Lituto za Siraki 33
33
1Haiba mutu a saba Muñ'a Bupilo
h'a na ku telwa ki bumaswe,
mi u ta puluswa mwa miliko ya hae
hañata.
2Mutu ya toya Mulao h'a na butali,
kono ya sa u kuteki ka pilu ya hae
kaufela
u swana inge sisepe se si
mwa liñungwa le lituna.
3 #
Mut 28.30; Litu 45.10 Mutu ya na ni kutwisiso u ta sepa
hahulu Mulao,
kakuli, ku yena, Mulao u sepahala
hahulu sina litaluso za Mulimu.
4U lukise pulelo ya hao,
mi batu ba ta ku teeleza.
U zibe taba hande,
u si ka alaba kale.
5Maikuto a sikuba a swana inge wili
ya sikocikala,
mi muhupulo wa hae u pindumuka
sina sipi ye zamaisa wili.
6Mulikani wa mashendo u swana
ni pizi ya munna
ye lilela mañi ni mañi ya i pahama.
Ku sa likana kwa lika
7Kiñi lizazi le liñwi
ha li li le linde ku fita le liñwi,
kanti liseli la ona kaufela mwa
silimo ni silimo li zwa fa lizazi?
8A fapahanyizwe ki muhupulo
wa Mulimu
ya lukisize linako ni mikiti.
9A mañwi u a ezize a matuna
ni ku a kenisa hahulu,
mi a mañwi u a ezize mazazi feela.
10Batu kamukana ba zwa fa mubu,
mane yena Adama kasibili
n'a bupilwe ka lizupa.
11Mulimu u fapahanyize batu
ka ngana ya hae ye tuna
ni ku lukisa mikwa ya bona.
12U tohonolofalize ba bañwi
ni ku ba hulisa.
U kenisize ba bañwi
ni ku ba suteleza ku yena,
kono ba bañwi u ba kutile
ni ku ba swabisa hahulu,
ka ku ba kutiseza mwa litulo
ze kwatasi.
13Sina mo li inezi lizupa mwa mazoho
a mubupi
kuli u li bupa mw'a latela,
kihona mo ba inezi ni bona batu
ku Mubupi wa bona.
U ba fa mipuzo mw'a ba bonela.
14Ku talimana ni lifu ki bupilo,
mi kamukwaoswana ya hanyeza za mutu
ya lata Mulimu ki muezalibi.
15Wo ki ona mukwa wa ku talima
misebezi ya Ya Pahami Hahulu.
I zamaya, i bapani cwalo ka bubeli,
inze i singanya.
16Na ka sibili ne ni bile
wa mafelelezo kwa ku taha,
sina mukutuli ya latelela
ba ba nopa miselo ya veine.
Ka limbuyoti za Muñ'a Bupilo
ni bile wa pili kwa ku fita,
mi ni talize silubelo sa ka sa waine
sina mo li talezi za bona.
17Mu lemuhe kuli
ha ni sa ka t'o ikataleza
ili na feela ni li nosi,
kono ni ezelize ni ba ba bata tuto
kaufela.
18Mu utwe, mina linabi za batu!
Bazamaisi ba mukopano, mu teeleze!
Tukuluho
19Mwa bupilo bwa hao kamukana,
u si ke wa fa maata a hao
ku mwana wa mushimani,
kamba ku musali,
nihaili ku mwanahenu
kapa ku mulikan'a hao.
Hape u si ke wa fa tutu ya hao
kwa batu,
kakuli mwendi u ka swana wa inyaza
mi wa ba ni muhupulo wa ku li kutisa.
20Mwa bupilo bwa hao kaufela,
u si ke wa fa mutu maata a hao.
21Ki hande hahulu kuli bana
ba hao ba kupe lituso ku wena,
ku fita kuli wena u itinge ku bona.
22Mwa lika kaufela z'o eza i be wena
yo muhulu,
mi u si ke wa isinyeza likute la hao.
23Lizazi la lifu la hao ha li se li
sutelezi,
ki yona nako ye nde ya ku aba lifa
la hao.
Batanga
24Se si lukela mbongolo
ki bucwañi, ku natwa, ni mulwalo.
Se si swanela mutanga
ki lico, mamelo, ni musebezi.
25U sebezise mutang'a hao ka tata
mi u ta ba ni kozo mwa pilu.
Haiba u ka mu tuhela a itulela feela,
u ka tuha a hupula ku ipumanela
tukuluho.
26Joko ni tumo li ta mu inamisa,
kono ku mutanga wa sisinyi
ku na ni manyando
ni ku utwiswa butuku hahulu.
27U mu patehise kamita
kuli a si ke a ina feela,
kakuli buzwa bu luta mikwa kaufela
ye maswe.
28Kamita u mu sebelise
kakuli ki swanelo ya hae ku eza cwalo.
Haiba a ba ya sa utwi,
mu tame ka mawenge.
29Kono u si ke wa hapeleza hahulu
mutu kaufela,
mi u si ke wa eza ze sa lukeli.
30Kana u na ni mutanga a li muñwi
feela?
Mu pilise hande sina m'o ipiliseza
wena,
kakuli u mu fumani ka mali a mañata.
31Mu eze sina mwanahenu,
kakuli u ka mu tokwa
sina m'o itatela ili wena.
Ha u ta mu kataza mi a toba,
u ta mu batela kai?
Currently Selected:
Lituto za Siraki 33: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.