1 Tsamuheri 22
22
Rawiri 'Arurani meta Mitsipa kemɨtiyuta'una
1Merikɨtsɨ Rawiri Kahati mɨrakutewatsie kaniyeyani, kaniyuta'una terɨta 'Arurani mɨrakutewatsie 'aurie. 'Ukiyarimama meta hipatɨ maremama kepauka mɨpaɨ memɨtehetima, mekanekɨne muwa paitɨ meheixeiyayuka. 2Hikɨ 'ana yumɨiretɨ mekanitinɨni memɨneniyɨakai, memɨtehapitɨkatei meta memɨte'uka'eniwakai. 'Ana mekanitinɨni nauka tsienituyari, Rawiri tiwa'aitɨwame hɨkɨtɨtɨ kaniyuhayewa.
3Mana kaniyeyani Mitsipa mɨrakutewatsie Muhawi kwieyaritsie, mana ti'aitame mɨpaɨ katiniutawawirieni: «Nepaapama memɨ'axɨanikɨ 'ena xehamatɨa nepɨmatsiwawirie, kepauka yanemɨretimani Kakaɨyari kemɨtiyurimɨkɨ nehetsiemieme 'anake nekaniwarawitɨmieni». 4Hikɨ mɨpaɨ katiniwaruhɨrita yupaapama Muhawi kwieyaritsie ti'aitame hetsɨa, mana mekanititekaitɨni kepauka Rawiri muyu'awietakai xeikɨa.
5Merikɨtsɨ Kakaɨyari niukameya Kahari Rawiri mɨpaɨ katiniutahɨawe: «Matsi pɨkaheuyewetse pemɨ'a'awietaneni. 'Aixɨa matsi pɨyɨni xɨka penuani Kura kwieyaritsie». Hikɨ 'ayumieme Rawiri mana mɨyetɨa kaneyani Kareti hɨriyaritsie makɨkɨyexiya kaneutiyune.
Tsahuri mawari wewiwamete Nuwitari kemɨtiwarukwi
6Merikɨtsɨ Kiweya hɨriyaritsie Tsahuri 'etɨpiwari hetɨa kaniukateitɨni, mana pɨtiutamari Rawiri yaxeikɨa teɨterimama wahepaɨtsita. Tsahuri pitsika 'amɨtewi kanakwekaitɨni, 'iparewiwamete 'auriena mekana'utɨkateitɨni yunaitɨ, 7mɨkɨ mɨpaɨ katiniwarutahɨawe:
—Xekeneu'enana, Wenikamini nuiwarimama, ¿xemeta yuri xete'erie 'Itsahi nu'aya kename kwie xeyetuiriexɨani yaxeikɨa kaxie haraweriyari meta kuyaxi xeimiriyaritsie miemete meta xeitsienituyaritsie miemete wa'ukiyarima xehayeitɨanike xete'erie? 8Hikɨke mɨpaɨ nepɨretima yunaitɨ titayari xemɨnete'uku'eiri, titayari nixewitɨ mɨkaneraxaxatɨwa neniwe meta 'Itsahi nu'aya hamatɨa tɨratu kememɨte'uwewi. Xeme nixewitɨ tɨma pɨkaneraxaxatɨwa neniwetɨtɨ Rawiri kemɨtiuparewi netsi'aye'unietɨ mayanikɨ, hikɨ kememɨ'ane.
9Hikɨ Ruheki 'erumi tewiyari, mana Tsahuri parewiwamete wahamatɨa muyeikakai, mɨpaɨ katinitahɨawe:
—Merikɨte ne Nuwi kiekariyaritsie 'Itsahi nu'aya nekanexeiya 'Akimereki 'Akituwi nu'aya hamatɨa katinekuxatakaitɨni. 10Meta 'Akimereki Yawé kanetahɨawe Rawiri hetsiemieme meta 'ikwaite katineimini metatsiere Kuriyati 'ixiparaya kaneiyetuirieni.
11Hikɨ mawari wewiwame 'Akimereki 'Akituwi nu'aya mɨwitɨkiemiekɨ ti'aitame katiniutanɨ'ani, yaxeikɨa yunaitɨ 'iwamama, Nuwi kiekariyaritsie mawari memɨwewiwametetɨkai. Kepauka memu'axɨa, 12Tsahuri mɨpaɨ 'Akimereki katiniutahɨawe:
—'Akituwi nu'aya, keneu'ena.
'Akimereki mɨpaɨ katinita'eiya.
—Neti'aitɨwame, yakeneutayɨki nepɨmatsi'enieni.
13Hikɨ Tsahuri mɨpaɨ katinitahɨawe:
—¿Titayari 'ekɨ 'Itsahi nu'aya matɨa xenete'ayeheka? 'Ikwai pepɨtiyetuiri meta xeime 'ixipara pepikweitɨa. Yaxeikɨata Kakaɨyari peputahɨawixɨ hetsiena mieme, miparewienikɨ netsi'aye'unietɨ mayanikɨ, hikɨ kememɨ'ane.
14Hikɨ 'Akimereki Tsahuri mɨpaɨ katiniuta'eiya:
—Ti'aitame, ¿kemɨ'ane yunaitɨ te'a'uximayatsiriwamete 'aixɨa pɨtiuyeika, Rawiri 'amune hepaɨ, kuyaxi tiwa'aitɨwame meta paratsiyuta 'aixɨa mɨtixeiyarie? 15¿Hikɨke kuta netiuyuri Kakaɨyari nemutahɨawixɨ hetsiena mieme? Pɨkatixaɨtsietɨ. Pɨkaheuyewetse matsi neti'aitɨwame nehetsie pemɨrahɨpani, yaxeikɨata netɨɨriyama wahetsie matsi ne ti'a'uximayatsiriwame 'atsinepɨkatimate ketɨtɨxemɨyɨa.
16Hikɨ ti'aitame mɨpaɨ katinitahɨawe:
—'Akimereki, 'atukariri kanaye'ani, 'ekɨ xeikɨa pɨkatixaɨ 'atɨɨriyamata.
17Merikɨte yapauka ti'aitame 'iparewiwamete memeweiyakai mɨpaɨ katiniwaruta'aitɨani:
—Mawari wewiwamete Yawé hetsɨa miemete xekeniwarukuya, mɨkɨta Rawiri meputinɨi. Kemɨtiyu'unarɨmekai mepɨtemaikai, peru mɨpaɨ mepɨkanete'utahɨawixɨ.
Peru ti'aitame parewiwamete mepɨka'uyuwaɨri mawari wewiwamete memɨwakwinikɨ. 18'Ayumieme ti'aitame, Ruheki mɨpaɨ katiniuta'aitɨani:
—Kamɨtsɨ 'ekɨ keniwarukuya.
Hikɨ Ruheki 'erumi tewiyari kaniyuwaɨriya mɨwakwinikɨ. 'Ana tukariyaritsie nauka tewiyari heimana 'auxɨwi meyupaɨmeme kaniwarukwini mawari wewiwamete. 19Hikɨ meta Nuwi kiekariyaritsie kaneyani, mawari wewiwamete wakie, 'ixiparakɨ kaniwarekwini 'ukitsi, 'ukarawetsixi, tɨɨri meta memutinunuiwaxɨke, tuurutsixi, puxuri meta muxatsi.
20Peru xewitɨ 'Akimereki nu'aya, 'Awiyataxi titewatɨ kaniuyuta'una, kaneyani Rawiri hetsɨa. 21Hikɨ 'Awiyataxi kepauka Rawiri mɨtiutaxatɨa kename mawari wewiwamete Yawé hetsɨa miemete Tsahuri warekwi, 22hikɨ Rawiri 'Awiyataxi mɨpaɨ katiniutahɨawe:
—'Ana paitɨ Ruheki 'Erumi tewiyari kepauka nemexeitsie Nuwi kiekariyaritsie, mɨpaɨ nekatinetimani Tsahuri katinitaxatɨanikekaitɨni. Netsɨ ya'aneme neheutiwiwiexɨaku 'a'iwama yunaitɨ mekaniukwi'iwa. 23Peru pepɨkaheumaka. Nehamatɨa keneyuhayewani, ne nepɨmatsi'ɨwiyani. Kemɨ'ane mɨmatsimiemɨkɨni, nepɨta matsi kenetsi'umieni.
Currently Selected:
1 Tsamuheri 22: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
