Bage oy fare 7
7
Yuwaleya ge ndu ge zwama ne
1Pateya golgo waɗe idir ge hur tuli.
Dam siya ge ndu ne a golgo, waɗe na dam tolla#Frs 22:1..
2Golgo ndu mbo swaga siya go,
ge mbo yál ge vḛso ne diŋ.
Ago siya a pe aya ge ndu dasana ne,
a kwaɗa ge ndu ge daage dwat siya pal
tek ge gale ne na ndwara.
3Kḭḭmi golgo waɗe maam.
Ago ndu ndwara da ne pool kat wiya ne miim,
amma na dulwak kat fiya se halas.
4A ɓol ndu ge zwama swaga siya ma go,
amma a ɓol ndu ge dale swaga ke laar saal go.
5A golgo mo zá̰ mḛreya ge ndu ge zwama ne,
ge mo zá̰ kaŋ mballa ge naa ge dale ma ne.
6Maam ge ndu ge dale ne
a dimma ca ne kore ne kabre ol kaja̰le pe zi go.
No uwale, a a̰me pe ne to.
7Yál njoyya hat ndu ge zwama daal,
wak lwaɗeya er na dulwak.
8Temel wak aya golgo waɗe na pe eya.
Suul golgo waɗe jegreya.
9Há tene saŋge pore to.
Ago pore swaga katɗa ya naa ge dale ma zi.
10Kaage mo jan go,
dam ge dḛ zaŋgal ma waɗe ge ma̰ ma da ne kwaɗa to.
A be zwama é mo jan fare mbe no ne to.
11Zwama golgo waɗe joo zamma.
Mbar naa ne dunya zi mbar pet#Ayu 28:12-19, Frs 3:13-16, 8:11..
12Zwama zur naa ne fare zi,
dimma ne bware ne zur naa go.
Zwama é ndu dam ma don zḛ,
no a hamba ge fare kwarra ne ne#Frs 3:18..
13Ndi kaŋ kerra ge Dok ne ma gale:
A wuɗi day ɗwabe kaŋ ge na sḛ ne ŋgwage na ne ɗaa?
14Dam ge tuli zi, ke laar saal,
dam ge yál zi me, wa̰ tene, mo dwat.
Ago dam mbe ma jwak,
a Dok ke nama ne,
ne da pe, na kaage ndu dasana
na kwa kaŋ ge ne mbo kerra na go̰r go to.
15Ge mbi swaga katɗa ge swak suwar pal mbe no zi,
mbi kwa kaŋ ma pet:
Ndu ge dosol su ne dosol ge na ne pe,
ndu ge sone me, na dam ma ka ndiri zḛ ne sone ge na ne pe.
16Há tene dosol gḛ waɗeya to,
ŋgay tene zwama gḛ waɗeya to me.
Mo ɓyare vḛne tene kyaɗa ɗaa?
17Há tene sone gḛ waɗeya to,
ke tene dale gḛ waɗeya to me.
Mo ɓyare hun tene be mo dam ma mbyatɗa to kyaɗa ɗaa?
18A kwaɗa go, mo ndi fare mbe ma no jwak solom to.
Ago ndu ge ne sya Dok vo koy nama mbe ma no koy jwak.
19Zwama hon ndu pool waɗe gan ma wol ge ne suwal ge ɗu ɗiŋ.
20Ndu a̰me ge dosol ne suwar pal ge ne ke kwaɗa ɗeŋgo,
be ge ke sone to to bat#Kmb 143:2, Frs 20:9..
21Kaage mo e mo haŋgal fare janna ge naa ne ma pal pet to.
Go no, mo mbo za̰ mo dore sal mo to.
22Ago, mo sḛ ne mo pala, mo kwa kwa go
dam a̰me ma mo sal naa ya go me.
23Mbi hale kaŋ ma pe pet,
mbi jya̰ tene go, mbi ɓyare kat zwama.
Amma mbi be mbyat ɓol na to.
24Mbi mbyat kwar fare pe ɗugul to.
A ɗugul helek, a wuɗi mbyat ge kwar na pe ne ɗaa?
25Mbi ho̰ tene hale fare pe lelet go
mbi ɓó zwama ne kwar fare pe ɗugul,
mbi kwa go sone kerra a dale ne baŋ,
a daal ge waɗeya ne baŋ.
26Uwale, mbi kwa go, kaŋ ge ne waɗe siya ne sone,
a gwale ge na sḛ ne na pala a faɗe ne,
na dulwak boy ne,
na tok ma zool ma ne me.
Ndu ge ne sya Dok vo, ɓur ne na tok zi ya zum baŋ ne,
amma ndu ge sone wat na faɗe zi#Frs 2:16-19, 6:24—7:27, 22:14..
27Mbi ndi kaŋ ma ɗu ne ɗu,
ne da pe mbi kwa pe ɗugul,
mbi bage oy fare, mbi jan go, kaŋ, ge mbi ne ɓó,
28no puy ɗe, mbi gale be ɓol na to:
Ne naa sonmo ge dubu ma buwal zi,
mbi ɓó ndu ge jwap ɗu kikit.
Amma ne naa zaab ma buwal zi pet,
mbi be ɓol ndu a̰me ɗu to bat.
29Ɗaŋ ɗe, ndi kaŋ ge mbi ne ɓo no:
Ago Dok ke naa dasana ma dosol,
amma a nama sḛ ma ɓyare vuuɗi ta gḛ ne.
Currently Selected:
Bage oy fare 7: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.