Filipensenan 1
1
Saludo
1Esaki ta un karta di Pablo i Timoteo, sirbidó di Kristu-Hesus, pa tur esnan na Filipi#Echonan 16:12 ku ta uní ku Hesu-Kristu i ta pertenesé na Dios, i tambe pa e lidernan i e diákononan.
2Dios nos Tata i Señor Hesu-Kristu duna boso grasia i pas.
Pablo ta resa pa su lesadónan
3Mi ta gradisí mi Dios kada be ku mi kòrda riba boso. 4Semper ora mi ta resa pa boso tur, mi ta resa ku goso, 5pasobra for di e promé dia te ku awor boso a tuma parti na e trabou di plama e bon notisia. 6Mi ta konvensí ku Esun ku a kuminsá un bon obra den boso, lo sigui te ora E termin'é#Salmo 138:8 riba e dia ku Kristu-Hesus bini.
7Boso tin un lugá den mi kurason! P'esei mes ta korekto ku mi ta pensa asin'akí di boso tur ku ta tuma parti na e grasia ku mi a haña di Dios, awor ku mi ta den prizòn i tin ku defendé e bon notisia i konfirmá su bèrdat. 8Pasobra Dios ta mi testigu ku e sintimentunan profundo ku mi ta sinti pa boso tur, ta sali for di kurason di Kristu-Hesus mes.
9Anto esaki ta mi orashon: Mare boso por haña mas i mas konosementu i bon komprondementu pa boso amor bira mas kompleto; 10asina boso por distinguí loke ta importante di bèrdè. E ora ei boso lo ta puru i sin falta riba e dia ku Hesus bini 11i boso lo ta kargá ku fruta di un bida hustu, debí na Hesu-Kristu, pa alabansa i gloria di Dios.
Pablo ta prezu, pero e bon notisia ta progresá
12Mi ke pa boso sa, mi rumannan, ku e kosnan ku a sosodé ku mi, a sirbi en realidat pa adelanto di e bon notisia. 13Resultado ta ku henter guardia di palasio i tur sobrá hende ta na altura ku mi ta prezu#Echonan 28:30 pasobra mi ta un siguidó di Kristu. 14Mi estadia den prizòn a duna mayoria di nos rumannan konfiansa den Señor; nan ta prediká e mensahe ku mas kurashi i sin miedu.
15Ta bèrdat ku tin hende ta prediká Kristu pa motibu ku nan ta envidioso i pasobra nan ta buskadó di pleitu, ma tin otro ta prediká ku bon intenshon. 16Nan ta hasié motivá pa amor, pasobra nan sa ku mi a haña e enkargo pa defendé e bon notisia. 17Ma e otronan ta proklamá Kristu motivá pa ambishon egoista; nan no ta hasié ku sinseridat; nan ta pensa di por laga mi sufri mas tantu miéntras mi ta prezu. 18Anto kiko? Sea ta pa motibu insinsero òf pa motibu sinsero, en todo kaso ta proklamá Kristu i esei ta loke ta hasi mi kontentu. Sí, mi ta sigui sinti mi kontentu, 19pasobra mi sa ku esaki ta resultá den mi salbashon, danki na boso orashon i na yudansa di Spiritu di Hesu-Kristu. 20Ta mi deseo i speransa ku lo mi no hasi nada ku despues ta pone mi kara na bèrgwensa. Mi ta spera ku, manera semper, awor akí tambe mi tin kurashi pa engrandesé Kristu den tur loke mi ta, sea ku mi ta morto òf bibu. 21Pasobra pa mi biba ta Kristu#Galatanan 2:20; Kolosensenan 3:4 i muri ta ganashi. 22Ma si sigui biba riba mundu ta nifiká ku mi por sigui traha ku éksito, e ora ei sí mi no sa kiko skohe. 23Mi ta haña mi ranká na dos banda: mi tin deseo di bandoná e mundu akí i di ta huntu ku Kristu, loke lo ta hopi mas mihó. 24Ma pa boso ta mas nesesario ainda pa mi keda na bida. 25I komo mi ta konvensí di esei, mi sa ku mi ta keda na bida i asin'ei keda serka boso tur, pa boso progreso i goso den fe. 26E ora ei boso lo tin mas motibu pa ta orguyoso di mi den Kristu-Hesus, ora mi bishitá boso atrobe.
27E úniko kos ta awor pa boso biba un bida ku ta kuadra ku e bon notisia di Kristu, pa sea ora mi bin mira boso òf mi tende di boso den mi ousensia, mi haña sa ku boso ta pará firme, uní pa e mesun spiritu, i ku boso ta lucha unánimemente pa kousa di fe den e bon notisia. 28No laga boso enemigunan spanta boso den nada. Esei lo demostrá nan ku nan ta bai pèrdí i ku boso ta haña salbashon;#1:28 ku boso…salbashon; otro posibel tradukshon: boso ku boso ta haña salbashon Dios ta sòru pa esei. 29Pasobra boso no a haña solamente e privilegio di kere den Kristu, pero tambe di sufri p'E. 30Boso ta pasando den e mesun lucha ku boso a mira ami pasa aden#Echonan 16:19-40 i ku awor boso ta tende ku mi ta pasando aden ketu bai.
Currently Selected:
Filipensenan 1: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013