San Juan 13
13
Ema Jesús, masipapevachavacapa ena máimitureana
1Tiuri, te jena sácheanahi tamirahupaipahi eta Pascua, ema Jesús máecharipa táitecapauchayarepa eta majunijisirayarehi eta juca apaquehe. Tiyanayarepa mayehe ema Maiya. Tétavicavahi eta máemunasirahavihi viti máimitureana. 2-4Jéhesare ema Júlasi, máimipanerecharipa ema Váinaraji eta máijararesirayarehi ema Jesús. Émasera ema Jesús, máecharipa eta machavirayarepa mayehe ema Maiya taicha eta másinehi. Émarichuhi ema Maiya tíjaracahi eta tamutuirayarehi máituruequeneha. Tacahe, te jena yati, eta máenisirahavihi viti máimitureana, téchepucapa ema Jesús. Tivejamuhiacavapa eta mamuiriha. Tiáyuruñequechavapa te mayehe paño. 5Tásiha, majucuhapa eta une te bañadora. Tépanavapa tisipapevachahavihi eta vívapeana viti máimitureana. Mavehavarepa eta paño, tiájapevachahavipa.
6Tásiha, te macapayacapa ema Pedro, éma vahi máisapavahini eta masipapevachira eta máivape. Máichapa:
—Tata maestro, vahi táurica eta pisipapevachiranuhini núti —macahepa.
7Tásiha, ema Jesús majicapapa:
—Páuresamivihi píti. Vuíchaha picaicutiarahini eta tacayemaqueneanahi eta juca. Achichuinapasera picaicutiarainapa.
8Ema Pedro máichavarepa:
—Nútisera, vahi pisipapevachanuimahi.
Ema Jesús máichavarepa:
—Te vahi nucusipapevachavi, vaipa pítiparacaimahi eta nuyehe.
9Tacahe, ema Pedro máichapa:
—Tata, vahi tácarichuimahi pisipaca eta nívapeana. Énerichuvare eta nuvahuana étapa juca nuchuti.
10Tásiha, máichavarepa ema Jesús:
—Nácani nacaviravahi vahi tácamesaimahi tiápechavana ticasipana. Tacarichu ticasipayarehi eta náivapeana. Éti, epachihavacaripa; váhisera ámutuhini epachihahini —máichapa.
11Ema Jesús máichahavihi eta juca vahi vámutuhini vipachihahini taicha máimatihi ema tíjararecayarehi.
12Te títavapa eta masipapevachirahavihi, ticamuirihavarepa eta mamuiriha. Tásiha, téjacapa te mesa. Máichahavipa:
—¿Ímatiequenehapuca éti eta juca níchirahehi? 13Eti ímijarechanu “Tata Maestro”. Étupicahisera, taicha yátupiquenénuhi eta numaestruvahi. 14Eta níchirahehi núti emaestro nusipapevachirahehi, ene ecaheyare éti eta ítaresiraya. Esipapevachacacayare eta ívapeana. 15Éhicayare eta juca níchaquenehi. Étayareichu eta nímitusirahehi. 16Nutupiruva numetacahe: Ema musu vahi macachuricaimahi ema máquenu. Émaripa ema vanairucahi váhivare macachuricaimahi ema tivanecahi. 17Te yátupina ecaravahuinapa eta juca nímiturapiana, tájina íchiravaimahi. Ecunachacareyareva eta ítauchiraya tamutu.
18Néchahinéni núti vahi ámutuhini esuapanu. Nímatihehivare eti yátupiqueneana nunerejiruanahi. Títauchavayarehisera eta táechajiriruvahi eta Sagrada Escritura, ani tacahehi: “Ema néniruasahi, masapihahi ticatianacanuhi”. 19Puiti nucainapucava numetacahe apaesa te táitauchavapa eta juca numetarapi, ímatinuinapa nuti yátupiquenénuhi Cristo. 20Nutupiruva numetacahe: Nácani tijacapaheanayare éti nuvaneruana, ticaecheranahi eta najacapiranuhi núti apana. Énerichuvare, najacapahivare ema Tata Nucaiya quene.
Ema Jesús máechajisiha eta máijararesirayare ema Júlasi
(Mt 26.20-25; Mr 14.17-21; Lc 22.21-23)
21Te títapiricapa eta máichirahavihi ema Jesús, téñamavaipa te masamure eta máijararesirayarehi ema émana vichamurihi. Tacahe, matupiruvapa máichahavihi:
—Nutupiruva numetacahe: Mararihi ani te etaracu ema tíjararecanuyare —macahepa.
22Tacahe, viáramecarinehi eta máichirahavihi. Véseniuquijiricacapa. Vahi vímatihini nájahahipuca ema máichaquenehi. 23Nutiarihisera nuti nachamuri máemunarupananuhi ema Jesús. Nucachacayahi éma eta véjasirahi te mesa. 24Tacahe, ema Pedro tiúmatsiuquichanupa nuyaserecahini nájahahipuca ema máichaquenehi ema Jesús. 25Tásiha, núti nujajaicapa ema Jesús:
—Tata, ¿nájahasica ema píchahi?
26Tásiha, tijicapanupa:
—Nuyuvetumecaya eta pan, néchipaejicaya. Ema níjararuyare, émara ema tíjararecanuyare —macahepa.
Tacahe, máechipaejicapa eta pan, máijaracapa ema Júlasi. 27Jéhesaréinehi, ema Váinaraji enevanepa mávahácahi éma. Tásiha, ema Jesús máichavanepa:
—Júlasi, eta juca pipanereruhi, táitauchavavanepa puítinaichu —máichapa.
28Váhisera vácaicutiarahini eta juca máichirahi ema Jesús ema Júlasi. 29Vímijachahichucha eta mavacharesirayarehivare eta tinicacare tayeheyare eta piesta, mácajihivarepucaini ena páureana, taicha émahi técha eta tarera máunasirarehi eta plata eta matesorerovahi. 30Te títanesipa ema Júlasi eta manisirahi eta pan, tiyanapa tiúchucahi. Tijunijicahavipa te jena yátiquenehi.
Ema Jesús macavanairipipa eta vémunasiracacayare
31Eta máuchusiraipa ema Júlasi eta viyehe, ema Jesús máichahavipa:
—Títecapapa puiti eta táitauchiravayare ímahainapa éti eta máitupajijiasirava ema Viya étapa eta nítupajijiasiravayare núti Manerejirunuhi éma. Éti ecunachahavinapa. 32Nímerecainapa eta máitupajijiasiravahi ema Tata, ema apana máimerecayareva eta nítupajijiasiravahi nuti Machicha. Puiti juca sácheanayare títauchavainapa. 33Nuchichanaveana, ánipirine eta juca ecachaneranuyare. Tásiha, nuyanainapa. Éti, etanucanuinapa; vuíchahasera ítujicavaimahi ecapayacanu. Étarichuhi eta numetarapihi nayehe ena ticatianacanuana eta níchiravacahi vahi títujicavanaimahi ticapayacanuana. 34Puiti nunaquicayare eta juca arairu nuvanairipi eta eyehe. Émunacacayarehi ena echamuriana. Ecutinuyarehi eta némunasiráhehi núti. Ene ecaheyare éti apanavare. 35Te yátupina émunacaca, eta tímatiacaheanayare ena achaneana étirahi eti nímitureanahi —máichahavipa.
Ema Jesús máimereucha ema Pedro eta máepiyasiravaya vahi máimati ema Jesús
(Mt 26.31-35; Mr 14.27-31; Lc 22.31-34)
36Tásiha, ema Pedro mayaserecapa:
—Tata Maestro, ¿távihainapa picaijuheya?
Ema Jesús majicapavarepa:
—Eta nucaijuheya puiti, éti vuíchaha ítujicavaimahi éhicanu. Ecapayacanuyaresera. Váhivare ánasimahi éti. Vuíchahasera tíjahúchavaimahi —máichapa.
37Ema Pedro majicapavarepa:
—¿Tájaha tacuichavaini vahi nucuratahahini néhicavi, Tata? Núti níjaracava népena píchavenénahi píti —máichapa.
38Tacahe, ema Jesús máichapa:
—Píti, pímijachavapuca píjaracava pépena eta picatiuchiranuya. Numetacavisera: Puiti juca yati, te tamirahuinarichaha eta táechajisiraya eta varayu te tijararahi, píti mapaheyare pépiyacavayare vahi pímatinu, eta picatiuchiravayarehi píti —máichapa.
Currently Selected:
San Juan 13: ign
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
San Juan 13
13
Ema Jesús, masipapevachavacapa ena máimitureana
1Tiuri, te jena sácheanahi tamirahupaipahi eta Pascua, ema Jesús máecharipa táitecapauchayarepa eta majunijisirayarehi eta juca apaquehe. Tiyanayarepa mayehe ema Maiya. Tétavicavahi eta máemunasirahavihi viti máimitureana. 2-4Jéhesare ema Júlasi, máimipanerecharipa ema Váinaraji eta máijararesirayarehi ema Jesús. Émasera ema Jesús, máecharipa eta machavirayarepa mayehe ema Maiya taicha eta másinehi. Émarichuhi ema Maiya tíjaracahi eta tamutuirayarehi máituruequeneha. Tacahe, te jena yati, eta máenisirahavihi viti máimitureana, téchepucapa ema Jesús. Tivejamuhiacavapa eta mamuiriha. Tiáyuruñequechavapa te mayehe paño. 5Tásiha, majucuhapa eta une te bañadora. Tépanavapa tisipapevachahavihi eta vívapeana viti máimitureana. Mavehavarepa eta paño, tiájapevachahavipa.
6Tásiha, te macapayacapa ema Pedro, éma vahi máisapavahini eta masipapevachira eta máivape. Máichapa:
—Tata maestro, vahi táurica eta pisipapevachiranuhini núti —macahepa.
7Tásiha, ema Jesús majicapapa:
—Páuresamivihi píti. Vuíchaha picaicutiarahini eta tacayemaqueneanahi eta juca. Achichuinapasera picaicutiarainapa.
8Ema Pedro máichavarepa:
—Nútisera, vahi pisipapevachanuimahi.
Ema Jesús máichavarepa:
—Te vahi nucusipapevachavi, vaipa pítiparacaimahi eta nuyehe.
9Tacahe, ema Pedro máichapa:
—Tata, vahi tácarichuimahi pisipaca eta nívapeana. Énerichuvare eta nuvahuana étapa juca nuchuti.
10Tásiha, máichavarepa ema Jesús:
—Nácani nacaviravahi vahi tácamesaimahi tiápechavana ticasipana. Tacarichu ticasipayarehi eta náivapeana. Éti, epachihavacaripa; váhisera ámutuhini epachihahini —máichapa.
11Ema Jesús máichahavihi eta juca vahi vámutuhini vipachihahini taicha máimatihi ema tíjararecayarehi.
12Te títavapa eta masipapevachirahavihi, ticamuirihavarepa eta mamuiriha. Tásiha, téjacapa te mesa. Máichahavipa:
—¿Ímatiequenehapuca éti eta juca níchirahehi? 13Eti ímijarechanu “Tata Maestro”. Étupicahisera, taicha yátupiquenénuhi eta numaestruvahi. 14Eta níchirahehi núti emaestro nusipapevachirahehi, ene ecaheyare éti eta ítaresiraya. Esipapevachacacayare eta ívapeana. 15Éhicayare eta juca níchaquenehi. Étayareichu eta nímitusirahehi. 16Nutupiruva numetacahe: Ema musu vahi macachuricaimahi ema máquenu. Émaripa ema vanairucahi váhivare macachuricaimahi ema tivanecahi. 17Te yátupina ecaravahuinapa eta juca nímiturapiana, tájina íchiravaimahi. Ecunachacareyareva eta ítauchiraya tamutu.
18Néchahinéni núti vahi ámutuhini esuapanu. Nímatihehivare eti yátupiqueneana nunerejiruanahi. Títauchavayarehisera eta táechajiriruvahi eta Sagrada Escritura, ani tacahehi: “Ema néniruasahi, masapihahi ticatianacanuhi”. 19Puiti nucainapucava numetacahe apaesa te táitauchavapa eta juca numetarapi, ímatinuinapa nuti yátupiquenénuhi Cristo. 20Nutupiruva numetacahe: Nácani tijacapaheanayare éti nuvaneruana, ticaecheranahi eta najacapiranuhi núti apana. Énerichuvare, najacapahivare ema Tata Nucaiya quene.
Ema Jesús máechajisiha eta máijararesirayare ema Júlasi
(Mt 26.20-25; Mr 14.17-21; Lc 22.21-23)
21Te títapiricapa eta máichirahavihi ema Jesús, téñamavaipa te masamure eta máijararesirayarehi ema émana vichamurihi. Tacahe, matupiruvapa máichahavihi:
—Nutupiruva numetacahe: Mararihi ani te etaracu ema tíjararecanuyare —macahepa.
22Tacahe, viáramecarinehi eta máichirahavihi. Véseniuquijiricacapa. Vahi vímatihini nájahahipuca ema máichaquenehi. 23Nutiarihisera nuti nachamuri máemunarupananuhi ema Jesús. Nucachacayahi éma eta véjasirahi te mesa. 24Tacahe, ema Pedro tiúmatsiuquichanupa nuyaserecahini nájahahipuca ema máichaquenehi ema Jesús. 25Tásiha, núti nujajaicapa ema Jesús:
—Tata, ¿nájahasica ema píchahi?
26Tásiha, tijicapanupa:
—Nuyuvetumecaya eta pan, néchipaejicaya. Ema níjararuyare, émara ema tíjararecanuyare —macahepa.
Tacahe, máechipaejicapa eta pan, máijaracapa ema Júlasi. 27Jéhesaréinehi, ema Váinaraji enevanepa mávahácahi éma. Tásiha, ema Jesús máichavanepa:
—Júlasi, eta juca pipanereruhi, táitauchavavanepa puítinaichu —máichapa.
28Váhisera vácaicutiarahini eta juca máichirahi ema Jesús ema Júlasi. 29Vímijachahichucha eta mavacharesirayarehivare eta tinicacare tayeheyare eta piesta, mácajihivarepucaini ena páureana, taicha émahi técha eta tarera máunasirarehi eta plata eta matesorerovahi. 30Te títanesipa ema Júlasi eta manisirahi eta pan, tiyanapa tiúchucahi. Tijunijicahavipa te jena yátiquenehi.
Ema Jesús macavanairipipa eta vémunasiracacayare
31Eta máuchusiraipa ema Júlasi eta viyehe, ema Jesús máichahavipa:
—Títecapapa puiti eta táitauchiravayare ímahainapa éti eta máitupajijiasirava ema Viya étapa eta nítupajijiasiravayare núti Manerejirunuhi éma. Éti ecunachahavinapa. 32Nímerecainapa eta máitupajijiasiravahi ema Tata, ema apana máimerecayareva eta nítupajijiasiravahi nuti Machicha. Puiti juca sácheanayare títauchavainapa. 33Nuchichanaveana, ánipirine eta juca ecachaneranuyare. Tásiha, nuyanainapa. Éti, etanucanuinapa; vuíchahasera ítujicavaimahi ecapayacanu. Étarichuhi eta numetarapihi nayehe ena ticatianacanuana eta níchiravacahi vahi títujicavanaimahi ticapayacanuana. 34Puiti nunaquicayare eta juca arairu nuvanairipi eta eyehe. Émunacacayarehi ena echamuriana. Ecutinuyarehi eta némunasiráhehi núti. Ene ecaheyare éti apanavare. 35Te yátupina émunacaca, eta tímatiacaheanayare ena achaneana étirahi eti nímitureanahi —máichahavipa.
Ema Jesús máimereucha ema Pedro eta máepiyasiravaya vahi máimati ema Jesús
(Mt 26.31-35; Mr 14.27-31; Lc 22.31-34)
36Tásiha, ema Pedro mayaserecapa:
—Tata Maestro, ¿távihainapa picaijuheya?
Ema Jesús majicapavarepa:
—Eta nucaijuheya puiti, éti vuíchaha ítujicavaimahi éhicanu. Ecapayacanuyaresera. Váhivare ánasimahi éti. Vuíchahasera tíjahúchavaimahi —máichapa.
37Ema Pedro majicapavarepa:
—¿Tájaha tacuichavaini vahi nucuratahahini néhicavi, Tata? Núti níjaracava népena píchavenénahi píti —máichapa.
38Tacahe, ema Jesús máichapa:
—Píti, pímijachavapuca píjaracava pépena eta picatiuchiranuya. Numetacavisera: Puiti juca yati, te tamirahuinarichaha eta táechajisiraya eta varayu te tijararahi, píti mapaheyare pépiyacavayare vahi pímatinu, eta picatiuchiravayarehi píti —máichapa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.