Sirag 1
1
HIMNO DI APERTURA
Elogio riba sabiduria
1Tur sabiduria ta bini di Señor,
e ta serka djE te den eternidat.#Proverbionan 2:6
2E pipitanan di santu kant'i laman, gotanan di áwaseru
i dianan di eternidat, ta ken por konta nan?
3Altura di shelu, hanchura di tera
i profundidat di abismo, ta ken por midi nan?
4A krea sabiduria promé ku a krea tur otro kos.
Inteligensia pa komprondé t'ei for di prinsipio.#1:4 Algun manuskrito griego ta añadí v. 5: Fuente di sabiduria ta palabra di Dios den shelu, kamindanan di sabiduria ta e mandamentunan eterno.
6Ken a deskubrí rais di sabiduria?
Ken sa di su kapasidat?#1:6 Algun manuskrito griego ta añadí v. 7: Ken a risibí komprondementu di sabiduria? Ken konosé tur su posibilidatnan?
8Ta Ún ta sabí i mashá temibel.
Esei ta Señor sintá riba su trono.
9T'E a krea sabiduria,
t'E a sondi'é, balor'é,
i dram'é riba tur su obranan.#Job 28:23-27; Proverbionan 8:21-22; Sirag 24:9
10Na e midí ku Dios duna,
e ta presente den tur hende;
E ta regal'é rikamente
na esnan ku ta stim'É.
Elogio riba rèspèt pa Señor
11Rèspèt pa Señor ta trese gloria i honor,
alegria i un korona di goso.
12Rèspèt pa Señor ta alegrá kurason,
trese goso, alegria i bida largu.
13Es ku respetá Señor, na final lo bai e bon,
dia e muri tur hende ta papia bon di dje.
14Sabiduria ta kuminsá ku rèspèt pa Señor,#Job 28:28; Salmo 111:10; Proverbionan 1:7; 9:10
e ta kompañá fielnan for di den barika di nan mama.
15El a forma su bibá pa semper meimei di hende
i lo keda tambe serka nan desendientenan.
16Rèspèt pa Señor ta kolmo di sabiduria,
e ta yena hende ku su frutanan.
17E ta yena nan kas ku loke nan ke
i nan mangasina ku su produktonan.
18Respetá Señor ta koroná bo mes ku sabiduria,
e ta pone bienestar i salú floresé.
19E ta laga konosementu i inteligensia kai manera áwaseru,
e ta engrandesé honor di esun ku a hañ'é.
20Rais di sabiduria ta rèspèt pa Señor;
na su ramanan ta haña bida largu.#1:20 Algun manuskrito ta añadí v. 21: Rèspèt pa Señor ta alehá di piká; si tin rèspèt, Dios no ta baha su ira.#Proverbionan 3:2,16; 4:10
Elogio riba frutanan di sabiduria
22Pa rabia infundá no tin despensa,
es ku laga rabia domin'é ta kaba ku su mes.
23Hende pasiente ta soportá tanten ta nesesario,
despues su rekompensa lo ta alegria.
24Tanten ta nesesario lo e sera su boka,
despues hopi lo gaba su inteligensia.
25Den klùisnan di sabiduria tin proverbio presioso;
pero pekadónan ta detestá búskeda di boluntat di Dios.
26Si bo ta anhelá sabiduria, kumpli ku e mandamentunan#Predikador 12:13; Sirag 19:20
i Señor lo duna bo e na abundansia.
27Rèspèt pa Señor ta konsistí di sabiduria i disiplina,
fieldat i humildat ta agrad'É.#Proverbionan 15:33
ATVERTENSIA DI APERTURA
Sirbi Señor ku sinseridat
28No stòp di respetá Señor
ni fingi rèspèt.
29No hasi trastu,
paga tinu kiko bo ta papia!
30No alsa bo mes pa bo no kai#Mateo 23:12
i pone bo mes kara na bèrgwensa.
Si bo hasié tòg Señor lo por saka bo echonan skondí na kla
i humiliá bo dilanti di henter komunidat,
si bo no respetá Señor
pero fingi di ta sirbiÉ.
Currently Selected:
Sirag 1: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013