Simuluho 16
16
Hagare ni Ishimaele
1Sarai, musal'a Abrame, n'a si ka pepa bana. Kono na na ni mutanga wa musali wa Muegepita, ya n'a bizwa Hagare. 2Sarai kih'a li ku Abrame, munn'a hae, “Bona, Muñ'a Bupilo h'a si ka ni fa lupepo. Kiñi ha u sa kopani ni mutang'a ka yo? Mwendi n'a ka ni pepela mwana.” Abrame a lumela. 3Cwale Sarai a nga Hagare, mutang'a hae wa Muegepita, mi a mu fa Abrame kuli a mu nyale. Taba ye ya ezahala Abrame ha s'a pilile lilimo ze lishumi mwa Kanana. 4Abrame ha s'a zibile Hagare, mutanga yo a itwala. Mi Hagare ha s'a boni kuli u itwezi, a kala ku ikuhumusa ni ku nyaziseza Sarai.
5Sarai kiha s'a li ku Abrame, “Ki mulatu wa hao Hagare h'a ni nyaziseza. Na kasibili ni ku file mutang'a ka, mi haisali a bona kuli u s'a itwezi, s'a kala ku ni nyaziseza. Cwalehe, Muñ'a Bupilo a ikatulele ya fosize mwahal'a luna kuli ki mañi?”
6Abrame a alaba, a li, “Ku lukile, ki mutang'a hao, mi hape u laulwa ki wena. U ikezeze m'o latela ku yena.” Cwale Sarai a mu nyandisa, mane Hagare a ba a toba.
7Lingeloi la Muñ'a Bupilo la katana ni yena mwa lihalaupa, kwatuko a lisima le li mwa nzila ye liba kwa Shuri. 8La li ku yena, “Hagare, mutang'a Sarai, u zwa kai mi hape u ya kai?”
Yena a alaba, a li, “Ni sabile Sarai.”
9Lingeloi la li, “Kutela ku yena, mi u y'o ipeya kwatas'a hae.” 10Cwale la zwelapili, la li, “Ni ta ku fa baikulu ba bañata ba ba si ke ba konwa ku balwa. 11U tuha u pepa mwana wa mushimani ya ta bizwa Ishimaele, kakuli Muñ'a Bupilo u utwile sililo sa manyando a hao. 12Kono mwan'a hao u ta pila sina mbongolo ye si ka tapiswa. U ka toyana ni batu kamukana, mi ni bona batu ba ka mu toya. U ta pila kwahule ni banabahabo kaufela.”
13Hagare a ipuza, a li, “Kana luli ye ni boni fa, ki ya ni bona, nji?” Cwale kih'a biza Muñ'a Bupilo ka libizo, a li, “Wena, u Mulimu ya ni bona.” 14Kikabakaleo batu ha ba biza lisima le li mwahal'a Kadeshi ni Beredi, Lisima la Ya Pila ya ni bona.
15 #
Magal 4.22
Hagare a pepela Abrame mwana wa mushimani, mi a mu biza Ishimaele. 16Abrame n'a s'a na ni lilimo ze mashumi a supile ka li li liñwi ni ze silezi.
Currently Selected:
Simuluho 16: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.