Mututo 23

Milao ni sobozi

1 # Mut 20.16; Malivi 19.11-12; Mul 5.20 “U si ke wa fitisa piho ya buhata. U si ke wa tusa mutu ya fosize ka ku fa bupaki bwa buhata. 2U si ke wa lumelelana ni ba bañata ku eza ze maswe, mi mwa mizeko u si ke wa fa bupaki bo bu ta hanisa katulo ye lukile, ili ku tabisa feela ba bañata. 3#Malivi 19.15 U si ke wa bonisa sobozi ha ku zekiswa mubotana.

4 # Mul 22.1-4 “Haiba u ka bona komu kamba mbongolo ya sila sa hao i mata-mata i nze i latehile, u i kutiseze ku yena. 5Haiba mbongolo ya hae i limbilwe ki mulwalo wa yona, u si ke wa mu fitelela feela cwalo. U mu tuse ku i limbutula ona.

6 # Malivi 19.15; Mul 16.19 “Ha ku zekiswa mubotana wa ku mina, u mu atule ka swanelo. 7U si ke wa tameleza mutu za buhata. Ya si na mulatu u si ke wa mu atulela lifu, kakuli mutu ya eza kezo ya maswe cwalo ni ta mu fa mulatu. 8U si ke wa lumela ku pumiwa ka mali, kakuli ku lekiwa ku eza mutu sibofu ku ze lukile, mi ku sinya mabaka a ba ba si na mulatu.

9 # Mut 22.21; Malivi 19.33-34; Mul 24.17-18; 27.19 “U si ke wa nyandisa muzwahule. Wa ziba mw'a ikutwela muzwahule mwa pilu, kakuli ni wena n'o li muzwahule mwa Egepita.

Silimo sa Busupa ni Lizazi la Busupa

10 # Malivi 25.1-7 “U ka na u cala masimu a hao ka lilimo ze silezi ni ku kutula ze cezwi. 11Kono ka silimo sa busupa u ta a tuhela a lobale, mi ha u na ku kutula sifi ni sifi se si ka mela ku ona. Babotana ba ba mwahal'a mina ba ka na ba ca se si ka mela mwateñi, ni zona lifolofolo li ka ca se si siyezi. Mi hape, u ta eza cwalo ni ka simu ya hao ya likota za veine ni za olive.

12 # Mut 20.9-11; 31.15; 34.21; 35.2; Malivi 23.3; Mul 5.13-14 “U ta sebeza mazazi a silezi, kono ka la busupa ha u na ku sebeza, kuli likomu ni limbongolo za hao li pumule, mi batanga ba hao ni bazwahule ba ikatuluse.

13Mu utwe ze ni mi bulelezi kaufela. Mu si ke mwa lapela milimu i sili. Nihaili mabizo a yona mu si ke mw'a bulela.

Mikiti ye milalu ye mituna

(Mut 34.18-26; Mul 16.1-17)

14“U ka ni ezezanga mukiti halalu ka silimo. 15#Mut 12.14-20; Malivi 23.6-8; Lipa 28.17-25 U ta ni ezeza Mukiti wa Lico ze si ka Umelwa. Ka mo ni ku laelezi, u ta ca lico ze si ka umelwa mazazi a supile, ka nako ye tomilwe mwa kweli ya Abibi, kakuli ki yona kweli ye ne mu zwile ka yona mwa Egepita. Ha ku na ya ka taha fapil'a ka a si na mpo.

16 # Malivi 23.15-21,39-43; Lipa 28.26-31 U ta eza Mukiti wa Kutulo, ha u ta kala ku kutula ze cezwi mwa masimu a hao.

U eze ni Mukiti wa Minganda kwa mafelelezo a silimo, ha u kulumuna miselo mwa simu ya hao ya veine ni ya olive. 17Banna ba hao kaufela ba ta bonahala fapil'a ka halalu ka silimo, na, Mulena Muñ'a Bupilo.

18“U si ke wa sebelisa lico ze umezwi ha u ni fa folofolo ya sitabelo. Lisuzo la folofolo le li ka sebeliswa mwa mukiti wa ka li si ke la lobala mane bu se.

19 # Mut 34.26; Mul 14.21; 26.2 “U ta tisa kwa ndu ya Muñ'a Bupilo, Mulimu wa hao, kutulo ye nde ya pili ya masimu a hao.

“U si ke wa apeha ngunyana mwa mabisi a m'a yona.

Lisepiso ni likelezo

20“Ni ta tangeta lingeloi fapil'a hao ku ku babalela mwa nzila, mane li y'o ku fitisa mwa sibaka se ni lukisize. 21U li teeleze, mi u eze ze li bulela. U si ke wa li fetuhela, kakuli li sebeza ka libizo la ka, mi milatu ye cwalo ha li i swaleli. 22Kono, ha u ka li utwa, ni ku eza ze ni ta ku bulelela kaufela, fohe ni ta ba sila sa lila za hao, mi ni ta lwanisa ba ba ku lwanisa. 23Lingeloi la ka li ta ku zamaya kwapili, mane li y'o ku fitisa mwa naha ya Maamori, ya Mahiti, ya Maperizi, ya Makanana, ya Mahivi ni ya Majebusi, mi ni ta ba yundiseleza. 24U si ke wa kubamela milimu ya bona ku i lapela. U si ke wa eza ze ba eza bona. U ta feleleza milimu ya bona ni ku pyataka maswaniso a bona. 25U ta sebeleza feela Muñ'a Bupilo, Mulimu wa hao, mi ni ta ku tohonolofaza ka ku ku fa lico ni mezi. Ni ka ku folisa mwa matuku a hao kamukana. 26Mwa naha ya hao, ha ku na musali ya ka sinyehelwa ki mba, mi ha ku na ya si ke a ba ni bana. Ni ta ku pilisa nako ye telele.

27“Ni ta sabisa batu ba ba ku hanyeza. Ni ta filikanya ba ba ku lwanisa. Ni ta eza lila za hao kaufela kuli li ku fulalele, li ku sabe. 28Ni ta luma makanganjamba a sabisa, a ku zamaye kwapili, mi a ta lelekisa Mahivi, Makanana ni Mahiti fapil'a hao. 29Ha ni na ku ba lundula kamukan'a bona mwa silimo si li siñwi, ili kuli naha i si ke ya ba litota, mi u atelwe ki libatana. 30Ni ta na ni ba zwisa hanyinyani-hanyinyani, ku fitela u ba ni bana ba bañata, mi u kona ku ikungela naha kaufela. 31Ni ta pazula mieto ya naha ya hao ku kalela kwa Liwate le Lifubelu mane ku y'o fita kwa Liwate la Mediteranea, ni ku zwa kwa lihalaupa mane ku y'o fita kwa Nuka ya Yuferati. Ni ta ku fa maata fahalimw'a ba ba yahile mwa naha yeo mi u ta ba leleka. 32U si ke wa eza litumelelano ni bona kamba ni milimu ya bona. 33Ba si ke ba pila mwa naha ya hao, kuli ba si ke ba ku isa mwa bumaswe, mi wa ni foseza. Haiba u lapela milimu ya bona, luli ki yona ye ta ku zieza.”

Currently Selected:

Mututo 23: Lozi09

Highlight

Copy

Compare