APOCALIPSIS 1
1
Ngulu'u Jesucristo ji'i̱ Juan sca cha' nu ntsu'u yacu̱' ti tya sa'ni la
1Nde nscua na' cha' nu ngulu'u Jesucristo 'na. Juan laca na', lo'o nde nscua na' sca cha' nu ntsu'u yacu̱' ti tya sa'ni la. Tya clyo la cua nda ycui' Ndyosi cha' bi' lo'o Jesús cha' culu'u ji'i̱ ñati̱ ji'i̱ ycui' lcaa ña'a̱ cha' nu cua lijya̱ ti cha' caca nde chalyuu. Li' nda Jesús cha' bi' lo'o na', nu lo'o nda Ni sca xca̱ ji'i̱ Ni nu ngutu'u nde cua̱ ya̱a̱ ca slo na', cha' ndyu'ni na' cña ji'i̱ Ni. 2Nde nscua na' lcaa cha' nu cua na'a̱ ycui' na'; jua'a̱ nchcui' liñi na' lo'o ñati̱ ji'i̱ Ni lcaa cha' nu cua nda ycui' Ndyosi lo'o ngu', la cui' cha' tso'o nu nchcui' tsa Jesús ji'i̱ lo'o ñati̱.
3Tso'o tsa caca tyiquee ma̱, ñati̱ nu chcui' lo quityi re, jua'a̱ cu'ma̱ lo'o cuna ma̱ cha' nu nchcui' quityi re, lcaa ña'a̱ cha' nu cua lijya̱ ti cha' caca nde chalyuu; nu lo'o taquiya' na ji'i̱ lcaa cha' nu nscua re, tso'o tsa caca tyiquee na li'. Lo'o jua'a̱ cua ngulala ti caca cha' nu nscua re.
Nscua Juan cha' nu ndyaa slo ñati̱ ji'i̱ Jesucristo nde cati tya'a quichi̱
4Juan laca na' nu nda̱ quityi re tsaa nde cati tya'a quichi̱ loyuu su cuentya Asia, ca su ndi'i̱ taju ñati̱ nu ngusñi cha' ji'i̱ Jesucristo. Nda na' xlyo ni'i̱ ji'i̱ ma̱ chacuayá' ji'i̱ ycui' Ndyosi Sti na, jua'a̱ chacuayá' ji'i̱ Xtyi'i ycui' Ndyosi, jua'a̱ chacuayá' ji'i̱ Jesucristo. Cua nti' na' cha' ña'a̱ ti cua'ni ycui' Ndyosi cha' tso'o lo'o ma̱, ña'a̱ ti cua'ni Ni cha' ti̱ ti tyi'i̱ tyiquee ma̱. Nu ngua tya clyo lu'ú ycui' Ndyosi, na lu'ú Ni juani, lo'o ña'a̱ ti tya lu'ú Ni tyempo nde loo la. Ntucua Xtyi'i ycui' Ni nde loo su tlyu su ntucua ycui' Ni, la cui' cati tya'a cui'i̱ lubii nu nda Xtyi'i Ni laca bi'. 5Tso'o tsa nchcui' liñi Jesucristo ji'i̱ ycui' Ndyosi Sti yu ña'a̱ cuayá' ndyujuii ngu' ji'i̱ yu. Pana lo'o ndyu'ú Jesús chaca quiya' lo'o ngujuii yu, li' na'a̱ ngu' cha' tlyu tsa cha' nu ntsu'u ji'i̱ yu. Lo'o juani laca Jesucristo loo ji'i̱ tyucui ña'a̱ chalyuu, xqui'ya cha' laca yu loo ji'i̱ lcaa nu laca xu'na chalyuu. Ntsu'u tsa tyiquee Jesús ña'a̱ yu ji'na, bi' cha' ngujuii yu lo crusi; cua ndyalú tañi yu, cha' ngua'ni lyaá yu ji'na ji'i̱ nu cuxi nu ntsu'u ji'na. 6Cua ngua'ni Jesús cha' laca na sca lo ñati̱ nu ndulo tsa cuentya ji'i̱ ycui' Ndyosi, nu ndyu'ni cña nu nti' ycui' Ndyosi Sti Jesús cha' cua'ni na. Cua nti' na cha' lcaa yija̱ nu lijya̱ nde loo la ná tye cha' cua'ni tlyu na ji'i̱ ycui' Ndyosi, cha' nchca ji'i̱ Ni cua'ni Ni lcaa lo cña tsiya' ti. Jua'a̱ caca cha' lacua.
7Cui'ya ma̱ cuentya, cha' tya tya̱a̱ Jesucristo nde chalyuu chaca quiya' laja coo. Ña'a̱ lcaa ñati̱ ji'i̱ yu li'; jua'a̱ nu ñati̱ nu liye' tsa ti' ña'a̱ ji'i̱ yu nu ngua tsubi', jua'a̱ nu ñati̱ nu cua ndyojo' chcua̱ ji'i̱ yu, lo'o ngu' bi' ña'a̱ ngu' ji'i̱ yu chaca quiya' li'. Xi'ya ñati̱ tyucui ña'a̱ chalyuu cha' xñi'i̱ ti' ngu' lo'o tya̱a̱ Jesús chaca quiya', cha' cua jlo ti' ngu' cha' ntsu'u qui'ya ji'i̱ ngu'. Jua'a̱ caca cha' bi' lacua.
8“Ñi'ya̱ nti' letra A, jua'a̱ nguxana lcaa cha' lo'o na'; ñi'ya̱ nti' letra Z, jua'a̱ tye lcaa cha' lo'o na'”, nacui̱ ycui' nu Xu'na na nu lcaa cña nchca ji'i̱ Ni. Nu ngua tya clyo lu'ú ycui' Ndyosi, na lu'ú Ni juani, lo'o ña'a̱ ti tya lu'ú Ni tyempo nde loo la.
Na'a̱ Juan ji'i̱ Cristo ca su tlyu su ntucua ycui' Ni
9Juan laca na', tya'a ntsu'u cha' ji'na lo'o Jesús laca na'. Ñi'ya̱ nu ndyaca ji'i̱ cu'ma̱, la cui' jua'a̱ ndyaca jna', cha' stu'ba ti ndyiji cha' ti'í ji'na cuentya ji'i̱ Jesús; pana jlya ti' na cha' Cristo laca loo ji'na juani, bi' cha' ndalo na ji'i̱ cha' ti'í nu tyacua ji'na. Nde cha' nu ngua 'na lo'o ndi'i̱ na' loyuu su naa Patmos, sca yuu piti ti nu nscua cla'be hitya. Ca bi' ntsu'u na' ne' chcua̱, xqui'ya cha' ná ntsi̱i̱ na' nchcui' na' cha' ji'i̱ ycui' Ndyosi lo'o ñati̱; nchcui' na' lcaa cha' tso'o nu cua nda Jesús lo'o na. 10Tsa̱ clyo ji'i̱ semana ngua, tsa̱ ji'i̱ ycui' nu Xu'na na, li' tyucui ña'a̱ na' ngua tii na' cha' ngua'ya Xtyi'i ycui' Ndyosi lo na' tsiya' ti; nga'aa ngua cua'ni na' xa' la cha'. Li' ndyuna na' cha' nchcui' tsaca ñati̱ nde chu̱' su ndu̱ na'; cui̱i̱ ngusi'ya bi' lo'o nchcui', ñi'ya̱ ndañi nclya'á ngu' sca cui'chcua̱. 11Ndi'ya̱ nchcui' nu bi' lo'o na':
―Ñi'ya̱ nti' letra A, jua'a̱ nguxana lcaa cha' lo'o na'; ñi'ya̱ nti' letra Z, jua'a̱ tye lcaa cha' lo'o na' ―nacui̱ nu nchcui' bi'―. Scua clya nu'u̱ lcaa cha' nu cacha' na' jinu'u̱ juani; lcaa cha' nu ña'a̱ nu'u̱ juani, scua clya nu'u̱ ji'i̱ lo quityi. Li' ta nu'u̱ quityi re cha' tsaa slo nu cati tya'a taju ñati̱ nu ntsu'u cha' ji'i̱ lo'o Jesucristo ca quichi̱ tyi ngu', ca loyuu su cuentya Asia nu ñacui̱ na' re: quichi̱ Efeso, jua'a̱ quichi̱ Esmirna, jua'a̱ quichi̱ Pérgamo, jua'a̱ quichi̱ Tiatira, jua'a̱ quichi̱ Sardis, jua'a̱ quichi̱ Filadelfia, jua'a̱ quichi̱ Laodicea.
12Li' nguxtyacui na' su ndu̱ na' cha' ña'a̱ na' tilaca laca nu nda cha' lo'o na'. Li' na'a̱ na' ndu̱ cati tya'a candyeru nu cua ndya' lo'o chcua̱ oro. 13Laja candyeru bi' ndu̱ sca nu ñi'ya̱ ña'a̱ ñati̱ ña'a̱, jua'a̱ ña'a̱ nu cusu' bi' ngua ti' na'. Tyucui̱ tsa late' lacu' Ni, nu ndyalaa ca yane quiya' Ni tsiya' ti, lo'o jua'a̱ cua ndyaaca̱' tyiquee Ni lo'o sca sintya oro. 14Ngati̱ tsa ña'a̱ quicha̱' hique Ni, ñi'ya̱ ngati̱ ña'a̱ quicha̱' xlya', masi yelu tlya' nu ngati̱ ña'a̱. Tso'o tsa ngulane xee cloo Ni ñi'ya̱ laca lo'o lye tsa ndyatu̱ quii' su talya ña'a̱. 15Ndubi tsa ña'a̱ quiya' Ni, ñi'ya̱ laca lo'o ndubi ña'a̱ chcua̱ ngatsi nu cua ndyaa lo quii', lo'o li' ngusubii ngu' ji'i̱. Nu lo'o nchcui' Ni, ñi'ya̱ laca lo'o ndyalú sca sta'a̱ clyaa to' quee jaa' su cua̱ tsa ndyalú hitya, jua'a̱ nguañi xtyi'i li'. 16Ya' tsu' cui̱ Ni ndacui cati tya'a cuii, ñi'ya̱ laca cuii nu ntsu'u nde cua̱; tu'ba Ni ntucua sca xlyu cusu̱u̱ nu cha tsa tyucuaa chu̱' bi'. Ndubi tsa ña'a̱ loo Ni, ñi'ya̱ laca lo'o ntyiji'i̱ xee cuichaa nde hora.
17Lo'o cua na'a̱ na' ji'i̱ Ni, tsiya' ca nclyú na' nde quiya' Ni; cua culiji ti ti' na' ngua, xqui'ya cha' ndyutsi̱i̱ tsa na'. Li' ya' tsu' cui̱ Ni ngusta Ni hichu̱' na', ndi'ya̱ nchcui' Ni lo'o na':
―Ná cutsi̱i̱ nu'u̱ ―nacui̱ Ni―. Na' ntucua̱ lo'o nguxana chalyuu, lo'o jua'a̱ la cui' na' tyucua̱ lo'o tye chalyuu. 18Ycui' Ni nu lu'ú ca laca na' ―nacui̱ Ni―. Cua ngujuii na' nu ngua li', pana xa' ndyu'ú na' chaca quiya', lo'o juani nga'aa tye cha' lu'ú na'. Na' nclyu̱ cña lo'o ndyijii ñati̱, jua'a̱ la cui' na' nclyu̱ cña macala su tyaa cresiya ji'i̱ ngu'. 19Scua nu'u̱ cha' nu ndyaca re juani, cha' nu ña'a̱ nu'u̱ ca nde, jua'a̱ cha' nu caca nde chalyuu tyempo nde loo la, cha' tsaa quityi slo taju ñati̱ 'na nde quichi̱ tyi ngu' bi'. 20Ndi'ya̱ ndyu'u cha' nu na'a̱ nu'u̱ tsa̱, cha' ji'i̱ nu cati tya'a cuii nu ntsu'u nde cua̱ nu na'a̱ nu'u̱ cha' ndacui ya' na' la'a tsu' cui̱, jua'a̱ nu cati tya'a candyeru oro bi', cha' ná ngua cuayá' ti' nu'u̱ nquicha': nu cati tya'a cuii bi', bi' laca nu cati tya'a ñati̱ nu ndu̱ cuentya ji'i̱ ycui' Ndyosi cha' chcui' ngu' lo'o nu cati tya'a taju ñati̱ ji'i̱ Jesucristo, sca taju ñati̱ bi' scaa quichi̱; lo'o jua'a̱ nu cati tya'a candyeru oro, bi' laca nu cati tya'a taju ñati̱ bi'.
Currently Selected:
APOCALIPSIS 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.