Josue 1
1
Agsagana dagiti Israelita a Mangparmek iti Canaan
1Kalpasan ti ipapatay ni Moises nga adipen ni Yahweh, nakisao ni Yahweh ken ni Josue a katulongan ni Moises ken anak ni Nun. 2Kinunana, “Natayen ni Moises nga adipenko. Sika ken dagiti amin nga Israelita, agsaganakayon a bumallasiw iti Karayan Jordan ket inkay iti daga nga itedko kadakayo. 3Kas#Deut. 11:24-25. imbagak ken ni Moises, intedkon kadakayo ti amin a daga a mabaddekanyonto. 4Mangrugi ti beddengyo iti let-ang iti abagatan agingga kadagiti bantay ti Libano iti amianan, manipud iti dakkel a Karayan Eufrates iti daya, ken amin a sakup dagiti Heteo, sa agpa-laud agingga iti Taaw Mediterranean. 5Josue,#Deut. 31:6, 8; Heb. 13:5. awanto ti makaparmek kenka iti unos ti panagbiagmo. Addaakto kenka a kas iti kaaddak idi ken ni Moises. Saankanto a panawan wenno baybay-an. 6Pakirdem#Deut. 31:6-7, 23. ti pakinakemmo ket dika agbuteng ta ipanguloam dagitoy a tattao a mangsakup iti daytoy a daga nga insapatak nga ited kadagiti kapuonanda. 7Masapul ngarud a pakirdem ti pakinakemmo ket tungpalem a siiinget dagiti amin a Linteg nga inted kadakayo ni Moises nga adipenko. Wen, tungpalem tapno agballigika iti sadinoman a papanam. 8Laglagipem a basaen ken adalen ti libro ti Linteg iti aldaw ken rabii tapno maannurotmo amin a sagudayenna ket rumang-ay ken agballigikanto. 9Laglagipem ti bilinko: ‘Pakirdem ti pakinakemmo. Dika agbuteng wenno maupay, ta siak, ti Apo a Diosmo, addaak latta kenka iti sadinoman a papanam.’”
10Kalpasanna, imbilin ni Josue kadagiti pangulo 11a sursorenda ti kampo ket ipakaammoda daytoy kadagiti tattao, “Isaganayo dagiti masapsapulyo agsipud ta inton maikatlo nga aldaw, ballasiwenyo ti Karayan Jordan ket sakupenyo ti daga nga ited kadakayo ti Apo a Diosyo.”
12Kinuna#Num. 32:28-32; Deut. 3:18-20; Jos. 22:1-6. ni Josue kadagiti tribu ti Ruben ken Gad ken iti kagudua ti tribu ti Manases: 13“Laglagipenyo ti imbaga kadakayo ni Moises nga adipen ti Apo. Imbagana nga itedto ti Apo a Diosyo daytoy a daga iti daya ti Jordan a pagnaedanyo. 14Agbatinto dagiti assawayo, dagiti annakyo ken dagiti animalyo iti daga nga inted ni Moises kadakayo. Ngem bumallasiwto dagiti mannakigubat kadakayo ket umun-unadanto ngem dagiti padayo nga Israelita tapno tulonganda ida 15agingga a masakupdan ti daga nga inted kadakuada ti Apo a Diosyo. Kalpasanna, mabalinyonton ti agsubli ken agnaed iti bukodyo a daga nga inted ni Moises nga adipen ti Apo ditoy akindaya a bangir ti Jordan.”
16Insungbatda ken ni Josue, “Aramidenmi amin nga imbagam ket inkam iti sadinoman a pangibaonam kadakami. 17Agtulnogkami kenka a kas iti kanayon a panagtulnogmi ken ni Moises. Sapay koma ta adda kenka ti Apo a Diosmo, a kas iti kaaddana idi ken ni Moises. 18Mapapatayto ti siasinoman nga agsukir ken saan nga agtungpal iti aniaman a bilinmo. Ngarud, masapul a pakirdem ti pakinakemmo ket dika agbuteng!”
Currently Selected:
Josue 1: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society