Lituto za Siraki 39
39
Muituti
1Kono ha ku cwalo ku mutu ya isize
hahulu moya wa hae
ku za Mulao wa Ya Pahami Hahulu.
U batisisa hahulu ka za butali
bwa baikale,
mi ka nako ya hae kamukana u ituta
za bupolofita.
2U buluka lipulelo za batu ba ba
tumile,
mi u utwisisa hande buniti
bwa linguli.
3U batisisa ku ziba litaluso
za linguli,
ni ku nahana ka za ku sa utwahala
hande kwa zona.
4U sebeleza linabi,
mi u bonahala fapil'a babusi.
U zamaya mwa linaha li sili
mi u ziba bunde ni bumaswe bwa mutu.
5Masa h'a patalala,
u ipeya ku Mulimu y'a mu bupile,
ka pilu ya hae kamukana.
U inyaza fapil'a Ya Pahami Hahulu,
wa lapela, mi u kupa swalelo ya libi
za hae.
6Haiba ki tato
ya Muñ'a Bupilo ya Maata,
u ta fiwa hahulu moya wa kutwisiso,
u ta bulela manzwi a butali,
mi u ka itumela ku Muñ'a Bupilo
ka litapelo.
7U ta ba ni ngana ni zibo,
mi u ta nahana hahulu
ka za likunutu za Muñ'a Bupilo.
8U ta hasanya tuto y'a fumani
a nz'a sepile Mulao wa bulikani
bwa Mulimu.
9Ba bañata ba ta lumba kutwisiso
ya hae mi ha i na ku libalwa.
Kupuzo ya hae ha i na ku timela
mi libizo la hae li ta ba teñi
kwa masika kamukana.
10Macaba a ta zibahaza butali bwa hae
mi mukopano u ta eza mukiti
wa ku mu lumbeka.
11Haiba a pila nako ye telele
libizo la hae li ka tuma hahulu
ku fita mabizo a mañwi a sikiti,
mi nihaiba a shwa,
ku yena kwa mu likana.
Ku bizezwa kwa ku lumbeka Mulimu
12Ni lakaza ku ekeza hahulu minahano
ya ka.
I ni hulisa inge kweli ha se i hulile.
13Mu ni teeleze, mina bana ba ba
lukile,
mi mu hule sina palisa ye nde
ye fa munanga wa nuka.
14Mu nunke hande sina insense,
mu tubule inge palisa ya mulilima,
mu hasanye mukwa wa mina o munde,
mi mu opele pina ya ku lumba
mu nze mu lumbeka Muñ'a Bupilo
ka misebezi ya hae kaufela.
15Mu bulele butuna bwa misebezi
ya hae,
mi mu hulise butumo bwa hae ka pina
ni ka liopeliso.
Mi wo ki ona mukwa o mu lukela
ku mu opelela ka ona,
16“Misebezi kamukana ya Muñ'a Bupilo
ki ye minde cwañi!
Mu bone, z'a laela kaufela
za ezahala!”
Mu si ke mwa li,
“Se kiñi? Kiñi sani ha si li cwalo?”
Kamukana li ta itutwa ka nako
ye lukela.
17Ka linwzi la hae, mezi h'a bubi
mi a kubukana hamoho.
Mezi a kubunyizwe ka taelo ya hae.
18Ka taelo ya hae z'a lata kamukana
ze ezahala,
mi ha ku na ya kona ku paleliswa
maata a hae ku tusa.
19Likezo za libupiwa kamukana li
fapil'a hae.
Ha ku na s'a sa boni.
20U bona kwa makalelo ni mafelelezo
a lika, kuya kuile,
mi ha ku na se si ka mu komokisa.
21Mu si ke mwa li,
“Se kiñi? Kiñi sani ha si li cwalo?”
Lika kamukana li ezelizwe litukelo
za zona.
22Limbuyoti za hae li apesa mubu
kamukana inge nuka,
ni ku u tibisa sina muunda.
23Kono u kona ku bonisa buhali
bwa hae kwa macaba,
sina mw'a n'a ezelize h'a fetula
mezi a mande lizwai.
24Mikwa ya hae ki ye minde hahulu
ku ya lukile,
sina mo i talezi ze sitatalisa
ku ya maswe.
25Lika ze nde ne li lukiselizwe
batu ba bande i sa li kwa simuluho,
sina bumaswe ha ne bu li
bwa baezalibi.
26Lika ze tuna ze tokwahala
mwa bupilo
ki mezi, mulilo, sipi, lizwai,
bupi bwa buloto, mabisi, linosi,
waine, mafula ni liapalo.
27Lika ze kamukana ki ze nde
ku ba ba lukile
sina mo li bela bumaswe kwa baezalibi.
28Mioya ye miñwi ne i ezelizwe
ku utwisa batu butuku.
Mulimu u i ezelize kuli i be tupa
ya bunyemi bwa hae.
Ka lizazi la bufelo i ta eza misebezi
ya yona
ni ku taleleza bunyemi
bwa ya i ezize.
29Mulilo, simbwewewe, tala ni lifu,
ze kamukana ne li ezelizwe
ku utwisa batu butuku.
30Meeno a libatana ze buhali, tubanze
ni limili,
ni mikwale ye itusiswa ku timeza
ba ba maswe,
ni zona li ezelizwe
ku utwisa batu butuku.
31Zeo kamukana li utwa litaelo
za Mulimu.
Li inzi mwa lifasi li nze li itukisize,
mi nako ha i ta fita ha li na ku hana
taelo ya hae.
32Kikabakaleo ni tiisize ku zwa
kwa makalelo,
ni nahanile, mi ni li ñozi cwana,
33“Misebezi ya Mulimu kaufela
ki ye minde,
mi u ta fa mutu ni mutu
ze tokwahala kaufela ka nako ya teñi.
34Mu si ke mwa li, ‘Se, si fita sani,’
kakuli linto kamukana li ta
bonahaza bunde, ka nako ya zona.
35Cwalehe, u opele ka pilu
ni ka linzwi la hao kaufela,
mi u lumbeke libizo la Muñ'a Bupilo!”
Currently Selected:
Lituto za Siraki 39: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.