Jonas 1
1
Syaya ge Jonas ne Dok ndwara zḛ
1Bage ɗiŋnedin jan Jonas ge Amitay vya go#2Gan 14:25.: 2«Ɗage digi, mbo suwal ga̰l Ninive ya oy fare, ne da pe, ya̰l ge na naa ma ne ke, det ja mbi ta.»
3Amma Jonas ɗage digi ndwara sya mbo Tarsisa ya, uzi ya kaal ne Bage ɗiŋnedin ta. Na sḛ mbo suwal Yafa ya, ɓol fak ga̰l ge ne mbo suwal Tarsisa, pot fak mbe, ndé na go poseya ne naa ge may ma, ndwara mbo Tarsisa ya uzi ya kaal ne Bage ɗiŋnedin ta.
4Bage ɗiŋnedin é saam ge ɓaŋlaŋ kwalla ge maŋgaɗam ga̰l yuwam pul go. Fak ga̰l mbe ka ɓyare halla uzi. 5Naa ge fak ma sḛ wan vo, ndu ge daage ɗage tol na dok ne ka̰l ndaar, a cigi bama kaŋ ma maŋgaɗam ga̰l yuwam se ya ndwara foge fak ga̰l digi. Jonas me, wat fak pul hṵsi se ya, dol tene se, son dam vop.
6Naa ge fak ma ga̰l ndar ya Jonas ta, gace na go: «A da ke mo ne, mo te fí dam’a? Ɗage digi! Tó mo Dok, tamekyala mo Dok mbe ma̰ kwa nee a̰se, ma̰ sya nee ko̰r, ge nee ba su to.»
7Swaga mbe go, naa ge fak ma ɗage jan ta go: «Uusi me nee baare, nee ba kwa pe go na wuɗi ne nee buwal zi ge ne gene ya̰l ya nee pal ne de?» Nama sḛ ma uusi baare, amma baare uusiya det ge Jonas pal. 8A jan Jonas go: «Wa̰ i fare ge ne zwa ya̰l ya nee pal go pe! Mo mbo mbo ke ma temel pe? Mo ɗage da ne le da ya ɗaa? A tol mo suwal dḭl gyana ɗaa? Mo ma hir ne ɗaa?» 9Jonas jan nama go: «Mbi Ibriniya ne, bage ne sya Bage ɗiŋnedin, Dok ge ne dó digi digi ya ma, ne maŋgaɗam ga̰l yuwam, ne suwar vo ne.» 10Amma vo ge ɓaŋlaŋ wan naa mbe ma gḛ ge be to, nama sḛ ma jan Jonas go: «Mo ke da go ɗaa!» Ago, ne fare pe wanna ge Jonas ne ta, naa mbe ma kwa tyatyat go, Jonas ɓyare sya uzi ya kaal ne Dok ta. 11Naa mbe ma gwan ele na uwale: «I ke ne mo da ɗo, maŋgaɗam ga̰l yuwam sḭḭl ba iyal se ɗaa?» Swaga mbe go, maŋgaɗam ga̰l yuwam sḭḭl gwan ɗage ndarra waɗeya.
12Jonas gwan ne nama janna go: «Aŋ dó mbi mam se ya, go no maŋgaɗam ga̰l yuwam sḭḭl ba iyal se ne aŋ pal go, mbi kwa kwa go, da ne mbi pe saam labreya pot aŋ ne sḭḭl no.» 13Swaga mbe go, naa mbe ma a ɗage syal fak ga̰l iibiya ndwara mbo wakal zi, amma a day to, ne da pe, maŋgaɗam ga̰l yuwam sḭḭl ka gwan ndarra waɗeya. 14Swaga ge a ne kwa no, a oy Bage ɗiŋnedin, a jan na go: «O! Bage ɗiŋnedin, kaage mo ya̰ i suya ne ndu mbe no pe to, ya̰ swama ge na ne na ka i pal to, i suli ne ndu mbe siya, ago mo, Bage ɗiŋnedin kaŋ ge mo ne ɓyare ya na ke, ke mbe go no tem.»
15Naa ge fak ma wan Jonas, a dol na maŋgaɗam ga̰l yuwam se ya, maŋgaɗam ga̰l yuwam sḭḭl juliliya iyal se. 16Go no, a gá sya Bage ɗiŋnedin vo gḛ ge be to. A ke tuwaleya hon Bage ɗiŋnedin, a ke wak tuli ma me.
Currently Selected:
Jonas 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.