Magalata 4

1Se ni bulela ki se. Shwana u swana sina mutanga h'a sa li yo munyinyani, nih'a li muñ'a lika kamukana. 2H'a sa li yo munyinyani, u mwa pabalelo ya batu ba ba mu bonela kwa maneku kaufela ku fitela nako ye tomilwe ki ndat'ahe. 3Kamukwaocwalo, ni luna ne lu li mwa butanga bwa lituto za lifasi ze ne sa fokola ha ne lu sa li banana, lu si ka hula kale. 4Kono nako ye n'e tomilwe ha i se i fitile, Mulimu a luma Mwan'a hae. A pepwa ku musali, mi a pila mwatas'a Mulao wa Sijuda. 5#Baro 8.15-17 A t'o lukulula ba ba ne ba li mwatas'a Mulao, ili kuli lu kone, ka mukwa o cwalo, ku ba bana ba Mulimu.

6Ku bonisa kuli mu bana ba hae luli, Mulimu u lumelezi Moya wa Mwan'a hae mwa lipilu za luna, Moya o nz'o huwa, u li, “Ndate!” 7Kabakaleo, ha u sa li mutanga, kono u s'o li mwana. Mi ha u s'o li mwan'a hae, Mulimu u ta ku fa z'a na ni zona kaufela z'a bulukezi bana ba hae.

Paulusi u bilaezwa ki Magalata

8Kale ne mu sa zibi Mulimu, mi ne mu li batanga ba be ne si milimu luli. 9Kono cwale ha mu se mu zibile Mulimu, kapa ni bulele cwana, ha mu se mu zibilwe ki Mulimu, kiñi cwale ha mu kutela kwa lituto ze fokola ze si na tuso? Kiñi ha mu sa bata ku ba batanga ba zona hape? 10Mu tokomela hahulu mazazi a mañwi, ni likweli, ni linako, ni miaha! 11Na saba kabakal'a mina, kuli mwendi musebezi o ni ezize ku mina i bile o si na tuso.

12Banabahesu, se ni kupa ku mina kikuli mu swane ni na, sina na, ha ni ikezize ya swana ni mina. Ha ku na se mu ni foselize. 13Mu sa hupula libaka ha ni mi lutile Litaba ze Nde za Mulimu lwa pili. Ki kakuli ne ni kula. 14Ne ni fokola mwa mubili, mi ne ni li muliko ku mina. Kono ha mu si ka ni shwaula, kamba ku ni hana. Mane mwa ni amuhela inge lingeloi la Mulimu, inge Jesu Kreste kasibili! 15Ne mu tabile hahulu. Cwale ku felezi kai? Na kasibili ni kona ku mi pakela kuli kabe ne ku konahala ne mu ka be mu longozi meeto a mina ni ku ni fa ona. 16Kana kikuli ni fetuhile sila sa mina ka ku mi bulelela niti, nji?

17Ba bañwi bao, ba bonahala ku mi tabela hahulu, kono mihupulo ya bona ha si ye minde. Se ba bata feela ki ku mi kauhanya ni na, kuli mu wele ku bona. 18Ki nto ye nde ku hohiwa ki batu, haiba ba mi hohela ku ze nde. Mane ku tokwahala kuli ku be cwalo kamita, isiñi feela ha ni inzi ni mina. 19Bana ba ka ba ba latiwa! Ni utwa hape butuku hahulu kabakala mina, butuku bo bu swana ni bwa musali h'a indukilwe. Mi i ta ba cwalo ku fitela Kreste f'a ka bupehela ku mina. 20Ha si mo ne ni ka tabela ku ba ni mina ka nako ye, ni zibe hande se ni swanezi ku bulela. Ni zielehile luli ka mina.

Nguli ya Agare ni Sara

21A mu ni bulelele mina mu lata ku ba mwatas'a Mulao. Kana ha mu utwi se si bulelwa ki Mulao? 22#Sim 16.15; 21.2 Mulao u li, Abrahama n'a na ni bana ba babeli. Yo muñwi n'a pepilwe ki musali wa mutanga. Yo muñwi ne li wa ku musali wa mulukuluhi. 23Mwan'a hae wa ku mutanga n'a pepilwe ka mukwa o lu twaezi, kono haili wa ku musali ye si mutanga, n'a pepilwe ka ku sepiswa ki Mulimu. 24Taba ye i ka ngiwa inge nguli. Basali bao ba babeli ba swanisa litumelelano ze peli ze ama bulikani bwa Mulimu. Tumelelano ye ñwi, ye swaniswa ka Agare, ki ya fa Lilundu la Sinai. Bana ba yona ba pepiwa ba li batanga. 25Agare u yemi bakeñisa Lilundu la Sinai le li mwa Arabia, mi ki siswaniso sa munzi wa Jerusalema wa nako ye, kakuli u mwa butanga hamoho ni batu ba ona kamukana. 26Kono Jerusalema wa kwa lihalimu u lukuluhile, mi ki yena m'a luna. 27#Isa 54.1 Kakuli ku ñozwi kuli,

“U tabe, wena musali ya si ka ba ni bana!

U lulueze mi u huwe ka tabo,

wena ya si ka utwa butuku bwa ku pepa!

Kakuli musali ya n'a hanilwe u ta ba

ni bana ba bañata ku fita musali

ya inzi ni munn'a hae.”

28Haili mina, banabahesu, mu bana ba ba pepilwe ka sepiso ya Mulimu sina mw'a n'a inezi Isaka. 29#Sim 21.9 Ka yona nako yeo mwana ya n'a pepilwe ka mo lu twaelezi n'a lwanisa ya n'a pepilwe ka Moya wa Mulimu, mi ki mo ku inezi ni ka nako ye. 30#Sim 21.10 Kono ze ñozwi li talusañi? Li talusa cwana, li li, “Leleka musali wa mutanga ni mwan'a hae, kakuli mwan'a mutanga h'a na ku ikabela lifa ni mwan'a musali ya lukuluhile.” 31Cwale banabahesu, ha lu bana ba musali wa mutanga, kono lu bana ba musali wa mulukuluhi.

Currently Selected:

Magalata 4: Lozi09

Highlight

Copy

Compare