Buka ya Pili ya Makabaeusi 1
1
Alexandere ni makwambuyu ba hae
1Alexandere wa mwa Masedonia mwan'a Filipi n'a zwile mwa naha ya Kitimi, a t'o tula Dariusi, mulena wa Maperesia ni Mamede, mi a mu yola. Pili n'a li mulena wa Magerike. 2A lwana lindwa ze ñata ni ku hapa minzi ye miñata ye silelelizwe, mi a bulaya malena ba libaka zeo. 3Cwale a zwelapili ku y'o fita kwa mafelelezo a lifasi, a nz'a hapa ni ku tukuta macaba. A kuzisa lifasi, mi pilu ya hae ne i tezi takazo ye kenelwa ki buikuhumuso. 4A kopanya limpi ze maata hahulu, a hapa manaha, macaba ni babusi ba ona, mi kaufela ba ba batu ba hae.
5Kono kwa taha nako ya n'a kulile hahulu, mane a hupula kuli wa shwa. 6Kiha s'a biza litaka za hae, ili makwambuyu ba n'a hulile ni bona ku zwa kwa bwanana, mi a ba abela mubuso wa hae a nz'a sa pila. 7Alexandere h'a shwa, n'a s'a busize lilimo ze lishumi ka ze peli. 8Yo muñwi ni yo muñwi wa babusi bao a ipuseza mwa naha ya hae. 9Ha s'a shwile, kaufel'a bona ba ba malena. Bona, ni ba ba ne ba ba yola cwalo ka lilimo ze ñata, ba ekeza bumaswe mwa lifasi.
Antiokusi Epifanesi ni tuto ya Sigerike
(2 Mak 4.7-11)
10 #
2 Mak 4.7
Ka bona malena bao kwa simuluha mulena yo muñwi ya maswe, ili mwan'a Antiokusi, yena Antiokusi Epifanesi ya n'a luilwe mwa Roma ka swalelele. A ba mulena ka silimo sa mwanda ka mashumi a malalu ni ze supile sa puso ya Magerike.
11Ka yona nako yeo, kwa Maisilaele kwa zwa sitopa sa bakwenuhi mi sa fosisa batu ba bañata, sa li, “A mu tahe, lu utwane ni bahedeni be lu yahile ni bona, kakuli haisali lu kauhanela ni bona, lu tahezwi ki bumai bo butuna.” 12Muhupulo wo wa lumelelwa. 13Ba bañwi ba itatela ku y'o bonana ni mulena ka taba yeo, mi yena a ba lumelela ku latelela lisebelezo za sihedeni. 14Cwale ba lukisa sibaka sa libapalelo mwa Jerusalema, se si swana ni sa bahedeni. 15#1 Bakor 7.18 Ba ikeza sina ba ba si ka ya kwa mupato, ba tuhela bulikani bo bu kenile, mi ba latelela milao ya macaba, mi sina batanga ba latelela lisebelezo za sihedeni.
Antiokusi Epifanesi u silafaza Tempele, ni ku nyandisa Majuda ba ba sa buluka Mulao
16Cwale Antiokusi ha s'a boni kuli puso ya hae i tiile, a pihelela ku ikeza mulena wa Egepita, ni mubusi wa manaha a mabeli ao. 17A lwanisa Egepita ka maata a matuna, a na ni makoloi a ndwa, litou ni lisepe za ndwa. 18A lwanisa Pitolemi mulena wa Egepita mwa ndwa, mi Pitolemi a saba, a siya batu ba bañata ba holofezi. 19Minzi ye silelelizwe ya Egepita ya hapiwa, mi Antiokusi a tukuta naha.
20Ka silimo sa mwanda ka mashumi a mane ni ze talu, ha s'a tuzi Egepita, Antiokusi a kuta, mi a liba kwa Isilaele ni Jerusalema ka maata a matuna. 21Ka lishwau a kena mwa Sibaka se si Kenile, a zwisa katala ka gauda ni sipahekelo sa lilampi za sona kaufela. 22A zwisa ni tafule ya linkwa za litabelo, lipiza za waine, likomoki ni lisosolo za gauda za insense, lisila la mwa Tempele, likuwani za bulena, ni likabisa za gauda ze ne li li fapil'a Tempele y'a n'a tukutile. 23A ikela a ngile silivela, gauda ni libyana za butokwa. A fumana bufumu bo bu ne bu patilwe, mi a bu nga. 24Ha s'a zwisize zeo kaufela, a kutela kwa naha ya habo, a siile sibaka si falalizwe maswe mi a zamaya a itumba ka manzwi a buikuhumuso luli.
25Cwale kwa ba ni sililo se situna mwa naha kaufela ya Isilaele.
26Babusi ni bahulu ba sicaba
ba bokolola.
Basizana ni micaha ba ota.
Bunde bwa basali bwa fela.
Munyali kaufela a opela pina
ya maswabi.
27Munyaliwa a ishonda ka maswabi
a matuna fa bulobalo bwa hae.
28Naha yona ya nyanganya
kabakala batu ba yona,
mi ba mba ya Jakobo kaufela
ba kenelwa ki maswabi.
29Kwa fita mazazi, mi mwamulaho a lilimo ze peli mulena a luma mueteleli yo muhulu mwa minzi ya Judea. A taha mwa Jerusalema a na ni mpi ye tuna. 30A bulela ni bona ka manzwi a kozo, kono ili ku ba puma, mane a hapa mihupulo ya bona. Cwale kapili-pili a lwanisa munzi ka sipundumukela, a u eza ka situhu mi a bulaya batu ba Isilaele ba bañata. 31A tukuta munzi, a u cisa, mi a lutulula mandu ni mamota a ona. 32A hapa basali ni bana, mi a soteza likomu.
33Cwale ba sileleza Munzi wa Davida ka limota le lituna le litata, ni ka litawala ze tiile, mi ba u eza munzi wa sisabelo sa bona. 34Mwateñi ba beya mpi ya batu ba ba maswe, ili bafetuheli ba ba ne ba ikwalezi mwateñi. 35Ba buluka mwateñi lilwaniso, lico, ni tutu kaufela ye ne ba hapile mwa Jerusalema. Ba zieza hahulu batu. 36Sitopa seo sa fetuha sa babulai ba batu mwa sibaka se si kenile, balwanisi ba ba maswe ba Isilaele ka linako kaufela. 37Ba bulaya batu ba ba si na mulatu mwa sibaka se si kenile kaufela, mi ba silafaza sona Sibaka se si Kenile kasibili. 38Batu ba Jerusalema ba baleha bakeñisa bona. Ona wa fetuha sibaka sa bazwahule, u kauhanyizwe kwa bana ba ona, mi bana ba ona ba u sabezi. 39Sibaka sa ona se si kenile sa siyala mukungulu sina lihalaupa, mikiti ya ona ya fetuha sililo, Lipumulo za ona za fetuha sisomo, mi likute la ona la fetuha lishwau. 40Lishwau la ona cwale se li swana ni kabubo ka ona ka pili, mi butumo bwa ona bu fetuhile maswabi a matuna.
41Cwale mulena a fa taelo ye li ba mubuso wa hae kaufela ba be sicaba si li siñwi, mi kaufela ba tuhele mikwa ya sihabo bona. 42Bahedeni kaufela ba lumela taelo ya mulena. 43Maisilaele ba bañata ba iketela ku amuhela bulapeli bwa hae, ili ku ezeza milimu ya maswaniso litabelo ni ku sa kuteka Lizazi la Pumulo.
44Hape mulena a lumela litaelo kwa Jerusalema ni kwa minzi ya Judea ka linumwana ku ba laela kuli ba latelele mikwa ye si ya sihabo bona. 45Ba tobohe ku eza litabelo za ku cisa, litabelo za kamita ni za waine mwa sibaka se si kenile, ku sa buluka Lipumulo ni mikiti ya silumeli. 46Ba silafaze Sibaka se si Kenile, ni ku shwaula baprisita ba Mulimu. 47Ba yahe tutala ni litempelenyana za maswaniso, ni ku eza litabelo za likulube ni lifolofolo ze si ka kena. 48Ba hanise bana ba bona ku ya kwa mupato, ni ku isilafaza ka mikwa kaufela ye masila, ni ku tuhela miila ye ba filwe. 49Kacwalo ba libale Mulao mi ba si ke ba u latelela. 50Mutu kaufela, ya n'a sa kuteki taelo ya mulena, n'a na ni ku bulaiwa. 51Ha s'a ñolezi cwalo libaka kaufela za mwa mubuso wa hae, yena mulena a keta batatubi ba batu kamukana, mi a laela minzi kaufela ya Judea ku eza litabelo ka ku tatamana.
52Buñata bwa batu, ili bona ba ba ne ba se ba tuhezi ku buluka Mulao kaufela, ba kena ku bona, mi cwale ba eza bumaswe mwa naha. 53Ba hapeleza Maisilaele ku sabela mwa libaka za bona kaufela za masabelo. 54#Dan 9.27; 11.31; 12.11; 1 Mak 6.7; Mat 24.15; Mar 13.14 Ka la bulishumi ka a ketalizoho mwa kweli ya Kisilevu ili ka silimo sa mwanda ka mashumi a mane ni ze ketalizoho, mulena a toma bumaswe bo bu sabisa fahalimw'a katala ka Muñ'a Bupilo. Kwa yahiwa tutala mwa minzi kaufela ya Judea. 55Insense ya cisezwa kwa minyako ya mandu ni mwa mikwakwa. 56Libuka za Mulao kaufela ze ne li fumaneha, ne li pazaulwa ni ku ciswa. 57Mutu kaufela ya n'a fumaneha a na ni buka ya bulikani kamba a buluka Mulao, n'a atulelwa lifu ka ku latelela taelo ya mulena. 58Ka ku ba ni maata cwalo, ba kala ku lwanisa batu ba ba ne ba tula taelo yeo, mwa minzi kaufela ya Isilaele, ka kweli ni kweli. 59Ka la mashumi a mabeli ni a ketalizoho kweli ni kweli, kwa ezwa sitabelo fa katala-tuna ka ka yahilwe fahalimw'a katala ka litabelo za ku cisa. 60#2 Mak 6.10 Basali ba ba ne ba na ni bana ba ba ne ba isizwe kwa mupato ba bulaiwa ka taelo yeo. 61Ba bulaiwa ni limbutu za bona li nze li tamelezwi mwa milala ya bona. Kwa bulaiwa cwalo ni ba ba ne ba pila mwa mandu a bona, mane ni bona ba ba ne ba ba kenyize mwa mupato.
62Kono nihakulicwalo, mwa Isilaele ne ku sa na ni batu ba bañata ba ba ne ba sa tiile, mi ba na ni bundume bwa ku hana lico ze si ka kena. 63Ba iketela lifu ku fita ku isilafaza ka ku swala lika ze si ka kena, kamba ku nyefula bulikani bo bu kenile, mi kamukwaocwalo ba bulaiwa. 64Ya ba buhali bo bu sabisa bo ne bu wezi sicaba sa Isilaele.
Currently Selected:
Buka ya Pili ya Makabaeusi 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.