Nǔnywɛ́xó 9
9
1Nǔnywɛ́ kpa dotín tɛ́nwe, bó dó bló xɔ tɔn. 2É hu kanlin, é ɖa vɛ̌ɛn, bó tɛ́ távo. 3É sɛ́ mɛsɛntɔ́ tɔn nyɔ̌nu lɛ́ɛ dó, bónú yě ná yi xá fí e yi jǐ ganjí ɖo toxo ɔ́ mɛ lɛ́ɛ jí, bó ná sú xó, bó da mɛ lɛ́ɛ ɖɔ: 4“Mi nǔmanywɛ́tɔ́ e mi, mi wá fí!” Yě nɔ́ ɖɔ nú xlonɔ lɛ́ɛ ɖɔ: 5“Mi wá bó wá ɖu nǔ e un ɖa ɔ́, bó nu vɛ̌ɛn e un ɖa é! 6Mi gosín gɔgɔnɔ lɛ́ɛ tɛ́ntin bó ná nɔ gbɛ! Mi wá ɖi zɔnlin gbɔn nukúnnú mɔ jɛ nǔ mɛ sín ali ɔ́ jí!”
Nǔnywɛ́tɔ́ kpó goyítɔ́ kpó
7Mɛ e nɔ kɛ nu dó nǔ wú nú mɛ e nɔ yí go ɔ́, wǎn wɛ è nɔ gbɛ́ n'i. Mɛ e nɔ gbɛ́ nǔ nú mɛdídá ɔ́, xó wɛ é nɔ́ ba do kɔ. 8Ma gbɛ́ nǔ nú mɛ e nɔ yí go ɔ́ ó; é táá wá gbɛ́ wǎn nú we. Lo ɔ́, gbɛ̌ nǔ nú mɛ e ɖó nǔnywɛ́ é; énɛ́ ɔ́, é ná yí wǎn nú we. 9Đɔ xó nú nǔnywɛ́tɔ́, énɛ́ ɔ́, é ná lɛ́ nyɔ́ nǔ i d'é jí. Kplɔ́n nǔ mɛ e nɔ wa nǔ ɖó sɛ́nxwi jí é, bónú é ná lɛ́ tunwun nǔ d'é jí. 10 Sísí ɖó nú Mawu Mavɔmavɔ wɛ nyí fí e nǔnywɛ́ bɛ́ sín é; mɛ e tunwun Mawu mɛ mímɛ́ ɔ́, Mawu nɔ ná mɛ ɔ́ nukúnnú mɔ jɛ nǔ mɛ. 11Đó nyɛ nǔnywɛ́ ɔ́, nyi wɛ ná dó azǎn azǎn jí nú we, un ná dó xwe xwe jí nú we. 12A nyɔ̌ nǔ i ɔ́, a nǎ nyɔ́ nǔ i nú hwiɖée. A ka nɔ yí go ɔ́, hwi ɖokpónɔ wɛ ná mɔ nǔ e ɖo goyíyí mɛ é.
Xlo ylɔ́ mɛ e ma ɖó nǔnywɛ́ ǎ lɛ́ɛ
13Xlojijɔ cí nyɔ̌nu tagbanɔ ɖɔhun, nyɔ̌nu yɛyinɔ ɖɔhun, nyɔ̌nu e má tunwun nǔɖé ǎ é ɖɔhun. 14É nɔ́ jínjɔ́n zinkpo jí ɖo xwé tɔn sín alihɛ́nnu, ɖo fí e yi jǐ ganjí ɖo toxo ɔ́ mɛ é; 15é nɔ́ nɔ fínɛ́ bó nɔ́ sú xó ylɔ́ mɛ e ɖo ali yětɔn jí tlélé bó ɖo yiyi wɛ lɛ́ɛ ɖɔ: 16“Mɛ e ma ɖó nǔywɛ́ ǎ é ní wá fí!” É nɔ́ sú xó ylɔ́ xlonɔ lɛ́ɛ ɖɔ: 17“Sin e è fin ɔ́ nɔ́ nyɔ́ nu tawun! Nǔ e è nɔ nɔ nǔglɔ́ bó nɔ ɖu ɔ́ nɔ víví tawun!” 18Lo ɔ́, mɛ énɛ́ lɛ́ɛ tunwun ɖɔ kú wɛ ɖo fínɛ́ ǎ; yě tunwun ɖɔ mɛ e xlojijɔ ylɔ́ lɛ́ɛ ɔ́, kútomɛ wɛ yě kó ɖe ǎ.
Nǔnywɛ́xó tɛnmɛ tɛnmɛ e kan gbɛtɔ́ sín walɔ lɛ́ɛ
Currently Selected:
Nǔnywɛ́xó 9: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.