Magalata 1

1Ki na Paulusi, ya bizelizwe ku ba muapositola, isiñi ka tato ya batu, kapa ka taelo ya mutu, kono ili ka taelo ya Jesu Kreste ni ya Mulimu Ndate ya mu zusize kwa bafu. 2Banabahesu kaufela ba ba kwanu ba kopana ni na ku fitisa litumeliso kwa likeleke ze mwa Galatia kaufela.

3Mu fiwe sishemo ni kozo ki Mulimu Ndat'a luna ni Mulen'a luna Jesu Kreste.

4Kreste u ineezi, kabakala libi za luna, ku lu lukulula kwa lifasi le li maswe la nako ye. Ka ku eza cwalo, u petile s'a n'a lata Mulimu Ndat'a luna. 5Kanya i be ku Mulimu kamita ni mita! Amen.

Evangeli ki i liñwi

6Ni komokile hahulu ha mu fulalezi kapili-pili cwalo ya mi bizize ka sishemo sa Kreste, mi ha mu hupuzi ku latelela Litaba ze Nde li sili. 7Hande-nde, ha ku na Litaba ze Nde li sili. Kono ni bulela cwalo kakuli ku na ni batu ba ba mi filikanya, mi ba ba lika ku fetula Litaba ze Nde za Kreste. 8Kono mutu h'a ka mi luta Litaba ze Nde ze fapana ni ze lu mi lutile, niha i ka ba luna, kapa lingeloi la kwa lihalimu, li kutiwe! 9Lu se lu mi bulelezi kale, mi ni sa tiisa ni ka nako ye. Haiba mutu a ka t'o mi luta Litaba ze Nde ze fapana ni ze mu amuhezi, a kutiwe luli!

10Kana kikuli ni bata ku ipitisa kwa batu, nji? Batili! Ni ipitisa ku Mulimu! Kana kikuli ni bata ku tabisa batu, nji? Kambe ne ni sa bata ku ba tabisa, kambe ne ni si ke na ba mutang'a Kreste.

Paulusi mw'a bizelizwe ku ba muapositola

11Taba ki ye, banabahesu. Litaba ze Nde ze ni luta, ha li si ka eziwa ki mutu. 12Ha ni si ka li fumana ku mutu, kapa ku li lutiwa ki mutu. Kono ki yena Jesu Kreste kasibili ya ni sinulezi zona.

13 # Lik 8.3; 22.4-5; 26.9-11 Mu se mu utwile mo ne ni pilela ha ne ni sa latelela tuto ya sijuda, mo ne ni nyandiseza Keleke ya Mulimu ka tata, ni nze ni lika ku i felisa. 14#Lik 22.3 Ne ni fitelela litaka za ka ze ñata za Majuda kwa ku mamela za sijuda, mi ne ni tukufalelwa hahulu ku ba fita, mwa mikwa ya bo kukw'a luna.

15 # Lik 9.3-6; 22.6-10; 26.13-18 Kono ka sishemo sa hae, Mulimu u ni ketile ni si ka pepwa kale, mi a ni biza kuli ni mu sebeleze. 16Mi h'a hupuzi ku ni sinulela Mwan'a hae kuli ni y'o luta balicaba Litaba ze Nde za hae, ha ni si ka kupa kelezo ku mutu. 17Ha ni si ka ya kwa Jerusalema ku y'o bonana ni baapositola ba pili ku na. Bakeñisa ku eza cwalo, na funduka honafo ku ya kwa Arabia, mi na kutela kwa Damaseka. 18#Lik 9.26-30 Ha ni se ni felize lilimo ze talu kihona ni ya kwa Jerusalema ku y'o zibana ni Pitrosi, mi na ina ni yena lisunda ze peli. 19Ha ni si ka bonana ni muapositola yo muñwi haisi Jakobo, mwanahabo Mulena.

20Se ni mi ñolela fa ki niti. Ni tiisa fapil'a Mulimu kuli ha ni buleli buhata.

21Mwamulaho, na ya mwa manaha a Siria ni Silisia. 22Nako yeo kaufela, balumeli ba likeleke za Kreste ze mwa Judea ne ba sa ni zibi ka sifateho. 23Ne ba ziba feela ze ne bulelwa ki ba bañwi, ha ba li, “Mutu ya n'a lu nyandisa, s'a luta za tumelo ya n'a lika ku sinya pili!” 24Mi ne ba lumba Mulimu kabakala ka.

Currently Selected:

Magalata 1: Lozi09

Highlight

Copy

Compare