Bafilipi 1

Litumeliso

1 # Lik 16.12 Liñolo le, li zwa ku Paulusi ni Timotea, batanga ba Jesu Kreste. Lu ñolela balumeli kaufela ba ba yahile mwa Filipi, ba ba lumela ku Jesu Kreste, hamohocwalo ni bazamaisi ba keleke ni batusi ba yona.

2Mu fiwe sishemo ni kozo ki Mulimu Ndat'a luna ni Mulena Jesu Kreste.

Tapelo ya Paulusi kwa bakreste ba mwa Filipi

3Kamita ha ni mi hupula, ni itumela ku Mulimu wa ka, ka ku mi lapelela ku yena. 4Nako kaufela ha ni mi lapelela, ni lapela ni nze ni tabile. 5Ni eza cwalo kabakala mukwa o mu ni tusize ka ona mwa ku hasanya Litaba ze Nde ku kala ka lizazi la pili, mane ku t'o fita nako ye. 6Ni na ni niti ya kuli Mulimu, ya kalile musebezi o munde wo ku mina, u ta zwelapili cwalo, a nz'a u kondisa mane u felelele ka Lizazi la Jesu Kreste. 7Mu mwa pilu ya ka ka nako kaufela! Mi kwa ni swanela ku ikutwa cwalo kabakala mina kaufela, kakuli mu kopanezi kamukana litohonolo le ni filwe ki Mulimu, i be cwale ha ni inzi mwa tolongo, kapa ha ne ni sa kona ku lwanela ni ku tiisa Litaba ze Nde ni nze ni lukuluhile. 8Mulimu wa ziba kuli ni bulela niti ha ni li ni mi lata kaufela ka lilato le lituna la Jesu Kreste.

9Mwa tapelo ye ni fitisa ku Mulimu bakeñisa mina ni kupa kuli lilato la mina li hule mwa zibo ni mwa kutwisiso kaufela. 10Kamukwacwalo mu ka kona ku lumelela ze lukile kaufela, kuli mu lukuluhile kwa masila kaufela ni kwa ku nyaziwa ka Lizazi la Kreste. 11Bupilo bwa mina bu ta tala ze lukile feela, ze kona ku fiwa ki yena Jesu Kreste a nosi, ili zeo kanya ya Mulimu i ta lumbiwa ka zona.

Ku pila ki ka Kreste

12Banabahesu, ni lakaza kuli mu zibe se. Lika ze ni tahezi li tusize luli ku zwisezapili Litaba ze Nde. 13#Lik 28.30 Mane balibeleli ba ndu ya mulena ni ba bañwi kaufela ba ziba hande-nde kuli ni mwa tolongo kakuli ni mutang'a Kreste. 14Ha ba ni bona mwa tolongo, banabahabo luna ba bañata ba tiya mwa ku sepa Mulena. Bundume bwa bona bwa ekezeha ka nako ni nako, mi ba luta Linzwi la Mulimu ba sa sabi se siñwi.

15Ki niti kuli ba bañwi ku bona ba luta za Kreste kakuli ba ni shwela muna, mi ba bata likañi. Kono ba bañwi ba luta za hae ka lipilu ze nde. 16Bao, ba eza cwalo ka lilato, ba nze ba ziba kuli Mulimu u ni file musebezi wa ku lwanela Litaba ze Nde. 17Ba bañwi ha ba buleli za Kreste ka busepahali, kono ili ka moya wa likañi, ba nze ba hupula kuli, ka ku eza cwalo, ba ka ni zieza ni ku fita, ha ni sa li mwa tolongo.

18Ha ku na taba! Na, kwa ni tabisa kuli ku lutwe ka Kreste ka mukwa ufi kamba ufi, mihupulo ya bona niha i ka ba ye minde kamba ye maswe. Mane ni ka na ni taba cwalo. 19Ni ziba kuli kabakala litapelo za mina, ni tuso ya Moya w'a ni fa Jesu Kreste, ni ta lukuluha kwa mafelelezo. 20Takazo ya ka luli, ni sepo ya ka, kikuli ha ni na ku palelwa musebezi wa ka, kono ka linako kaufela, sihulu ka yona nako ye, ni ta ba ni bundume, ili kuli ka butu bwa ka kaufela ni tise kanya ku Kreste, i ka ba ni sa pila kamba ni shwile. 21Kakuli bupilo kiñi? Ku na, bupilo ki Kreste, mi lifu ki ñambeko fahalimw'a bufumu bwa ka. 22Kono mwa bupilo, haiba ni sa kona ku eza musebezi o' na ni tuso, fo ha ni zibi se ni lukela ku keta. 23Ni swalehile kafa ni kafa. Ni lakaza hahulu ku siya bupilo bo, ni y'o ina ni Kreste, ili nto ye nde ka ku fitisisa. 24Kono kabakala mina, i ne i ka ba nto ya butokwa hape ha ne ni ka pila. 25Ni kolwa cwalo, mane ni ziba kuli ni ta pila. Ni ta ina ni mina kaufela, ku mi tusa ku zwelapili ni ku ba ni tabo mwa tumelo. 26Cwale, ha ni ka ina hape ni mina, mu ka kona ku itumba hahulu ka na, mwa bupilo bwa mina ni Jesu Kreste.

27Kono ku be cwañi ni cwañi, nto ya butokwa kikuli mwa bupilo bwa mina, mu pile ka mukwa o' lumelelana ni Litaba ze Nde za Kreste kuli, haiba ni ta kona kapa ni ta palelwa ku t'o mi bona, ni utwe kuli mu tiile hamoho mwa mulelo u li muñwi, ni kuli mu lwanela hamoho ni ka pilu i liñwi tumelo ya Litaba ze Nde. 28Mu si ke mwa saba lila za mina. Mu tiye lipilu! Fo i ta ba sisupo sa kuli ba ta sinyeha, mi mina mu ta puluswa. Mi ku puluswa koo ku zwa ku Mulimu! 29Kakuli mu filwe litohonolo la ku sebeleza Kreste, isiñi ka ku lumela feela ku yena, kono ni ka ku mu nyandela. 30#Lik 16.19-40 Cwale mu swalisane ni na kwa ku lwana. I sa li yona ndwa yeo ye ne mu ni boni ni nze ni i lwana, yeo ni sa i lwana ni cwale sina mo mu zibela.

Currently Selected:

Bafilipi 1: Lozi09

Highlight

Copy

Compare