Hebreo 1
1
Nagsao ti Dios babaen iti Anakna
1Kadagidi un-unana nga aldaw, nagsao ti Dios kadagidi kapuonantayo iti namin-adu a daras ken iti nadumaduma a wagas babaen kadagiti profeta. 2Ngem kadagitoy maudi nga aldaw, nagsao kadatayo babaen iti Anakna. Pinarsua ti Dios ti amin a lubong babaen kenkuana, ket isu ti pinilina nga agtagikua kadagiti amin a banag. 3Ti Anak ti mangipakita iti dayag ti Dios. Isu ti napaypayso a ladawan ti kinadiosna. Isu pay ti mangtartarawidwid iti amin a lubong babaen iti mannakabalin a saona. Kalpasan ti pananggun-odna iti pannakapakawan ti basol ti sangkataoan, nagtugaw sadi langit iti makannawan ti Kangatoan a Pannakabalin.#3 MAKANNAWAN…PANNAKABALIN: ti lugar ti dayaw ken turay.
Natantan-ok ti Anak ngem dagiti Angheles
4Naaramid ti Anak a naturturay ngem dagiti angheles. Nadaydayaw met ti naganna nga inted ti Dios ngem ti naganda. 5Awan#Sal. 2:7; 2 Sam. 7:14; 1 Cron. 17:13. a pulos kadagiti angheles ti nangibagaan ti Dios,
“Sika ti Anakko;
Ita nga aldaw, nagbalinak nga Amam.”
Awan met ti anghel a nangikarianna,
“Siakto ti Amana,
Ket isunto ti Anakko.”
6Ngem#Deut. 32:43 (LXX). kuna ti Dios idi dandanina ibaon ti inauna nga Anakna ditoy lubong,
“Masapul nga agdaydayaw kenkuana dagiti amin nga angheles ti Dios.”
7Daytoy#Sal. 104:4 (LXX). ti kuna ti Dios no maipapan kadagiti angheles:
“Pagbalinen ti Dios nga angin dagiti anghelesna.
Pagbalinenna met a sumsumged nga apuy dagiti adipenna.”
8Ngem#Sal. 45:6-7. no maipapan iti Anak, kunana daytoy:
“Ti tronom, O Dios,#8 Ti tronom, O Dios: wenno Ti Dios isu ti tronom, kuna ti dadduma a manuskrito. agnanayon nga awan patinggana!
Agturayka a sililinteg iti pagariam.#8 Agturayka…pagariam: wenno Agturayka…pagarianna.
9Inayatmo ti kinalinteg ket ginuram ti kinadakes.
Isut' gapuna a pinilinaka ti Dios; wen, ti Diosmo.
Ket linanaannaka iti rag-o—inikkannaka iti dayaw
a dakdakkel ngem ti intedna kadagiti kakaduam.”
10Kunana#Sal. 102:25-27 (LXX). pay,
“Sika, Apo, ti nangparsua iti daga idi punganay,
Ket dagiti langit aramid dagiti imam.
11Mapukawdanto, ngem mataginayonka.
Dumaandanto amin a kas pagan-anay.
12Kupinemto ida a kas iti kagay,
ket masukatandanto a kas pagan-anay,
ngem pulos a dika agbalbaliw,
ket ti biagmo dinto agpatingga.”
13Awan#Sal. 110:1. a pulos kadagiti angheles ti nagkunaan ti Dios iti kastoy:
“Agtugawka ditoy makannawanko,
agingga a maparmekko dagiti kabusormo
ket addada iti babaem.”
14Siasino ngarud dagiti angheles? Espirituda nga agserserbi iti Dios ket imbaonna ida a tumulong kadagiti umawat iti pannakaisalakan.
Currently Selected:
Hebreo 1: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society