1 Tsamuheri 15

Tsahuri Yawé kemɨkatitanaki'eri

1Merikɨtsɨ Tsamuheri xeitukaritsie Tsahuri mɨpaɨ katiniutahɨawe: «Yawé kaneniutanɨ'ani hatseiti nemɨmatsikawirienikɨ ti'aitame pemayanikɨ 'Ixaheri kwieyaritsie. 'Ayumieme hikɨta keneu'eni 'ikɨ Yawé niukieya. 2Mɨpaɨ kanaineni Yawé Naimekɨmɨtɨrɨkaɨye: “Nepɨwarupitɨa 'amarekitsixi nemɨtiwakwinitɨanikɨ 'ixaheritsixi 'axamemɨwaruyurikɨ, kepauka 'Ekipitu memayekɨtsie memɨkawarupitɨakɨ wakwietsie memuyekɨnekɨ. 3Merikɨte xekenehu hikɨ kwitɨwa 'amarekitsixi xekenewaretakuya. Naime tita memɨtehexeiya xeketenewareka'uniri, xepɨkawarenenimayaka. Yunaime xekenewarekuya, 'ukitsi, 'ukarawetsixi, tɨɨri meta 'unetsitsixi, watuurutsixi, muxatsi, kameyutsixi meta wapuxurima”».

4Merikɨtsɨ Tsahuri yukuyaxima Terahini kaniwarukuxeɨrieni: kaniwaruti'inɨata huta tsienituyari miriyari mekaniyupaɨmekaitɨni memeuyutakwiwawekai, meta tamamata miriyari mepɨyupaɨmekai Kura kwieyaritsie kiekatari. 5'Amareki kiekariyaritsie mekanekɨne mana mekaniyuti'awieta 'akitsie. 6Kenitsixi 'amarekitsixi mepɨwaruku'eiri Tsahuri mɨpaɨ mɨtiwarutahɨawixɨkɨ: «'Amarekitsixi teɨteriyari wahamatɨa xepɨka'u'uwani xekenehu 'ateewa paitɨ. Kepauka tateɨterima 'ixaheritsixi 'Ekipitu memayekɨ, xeme 'aixɨa xepɨtatexeiyakai, 'ayumieme xeme mɨkɨ wahamatɨa xemɨka'unarienikɨ yanepɨkara'eriwa».

7Hikɨ Tsahuri 'amarekitsixi kaniwarutakwini, Kawira mepitsutɨa 'atsita Tsuhuxi paitɨ mepɨye'axɨa, 'Ekipitu kwieyari maka'atɨkatsie yateewa. 8'Akaki 'amarekitsixi teɨteriyari tiwa'aitɨwame mekaniuwiya 'ayeniereme mekaniuhayewa. Hipame yunaime teɨterimama 'ixiparakɨ mekaniwarukwini. 9'Akaki meka'umieka, Tsahuri yukuyaxima wahamatɨa mekaniwaruhayewata muxatsi 'aixɨa memɨ'anene meta wakaitsixi, tsikerutsixi memɨwaiyatɨarietɨka, meta hipame piinite mɨraye'atɨka xeikɨa. 'Ikɨ naime memɨteheuyehɨani mepɨkayuwaɨri, mɨkatiyunaki'erie 'axamɨti'anene xeikɨa mekateneuyehɨani.

10Merikɨte Yawé Tsamuheri mɨpaɨ katiniutahɨawe: 11«Hikɨke nepɨne'iyaritɨa titayari Tsahuri ti'aitame nerayeitɨa, pɨkanetsi'enie kenemɨrehɨawe yapɨkatikamie».

Tsamuheri waɨkawamekɨ puyutihɨawixɨ, tɨkarikɨ kaniukatariyarieni Yawé hahɨawetɨ mɨreiyehɨwirienikɨ. 12Hikɨ meripai ximeri 'anukukeka kaneyani Tsahuri hetsɨa, peru muwa mɨpaɨ pɨretahɨawarie: «Tsahuri Kaximeri kaneyani, mana tete hetakenike mɨpaɨ tiku'eriwatɨ 'inɨari mayanikɨ, manata mɨyetɨa Kirikari kaneyani».

13Hikɨ kepauka Tsamuheri munua, Tsahuri mɨpaɨ katinitahɨawe:

—Yawé 'aixɨa kematsiyurieka. 'Ari nepɨraye'atɨa Yawé kemɨnetiuta'aitɨa.

14Tsamuheri mɨpaɨ katinitahɨawe:

—Merikɨte xɨka yuritɨni peraye'atɨani, ¿Tita mɨkɨ metehamuxatsima nemɨwa'enie? ¿Tita mɨkɨ metehawakaitsixi watsuari nemɨ'enie?

15Tsahuri mɨpaɨ katinita'eiya:

—'Amareki kwieyaritsie meteneyepini kuyaxi. 'Aixɨa memɨ'anene xeikɨa muxatsi mekaniwarehayewa wakaitsixi meta, Yawé 'akakaɨyari mawari pemɨwewirienikɨ, peru hipame yunaime tekateniwareuyehɨani.

16Tsamuheri mɨpaɨ katinitahɨawe 'akuxi tikuxatakaku:

—'Ari ketineuhayewa. Yawé tɨkarikɨ kemɨneretahɨawixɨ nekamatinitaxatɨamɨkɨ.

Tsahuri mɨpaɨ kaniutayɨni:

—Nepɨmatsi'enieni.

17Hikɨ Tsamuheri mɨpaɨ katinitahɨawe:

—Kaniyuritɨni tsepanetɨ 'ekɨ tixaɨtɨ pemɨkati'a'eriekai, 'ekɨ hikɨ 'ixaheritsixi tiwa'aitɨwame pekanihɨkɨtɨni. Yawé katiniuyurieni mɨmatsi'anayexei 'Ixaheri kwieyaritsie ti'aitame pemayanikɨ. 18Meta mɨkɨ Yawé kametiutanɨ'a 'aitsikaya pemaye'atɨanikɨ. Mɨkɨ mɨpaɨ pɨmatiuta'aitɨa: “Kenemie mɨkɨ 'axateyuruwamete 'amarekitsixi keniwareka'una, keniwarekuya yunaime”. 19¿Titayaritsɨkamɨ Yawé pekaranu'eni? ¿Titayari piinite yuhetsiemieme xetehayeitɨa, titayari Yawé kemɨkatinake petiuyuri?

20Tsahuri mɨpaɨ katinita'eiya:

—Ne Yawé nepanu'eni. Kemɨnetiuta'aitɨa 'aitsikaya nepaye'atɨa. 'Akaki tepewiyaxɨ tepenutahɨa 'amarekitsixi tiwa'aitɨwame, peru 'amarekitsixi yunaime tepɨwarekwi. 21Nekuyaxima memɨtatsi'aye'unie wamuxatsima, wawakaitsixima mekateniwareyehapani, Kirikari Yawé 'akakaɨyari hetsiemieme mawari pemɨwewirienikɨ.

22Tsamuheri mɨpaɨ katinita'eiya:

«¿Tita matsi Yawé tinake:

mawari taiyariyari meta hipame 'imikierite,

nutsu 'aitsikaya kemaine yatepɨtekahuni?

Matsi peuyewetse temi'enieka, keyuri mawari,

yatemɨteyurieka peuyewetse, wai wiya matɨa pɨkaheuyewetse.

23Yemekɨ 'aixɨa pɨka'ane xɨka yakatikamieni, memɨtehetimamateke wahepaɨ pɨ'aneni,

meta muyuta'ɨre, kakaɨyarixi mɨwarayexeiyani hepaɨ pɨtiyurieneni.

'Ekɨ Yawé niukieya pemuku'eirikɨ,

mɨkɨta pumatsi'uku'eiri pemɨkati'aitametɨnikɨ».

24Tsahuri mɨpaɨ kaniutayɨni:

—Yurikɨ pepaine 'axanepɨtiuyuri. Yawé 'aitsikaya nepɨkahaye'atɨa meta 'ekɨ kepemɨnetiuta'aitɨa. Ne kuyaxi nepɨwaretimaka 'ayumieme nepɨwaranu'eni. 25Peru waɨkawamekɨ nepɨmatsiwawirie ke'axanemɨtiuyuri, kenetineuyehɨwiri xɨa, Yawé tepɨtahɨawe tanaitɨ keneukunua.

26Tsamuheri mɨpaɨ katinita'eiya:

—Ne 'ahamatɨa nepɨkamie, Yawé niukieya 'ekɨ pepɨka'anu'eni, mɨkɨta 'ari pɨkamatsinaki'erie, 'ixaheritsixi wahetsie pemɨti'aitanikɨ.

27Hikɨ Tsamuheri 'ari heyaka ta'aurie kanaweni, Tsahuri 'ixurikieya kɨtsimeyaritsie kanitiwiere kanetsanirieni. 28Merikɨte 'ayumieme Tsamuheri mɨpaɨ katinitahɨawe:

—Yawé hikɨ kwitɨwa mɨpaɨ pɨmatiutsaniri 'Ixaheri kwieyari pemɨra'aitatsie, 'aixɨa tiuka'iyarime pɨyetuiri pɨta. 29Yurikɨ Kakaɨyari 'Ixaheri rayu'iwame mayeitɨwa, pɨkati'itawa, pɨkayukupata, tewi kemɨtiuxaxata mɨpaɨ pɨka'ane.

30Merikɨte Tsahuri mɨpaɨ katinita'eiya:

—'Axanepɨtiuyuri. Peru hikɨ nepɨmatsiwawirie 'ukirawetsixi neteɨterima wahɨxie meta 'ixaheritsixi meketemaika kenemɨti'aitame. Meta Yawé 'akakaɨyari temɨtahɨawekɨ tanaitɨ keneukunua.

31Hikɨ Tsamuheri kaniyuwaɨriya mɨkunuanikɨ hamatɨana, Tsahuri 'ana Yawé kaniutahɨawe. 32Hikɨ mana Tsamuheri mɨpaɨ kaniutayɨni:

—'Akaki 'amarekitsixi tiwa'aitɨwame xekenene'atɨiri.

Kepauka Tsamuheri hepa muhanieximekai, 'Akaki mɨpaɨ pɨtiku'eriwakai ka'imienike pɨ'eriekai mɨixa tukari manukamiekaikɨri.

33Tsamuheri mɨpaɨ katinitahɨawe:

—'A'ixipara hipame 'ukarawetsixi mekaniwetɨkaime pɨwaruhayewaxɨ, 'ekɨta 'amaama kaniwetɨ kaniyuhayewamɨkɨ.

Kirikari mɨrakutewatsie mana Yawé hɨxie, Tsamuheri 'Akaki kaneutixitexɨani.

34Tsamuheri Xama mɨrakutewatsie kaneyani, Tsahuri meta Kiweya kaneyani yukie. 35Yawé ti'aitame Tsahuri hayeitɨaka 'Ixaheri kwieyaritsie 'arike pɨka'inakixɨ, 'ayumieme hatsuaku Tsamuheri Tsahuri pɨka'uxei, matsi mɨixa puyuhiweriekai hetsiena mieme.

Currently Selected:

1 Tsamuheri 15: hch

Highlight

Copy

Compare