1 Kurinitutari 12

'Iyaritsie timieme ketemɨte'umikiwa

1Ne'iwama, kaneuyeweka 'ipaɨ xemɨtemaikakɨ tita 'Iyaritsie mɨtimieme hepaɨtsita. 2Xeme mɨpaɨ xekatenimaika kemɨti'anekai kepauka Ti'aitame xemɨka'ayexeiyakaitsie. Xekanikuhapanietɨwekaitɨni tetexi memɨkaniuwawe wahetsɨa, kexemɨtekɨhɨawarɨwakai. 3'Ayumieme 'ipaɨ nekatinixetahekɨatɨanikeyu, tewi xɨka mɨpaɨ 'utayɨni: «Ketsutsi 'axaketikuxaxatsiwani», 'utaitɨ, mɨkɨ Kakaɨyari 'Iyarieyatsie tiwiyatɨ pɨka'utaine. Mɨkɨ meta, tewi xɨka mɨpaɨ 'utayɨni: «Ketsutsi katini'aitametɨni», 'utaitɨ, 'Iyari Mɨtiyupatatsie tiwiyatɨ xeikɨa kaniyɨweni mɨpaɨ mutayɨni.

4Yɨkɨ tepɨte'umikiwa, 'Iyari yuxewikaku. 5Yɨkɨ tepɨte'uhɨritɨariwa, Ti'aitame yuxewikaku. 6Yɨkɨ tepɨtekuyuitɨariwa, Kakaɨyari yuxewikaku. Mɨkɨ kanihɨkɨtɨni kemɨ'ane yunaime mɨwakuyuitɨwa naimekɨ. 7Taxexuime tahetsie, 'Iyari matsiɨkɨtɨ kanayeitɨariwani, 'aixɨa temɨ'itɨarienikɨ tanaitɨ. 8Xewitɨ kanipitɨarieka mɨtaniunikɨ timaiweme hepaɨ, 'Iyari yatipitɨakaku. Xewitɨta kanipitɨarieka waɨkawa mɨrakumaikakɨ, mɨkɨtɨtɨ 'Iyari yuxewitɨ kemɨtipitɨa. 9Xewitɨta kanipitɨarieka yuri mɨti'eriekakɨ, mɨkɨ 'Iyaritsie tiwiyatɨ. Xewitɨta kanipitɨarieka 'aixɨa meteheu'eriekame muwarayeitɨanikɨ tekwikwikate, mɨkɨ 'Iyari muyuxewitsie tiwiyatɨ. 10Xewitɨta kanipitɨarieka mariwemekɨ yamɨtiyurienenikɨ, xewitɨta mɨtikuxatanikɨ, xewitɨta 'iyarite mɨ'inɨatanikɨ, xɨka 'aixɨa 'aneneni yatɨni xɨka 'axa'aneneni. Xewitɨta hipame niukiyarikɨ mɨtaniunikɨ kanipitɨarieka, xewitɨta hipame niukiyarite kemɨtikuxaxatsiwa mɨhekɨatanikɨ. 11Mɨkɨ 'Iyari yuxewitɨ kanihɨkɨtɨni kemɨ'ane mɨwakuyuitɨwa yunaime. Yɨkɨ katiniwapitɨaka yuxexuime, kemɨtiyuwaɨriya.

Xeiwaiyari tekanakɨne teyunaitɨ

12Yaxeikɨa tawaiyari kaniyuxewini, tamamate, ta'ɨkate, tateni naitɨ timɨirekaku. Naitɨ tawaiyaritsie timieme timɨirekaku muyuxewi hepaɨ waiyari, mɨpaɨta kani'aneni Kɨritsitu. 13'Iyari muyuxewi kemɨtatiutaxewiriyaxɨ, xeiwaiyari tekanakɨne kepauka temuka'ɨyarie, tsepa Huriyutsixi Kɨriyekutsixi temɨhɨkɨ, tsepa waɨriyarika temɨte'uximaya, tsepa temɨxɨxɨni. Teyunaitɨ tekaniuharitɨarieni, 'Iyari yuxewikaku.

14Mɨkɨ meta, rawaiyari xeimamayari xei'ɨkayari pɨkahɨkɨ. Pɨmɨire pɨta. 15Ra'ɨka xɨka mɨpaɨ hainenike: «Ne ramama nemɨkahɨkɨkɨ, 'ayumieme rawaiyaritsie nepɨkamieme», mɨpaɨ 'utayɨka xeikɨa rawaiyaritsie kamiemetɨtɨ pɨka'ayanikeyu. 16Ranaka xɨka mɨpaɨ hainenike: «Ne rahɨxite nemɨkahɨkɨkɨ, 'ayumieme rawaiyaritsie nepɨkamieme», rawaiyaritsie kamiemetɨtɨ pɨka'ayanikeyu, mɨpaɨ 'utayɨka xeikɨa. 17Rawaiyari naitɨ xɨka hɨxitetɨnike, ¿keti'enanikeyu? Naitɨ xɨka nakatɨnike, ¿keri reu'ɨkwenikeyu? 18Peru hikɨ Kakaɨyari rawaiyaritsie kanikayatsa xexuime kemɨtinake. 19Xɨka naitɨ xeipaɨriyaritɨnike, ¿keri tihɨkɨtɨnikeyu rawaiyari? 20Matsi pɨmɨire, peru rawaiyari kaniyuxewini.

21Rahɨxi pɨkayɨwe mɨpaɨ mɨtitahɨawe ramama: «Nepɨkamatsiheuyehɨwa», 'utaitɨ. Yaxeikɨata ramu'u pɨkayɨwe mɨpaɨ mɨtitahɨawe ra'ɨkate: «Nepɨkaxeheuyehɨwa», 'utaitɨ. 22Matsi tita katitɨrɨkawime temɨte'erie, mɨkɨ yemekɨ tepeuyehɨwa. 23Tawaiyaritsie timieme, tita 'aixɨa kati'aneneme temɨxata, mɨkɨ tekanikemaritɨaka matsi. Tawaiyaritsie tita witsimɨkatixeiyarie, witsi'anenetɨ matsi kanayeitɨariwani, 24tita witsimɨtixeiyarie mɨpaɨ mɨkareuyewetsekɨ. Matsi Kakaɨyari kanitaxewiriyani tawaiyari, 'aixɨa 'iyurienetɨ matsi tita tixaɨtɨ mɨreuyehɨwa, 25tawaiyari kapa hixɨata tsaninikɨ, matsi tita tawaiyaritsie mɨtimieme yaxeikɨa mɨtiyɨ'ɨwiyanikɨ naitɨ. 26Xeipaɨriyari xɨka tikuyeni, naitɨ hamatɨana katinikuyekamɨkɨ. Xeipaɨriyari xɨka witsi'u'itɨarieni, naitɨ hamatɨana kaniyutemawiekamɨkɨ.

27Xemeri Kɨritsitu waiyarieya xekanihɨkɨtɨni. Yuxexuitɨ waiyarieyatsie timieme xeipaɨriyari xekanihɨkɨtɨni, kexemɨte'upitɨarie. 28Mɨkɨ memeyutixexeɨriwatsie, Kakaɨyari hipame meri kaniwarukayatsa nɨ'ariekate, 'ariketa Kakaɨyari niukametemama, 'ariketa te'ɨkitamete, 'anariketa mɨkɨ mariwemekɨ memɨteyurie, 'ariketa mɨkɨ memɨte'umikie 'aixɨa meteheu'eriekame tekwikwikate memɨwarayeitɨwanikɨ, teparewiwamete meta te'aitamete, mɨkɨta hipame niukitekɨ memutiniuka. 29¿Yunaitɨ nɨ'ariekate kemetehɨkɨ? ¿Yunaitɨ Kakaɨyari niukametemama kemetehɨkɨ? ¿Yunaitɨ te'ɨkitamete kemetehɨkɨ? ¿Yunaitɨ mariwemekɨ kemeteyurie? 30¿Yunaitɨ kemete'umikiwa 'aixɨa meteheu'eriekame memɨwarayeitɨwanikɨ tekwikwikate? ¿Yunaitɨ hipame niukiyaritekɨ kemete'utiniuka? ¿Yunaitɨ kemete'ihekɨata tita mɨtikuxaxatsiwa hipame niukiyarikɨ metekuxatakaku? 31Xekeneyuwaɨriyani 'aixɨa 'aneneme matsi xemɨtemikienikɨ. 'Akuxi huye yemekɨ 'aixɨa mɨ'ane nekanixetahekɨatɨamɨkɨ.

Currently Selected:

1 Kurinitutari 12: hch

Highlight

Copy

Compare