Buka ya Bubeli ya Makabaeusi 2
2
Jeremia u kwahela Tende, Likwati la Bulikani, ni Katala
1Lu fumana mwa libuka, mo ku ñozwi ka za taba ye, kuli mupolofita Jeremia n'a laezi ba ba ne ba hapilwe ku nga mulilo sina mo lu se lu taluselize. 2Ha s'a ba file Mulao, a ba laela kuli ba si ke ba hana litaelo za Muñ'a Bupilo kamba ku sikululela mihupulo ya bona kwa milimu ya buhata, ye ba ta bona i ezizwe ka gauda ni silivela, niha i kabisizwe hande. 3Ka manzwi a swana n'a nz'a ba bulelela hañata ku buluka Mulao.
4Hape mwa libuka mo ne ku ñozwi kuli mupolofita, ha s'a amuhezi zibiso ya Mulimu, a laela kuli Tende ni Likwati la Bulikani li ye ni yena. Ku tuha fo a ya fa lilundu f'a n'a bonezi Mushe naha y'a n'a ba sepisize Mulimu. 5Jeremia h'a y'o fita fateñi a fumana liñope mwa ku ina mi a beya mwateñi Tende, Likwati la Bulikani, ni Katala ka Insense. Ku tuha fo a kwala makenelo.
6Ba bañwi kwa batu ba habo ba mu latelela kuli ba zibe nzila kono ba palelwa ku i fumana. 7Jeremia ha s'a zibile cwalo a ba omanya, a li, “Sibaka seo si na ni ku ina cwalo, si sa zibwi, ku fitela Mulimu f'a ta kopanyeza batu ba hae hape, ni ku ba bonisa musa wa hae. 8#Mut 16.10; 24.16; 1 Male 8.10-11 Kihona Muñ'a Bupilo a ta bonahaza linto ze hape, mane ni yona kanya ya Muñ'a Bupilo i ta bonahala hamohocwalo ni malu sina mo ne ku bonahalezi ka nako ya Mushe ni ka nako ya Salumoni ha n'a lapezi kuli Sibaka se si Kenile si tohonolofazwe ki Mulimu.”
9Hape ne ku ñozwi mw'a n'a ezelize Salumoni, ka butali bwa hae, sitabelo sa ku kwalula ni ku feleleza sibaka se si kenile. 10Sina mw'a kile a lapelela Mushe ku Muñ'a Bupilo mi mulilo wa zwa kwa lihalimu ku t'o cisa sitabelo, ni yena Salumoni a lapela mi kwa taha mulilo, wa t'o cisa sitabelo kaufela. 11Mushe n'a ize, “Sitabelo sa sibi ne si sa ciwi, kikabakaleo ne si cisizwe.” 12Salumoni ni yena a eza mukiti ka mukwa o swana ka mazazi a supile ni li li liñwi.
Libuka za Nehemia
13Ka ku ekeza ku ze se li talusizwe, ne ku ñozwi hape mwa libuka, hamohocwalo ni mwa litabanyana za Nehemia, mw'a n'a ezelize muyaho ni ku kopanya libuka za litaba za malena ni za bapolofita, mañolo a Davida ni mañolo a malena a ama ka za linubu. 14Kamukwaoswana Judeasi ni yena u kopanyize libuka kaufela ze ne li latehile bakeñisa ndwa ye felile, mi zeo ku sa na ni zona. 15Haiba mu tokwa ze ñwi za ku zona mu lume mutu, a t'o mi ngela ze ñwi ze swana ni zona.
Pizo ya Mukiti wa ku Kwalula Tempele
16 #
1 Mak 4.59
Cwale ka ku feleleza, kabakala kuli se lu li fakaufi ni ku eza Mukiti wa ku Kenisa Tempele, lu mi ñolela ku mi kupa kuli ni mina mu eze cwalo mwa mazazi ao. 17Mulimu ya pilisize batu ba hae kaufela u ba file naha, mubuso, buprisita ni ku ikenisa. 18U lu sepiselize cwalo mwa Mulao. Kaniti, sina ni luna ha lu mu sepile, u ta lu shwela makeke kapili, a lu zwise mwa libaka kamukana mwa lifasi mo lu hasanezi, a lu tise ni ku lu kopanya kwa sibaka se si kenile sina h'a lu pulusize kwa bumaswe bo butuna mi u kenisize Tempele.
Manzwi a muñoli
19Ni ka ñola sinca ka za Judeasi Makabaeusi ni banabahabo, ku keniswa kwa Tempele, ni kwa Katala. 20Ni ka talusa ka za lindwa ze ne li lwanwa ni Antiokusi Epifanesi ni mwan'a hae Eupatori. 21Ni ka ñola ka za liponahalo za maata ze zwa kwa lihalimu, ze ne til'o tiisa ni ku ndumebisa balwani ba sijuda, kuli mane niha ne ba li ba banyinyani ba konile ku nga naha kaufela. Ba leleka limpi za mañete. 22Ba lukulula Tempele ye ne zibahala mwa lifasi kamukana, ba lukuluzi muleneñi mi ba tomile sinca milao ye ne batile ku feliswa kaufela. Ba konile linto zeo kaufela ka musa ni tuso ye tuna ya Mulena Mulimu.
23Ze kamukana li se li ñozwi ki Jasoni wa Sirene mwa libuka li ketalizoho mi ni ta lika ku li kusufaza mwa kabuka ka li kañwi. 24Kono luli butata ki bo butuna. Buñata bwa lipalo ni butuna bwa lika ze ñozwi, li kataza hahulu ba ba lakaza ku ziba litaba za kale. 25Ba bañwi ba tabela ku bala feela, mi ba bañwi ba lata ku buluka litaba mwa toho. Kabakaleo lu hupuzi ku li kusufaza, kuli kaufel'a bona ba kone ku fumana se siñwi ha ba bala.
26Ku luna ba ba ngile musebezi wo wa ku nolofaza ni ku kusufaza litaba ze, ha si musebezi o bunolo. U tata hahulu mi u nga nako ye telele. 27U swana ni musebezi wa mutu ya lukisa mukiti wa lico, ya na ni muhupulo wa ku ba ni lico za mifuta-futa ze tabisa ba bañata. Nihakulicwalo ka ku lata ku tusa babali kaufela, lu tabela ku zwelapili mwa musebezi o tata cwalo wo. 28Lu siya musebezi wa ku tatuba litabanyana kamukana ku muñoli wa za kale, mi luna, lu zwelapili mwa musebezi wa luna wa ku nolofaza, ku kusufaza, ni ku bonisa feela litoho ze tuna za litaba mwa bukanyana ye. 29Sina mo ku inezi mutu ya lala ndu ye nca, ili yena ya talima za muyaho wa yona kaufela, ni ya talima za mo i ta pendelwa a nahana feela ka za lika ze tokwahala ku kabisa ndu yeo, mi cwale, lu hupula kuli ki mona mo ku inezi ni ku luna. 30Cwale ki musebezi wa ya kalile ku ñola litaba za kale ku zwelapili ni ku batisisa litaba ka ku tala ni ku ambolisana ka zona mwa libaka kamukana, ku li tomahanya kaufela mo ne li inezi. 31Kono mutu ya zibahaza feela, u lumelelwa ku li ñola ka bukuswani a sa lateleli taba ka butelele bwa yona.
32Cwalehe, a lu kaleñi ku ñola taba ya luna, lu sa ekezi se siñwi ku ze s'e bulezwi pili. Ne i ta ba ku fosa ku hulisa makalelo a taba ni ku kusufaza yona taba ka sibili.
Currently Selected:
Buka ya Bubeli ya Makabaeusi 2: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.