1 Tsamuheri 20
20
Rawiri meta Kunatani
1Merikɨtsɨ Rawiri Nayuti Xama mɨrakutewatsie kanayeyani, Kunatani manukatsie kaneyani. Mɨpaɨ katinita'iwawiya:
—¿Ne kenetiuyuri? ¿Titakɨ 'axanetiuyuri yanutsɨtɨni nekapɨtiuyumi 'apaapa titayari netimiemɨkɨni?
2Kunatani mɨpaɨ katinita'eiya:
—¿Titayarikuta petimierieni? Pɨkatixaɨ matsi, nepaapa naime kemɨtiyuriene kanetinikuxaxatiwani, tsepanetɨ kwinimieme mɨkati'ane. Pɨkaneti'awitsirie, 'aixɨa pɨka'ane kepemaine.
3Hikɨ Rawiri yurikɨ mɨpaɨ katinitahɨawe:
—'Ekɨ pemɨnetsinaki'erie 'apaapa yakatinimaika, 'ayumieme xɨari mɨpaɨ pɨtiu'eri: “Yapɨkaretimani matsi Kunatani, mɨkanutuixiekakɨ”. Peru Yawé mayeniere hɨxie meta 'ekɨ 'ahɨxie mɨpaɨ nekanaineni, kanehuraniri nemɨmɨnikɨ.
4Kunatani mɨpaɨ katinitahɨawe:
—Kenetiyurieni yakenetineutahɨawi, yanekatiniyuriemɨkɨ.
5Hikɨ Rawiri mɨpaɨ katinitahɨawe:
—Pepɨtimate metseri mɨhekwa 'ixɨarariyari 'uxa'a mayani, nepɨrekwanikekai 'apaapa hamatɨa mexatsie. 'Aixɨa kaniyɨmɨkɨ nemɨneti'awietakɨ 'ɨtsita keneneupitɨa warie taikaike nemɨnuanikɨ. 6Xɨka netsiheku'iwawani 'apaapa, Wereni nemɨmiekɨ kename ne'uyutawau 'ahetsɨa mɨpaɨ ketinetahɨawi, nekiekari meta ne'iwama muwa meheyuxeɨrie mawari mehewewienike metseri mɨhekwa hetsiemieme. 7Xɨka mɨkɨ mɨpaɨ hetayɨni 'aixɨa kename 'ane, merikɨte 'ana kanimatsiɨkɨrimɨkɨ kename kanetsimiemɨkɨ. Xɨkata matsi heyeha'ani, mɨpaɨ mɨkɨ petinetimaimɨkɨ kenameri netsimiemɨkɨ. 8Metsɨ Yawé hɨxie tɨratu pekaniuwewieni nehamatɨa, kename ti'a'uximayatsiriwame nehɨkɨ, 'ayumieme waɨkawa nepɨmatsiwawirie yurikɨ pemɨnetikuxaxatɨwanikɨ. Xɨka ne 'axanetiuyurieni mɨpaɨ peretimani, 'apaapa hetsɨa pepɨkanetsiyetuayani, 'ekɨ matsi keneneumi'a.
9Kunatani mɨpaɨ katinitahɨawe:
—Mɨpaɨ pepɨka'utaineni, ne mɨpaɨ nepɨkatiyurieni. Matsi xɨka neretimani nepaapa kename matsimiemɨkɨ, kwitɨwa mɨpaɨ nekamatinitaxatɨamɨkɨ.
10Rawiri mɨpaɨ katinita'iwawiya:
—Xɨka 'apaapa 'aixɨa kamatiu'eiya, ¿kemɨ'ane pɨnetitaxatɨani?
11Hikɨ 'aixɨa mete'uxataka naimekɨ, Kunatani Rawiri kaniuta'inieni hɨritsie memakukɨnekɨ. Hikɨ mana me'u'uwatɨ, 12Kunatani mɨpaɨ katinitahɨawe:
—Rawiri 'aku Yawé 'ixaheritsixi wakakaɨyari hɨxie yurikɨ yanepɨmarahɨawe, warie yanepɨretimani 'ipaɨ 'upaukakaku nepaapa kemɨreku'eriwa kemɨmatsiyurimɨkɨ. Xɨka kamatsimiemɨkɨni yanepɨmatitaxatɨani. 13Peru nepaapa xɨka matsimiemɨkɨni, neta pemɨ'ata'unakɨ xɨka nekamatiutaxatɨani, Yawé 'axakenetsi'uyurieni waɨkawa, 'ekɨta 'ahamatɨa ke'uyeikani nepaapa hamatɨa kemɨtiuyeikakai. 14Kepauka Yawé mɨmatsiparewieni xɨka 'akuxi ne'uyeikani, keneneutinenimayata, nehetsie keneutanua nemɨkamierienikɨ. 15Hatsuaku pepɨkatihayewani ne'iwama 'aixɨa petiwaxeiyatɨ, Yawé kepauka mɨwaka'una yunaime memɨmatsi'aye'unie. 16Yawé ketiwarukwinitɨani memɨmatsi'aye'unie.
Hikɨ mɨpaɨ Kunatani tɨratu katiniuwewieni Rawiri meta 'iwamama wahamatɨa, 17kemɨtiyunaki'eriekai yukɨmana Rawiri mɨpaɨ mɨtinaki'eriekaikɨ. Mɨya mɨtinaki'eriekaikɨ, Rawiri kaniutawawirieni mɨkɨ tɨratu hepaɨtsita yamɨtayɨnikɨ. 18Mɨpaɨta katinitahɨawe:
—Metsa mɨhekwa 'ixɨarariyari 'uxa'a kanihɨkɨtɨni. Hikɨ mematsihetɨmaiyatɨ 'a'ɨpari xeikɨa mehexeiyatɨ mekameneta'iwaukuni. 19Kahauyewekamekɨ, warie kenemie meripaitɨ hakewa pemeyuti'awietaxɨtsie, tete 'Etseheri mɨtitewa manuka 'aurie keneyuhayewani. 20Yuri nemɨyɨaneni hepaɨ haikakɨa nekatinitamɨimɨkɨ 'ɨrɨkɨ. 21Hikɨ xeime netsiparewiwame nekanitanɨ'amɨkɨ miwaumiekɨ. Mɨpaɨ xɨka nerehɨaweni: “Neuxei 'ɨrɨ kene'ɨimie 'ena hurawa pukaxɨri”. Mɨkɨ mɨpaɨ pɨti'inɨaritɨni kename 'ahepaɨtsita 'atsikati'ane pekaniyɨwemɨkɨ pemɨnuani. Yawé hɨxie yurikɨ nepaineni. 22Peru xɨka 'ipaɨ nerehɨaweni: “Neuxei humapaitɨ 'ɨrɨ pekahu”, 'ana Yawé yapɨra'eriwani pemɨ'ata'unakɨ. 23Merikɨte Yawé xeikɨa pɨhɨkɨ munierixɨ 'ekɨ matɨa ne ketemɨte'uxa.
24Hikɨ Rawiri 'ɨtsita kaniyuti'awieta. Kepauka maye'a metsa mɨhekwa 'ixɨarariyari, ti'aitame tikwanike mexatsie kaniutiyerɨni, 25'ixumeri 'aurie muwatiyeixatsie. Kunatani meta hɨxiena kanayerɨni, peru 'Awinexi Tsahuri 'aurie kaniutiyerɨni. Rawiri 'uparieya yuxaɨta kaniyuhayewa. 26Hikɨ Tsahuri 'ana tukariyaritsie 'atsipɨka'utayɨ, matsi mɨpaɨ pɨtiu'eri: «Rawiri xɨari yɨkɨ katineiyurieni, 'ayumieme ka'itiyatɨ peyuhayewaxɨ, xɨari pɨkaheyɨwekaxɨa 'aixɨa meyuyurienikɨ». 27Hikɨ 'uxa'arieka, hutarieka tukaritsie metseri mɨhekwa 'ixɨarariyari mekaniuwewieni, Rawiri yɨ'ɨparitsie pɨka'ayeixakai, hikɨ Tsahuri Kunatani mɨpaɨ katiniuta'iwawiya:
—¿Keri titayari 'Itsahi nu'aya takai meta hikɨ kareukuyeixɨa mɨtikwanikɨ?
28Kunatani mɨpaɨ katinita'eiya:
—Rawiri nehetsɨa kaniyutawauni Wereni mɨmiekɨ. 29Mɨpaɨ pɨnerahɨawekai: “Keneneupitɨa ximɨxi nemɨmiekɨ. Ne'iwama mawari mepewewieni wiyari mɨhekwa hetsiemieme nekiekaritsie, nemɨmiekɨ ne'iwa mɨpaɨ pɨnerahɨawekai. Ximɨxi keneneupitɨa nemɨkahayewenikɨ, ne'iwama pɨta nemɨwaxeiyamiekɨ”. Merikɨte 'ayumieme Rawiri pɨkahekuyeixɨawe 'ahamatɨa mɨtikwanikɨ.
30Hikɨ Tsahuri waɨkawa ha'atɨ, Kunatani mɨpaɨ katiniutatieni:
—'Ukaratsi 'axamɨtiuka'iyari pepɨnu'aya. Ne nekatimaikame peti'erie, 'Itsahi nu'aya matɨa kwinimieme xemɨteyunaki'erie, nepɨxeheutewiya 'ekɨ meta 'amaama pɨka'uka'iyari. 31'Ayumieme mexi 'Itsahi nu'aya 'ena 'uyeikani, heitserie pepɨkahexeiya ti'aitame pemayanikɨ. 'Ayumieme mɨwawiemiekɨ ketineutanɨ'a, ke'atɨarieni kaneuyeweka mɨkɨ mɨmierienikɨ.
32Kunatani mɨpaɨ katinita'eiya:
—¿Titayari timierieni? ¿Kekuta tiuyuri?
33Hikɨ Tsahuri ka'ita'eiyawetɨ tepɨa pitsikayari kaneihɨwirieni 'imienike. Hikɨ Kunatani mɨpaɨ katinetimani paapaya Rawiri kemɨtimiemɨkɨkai. 34Kunatani 'uyeha'aka kananukukeni mexatsie 'utikaitɨ, 'ikwai hutarieka tukaritsie mieme pɨkatiukwai. Waɨkawa pɨyuheiweriekai paapaya 'axamutayɨkɨ Rawiri hepaɨtsita.
35Kunatani 'uxa'arieka ximeri kaneyani yeuta Rawiri hamatɨa memeyukaxeiyakɨ. Xewitɨ 'iparewiwameya temaikɨtɨtɨ kaneweiyakaitɨni. 36Mɨpaɨ Kunatani katinitahɨawe: «Nekatinitamɨimɨkɨ 'ɨrɨ pekaniwaumieni pe'unautsarɨmetɨ».
Temaikɨ kaniutanautsa, hikɨ Kunatani 'ɨrɨkɨ katiniutamɨni teewa kaniukaweni. 37Hikɨ kepauka 'ɨrɨ makawetsie maye'a temaikɨ, Kunatani kanitahiwieni: «Humapaitɨ pekamie 'ɨrɨ. Humapaitɨ. 38Xeiya keneumietɨ, pepɨka'ukukiekani». Kunatani mɨpaɨ tiuhiwatɨ pɨkatihayewakai. Hikɨ temaikɨ heiku'ɨka hetsɨana kaninuani minɨ'a hetsɨa. 39Ketɨtɨ mɨtiuyuriekai temaikɨ 'atsipɨkaretima, Kunatani Rawiri hamatɨa xeikɨa mepɨtemaikai ketɨtɨ memɨteyuriekai. 40Hikɨ Kunatani yuparewiwame yu'ɨrɨte katiniyetuirieni, mɨpaɨ katinitahɨawe: «Kenemie kiekaritsie 'a'utɨma ketinakunuitɨa».
41Hikɨ 'iparewiwameya heyaku, Rawiri mɨwayu'awietakaitsie kaniwayeyani, haikakɨa 'akatutsitaka kwiepa kaniukahɨximakeni. Hikɨ 'ana mekaniyutapa mekaniyutawaɨritɨani 'itsiyakɨ me'utitsuatɨ, kepaukake Rawiri muyunɨtɨa.
42Hikɨ Kunatani Rawiri mɨpaɨ katiniutahɨawe: «'Atsipekati'akɨhɨawetɨ kenemie Yawé hɨxie tɨratu temuwewikɨ tame teyuhutatɨ, te'iwawirietɨ 'aixɨa mɨtiyurienikɨ nehetsie meta 'ahetsie metatsiere 'anuiwarima wahetsie meta nenuiwarima wahetsie». Hikɨ 'ana Rawiri kaneyani meta Kunatani kiekaritsie kanakunuani.
Currently Selected:
1 Tsamuheri 20: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
