SANTIAGO 1
1
1Santiago laca na' nu nscua̱ quityi re cha' ca̱a̱ ca su ndi'i̱ cu'ma̱, ñati̱ ji'i̱ ycui' Ndyosi nu ndyaa ma̱ tyucui ña'a̱ chalyuu. Cña laca na' cuentya ji'i̱ ycui' Ndyosi, la cui' jua'a̱ laca na' cña ji'i̱ Jesucristo nu Xu'na na. Cua nti' na' chcui' na' xlyo ni'i̱ lo'o lcaa ma̱ lo'o tya'a ma̱.
Nu lo'o ta ycui' Ndyosi sca cha' nu ca'ya tso'o hique scaa na
2Cu'ma̱ tya'a ngusñi na cha' ji'i̱ Cristo, si lye tsa nti' ma̱ xqui'ya cua ña'a̱ ca lo cha' ti'í nu ndyacua ji'i̱ ma̱, ná xñi'i̱ tsa culacua ti' ma̱ li'; pana tso'o tsa caca tyiquee ma̱ li', 3cha' nu lo'o ngualo cha' ti'í bi' ji'i̱ ma̱ xqui'ya cha' ngusñi tso'o ma̱ cha' ji'i̱ Jesús, li' taca jlo ti' ma̱ cha' cua nchca la ji'i̱ ma̱ talo ma̱ nde chalyuu. 4Pana cui'ya ma̱ cuentya cha' talo ma̱ tyucui tyempo lo'o ndi'i̱ ma̱ chalyuu, ña'a̱ cuayá' nu tye cha' ti'í ji'i̱ ma̱, cha' caca ma̱ ñati̱ nu tyucui tyiquee, ñati̱ nu ná sca na lyiji ji'i̱ cha' ngusñi ma̱ cha' ji'i̱ Jesús.
5Si ntsu'u quiya' nu lo'o ná jlo ti' ma̱ tsiya' ti ñi'ya̱ nu cua'ni ma̱, li' tso'o chcui' ma̱ lo'o ycui' Ndyosi, cha' ta Ni sca cha' nu ca'ya hique ma̱ ñi'ya̱ nu cua'ni ma̱ li'. Tso'o tsa cha' xlya'be nda Ni ji'i̱ lcaa ñati̱, cuati ná ndu'ni tyaala Ni ji'na lo'o nda Ni sca cha' tso'o ji'na. 6Tsa bi' ti cha', nu lo'o jña ma̱ sca cha' ji'i̱ ycui' Ndyosi, li' nga'a̱ cha' jlya ti' ma̱ cha' nchca ji'i̱ Ni cua'ni Ni jua'a̱; ná tso'o si tya'a̱chu̱' ma̱ ji'i̱ cha' bi', ñi'ya̱ si ñacui̱ ma̱ cha' ná nchca ji'i̱ Ni cua'ni Ni jua'a̱. Ñati̱ nu jua'a̱ ñacui̱ cha' ná nchca ji'i̱ ycui' Ni, laca ngu' bi' ñi'ya̱ laca sca clyoo' nu ndya'a̱ lo tyujo'o; ndyatu̱ clyoo' ndyaa macala su nducuni'i̱ cui'i̱ ji'i̱ cha' tsaa. 7Ná ca tu̱ ti' ngu' bi' ji'i̱ ni sca na, cha' ta ycui' nu Xu'na na ji'i̱ ngu' li', 8cha' tucua cha' ntsu'u tyiquee ngu' bi'; ná sca cha' caja ji'i̱ ngu' cha' xcui' na ncha'a̱ ti tyiquee ngu'. Sca ti cha' chcui' ngu' sca tsa̱, chaca tsa̱ xa' cha' chcui' ngu' bi' li'.
9Tso'o ti caca tyiquee ngu' ti'i tya'a ngusñi na cha' ji'i̱ ycui' Ndyosi; xtyucua Ni ji'i̱ ngu' bi', cha' tso'o la tyi'i̱ ngu' nde loo la, masi nchcube' tsa ngu' su ndi'i̱ ngu' juani ti. 10Lo'o jua'a̱ ndu'ni cha' tso'o ti caca tyiquee ngu' culiya' tya'a ngusñi na cha' ji'i̱ Ni, masi tye cha' culiya' ngu'; culiji yu'u lcaa cha' tso'o nu ntsu'u ji'i̱ cua ña'a̱ ca ngu' culiya', ñi'ya̱ ndye cha' ji'i̱ sca queé nu tso'o ña'a̱ nu ntsu'u ca ne' quixi̱'. 11Lo'o ndyaa cuichaa nde cua̱, ca tyique' tsa cua̱ li', ndyanaa yaca queé, ndyalú lcaa cucu' queé, ndye cha' tso'o ña'a̱ ji'i̱ li'. La cui' jua'a̱ tye cha' ji'i̱ ngu' culiya'; laja lo'o ndyu'ni cña ti' ngu' cha' tya caja la cha' tso'o ji'i̱ ngu', tye cha' tso'o bi' ji'i̱ ngu' li'.
Nu lo'o ndojolaqui nu xña'a̱ ji'na cha' cua'ni na cha' cuxi
12Tso'o caca tyiquee ñati̱ nu ña'a̱ ti nxñi cha' ji'i̱ Jesús, masi tyacua cua ña'a̱ ca cha' ti'í ji'i̱ ngu'. Tso'o si talo ngu' tyiquee', ña'a̱ cuayá' tye cha' ti'í bi' ji'i̱ ngu', cha' caja chalyuu nu ná nga'a̱ cha' tye ji'i̱ ngu' bi' li'; bi' laca cha' tso'o nu cua nacui̱ Ni cha' ta Ni ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni. 13Nu lo'o cojolaqui sca cha' cuxi ji'na ni, ná tso'o si ñacui̱ na ndi'ya̱: “Ycui' Ndyosi ndyu'ni cha' nñilo'o cha' cuxi re 'na”. Ná ntsu'u cha' cuxi tsiya' ti nu caca ji'i̱ cñilo'o ji'i̱ ycui' Ndyosi, lo'o jua'a̱ ná nñilo'o Ni ji'i̱ ñati̱ lo'o sca cha' cuxi. 14Nu lo'o ndojolaqui cha' cuxi ji'na, bi' hora laca nu ná ndaquiya' na ji'i̱ sca cha' ji'i̱ ycui' Ni; li' la cui' cha' cuxi nu ntsu'u ne' cresiya ji'i̱ ycui' ca na, bi' laca nu ndatsaa ji'na cha' tya cua'ni la na cha' cuxi. 15Tso'o la nti' na cha' cua'ni na cha' cuxi bi', masi caca tlyu la qui'ya ji'na; nu lo'o ngui'i̱ na ji'i̱ qui'ya bi' ji'na ña'a̱ cuayá' nu nga'aa caca xtyanu na ji'i̱, li' xana na xtyanu na chalyuu tso'o nu cua ngujui ji'na.
16Cu'ma̱ tya'a ngusñi na cha' ji'i̱ ycui' Ndyosi, tyaca'a tsa ma̱ 'na; ná ta ma̱ chacuayá' cha' cñilo'o nu xña'a̱ ji'i̱ ma̱. 17Lcaa cha' xlya'be nu ndyiji ji'na ni, lcaa cha' nu chañi cha' xcui' cha' tso'o laca bi', ca su ntucua ycui' Ndyosi tsiya' ti, ca bi' ngutu'u lcaa cha' bi', la cui' ycui' Ndyosi nu ngüiñá lcaa xee tlyu nu nga'a̱ nde cua̱. Sca ti cuayá' ña'a̱ loo ycui' Ndyosi ña'a̱ Ni ji'na; ná xcutsa'a̱ Ni cha' nu ntsu'u tyiquee Ni ña'a̱ Ni ji'na, cha' ná ntsu'u cha' tya'a̱chu̱' Ni ji'i̱ scaa cha' nu cua nchcui' Ni lo'o ñati̱. 18Lcaa cha' nu liñi ca cuentya ji'i̱ ycui' Ndyosi, cua ngulu'u Ni cha' bi' ji'na cha' caca na ñati̱ ji'i̱ ycui' Ni, cha' jua'a̱ nti' Ni cha' caca; cua nti' Ni cha' caca na loo ji'i̱ lcaa ca lo na nu cua ngüiñá ycui' Ni, jua'a̱ nti' Ni.
Cha' tacati nu nga'a̱ cha' cua'ni na cuentya ji'i̱ ycui' Ndyosi
19Cu'ma̱ tya'a ngusñi na cha' ji'i̱ ycui' Ndyosi, nu tso'o tsa ntsu'u tyiquee na' ña'a̱a̱ ji'i̱ ma̱, tso'o si cui'ya ma̱ cuentya ji'i̱ cha' nu chcui' na' re. Ntsu'u cña ji'i̱ lcaa na cha' yala ti cua'a̱ jyaca̱ na ji'i̱ cha' nu chcui' ñati̱ lo'o na; pana tiya' ti xacui̱ na cha' ji'i̱ ngu', jua'a̱ tiya' tsa caca ñasi̱' na ji'i̱ ngu'. 20Nu lo'o nchca ñasi̱' na ni, ná taca cua'ni na cha' liñi nu nti' ycui' Ndyosi cha' cua'ni na nde chalyuu. 21Lo'o jua'a̱ nga'a̱ cha' culochu̱' na lcaa cha' suba', lcaa cha' cuxi nu tya ntsu'u ne' cresiya ji'na; tucuá na cha' ji'i̱ ycui' Ndyosi lacua, xñi tso'o na lcaa cha' nu nda Ni cha' tyanu ne' cresiya ji'na, cha' bi' laca cha' nu taca cua'ni lyaá ji'na ji'i̱ nu cuxi nu ntsu'u ji'na.
22Tsa bi' ti cha', nga'a̱ cha' taquiya' na lcaa cha' nu nclyu'u Ni ji'na, si'i na cua'a̱ jyaca̱ ti na ji'i̱ cha' bi'; na cñilo'o ti na ji'i̱ ycui' ca na, si xcui' na cua'a̱ jyaca̱ ti na ji'i̱ cha' bi', lo'o ná ndaquiya' na cha' bi'. 23Cua ña'a̱ ca ñati̱ nu nti' cuna ti cha' nu nda Ni lo'o na, lo'o li' ná ntaja'a̱ cua'ni cha' bi', laca ñati̱ bi' ñi'ya̱ laca ñati̱ nu ña'a̱ cui'ya xi ji'i̱ ycui' ca lo sca cuanaa; 24yala ntchaa ti ña'a̱ ngu' ji'i̱ ycui' ca ngu' lo cuanaa, pana lo'o cua ndyaa ngu', li' hora ti cjlyaa ti' ngu' ñi'ya̱ ña'a̱ ycui' ca ngu'. 25Xtyucua ycui' Ndyosi ji'i̱ cua ña'a̱ ca ñati̱ nu chañi cha' cua'a̱ jyaca̱ ji'i̱ cha' tso'o nu nda Ni cha' tyanu ne' cresiya ji'na; bi' laca cha' nu xtyucua ji'na cha' taca tyi'i̱ tyiquee na tso'o ti. Si tso'o ti cua'ni na nde chalyuu, si cua'ni na lcaa cña nu nclyu'u ycui' Ndyosi ji'na lcaa tsa̱ lo'o tyi'i̱ na chalyuu, tso'o tsa caca ji'na li'. Si'i na nduna ti na cha' bi', lo'o li' xtyanu na ji'i̱.
26Ná tyiquee' ntsu'u xi ngu' tya'a ma̱ nu nti' cha' tacati tsa ndu'ni ycui' ca ngu'. Pana laja ti ndu'ni ngu' cha' tacati ngu', si ná ndube ti' ngu' ñi'ya̱ nchcui' ngu' lo'o ñati̱; na ñilo'o ngu' ji'i̱ ycui' ca ngu' cha' tacati ngu' li'. 27Si tyucui tyiquee na tsiya' ti ndu'ni na cha' tacati cuentya ji'i̱ Ni, si si'i na tucua cha' ntsu'u tyiquee na, ndi'ya̱ nti' ycui' Ndyosi Sti na cha' cua'ni na li': nga'a̱ cha' xtyucua na ji'i̱ nu sube ti'i, jua'a̱ nga'a̱ cha' xtyucua na ji'i̱ nu cuna'a̱ nu ndyanu ti'i ti, nu lo'o nchcube' tsa ngu' ndi'i̱ ngu' chalyuu; pana ná tso'o tyatí̱ yu'u na lo'o cha' cuxi nu ntsu'u nde chalyuu.
Currently Selected:
SANTIAGO 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.