Judíti 16
16
Judíti sín han
1Han e Judíti dó ɔ́ ɖíe:
Mi dó hǔnví gbe bó jí han nú Mawu ce.
Mi ji han nú Aklúnɔ kpó gan kwékwé lɛ́ɛ kpó.
Mi kpa susu n'i dó han mɛ,
bó ylɔ́ ɛ nú é hwlɛ́n mi.
2Nǔgbó wɛ, Aklúnɔ wɛ nyí Mawu e nɔ ɖó ahwan te é.
É ɖe mǐ sín kɛntɔ́ lɛ́ɛ sín acɛ mɛ,
é kplá mǐ wá ahwankpá tɔn mɛ,
ɖo togun tɔn tɛ́ntin.
3Asilíi sín ahwan gosín Totaligbé sókan mɛ wá,
ahwan maxamaxa wɛ.
Sɔ́ja tobutóbú nɛ́ lɛ́ɛ nɔ ɖó tɔsisa te.
Sɔ́ yětɔn lɛ́ɛ kpó sɔ́xátɔ́ yětɔn lɛ́ɛ kpó nɔ gba kpé sóví lɛ́ɛ jí.
4Kɛntɔ́ lɛ́ɛ ɖɔ émí ná dó to ce zo,
bó ná sɔ́ hwi dó vívá kún dɔ̌nkpɛ mitɔn lɛ́ɛ tɔn,
bó ná sɔ́ yɛ̌yɛ́ví mitɔn nyi gbě,
bó ná sɔ́ vǐ mitɔn lɛ́ɛ dó ɖó kannumɔ,
bó ná bɛ́ ahwlivú mitɔn lɛ́ɛ yi.
5Aklúnɔ Nǔbǐwúkpétɔ́ ɔ́ ka kpíkpé yě yi zɔ;
nyɔ̌nu ɖé wɛ é zán dó kpíkpé yě yi zɔ.
6Dɔ̌nkpɛ lɛ́ɛ wɛ hu gǎn yětɔn ǎ.
É ka nyí súnnu glegbenu lɛ́ɛ wɛ hu i ǎ.
Gbɛtɔ́ jɔ asú wɛ kpé nǔ xá ɛ ǎ.
Lo ɔ́, Judíti, Mɛlali ví ɔ́ wɛ lú i kpó ɖɛkpɛ tɔn kpó.
7Bó ná dó ná akɔ́nkpinkpan Izlayɛ́li ví e awakanmɛ kú lɛ́ɛ wútu ɔ́,
é ɖe asúkúsivɔ tɔn lɛ́ɛ, bó vun célu.
8É sɔ́ avɔví ɖé dó wlí ɖa tɔn bó ná dó dɔn kɛntɔ́ é dó lɛ̌ɛnkanvɔwu ɖagbe ɖagbe é.
9Ahwangán ɔ́ mɔ afɔkpa tɔn bɔ é dɔn ɛ.
Ɖɛkpɛ tɔn gba ahwangán ɔ́ sín ayi dó,
bɔ ahwanlyánnú é ɖésú tɔn gbo ta ɛ.
10Pɛ́sinu lɛ́ɛ sísɔ́ ɖo ta syɛ́nsyɛ́n tɔn nukɔn,
bɔ Mɛdinu lɛ́ɛ flí jɛ wɛn ɖo akɔ́nkpinkpan nukɔn.
11Énɛ́ gúdo ɔ́, togun masɔatɛ́n mitɔn dó sú xó,
bɔ xɛsi ɖi Asilíinu lɛ́ɛ.
Togun gǎnmaɖowǔ mitɔn sú xó, bɔ xɛsi jɛ yě jǐ.
É dó axwá, bɔ yě bǐ jó agɔ yi gǔdo.
12Mɛ e ma sɔ nǔtí ǎ lɛ́ɛ hu Asilíinu lɛ́ɛ ɖó hwǐ wú,
yě gblé wǔ yě, bó hu yě,
bɔ Asilíinu lɛ́ɛ hɔn ɖo nukɔn yětɔn xɛsinɔ ɖɔhun.
Yě kú ɖó Aklúnɔ ɖésú wɛ fun ahwan xá yě.
13 Un ná ji han yɔ̌yɔ́ nú Mawu ce.
Aklúnɔ, a kló, bɔ susu kpé we. Hlɔ̌nhlɔ́n towe jɛ acɔ́,
bɔ mɛ ɖěbǔ sixú ɖu ɖo jǐ towe ǎ.
14Nǔ e a ɖǒ lɛ́ɛ bǐ ni sɛn we! Nǔgbó wɛ.
Hwi wɛ ɖɔ xó ɖokpó bɔ yě bǐ dó tin,
a sɛ́ funfún towe dó bɔ yě bǐ wá gbɛ.
Yě mɛ ɖěbǔ sixú nɔ te ɖo gbe towe nukɔn ǎ.
15Azɔ̌ towe nɔ hɔn só lɛ́ɛ, bɔ yě nɔ́ lɔ́n jɛ xu mɛ.
Só lɛ́ɛ nɔ yɔ́ ɖo nukɔn towe vɛ̌la ɖɔhun.
Amɔ̌, a nɔ ɖe xomɛnyínyɔ́ towe xlɛ́ mɛ e nɔ sí we lɛ́ɛ.
16 Vɔ̌sísá lɛ́ɛ bǐ kpé bó ná nyɔ́ nukún towe mɛ ǎ,
kloklo e è nɔ dó zo e ɖésú kpé nǔɖé ɖo nukɔn towe ǎ.
Lo ɔ́, mɛ e nɔ sí Aklúnɔ ɔ́ nɔ ɖó susu ɖo nukún towe mɛ tɛgbɛ.
17Awě ɖaxó tɛ́ ɖíe ká ná xo to e nɔ fun ahwan xá togun mǐtɔn ɔ́ e.
Aklúnɔ Nǔbǐwúkpétɔ́ ná dɔn tó nú yě hwɛɖɔzán gbe.
É ná gbe zo kpó wǎnvú kpó bɔ yě ná ɖu yě,
bɔ yě mɔ wǔvɛ́ káká sɔ́yi.
18Hwenu e Izlayɛ́li ví lɛ́ɛ wá Jeluzalɛ́mu ɔ́, togun ɔ́ byɔ́ Sinsɛnxɔ ɔ́ sá, bó sɛn Mawu. Yě slá wǔ, bó xwlé vɔ̌ e è nɔ dó zo é, bó ná nǔ e mɛ ɖokpó ɖokpó jló é, kpó nǔníná ɖě lɛ́ɛ bǐ kpó. 19Judíti sɔ́ nǔ e nyí Holofɛ́ni tɔn bɔ togun ɔ́ bɛ́ n'i lɛ́ɛ bǐ ná Sinsɛnxɔ ɔ́. É sɔ́ amǔdɔ́ e è sɔ́ ɖo ahwangán ɔ́ sín xɔ mɛ ɔ́ xwlé Aklúnɔ. Ahwandɔkun Aklúnɔ tɔn ɔ́ nɛ́. 20Togun ɔ́ j'awǎ ɖo Sinsɛnxɔ ɔ́ nukɔn nú sun atɔn, bɔ Judíti nɔ kpɔ́ xá yě.
Vivɔnu gbɛzán Judíti tɔn
21Énɛ́ gúdo ɔ́, mɛ ɖokpó ɖokpó yi xwé tɔn gbe. Judíti ɖésú yi xwé tɔn gbe, é xɔ susu bɔ mɛ bǐ tunwun n'i ɖo gbɛzán tɔn mɛ. 22Súnnu gěgé jló ná da ɛ. Amɔ̌, sín hwenu e asú tɔn Manasée kú, bɔ è ɖi i ɔ́, é sɔ́ ba ná da asú ǎ. 23-24Judíti nɔ gbɛ káká bó kpo bǐ. É nɔ asúxwé káká bó ɖó xwe kanwe koatɔ́n (105). Cóbó ná kú ɔ́, é jó kannumɔ tɔn dó, bɔ é jɛ éɖée sí. É má nǔ tɔn lɛ́ɛ nú asú tɔn hɛ́nnu kpó mɛ tɔn lɛ́ɛ kpó. É kú ɖo Betúli. Bɔ è ɖi i dó asú tɔn sín yɔ mɛ. Togun ɔ́ wa cyɔ ɔ́ nǔ tɔn nú azǎn tɛ́nwe. 25Sín gbɛ hwenu Judíti tɔn káká yi jɛ hwenu e é kú é ɔ́, mɛ ɖěbǔ sɔ́ glá dó xɛsi nú Izlayɛ́li ví lɛ́ɛ ǎ.
Currently Selected:
Judíti 16: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.
Judíti 16
16
Judíti sín han
1Han e Judíti dó ɔ́ ɖíe:
Mi dó hǔnví gbe bó jí han nú Mawu ce.
Mi ji han nú Aklúnɔ kpó gan kwékwé lɛ́ɛ kpó.
Mi kpa susu n'i dó han mɛ,
bó ylɔ́ ɛ nú é hwlɛ́n mi.
2Nǔgbó wɛ, Aklúnɔ wɛ nyí Mawu e nɔ ɖó ahwan te é.
É ɖe mǐ sín kɛntɔ́ lɛ́ɛ sín acɛ mɛ,
é kplá mǐ wá ahwankpá tɔn mɛ,
ɖo togun tɔn tɛ́ntin.
3Asilíi sín ahwan gosín Totaligbé sókan mɛ wá,
ahwan maxamaxa wɛ.
Sɔ́ja tobutóbú nɛ́ lɛ́ɛ nɔ ɖó tɔsisa te.
Sɔ́ yětɔn lɛ́ɛ kpó sɔ́xátɔ́ yětɔn lɛ́ɛ kpó nɔ gba kpé sóví lɛ́ɛ jí.
4Kɛntɔ́ lɛ́ɛ ɖɔ émí ná dó to ce zo,
bó ná sɔ́ hwi dó vívá kún dɔ̌nkpɛ mitɔn lɛ́ɛ tɔn,
bó ná sɔ́ yɛ̌yɛ́ví mitɔn nyi gbě,
bó ná sɔ́ vǐ mitɔn lɛ́ɛ dó ɖó kannumɔ,
bó ná bɛ́ ahwlivú mitɔn lɛ́ɛ yi.
5Aklúnɔ Nǔbǐwúkpétɔ́ ɔ́ ka kpíkpé yě yi zɔ;
nyɔ̌nu ɖé wɛ é zán dó kpíkpé yě yi zɔ.
6Dɔ̌nkpɛ lɛ́ɛ wɛ hu gǎn yětɔn ǎ.
É ka nyí súnnu glegbenu lɛ́ɛ wɛ hu i ǎ.
Gbɛtɔ́ jɔ asú wɛ kpé nǔ xá ɛ ǎ.
Lo ɔ́, Judíti, Mɛlali ví ɔ́ wɛ lú i kpó ɖɛkpɛ tɔn kpó.
7Bó ná dó ná akɔ́nkpinkpan Izlayɛ́li ví e awakanmɛ kú lɛ́ɛ wútu ɔ́,
é ɖe asúkúsivɔ tɔn lɛ́ɛ, bó vun célu.
8É sɔ́ avɔví ɖé dó wlí ɖa tɔn bó ná dó dɔn kɛntɔ́ é dó lɛ̌ɛnkanvɔwu ɖagbe ɖagbe é.
9Ahwangán ɔ́ mɔ afɔkpa tɔn bɔ é dɔn ɛ.
Ɖɛkpɛ tɔn gba ahwangán ɔ́ sín ayi dó,
bɔ ahwanlyánnú é ɖésú tɔn gbo ta ɛ.
10Pɛ́sinu lɛ́ɛ sísɔ́ ɖo ta syɛ́nsyɛ́n tɔn nukɔn,
bɔ Mɛdinu lɛ́ɛ flí jɛ wɛn ɖo akɔ́nkpinkpan nukɔn.
11Énɛ́ gúdo ɔ́, togun masɔatɛ́n mitɔn dó sú xó,
bɔ xɛsi ɖi Asilíinu lɛ́ɛ.
Togun gǎnmaɖowǔ mitɔn sú xó, bɔ xɛsi jɛ yě jǐ.
É dó axwá, bɔ yě bǐ jó agɔ yi gǔdo.
12Mɛ e ma sɔ nǔtí ǎ lɛ́ɛ hu Asilíinu lɛ́ɛ ɖó hwǐ wú,
yě gblé wǔ yě, bó hu yě,
bɔ Asilíinu lɛ́ɛ hɔn ɖo nukɔn yětɔn xɛsinɔ ɖɔhun.
Yě kú ɖó Aklúnɔ ɖésú wɛ fun ahwan xá yě.
13 Un ná ji han yɔ̌yɔ́ nú Mawu ce.
Aklúnɔ, a kló, bɔ susu kpé we. Hlɔ̌nhlɔ́n towe jɛ acɔ́,
bɔ mɛ ɖěbǔ sixú ɖu ɖo jǐ towe ǎ.
14Nǔ e a ɖǒ lɛ́ɛ bǐ ni sɛn we! Nǔgbó wɛ.
Hwi wɛ ɖɔ xó ɖokpó bɔ yě bǐ dó tin,
a sɛ́ funfún towe dó bɔ yě bǐ wá gbɛ.
Yě mɛ ɖěbǔ sixú nɔ te ɖo gbe towe nukɔn ǎ.
15Azɔ̌ towe nɔ hɔn só lɛ́ɛ, bɔ yě nɔ́ lɔ́n jɛ xu mɛ.
Só lɛ́ɛ nɔ yɔ́ ɖo nukɔn towe vɛ̌la ɖɔhun.
Amɔ̌, a nɔ ɖe xomɛnyínyɔ́ towe xlɛ́ mɛ e nɔ sí we lɛ́ɛ.
16 Vɔ̌sísá lɛ́ɛ bǐ kpé bó ná nyɔ́ nukún towe mɛ ǎ,
kloklo e è nɔ dó zo e ɖésú kpé nǔɖé ɖo nukɔn towe ǎ.
Lo ɔ́, mɛ e nɔ sí Aklúnɔ ɔ́ nɔ ɖó susu ɖo nukún towe mɛ tɛgbɛ.
17Awě ɖaxó tɛ́ ɖíe ká ná xo to e nɔ fun ahwan xá togun mǐtɔn ɔ́ e.
Aklúnɔ Nǔbǐwúkpétɔ́ ná dɔn tó nú yě hwɛɖɔzán gbe.
É ná gbe zo kpó wǎnvú kpó bɔ yě ná ɖu yě,
bɔ yě mɔ wǔvɛ́ káká sɔ́yi.
18Hwenu e Izlayɛ́li ví lɛ́ɛ wá Jeluzalɛ́mu ɔ́, togun ɔ́ byɔ́ Sinsɛnxɔ ɔ́ sá, bó sɛn Mawu. Yě slá wǔ, bó xwlé vɔ̌ e è nɔ dó zo é, bó ná nǔ e mɛ ɖokpó ɖokpó jló é, kpó nǔníná ɖě lɛ́ɛ bǐ kpó. 19Judíti sɔ́ nǔ e nyí Holofɛ́ni tɔn bɔ togun ɔ́ bɛ́ n'i lɛ́ɛ bǐ ná Sinsɛnxɔ ɔ́. É sɔ́ amǔdɔ́ e è sɔ́ ɖo ahwangán ɔ́ sín xɔ mɛ ɔ́ xwlé Aklúnɔ. Ahwandɔkun Aklúnɔ tɔn ɔ́ nɛ́. 20Togun ɔ́ j'awǎ ɖo Sinsɛnxɔ ɔ́ nukɔn nú sun atɔn, bɔ Judíti nɔ kpɔ́ xá yě.
Vivɔnu gbɛzán Judíti tɔn
21Énɛ́ gúdo ɔ́, mɛ ɖokpó ɖokpó yi xwé tɔn gbe. Judíti ɖésú yi xwé tɔn gbe, é xɔ susu bɔ mɛ bǐ tunwun n'i ɖo gbɛzán tɔn mɛ. 22Súnnu gěgé jló ná da ɛ. Amɔ̌, sín hwenu e asú tɔn Manasée kú, bɔ è ɖi i ɔ́, é sɔ́ ba ná da asú ǎ. 23-24Judíti nɔ gbɛ káká bó kpo bǐ. É nɔ asúxwé káká bó ɖó xwe kanwe koatɔ́n (105). Cóbó ná kú ɔ́, é jó kannumɔ tɔn dó, bɔ é jɛ éɖée sí. É má nǔ tɔn lɛ́ɛ nú asú tɔn hɛ́nnu kpó mɛ tɔn lɛ́ɛ kpó. É kú ɖo Betúli. Bɔ è ɖi i dó asú tɔn sín yɔ mɛ. Togun ɔ́ wa cyɔ ɔ́ nǔ tɔn nú azǎn tɛ́nwe. 25Sín gbɛ hwenu Judíti tɔn káká yi jɛ hwenu e é kú é ɔ́, mɛ ɖěbǔ sɔ́ glá dó xɛsi nú Izlayɛ́li ví lɛ́ɛ ǎ.
La Bible en langue fon © Alliance Biblique du Bénin, 2012.