirieni. 18'Ekɨ Yawé pemɨka'anu'enikɨ, 'amarekitsixi kemɨtiwahekakai pepɨkawarukwi, 'ayumieme hikɨ mɨkɨ mɨyakamatinikwinitɨaka. 19Merikɨte Yawé piritsiteutsixi wahetsɨa kamaniyetuamɨkɨ meta 'ixaheritsixi. 'Ekɨ meta 'aniwema 'uxa'a nehamatɨa 'uwa xekaniyuhayewakakuni meta 'ixaheritsixi mekana'iwariekuni.

20Hikɨ Tsahuri Tsamuheri 'u'enieka yapauka marikakɨ kanatiweni. Waɨkawa kaniutimani Tsamuheri mɨpaɨ mɨtitahɨawixɨkɨ meta haakakɨ kanimɨximekaitɨni, tɨkarikɨ tukarikɨ tixaɨ pɨkatitakwaiwekai. 21Merikɨte 'ukaratsi Tsahuri 'uxeiyaka, mana 'ukaikame, mɨpaɨ katinitahɨawe:

—Ne ti'a'uximayatsiriwame yanepɨtikatɨa kepemɨnetiu'aitɨa kepemɨnetiutahɨawixɨ, netukari neyetuatɨ. 22Hikɨta 'ekɨ kenenanu'eni pekatinikwaimɨkɨ 'ikwai nepɨkawewieni, mɨpaɨ peyukamaime 'ahuyeta pekaniyemieni.

23Hikɨ Tsahuri kaniyuku'imawakaitɨni. Yaxeikɨata 'iparewiwamete mekatenikɨhɨawekaitɨni 'ukaratsi kemɨtikɨhɨawekai, 'imatɨrieka kaniyuwaɨriya. Kwiepa 'anukukeka 'utatsie kanayerɨni. 24Merikɨte 'ukaratsi yukie tsikeru kaniweriyakaitɨni, mɨkɨ kaniumieni meta tɨriku tɨxiyari kaniupɨna, tsuirayari kaniutiwewieni kanitikwaxiya. 25Hikɨ Tsahuri katiniukwani meta 'iparewiwamete. 'Ana tɨkariyaritsie mete'ukwaka mekanayekɨne.

Currently Selected:

1 Tsamuheri 28: hch

Highlight

Copy

Compare