1 Te'aitamete 3
3
Tsarumuni kemɨtita'iwau mɨtimaiwenikɨ
(1Te 3:4-15 – 2Kem 1:2-13)
1Merikɨtsɨ Tsarumuni, 'ekipitutanaka ti'aitame Parahuni matɨa tɨratu mekaniuwewieni memɨyuparewiekakɨ nu'aya 'utiwitɨka, hikɨ Tsarumuni 'uka Rawiri kiekariena paitɨ kani'atɨani, 'ana 'akuxi yuparatsiyu puwewienekai, meta Yawé tukieya metatsiere Kerutsareme kuraruyari 'amatayewa. 2Mana 'akuxi mɨkatawewiyawekaikɨ tuki Yawé hetsiemieme, teɨteri xeikɨa mepɨtemawatɨwekai tukite 'etsipepemeta. 3Tsarumuni Yawé kaninaki'eriekaitɨni, metatsiere kemɨti'aitɨakai paapaya Rawiri yakatinikamiekaitɨni. Peru mɨkɨta yaxeikɨa kaneta'axekaitɨni hakewa memɨtehetimawakai tukite 'etsipepemeta, mɨtitimawakɨ meta 'ɨkwa putitaiyakai. 4Tuki 'etsimupe waɨkawa mɨmatiwakai Kawahuni rakutewakaku kaniuwekaitɨni, mana kaneta'axekaitɨni Tsarumuni timawamɨtɨ. Heiwa mana xeimiriyari mawari taiyariyari kaniuwewieni, 5hikɨ mana kutsukaku Yawé heinɨtsitana kaniuyuhekɨata mɨpaɨ katinitaxatɨani:
—Kenetineutawawiri tita mɨmatinake nemɨmatiminikɨ.
6Hikɨ Tsarumuni mɨpaɨ katinita'eiya:
—'Ekɨtsɨ waɨkawa pekaninaki'eriekaitɨni mati'uximayatsiriwame Rawiri, nepaapa, mɨkɨ 'aniuyeikakaitɨni yatikamietɨ naimetsie kepemɨtihɨritɨa 'aixɨa 'anemekɨ 'ahetsie tiwiyatɨ, 'iyarieya niheitseriekaitɨni. Hikɨta yaxeikɨa tepɨneniere kepemɨtinaki'erie Rawiri nu'ayatɨme pemanayexeikɨ 'uwenieyatsie mayerɨnikɨ.
7»Yawé nekakaɨyari, hikɨ 'ekɨ ti'aitame pepɨnetsi'ayeitɨa nepaapa Rawiri hetsiemieme. Peru ne matsi 'akuxi nepɨtemaikɨ, 'atsinepɨkatimate kenemɨtiyurieneni. 8Peru 'ena pekaneniuhɨani ne ti'a'uximayatsiriwame teɨteri memɨyumɨire wahɨxie pemɨwaranayexei, teɨteri memɨkayu'inɨatsinɨa. 9Ne nepɨmatsiwawirie mati'uximayatsiriwame nehɨkɨtɨtɨ nemɨtimaiwenikɨ nemɨyɨwenikɨ nemɨtiwata'aitɨanikɨ 'ateɨterima, para nemɨtimaikakɨ ketita 'aixɨa mɨti'ane meta tita 'axamɨti'ane. Mexɨka katixaɨtɨni pekanetsi'uparewieni, xewitɨ pɨkayɨwe mɨtiwaruta'aitɨani 'ikɨ teɨteri memɨyumɨire».
10Yawé pinakixɨ Tsarumuni mɨkɨ mɨtitawawirikɨ. 11'Ayumieme mɨpaɨ Yawé katinitahɨawe:
—Mɨkɨ pemɨnetiutawawirikɨ, pemɨtimaiwenikɨ heitserie pemɨti'aitanikɨ, matsi pɨta tukari mɨireme pemɨka'utawau, xikutɨriya 'ahetsiemieme pemɨka'utawau, yatɨni memɨkwinikɨ memɨmatsi'aye'unie pemɨka'utawau, 12nekametiniyetuiriemɨkɨ pemɨnetiutawawiri, 'iyari timaiweme nekamenimimɨkɨ, meta pekatinimaikamɨkɨ tita 'aixɨa mɨti'ane meta tita 'axamɨti'ane. Xewitɨ mɨpaɨ 'anetɨ pɨkatinuiwawe meta xewitɨ mɨpaɨ pɨkayɨni 'arike. 13Metatsiere tsepa pemɨkanetiutawawiri nepɨmatiyetuirieni, waɨkawa pemɨrexeiyanikɨ, pemɨmariwenikɨ xewitɨ ti'aitame 'ahepaɨ pɨka'aneni pe'uyeikakaku. 14Xɨka yapetikamieni naime ne'aitsikatetsie, 'apaapa mɨtikamiekai hepaɨ Rawiri, tukari waɨkawa nepɨmatsipitɨani.
15Merikɨte kepauka Tsarumuni manutanierixɨ yakatinetimani kehapaɨ mɨtiuheinɨ, hikɨ kanakunuani Kerutsareme. Mana nuaka tɨratu kakuniyari manuka kaneyani hikɨ mawari taiyariyari kaniuwewieni meta kename meyuxewi mawariyari. Metatsiere 'ixɨarari kaniuwewieni yunaime 'iparewiwamete wahetsiemieme.
Tsarumuni kemɨtimaiwekai ti'aitatɨ
16Merikɨtsɨ yapaɨmexɨa tukari 'anukayaku, yuhutatɨ 'ukari tuminikɨ memɨyumayɨinɨa mekaniu'axɨani ti'aitame hetsɨa. 17Xewitɨ mɨkɨ mɨpaɨ katinitahɨawe:
—Neuxei ti'aitame, 'ikɨ 'ukaratsi teyunaitɨ 'uxeikɨa tepayetei xeikiyarita, mɨkɨ nehamatɨa 'ayekaiku ne nepetiniwexɨ, 18hikɨ haika tukari 'anukayaku mɨkɨta petiniwexɨ. Xewitɨ muwa pɨka'ayekatei, matsi tame xeikɨa teyuhutatɨ. 19Merikɨte xeitɨkaritsie 'ikɨ nu'aya kanemɨni hetsiena mahuikɨ warutsieya. 20Peru mɨkɨ tɨkari hixɨapa kananukukeni, mexi nekutsukai neniwe 'utikweka, yuhamatɨa kanikateni, yuniweta mɨmɨki ne'aurie kanititeni. 21Kepauka nemanukuke ne'itsitsitɨanike neniwe, nemixei pɨmɨkikai, 'arike 'ukahekɨareku kwi nemune'ɨwiyaxɨ mɨkɨ neniwe pɨkahɨkɨtɨkai, ke'aneme nemutiniwekai.
22Hikɨ xewitɨta mɨpaɨ kaniutayɨni:
—Hawaikɨ pɨkayuri. Nunutsi kemɨ'ane mayeniere kanineniwetɨni, kemɨ'ane mɨmɨki kani'aniwetɨni.
'Ukaratsi matɨari mɨtiutaxataxɨ mɨpaɨ katinitahɨawe:
—Pekatiniku'itawani. Nunutsi mɨmɨki 'ekɨ kani'aniwetɨni, kemɨ'ane mayeniere kanineniwetɨni.
Mɨkɨ mɨpaɨ mekateniyukɨhɨawekaitɨni ti'aitame hɨxie.
23Hikɨ ti'aitame mɨpaɨ katiniwarutahɨawe:
—Xewitɨ mɨpaɨ mutaine: “Nunutsi kemɨ'ane mayeniere kanineniwetɨni, kemɨ'ane mɨmɨki kani'aniwetɨni”. Xewitɨta mɨpaɨ tiutaine: “Pɨkayuri. Nunutsi mɨmɨki kani'aniwetɨni, mayeniere kanineniwetɨni”». 24Hikɨ mɨpaɨ katiniuta'aita:
—'Ixipara xekenenakwe'iri.
Kepauka memi'atɨiri, 25mɨpaɨ kaniutayɨni:
—Hixɨapa xekeniwawitekiri nunutsi mayeniere, xekeneyetuiri hixɨapa 'akame 'ikɨ, 'iyata xeime.
26Yuri mɨmaamaya waɨkawa yuhiwerietɨ yuniwekɨ mɨpaɨ ti'aitame katiniutahɨawe:
—Neuxei waɨkawa nepɨmatsiwawirie, ti'aitame. Pepɨka'ikumemiwani, mɨkɨ keneyetuiri nunutsi mayeniere.
Peru xewitɨta mɨpaɨ kaniutayɨni:
—Hixɨapa ke'uwitekieni, nehetsiemieme mɨkahɨkɨtɨnikɨ meta 'ahetsiemieme.
27Hikɨ ti'aitame mɨpaɨ katiniuta'aita:
—Hawaikɨ xepɨka'ikumemiwani. Xekeneyetuiri nunutsi matɨari mutaniu, mɨkɨ yemekɨ kanimaamayatɨni.
28Yunaitɨ mekatenetimani 'ixaheritsixi teɨteriyari, kemɨtiwarunɨtsiri mɨkɨ 'ukari, mariweme menayeitɨakaitɨni, metemaitɨ Kakaɨyari mɨtimaiwenikɨ mipitɨakaikɨ heitserie hipame muwapitɨakakɨ.
Currently Selected:
1 Te'aitamete 3: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
