Lom 12
12
Kidziingu kyamoono mu Kiristo
1Hango me nyisyaamisa beenu bampaangi, mu kyaari kya Nzaambi, mu kuyekele manyutu meenu bunu kikabu kyamwooyo, kyangisi na kyabweeye kuri Nzaambi. Yiyo ngo nsambukulu yangwanwa kuri beenu. 2Yaa lunama bifu bya ntaangu yimayi ko, ngo kasi beenee bakituka mu nkitukulu ya kiluunsi, mpisi lufyongokono bunu buri kutya kwa Nzaambi, kwakubwete, kwatya na kuri na nyirimunu yakuka.
3Mukwongo, me nyileele ti, mu bweese bu bari baha kuri me, kuri mpisi muutu mu beenu, mu kuhele kuba na ndyaatulu ya masiiku, yalutila kiteesu, ngo beenee na ndyaatulu ya madyeele, bunu buri kiteesu kya kanyi, dyaha Nzaambi kuri muutu-muutu. 4Mukwongo, bunu bu turi na binamu byalaka mu nyutu mosi, ngo binamu byobinso byahele kuba na kisalu kimosi, 5bunubwo se, beetuneenu turi balaka, ngo turi nyutu mosi mu Kiristo, na mpisi muutu wuri kinamu mu nyutu mbaasi. 6Turi na bikabu byasobokono, bunu buri bweese bu bari batuha. Mbuti mbikululu, lo yiba bunu bu yelemini mu kanyi; 7mbuti kisalu, lo mu kisalu; mbuti muyikisi, lo mu nyikusulu; 8mbuti musyaamisi, lo mu nsyamusunu; mukabiri, lo kaheele mu mutima-kikabu; mutwaalisi, lo katwaalisila mu kuheme; ngaa-ngebe, lo kasalila mu kiminu.
9Ntiilu yiba yahele na bumpitu-bumpyoongo. Yitikee mamabi, kaangamee mu mamabwe. 10Mu mitariri ntiilu ya kimpaangi, beenee na bundeembu beenu na beenu, silisineenu bukwa beenu na beenu kunsa lukiinsu. 11Beenee na kuheme nkani ka bulyeebu ko, salilee Mfumu mu mpeeve ya bumfifu. 12Beenee na kiminu mu nsiitu, beenee na nkindusulu-mutima mu mpasi, beenee basyaama mu lusaambulu. 13Bakisee bangisi mu manzala maaku, namitinee mu ntambukulu banzeense.
14Sakumunee babo bakwelukwaamisa, basakumunee yaa lubabulula mampopi ko. 15Monee kiminu na babo bari mu kiminu, dilee na babo bari mu kudila. 16Beenee na nyukusunu beenu na beenu, yaa luba na masiiku ko, ngo tambukilee ma kuluka. Yaa lumonoko ba bangaa-madyeele mu beenu-meene ko.
17Yaa lwebvutula bubi mu bubi kuri muutu ko, sakee kuyirika mamabwe ha busu bwa baatu bobanso; 18mbuti bwadzuka, na diri mu miswa mya beenu, lo beenee na kiyeengi na baatu bobanso. 19Banduku ba mutima, yaa lubvutula kitete ko, ngo hemesee nkesi dza Nzaambi dzisala, bukuri dyatinu ti: «Me nyibvutula kitete, me nyikabula museendu,» bu leele Mfumu. 20Kasi mbuti mutaatu waaku wuri na nzala, lo muha byandya; mbuti wuri na mpwiisu, lo wumuha maampa ma kunwa; bukuri wubaanaa wuyirika ma bubwo, lo makeengele ma mbaawu, wuri mu kukutukisa ha yulu mutu waandi. 21Yaa tala ko ti mamabi makubwiisa, ngo ye bwiisa mamabi mu mamabwe.
Currently Selected:
Lom 12: MW2013
Highlight
Share
Copy
Want to have your highlights saved across all your devices? Sign up or sign in
Nouveau Testament Beembe © Bible Society of the Republic of Congo, 2013.