1 Bakorinte 15
15
Zuho ya Kreste
1Banabahesu, cwale ni bata ku mi hupulisa Litaba ze Nde za Mulimu ze ni mi lutile, ze mu amuhezi, ze tiisa tumelo ya mina. 2Litaba ze ni mi lutile, mu piliswa ka zona haiba mu kumalela ku zona ze ni mi bulelezi. Hakusicwalo, mu ka be mu lumezi feela-feela.
3 #
Isa 53.5-12
Ni mi file tuto ye ni amuhezi, ili ye tuna ku fita ze ñwi kamukana, kuli Kreste u shwezi libi za luna, sina mo ne ku ñolezwi mwa Mañolo. 4#Lipi 16.8-10; Mat 12.40; Lik 2.24-32 A pumbekiwa, mi a zuswa kwa bafu ka lizazi la bulalu, sina mo ne ku ñolezwi mwa Mañolo. 5#Mat 28.16-17; Mar 16.14; Luk 24.34, 36; Joa 20.19 A iponahaza ku Pitrosi, mi mwamulahonyana a bonahala ni kwa baapositola ba lishumi ka ba babeli. 6Hape a bonahala ka nako i liñwi kwa balateleli ba hae ba ba fitelela mianda i ketalizoho, mane buñata bwa bona ba sa pila, nihaike ba bañwi ba shwile. 7Mwamulaho a iponahaza ku Jakobo, mi ku zwa fo a t'o iponahaza hape kwa baapositola kaufela.
8 #
Lik 9.3-6
Kwa mafelelezo a bonahala ni ku na, na ya swana ni sifolozwani. 9#Lik 8.3 Kakuli na, ki na yo munyinyani kwa baapositola kaufela, mane ha ni swaneli ku bizwa muapositola, kakuli ni nyandisize Keleke ya Mulimu. 10Kono, ki ka sishemo sa Mulimu ha ni li muapositola, mi sishemo s'a ni file ha si si ka ku yonga feela. Mane, ni sebelize ka tata ku fita baapositola ba bañwi kaufela, nihaike i ne si na ya n'a sebeza cwalo, kono i ne li sishemo sa Mulimu se ne si sebeza ku na. 11Cwalehe, niha i ka ba kuli li zwa ku na, kamba ku bona, ki zona ze lu luta, mi ki zona ze mu lumezi.
Zuho ya luna
12Cwale, tuto ya luna kikuli Kreste u zuhile kwa bafu. Hakulicwalo, kiñi ba bañwi ku mina ha ba bulela kuli ba ba shwile ha ba na ku zuha? 13Haiba ki niti, fohe Kreste ni yena h'a si ka zuha. 14Mi, haiba Kreste h'a si ka zuha kwa bafu, fohe ha lu na se lu ka luta, mi ha ku na se mu ka lumela. 15Fahalimw'a zeo, lu ka fumaneha kuli lu tama Mulimu buhata, kakuli lu bulezi kuli u zusize Kreste kwa bafu. Kanti h'a si ka mu zusa, haiba ki niti kuli ba ba shwile ha ba na ku zuha. 16Kakuli haiba ba ba shwile ha ba na ku zuswa, Kreste ni yena h'a si ka zuswa. 17Mi haiba Kreste h'a si ka zuswa, fohe tumelo ya mina ha i na tuso, mi mu sa li mwa libi za mina. 18Hape ku talusa kuli ni ba ba shwezi mwa tumelo ku Kreste ba shwelelezi. 19Haiba sepo ya luna ku Kreste ki ye na ni tuso kwa neko la bupilo bo feela, ku si na se siñwi hape, luli lu swanezi ku shwelwa makeke ku fita batu kamukana mwa lifasi kaufela.
20Kono niti kikuli Kreste u zuhile kwa bafu, ili poniso ye sepisa kuli ni ba ba shwile ba ta zuha. 21Cwale sina lifu ha li tile ka mutu, zuho ya bafu ni yona i tile ka mutu. 22Sina batu kaufela ha ba shwa kabakala kopano ye ba na ni yona ni Adama, kamukwaoswana ba ta zuha kwa bafu, kamukan'a bona, kabakala kopano ya bona ni Kreste. 23Kono yo muñwi ni yo muñwi u ta zuha ka nako ya hae. Kreste i ta ba yena wa pili ku bona kaufela, mi kihona ku ta taha ba ba li ba Kreste kamukana, ka yona nako y'a ka taha ka yona. 24Ibehe, mafelelezo a ka taha, mi Kreste u ta felisa maata a ba ba lwanisa bulena bwa Mulimu ni ku fa Mubuso ku Mulimu Ndate. 25#Lipi 110.1 Kakuli Kreste u swanezi ku busa ku fitela Mulimu a fenya lila za hae kamukana ni ku li beya kwatas'a mahutu a hae. 26Sila sa mafelelezo se si ta fenyiwa i ta ba lona lifu. 27#Lipi 8.6 Kakuli sina mo ku ñolezwi kuli, “Mulimu u beile lika kaufela kwatas'a mahutu a hae.” Kwa utwahala, kono manzwi a' li “lika kaufela” h'a kopanyelezi ni yena Mulimu kasibili ya beya lika kamukana mwatas'a mahutu a Kreste. 28Kono lika kamukana ha li se li beilwe mwatas'a mubuso wa Kreste, cwale yena Mwana kasibili u ta ipeya kwatas'a Mulimu, ya beile lika kamukana kwatas'a hae. Mi Mulimu u ta busa lika kaufela.
29 #
2 Mak 12.44
Cwale, haili batu ba ba kolobezwa ka libizo la ba ba shwile, bo? Se ba hupula ki sika mañi? Haiba ki niti, sina mo ba bulelela, kuli ba ba shwile ha ba na ku zuha, cwale ba kolobelezwañi ka libizo la bona? 30Luna bo, lu ipeelañi mwa likozi nako kaufela? 31Banabahesu, na, ni talimani ni lifu ka zazi ni zazi! Ku itumba kwa ka ka mina, mwa bupilo bo lu na ni bona ku Jesu Kreste Mulen'a luna, ki kona ko ku ni bulelisa cwalo. 32#Isa 22.13 Haiba ni ezize inge ni lwana ni libatana, mo mwa Efese, ka mukwa feela wa batu, ku ni tusize sika mañi? Ba ba shwile ha ba sa zuhi, “A lu ceñi, mi lu nwe, kakuli kamuso lu ka shwa.”
33Mu si ke mwa ipuma. “Balikani ba ba maswe ba sinya mikwa ye minde.” 34Mu kutele kwa minahano ya mina ye lukile, mi mu tuhele ku eza sibi. Ni bulela cwalo ku mi swabisa, kakuli ba bañwi ku mina ha ba zibi Mulimu.
Mubili o' ka zuha
35Yo muñwi a ka buza, a li, “Ba ba shwile ba ka zuha cwañi? Ba ta ba ni mubili o cwañi?” 36Wena sitoto! Ha u cala peu mwa mubu, ha i na ku tunguka ha i sa shwi, nji? 37Mi s'o cala mwa mubu ki peu feela, mwendi i ka ba lubeke lwa buloto, kamba lwa mushobo o muñwi, isi sicalo se si melile. 38Mulimu ki yena ya fa peu yeo lisina l'a lata. U fa peu ye ñwi ni ye ñwi lisina le li lukela.
39Mibili ya libupiwa ze pila kaufela ha i swani. Batu ba na ni mubili o muñwi, lifolofolo li na ni u sili, linyunywani u sili, ni litapi u sili hape.
40Ku na ni mibili ya kwa lihalimu, ni mibili ya mwa lifasi mo. Ku na ni bunde bwa mibili ya lihalimu, ni bunde bwa mibili ya lifasi. 41Lizazi li na ni bunde bwa lona, kweli bunde bwa yona, ni linaleli li na ni bunde bwa zona, nihaike bunde bwa linaleli bwa fapahana mwahal'a zona.
42Ku ta ba cwalo, bafu ha ba ta zuha. Mubili ha u pumbekiwa, u shwile, kono ha u ka zuha ha u sa na ku shwa. 43Ha u pumbekiwa, u maswe ni ku fokola, kono ha u ka zuha u ta ba o munde, o maata. 44Ha u pumbekiwa ki mubili wa nama, kono ha u ka zuha u ta ba mubili wa moya. Ha ku na ni mubili wa nama, cwale ku swanezi ku ba ni mubili wa moya. 45#Sim 2.7 Kakuli ku ñozwi kuli, “Mutu wa pili, Adama, a eziwa sibupiwa se si pila.” Kono Adama wa mafelelezo ki Moya o' fa bupilo. 46Ha si bupilo bwa Moya bo bu tahile pili, kono ki bupilo bwa nama. Bupilo bwa moya, bona bu tahile mwamulaho. 47Adama wa pili u ezizwe ka mubu wa lifasi. Adama wa bubeli u zwile kwa lihalimu. 48Ba ba li ba lifasi ba swana ni ya bupilwe ka mubu, mi ba ba li ba lihalimu ba swana ni ya zwile kwa lihalimu. 49Cwale, sina mo lu apalezi siswaniso sa mutu ya ezizwe ka mubu, kamukwaoswana lu ta apala siswaniso sa mutu ya zwa kwa lihalimu.
50Banabahesu, se ni bata ku bulela ki se. Se si ezizwe ka nama ni mali ha si koni ku ikabela za Mubuso wa Mulimu, mi se si shwa ha si koni ku ikabela za se si sa shwi.
51 #
1 Bates 4.15-17
Mu teeleze kwa kunutu ye. Ha lu na ku shwa kaufel'a luna, kono lu ta fetulwa kamukana, ka nakonyana feela. 52Ka bubebe bo bu swana ni bwa ku koba kwa liito, ha ku ta lila tolombita ya mafelelezo, lu ta fetulwa. Kakuli ha i ta lila, ba ba shwile ba ta zuha ka sibupeho se si sa shwi. Mi lu ta be lu fetuzwi kaufel'a luna. 53Kakuli se si fela si swanezi ku apala se si sa shwi. 54#Isa 25.8 Cwale, se si fela ha si se si apezi se si sa feli, mi se si shwa ha si se si apezi se si sa shwi, fohe se si ñozwi si ta ezahala, se si li, “Lifu li mizizwe. Ku tula ku petahalile!”
55 #
Hos 13.14
“Wena lifu, ku tula kwa hao ku kai?
Wena lifu, maata a hao a ku holofaza a kai?”
56Lifu li fumana maata a ku holofaza kwa sibi, mi sibi si fumana maata a sona kwa Mulao. 57Kono lu itumele ku Mulimu ya lu fa ku tula ka Mulen'a luna Jesu Kreste!
58Cwale banabahesu ba ba latwa, mu tiye, mi mu tiyelele. Mu pete musebezi wa Mulena ka ku tala, sina ha mu ziba kuli, ka tuso ya hae, ha u na ku ba wa mbango.
Currently Selected:
1 Bakorinte 15: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
