LOS HECHOS 1
1
Nchcui' Jesús cha' ca̱a̱ Xtyi'i ycui' Ni
1Tya tsubi' la cua nscua na' sca quityi nu ndyaa slo nu'u̱, Teófilo. Quityi bi' ndacha' ji'i̱ cua ña'a̱ ca cña nu ngua'ni Jesús, cua ña'a̱ ca cha' nu ngulu'u Jesús tya lo'o nguxana ndyu'ni yu cña, 2lcaa cha' nu ngua'ni yu lo'o nguti'i̱ yu nde chalyuu. Bilya tyaa Jesús ca slo ycui' Ndyosi lo'o ngusubi yu ji'i̱ nu tii tyucuaa tya'a ngu' nu tsaa chcui' cha' ji'i̱ ycui' yu nde chalyuu. Nguxtyucua Xtyi'i ycui' Ndyosi ji'i̱ Jesús lo'o ngulo yu cña ji'i̱ nu tii tyucuaa tya'a ngu' bi', ñi'ya̱ ntsu'u cña nu cua'ni ngu' bi'. 3Lo'o cua ngujuii Jesús, ndyu'ú yu chaca quiya', li' ndu'u tucua yu slo ngu' bi'. Tya tu'ba tsa̱ ndya'a̱ Jesús chalyuu, lo'o jua'a̱ tyu̱u̱ quiya' ndu'u tucua yu slo ngu' bi'; tso'o tsa ngulu'u yu ji'i̱ ngu' cha' chañi cha' cua ndyu'ú yu chaca quiya'. Lo'o jua'a̱ ngulu'u yu ji'i̱ ngu' bi' ñi'ya̱ nu caca ycui' Ndyosi loo ne' cresiya ji'i̱ ñati̱. 4Bilya tyaa Jesús lo'o nchcui' yu lo'o ngu' bi', cha' tyanu ngu' quichi̱ Jerusalén.
―Jatya ma̱ ca quichi̱ re ―nacui̱ Jesús ji'i̱ ngu'―, ña'a̱ cuayá' nu ca̱a̱ Xtyi'i ycui' Ndyosi cha' tyanu Ni ne' cresiya ji'i̱ ma̱, ñi'ya̱ nchcui' Sti na' tya sa'ni la; jua'a̱ nda na' la cui' ti cha' lo'o ma̱ tsubi' ti. 5Clyo cua ntyucuatya Juan ji'i̱ ñati̱ lo'o hitya ti; pana cua tyalaa ti tsa̱ nu ca̱a̱ Xtyi'i ycui' Ndyosi cha' tyanu ne' cresiya ji'i̱ ma̱, jua'a̱ tyucuatya ycui' Ndyosi ji'i̱ ma̱.
Ndyaa Jesús nde cua̱
6Li' lcaa tya'a ngu' cua ndyu'u ti'i̱ ngu' se'i̱ ti, nchcuane ngu' bi' ji'i̱ Jesús li':
―Xu'na ―nacui̱ ngu'―, ¿ha si'i juani nu cua'ni nu'u̱ cha' tyanu cha' ji'i̱ cua, cha' caca ya loo ji'i̱ loyuu su cuentya quichi̱ tyi ya chaca quiya', cha' la cui' ngu' Israel laca ya?
7Nguxacui̱ Jesús cha' ji'i̱ ngu' bi' li':
―Ná ndyi'ya ma̱ chacuayá' cha' caca cuayá' ti' ma̱ ni tsa̱ caca, ni tyempo caca nu cua'ni ycui' Ndyosi cña. Sca ti ycui' Ndyosi Sti na' jlo ti' cha' bi', nguxtyanu tso'o Ni cha' ji'i̱. 8Juani xa' chcui' na' lo'o ma̱, cha' caja ñi'ya̱ cua'ni ma̱ nu lo'o tyanu Xtyi'i ycui' Ndyosi ne' cresiya ji'i̱ ma̱, cha' li' taca chcui' ma̱ cha' tso'o lo'o lcaa ñati̱, nu cha' ji'i̱ ycui' na'. Chcui' ma̱ lo'o ngu' nde quichi̱ Jerusalén, jua'a̱ lo'o ngu' loyuu su cuentya Judea, jua'a̱ lo'o ngu' loyuu cacua ti nu naa Samaria bi'; chcui' ma̱ lo'o ngu' lcaa quichi̱ su ndi'i̱ ngu' chalyuu.
9Lo'o cua ndye nchcui' Jesús cha' bi', laja lo'o na'a̱ ngu' ji'i̱ ndyiqui'ya ycui' Ndyosi ji'i̱ yu ndyaa yu nde cua̱ li'. Ndyacu̱' sca coo hichu̱' yu cha' nga'aa tyaca̱' ña'a̱ ngu' ji'i̱ yu. 10Hora nu ndyaa bi', li' nguxña'a̱ ngu' nde cua̱. Lo'o ti ndu̱ tucua tya'a ñati̱ nu ngati̱ ste'. Ndu̱ ngu' slo ngu' bi' li', 11nchcui' ngu' lo'o ngu' bi':
―Cu'ma̱ ngu' Galilea ―nacui̱ ngu'―, ¿ni cha' laca ndu̱ ma̱ ña'a̱ ma̱ nde cua̱? ―nacui̱ ngu'―. Jesús nu nguxtyanu ca ti ji'i̱ ma̱ cua ndyaa nde cua̱, tya ca̱a̱ yu lo yuu chaca quiya'. Ñi'ya̱ nu tyaca̱' lo'o ndyaa yu, jua'a̱ tyaca̱' lo'o ca̱a̱ yu chaca quiya' ―nacui̱ ngu' nu ngati̱ ste' bi' li'.
Ngusubi ngu' ji'i̱ Matías cha' cua'ni cña loo Judas
12Li' ndu'u ngu' nde lo cuati̱ Olivos, nguxtyu̱u̱ ngu' nde quichi̱ Jerusalén. Cacua ti ndi'i̱ quichi̱; ná ntsu'u chacuayá' ji'i̱ ngu' judío cha' tsaa ngu' tyijyu' la tsa̱ ta'a, nu lo'o ndi'i̱ cña' ngu'. 13Yala ti ndyalaa ngu' quichi̱ bi', li' ndyaa ngu' ni'i̱ tucua ba'a su ndi'i̱ ngu': ndyaa Pedro, lo'o Jacobo, lo'o Juan, lo'o Andrés, lo'o Felipe, lo'o Tomás, lo'o Bartolomé, lo'o Mateo, lo'o chaca Jacobo sñi' Alfeo, lo'o Simón nu ngua sca ngu' ji'i̱ taju cananista, lo'o Judas tya'a Jacobo. 14Stu'ba ti nclacua ti' ngu' bi', lu'ba ti nchcui' ngu' lo'o ycui' Ndyosi. Lo'o tya'a Jesús ndi'i̱ lo'o ngu' bi', lo'o María xtya'a̱ Jesús, lo'o tyu̱u̱ tya'a nu cuna'a̱ nu ndya'a̱ lo'o yu.
15Ngua sca tsa̱ ndyu'u ti'i̱ lcaa ñati̱ nu cua ngusñi cha' ji'i̱ Jesucristo ca quichi̱ bi'; sca siyento ntucua calaa tya'a ñati̱ ntsu'u nu ngutu'u ti'i̱ tsa̱ bi'. Li' ndatu̱ Pedro cha' chcui' yu lo'o ngu' bi':
16―Cu'ma̱ tya'a ndi'i̱ na re ―nacui̱ Pedro ji'i̱ ngu' bi'―, nu ngua sa'ni nguxtyucua Xtyi'i ycui' Ndyosi ji'i̱ jyo'o cusu' David lo'o nguscua jyo'o bi' lo quityi ñi'ya̱ caca cña nu cua'ni jyo'o Judas nde loo la. Ycui' Judas ngulu'u tyucui̱i̱ ji'i̱ ngu' xña'a̱ lo'o ngusñi ngu' ji'i̱ Jesús preso; pana ñi'ya̱ nu ndyanu cha' caca ji'i̱ yu, jua'a̱ ngua cha' bi'. 17Stu'ba ti nguta'a̱ jyo'o Judas lo'o na, stu'ba ti ngua'ni yu cña lo'o na nquicha'. 18Lo'o li' ndyaa jyo'o bi' ngüi'ya sca yuu lo'o caya' nu nda ngu' ji'i̱ yu cha' ngua'ni yu cha' cuxi, nu lo'o ndyujui' yu cresiya ji'i̱ Jesús ji'i̱ ngu' xña'a̱ bi'. Ycui' ca yu nguxtyú yu ji'i̱ yu lo yuu, ngutaa' ne' yu ndu'u tri se'i̱ yu, ngujuii yu li'. 19Hora ti ngua cuayá' ti' lcaa ngu' quichi̱ Jerusalén, bi' cha' nchcui' ngu' cha'cña ji'i̱ ngu' cha' Acéldama naa yuu su nclyú yu; ndi'ya̱ ndyu'u cha'cña bi': “Yuu su ndyalú tañi ñati̱”. 20Lo'o jua'a̱ ngutu'u tucua cha' nu nguscua jyo'o cusu' lo quityi Salmos nu nchcui' ndi'ya̱:
Laja ti tyanu tyi yu,
nga'aa tyanu ñati̱ lu'ú cajua.
Lo'o xa' nchcui' quityi bi' chaca quiya':
Cua'ni xa' ñati̱ cña su ndu̱ yu.
’Jua'a̱ nchcui' quityi bi' ―nacui̱ Pedro ji'i̱ ngu'―, 21-22bi' cha' juani tso'o si cua'ni xa' ñati̱ tya'a na cña loo jyo'o Judas. Ñati̱ bi' caca sca ngu' tya'a na nu ndya'a̱ lo'o na lcaa tsa̱ lo'o nguti'i̱ Jesús lo'o na chalyuu re. Ndya'a̱ yu lo'o na, masi clyo lo'o ntyucuatya jyo'o Juan ji'i̱ ñati̱, masi tsubi' ti lo'o ndu'u Jesús ndyaa nde cua̱. Ñati̱ bi' cua na'a̱ ñi'ya̱ ngua lo'o ndyu'ú Jesús chaca quiya' lo'o cua ngujuii, bi' cha' taca chcui' yu lo'o xa' ñati̱ cha' caca cuayá' ti' ngu' ñi'ya̱ nu ngua cha' bi'.
23Li' ngusubi ngu' tucua tya'a nu qui'yu; sca yu nu naa José Barsabás nu nchcui' ngu' cha' Justo naa yu, lo'o chaca yu nu naa Matías. 24Li' nchcui' lcaa ngu' bi' lo'o ycui' Ndyosi:
―Ndyosi nu Xu'na ya ―nacui̱ ngu'―, jlo ti' nu'u̱ ñi'ya̱ nu ntsu'u tyiquee lcaa ñati̱ chalyuu. Culu'u nu'u̱ ji'i̱ ya ti ji'i̱ nu tucua tya'a nu qui'yu re nu cua ngusubi ycui' nu'u̱ ji'i̱, 25cha' taca tsaa yu bi' xa' quichi̱, cha' chcui' yu cha' jinu'u̱ cña su ndu̱ jyo'o Judas nquicha'. Na cua nguxtyanu jyo'o bi' cña cha' xña'a̱ tsa bi', lo'o li' ndyaa ca su ndyanu cha' tsaa.
26Li' ngua'ni ngu' sca cña cha' ngusubi ngu' ji'i̱ tsaca ngu', ti ji'i̱ tyanu cña bi'. Jua'a̱ nquijeloo ji'i̱ ngu' cha' Matías caca ñati̱ bi'. Li' stu'ba ti ndya'a̱ yu bi' lo'o nu tii chaca tya'a ngu' cha' caca tya'a ngu' nu nda Ni cña ji'i̱ cha' chcui' cha' ji'i̱ Jesucristo nde lo yuu chalyuu.
Currently Selected:
LOS HECHOS 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.