TUTU JUAAN 18
18
Tiin ñivi chi ra Jesuu
(Mt. 26.47‑56; Mr. 14.43‑50; Lc. 22.47‑53)
1Chacan ni cahan ra Jesuu, ta quee ra. Cuahan ra chi ra sacuaha chi ra. Cuahan ra ta ra inga chiyo xahva Cedrón, ta queta ra ta ra iin nu cumi ñivi yutun tata, ta quihvi ra. 2Chito tahan run Juda ndaa iyo chi, vati cuaha chaha nducuiti ra Jesuu chi ra sacuaha chi ra tican. 3Chacan cuu cha quihin run iin cuenda sandaru, ta quihin run chi tatun tachi ra sutu chahnu chi ra fariseo, ta cuahan ra tican, ta naan ra ta ra ñuhun. Naan ra ta ra espada. Naan ra ta ra garote. Naan ra. 4Tacan cuu, ta chito ra Jesuu ñaan cha cuu cha cua tahan ra, ta quee ra, ta quechaha nducu tuhun ra chi ñi ti:
―¿Yochi nanducu ndo?
5Ta cati ndico ñi chi ra ti:
―Chi ra Jesuu ra ñuun Nazaret vachi quihin ndi ―cati ñi.
Ta cati ndico ra chi ñi ti:
―Yuhu cui ―cati ra.
Chacuinda tahan run Juda chi ñi, ta maan run cuu run ni xico tuhun chi ra Jesuu. 6Cha cati ra Jesuu ti maan ra cuu ra, ta chinu chata ñi suhva, ta nduva ñi nu ñuhun. 7Tacan cuu, ta nducu tuhun ndico tucu ra chi ñi ti:
―¿Yochi nanducu ndo?
Ta cati ñi ti:
―Chi ra Jesuu ra ñuun Nazaret vachi quihin ndi.
8Ta cati ndico ra Jesuu chi ñi ti:
―Cha cati yu ti yuhu cui. Na cua saña ndo chi rahya ta ra, vati chi yuhu vachi quihin ndo.
9Tacan ni cati ra, ta saqueta ra tuhun cha ni cati ra, vati cha cati ra nu quichi quivi ti cha chaha cuenda sutu ra chi ra chica chihin ra, ta ña cua ndoyo ñuhun ni iin ra, cati ra. 10Tacan cuu, ta xita ra Pedro cha cuu ta iin machete ra, ta cani ra chi ra cuu musu ra sutu chahnu, ta chahnda ra iin chiyo soho ra chiyo cuaha ra ndahvi can. Malco nani ra ndahvi can. 11Tacan cuu, ta cati ra Jesuu chi ra Pedro ti:
―Tihi ndico machete cun tichi vena cun. Cua ndehi tu ndoho cuhva ni cati suti chihin yu ―cati ra.
Yaha ra Jesuu iti nuun ra sutu chahnu
(Mt. 26.57‑58; Mr. 14.53‑54; Lc. 22.54)
12Tacan cuu, ta tiin ra sandaru can chi ra Jesuu, ta chuhni ra chi ra, 13ta chandaca xihna ra ta ra chi ra iti nuun ra Anaa, vati chiso ra chi ra Caifás ra cuu sutu chahnu cuiya can. 14Maan ra Caifás can cuu ra cati chi ñivi judío ti nini xaan cha cua cuvi iin ñivi, vati tacan ni cua cacu ndihi ca maan ñi.
Cati ra Pedro ti ña nacoto ra chi ra Jesuu
(Mt. 26.69‑70; Mr. 14.66‑68; Lc. 22.55‑57)
15Chandicu ra Pedro chi ra Jesuu nuun cuahan ra chi ra sandaru ta ra, ta chandicu tahan inga ra sacuaha chi ra, ta nacoto ra sutu chahnu chi racan. Chacan cuu cha quihvi tahan ra chi ra Jesuu tihyo ra sutu chahnu can, 16soco ndoo ra Pedro iti chata yatin yu vehe, vati iyo iin ñahan cumi yu vehe. Chacan cuu cha chahan ndico ra nacoto chi ra sutu chahnu iti yu vehe, ta cahan ra chi ña ñahan can, ta sa yaha tahan ra Pedro. 17Tacan cuu, ta quechaha cati ña ñahan can chi ra Pedro ti:
―¿Atu ña ndicha ti chica tahun chi ra Jesuu?
Ta cati ndico ra Pedro chi ña ti:
―Ña ndicha ―cati ra.
18Cha satahan ra musu ñuhun chi ra tatun can, vati cua tuni ra ta ra, vati vichin xaan suhva. Inda tahan ra Pedro, ta tuni tahan ra ñuhun.
Nducu tuhun ra sutu chahnu chi ra Jesuu
(Mt. 26.59‑66; Mr. 14.55‑64; Lc. 22.66‑71)
19Tacan cuu, ta nducu tuhun ra sutu chahnu chi ra Jesuu yoso cuhva iyo ra sacuaha chi ra, ta nducu tuhun tahan ra ñaan cha cuu cha ni sacuaha ra chi ñivi, 20ta cati ndico ra Jesuu chi ra ti:
―Cha cati cachin yu chi ndihi ñivi, ta cha sacuahi chi ñi ndihi ve ñuhun nu nducuiti ñivi judío, ta ñahni cha cahan xehi chi ñi. 21Ña cua nducu tuhun ndo chihin yu. Cua nducu tuhun ndo chi maan ñi, vati chini soho ñi ndihi tuhun cha ni cahin, ta chito ñi ñaan tuhun cahin chi ñi ―cati ra.
22Tacan cati ra Jesuu, ta cani iin ra tatun can chi ra Jesuu, vati yatin nu inda ra inda tahan ra, ta cati ra chi ra ti:
―Ña vaha cha cahun chi ra sutu chahnu tacan.
23Ta cati ndico ra Jesuu chi ra ti:
―Tu ndavaha ni cuu cha ni cati yu, cua cuhvon cuenda ñaan ndavaha ni cuu chi, soco tu cha vaha cuu chi, ña vaha cha cani cun chihin yu ―cati ra.
24Tacan cuu, ta tachi ra Anaa chi ra Jesuu nu iyo ra Caifás ra cuu sutu chahnu, ta nuhni ra, ta cuahan ra.
Cati ndico tucu ra Pedro ti ña nacoto ra chi ra Jesuu
(Mt. 26.71‑75; Mr. 14.69‑72; Lc. 22.58‑62)
25Ni inda ra Simón Pedro tuni ra ñuhun, ta nducu tuhun ra ta ra chi ra ti:
―¿Atu sacuahun chi ra Jesuu?
Ta cati ndico ra Pedro ti:
―Ñahni, xaa.
26Inda tahan iin musu ra sutu chahnu can, ta ñivi ra chi ra ni tahnda soho, ta quechaha cati ra chi ra Pedro ti:
―Cha ndehi chihun, vati cha iyo cun chi ra hora cha ni chaquihin ndi chi ra nu iyo yutun tata can ―cati ra.
27Ta cati ndico tucu ra Pedro ti ña ndicha, ta sa ndahyu ri chitoho, [vati cha queta uni hora cha ni sandahyu ñahan ra Pedro].
Yaha ra Jesuu iti nuun ra Pilato
(Mt. 27.1‑2, 11‑14; Mr. 15.1‑5; Lc. 23.1‑5)
28Tacan cuu, ta quee ra ta ra nuun iyo ra Caifás, ta chandaca ra ta ra chi ra Jesuu iti nu iyo vehe ra cumi tiñu cha iyo cuenda ñuun Roma, ta ni vii nahan cuu chi. Ña quihvi ra judío can ve tiñu, coto cua coo ica ra, vati cuni ra sacahnu ra vico can. 29Chacan cuu cha quee ra Pilato iti chata nu iyo ra ta ra, ta nducu tuhun ra chi ra ta ra ti:
―¿Ñaan cuati cuni ndo chi rahya?
30Ta cati ndico ra ta ra chi ra ti:
―Ndacu ra ndavaha ni. Chacan cuu cha vachi ndaca ndi chi ra chihun ―cati ra ta ra.
31Ta cati ra Pilato chi ra ta ra ti:
―Cua ndehe maan ndo, vati cua tachi tuni maan ndo chi ra cuhva cati ley maan ndo ―cati ra.
Ta cati ndico ra judío can ti:
―Ñahni ndatu cha cua cahni ndi chi ñivi ―cati ra.
32Chacan cuu cha quee chi cuhva ni cati ra Jesuu, vati cha ni cati ra yoso cuhva cua cuvi ra. 33Tacan cuu, ta quihvi ndico tucu ra Pilato tichi ve tiñu, ta cana ra chi ra Jesuu, ta nducu tuhun ra chi ra ti:
―¿Atu maun cuu ra ndaca ñahan chi ñivi judío?
34Ta cati ndico ra Jesuu chi ra ti:
―¿Atu cha saxini maun cuu chi a cha cati inga ñivi chihun ti tacan cuu chi?
35Ta cati ra Pilato ti:
―Ñavi ra judío cui. Cha ni chaha cuenda ra sutu chahnu chi ndihi ñivi cuu ñivi cun chihun chihin yu. ¿Ñaan cha cuu cha ni savahun? ―cati ra.
36Ta cati ndico ra Jesuu ti:
―Ñavi cuenda ñuhun ñuñivi ya cua cundaca ñahin. Tu cua cundaca ñahin ihya nu ñuhun ñuñivi ya, cua cani tahan ñivi yu, ta ña cua cuu cuhva cuenda cun chihin yu chi ñivi judío can, soco ñavi tacan cuu chi. Ña cua cundaca ñahin ihya ―cati ra.
37Ta cati ndico ra Pilato chi ra ti:
―¿Atu cua cundaca ñahun chi ñi?
Ta cati ndico ra Jesuu ti:
―Maun cati ti cua cundaca ñahin chi ñi. Chacan cuu cha quichi yu ihya nu ñuhun ñuñivi ya. Chacan cuu cha cacu yu ihya, vati cua cati tuhin cha ndicha. Tu cua cuni coto ñivi iin cha ndicha, cua tasoho ñi cuhva cati yu ―cati ra.
38Ta nducu tuhun ra Pilato chi ra ti:
―¿Ñaan cha cuu cha ndicha? ―cati ra.
Cati ra Pilato ti cua cuvi ra Jesuu
(Mt. 27.15‑31; Mr. 15.6‑20; Lc. 23.13‑25)
Tacan ni nducu tuhun ra Pilato, ta cuahan ndico ra nu iyo ra judío can, ta cati ra ti:
―Yuhu cati ti ñahni cuati savaha ra. 39Chito ndo ti iyo costumbre cha cua sañe chi iin ra indi ve caa tichi vico ya. ¿Atu cuni ndo cha cua sañe chi ra cua cundaca ñahan chi ndo? ―cati ra.
40Tacan cuu, ta cuvaa ndihi ñi, ta cati ñi ti:
―Ña cua sañon chi rahya. Cua sañon chi ra Barabaa ―cati ñi, ta ñasuhu cuu ra Barabaa can.
Currently Selected:
TUTU JUAAN 18: mio
Highlight
Share
Copy
Want to have your highlights saved across all your devices? Sign up or sign in
© 1980, Wycliffe Bible Translators, Inc. All rights reserved.