FILIPENSES 2
2
Ngua Jesús sca ngu' ti'i lo'o ya̱a̱ yu chalyuu, cha' tiya' la li' tlyu tsa chacuayá' nda ycui' Ndyosi ji'i̱ yu
1Ná tyiquee' cua nguula la ti' tyiquee ma̱ juani, xqui'ya cha' cua ngusñi ma̱ cha' ji'i̱ Cristo; cua tso'o la nti' ma̱ cha' ntsu'u tsa tyiquee Ni ña'a̱ Ni ji'i̱ ma̱. La cui' ti cha' xqui'ya nu Xtyi'i ycui' Ndyosi stu'ba ti ntsu'u cha' ji'i̱ ma̱ lo'o tya'a ma̱, jua'a̱ lo'o ycui' Ni, ña'a̱ cuayá' nu nchca tya'na ti' ma̱ ña'a̱ ma̱ ji'i̱ tya'a ma̱, ña'a̱ cuayá' nu tso'o ntsu'u tyiquee ma̱ ña'a̱ ma̱ ji'i̱ tya'a ma̱. 2Bi' cha' lacua, si chañi cha' jua'a̱ nti' ma̱, li' cua'ni ma̱ cha' caca tso'o tyiquee na'; jua'a̱ caca nu lo'o ña'a̱ na' cha' stu'ba tsa ntsu'u cha' ji'i̱ ma̱ lo'o tya'a ma̱, cha' sca ti cha' ntsu'u tyiquee ma̱, cha' sca ti cha' nclyacua ti' ma̱, cha' sca ti cuayá' tso'o ti nti' ma̱ ña'a̱ ma̱ ji'i̱ tya'a ma̱. 3Cua'ni ma̱ cha' ná quiña'a̱ cha' tyu'u tyiquee ma̱ lo'o cua'ni ma̱ sca cña; si'i xcui' cha' ji'i̱ ycui' ca ma̱ culacua ti' ma̱, ni si'i na cua'ni tyucuaa ti' ma̱ lo'o tya'a ma̱. Tso'o la si culacua ti' ma̱ cha' tso'o la laca nu xa' la ngu' tya'a ma̱, pana ná tso'o ycui' ca ma̱; 4cube la ti' ma̱ ñi'ya̱ caca cha' ca tso'o cha' ji'i̱ xa' la ngu' tya'a ma̱, si'i xcui' cha' ji'i̱ ycui' ca ma̱ nu nga'a̱ cha' cube ti' ma̱.
5Tso'o si culacua ti' ma̱ ñi'ya̱ nclyacua ti' ycui' Jesucristo. Ndi'ya̱ ngua cha' ji'i̱ yu: 6Tyucui tyempo ycui' Ndyosi tsiya' ti laca Jesucristo, ná ntsu'u tyempo nu ná laca yu ycui' Ndyosi; pana lo'o ya̱a̱ yu lo yuu chalyuu, ná ngulacua ti' Jesús cha' ca̱lo'o yu lcaa chacuayá' ji'i̱ ycui' Ndyosi, masi ntsu'u tsa chacuayá' ji'i̱ yu slo Ni nquicha', cha' stu'ba ti ntsu'u cha' ji'i̱ yu lo'o ycui' Ndyosi Sti yu. 7Pana nguxtyanu yu chacuayá' nu ntsu'u ji'i̱ yu ca slo ycui' Ndyosi Sti yu, cha' tso'o la ngua ti' yu lo'o ngua'ni yu jua'a̱. Lo'o li' ntaja'a̱ yu ngua yu ñati̱, cha' caja ñi'ya̱ xtyucua yu ji'na; ñi'ya̱ nclya lcaa ñati̱, jua'a̱ ngula yu nde chalyuu, ñati̱ tsiya' ti ngua yu. 8Ngua yu sca ñati̱ ti'i, lo'o jua'a̱ tso'o tsa ndaquiya' yu cña nu cua nda ycui' Ndyosi Sti yu ji'i̱ yu; ngujuii yu, hasta ngujuii yu lo crusi, masi jua'a̱ ndujuii ngu' ji'i̱ ngu' nu xña'a̱ tsa nu ngua li'. 9Bi' cha' juani cua ndyaa lo'o Ni ji'i̱ yu cha' stu'ba ti tyi'i̱ yu ca su tlyu la ca su ntucua ycui' Ni; juani tlyu tsa chacuayá' cua nda Ni ji'i̱ Jesús. Tyucui ña'a̱ chalyuu nga'aa ntsu'u la xa' chacuayá' nu tlyu la, 10cha' jua'a̱ tyu̱ sti̱' lcaa na lu'ú nde loo Jesús, masi ñati̱, masi cui'i̱. Ná ntsu'u su tye cha' cua'ni chi̱ ngu' loo yu xqui'ya chacuayá' nu cua nda Ni ji'i̱ yu, masi nu ndi'i̱ ca nde cua̱, masi nu ndi'i̱ nde lo yuu chalyuu, masi ngu' nu cua nguatsi', lo'o jyo'o bi' cua'ni chi̱ ngu' loo yu. 11Cui̱i̱ tsa chcui' lcaa ñati̱ cha' Jesucristo laca Xu'na lcaa ca chalyuu, jua'a̱ tso'o tsa cua'ni tlyu ngu' ji'i̱ ycui' Ndyosi Sti na.
Ñi'ya̱ nu ntyiji'i̱ xee cuii nde talya, jua'a̱ cua'ni na lo'o ndi'i̱ na chalyuu
12Cu'ma̱ ngu' tya'a na nu tyaca'a tsa ma̱ 'na, cua ndaquiya' tsa ma̱ ji'i̱ cha' nu nchcui' na' lcaa tsa̱ lo'o nguti'i̱ na' lo'o ma̱; ña'a̱ ti tya ndulo tsa cha' ji'i̱ ma̱ cha' taquiya' la ma̱ ji'i̱ cha' nu nchcui' na', masi tyijyu' tsa nga'a̱ na' ca su ndi'i̱ ma̱ juani. Ña'a̱ ti cua'ni cña ti' ma̱ cha' caca lyiji lcaa cha' nu ngua ti' ycui' Ndyosi cua'ni Ni ne' cresiya ji'i̱ ma̱ lo'o ngua'ni lyaá Jesucristo ji'i̱ ma̱. Xti ti cha' tyu'u tyiquee ma̱ cuentya ji'i̱ ycui' ma̱, pana cube la ti' ma̱ ji'i̱ ycui' Ndyosi. 13Tyi'u ti' ma̱ cha' lcaa tsa̱ ndu'ni ycui' Ndyosi cña laja ne' cresiya ji'i̱ ma̱, cha' taca cua'ni ma̱ cña ji'i̱ Ni; jua'a̱ ndu'ni Ni cha' tyaja'a̱ ma̱ cua'ni ma̱ lcaa ña'a̱ nu nti' ycui' Ndyosi cha' cua'ni ma̱.
14Lcaa lo cña nu cua'ni ma̱ ni, ná caca chi̱i̱ nti' ma̱ ña'a̱ ma̱ ji'i̱ ngu' lo'o ndyu'ni ma̱ cña bi', ná xlyú ma̱ cha' hichu̱' ngu', 15cha' ná caca ñacui̱ ngu' cha' ntsu'u qui'ya ji'i̱ ma̱ li', lo'o jua'a̱ ná caja su lyiji cua'ni ma̱ sca cha' li'. Tso'o la si caca cuayá' ti' ngu' cha' chañi cha' laca ma̱ sñi' ycui' Ndyosi tyucui tyiquee ma̱, masi xcui' ndi'i̱ ti ma̱ chalyuu laja ñati̱ cuxi, laja ñati̱ nu chi̱i̱ nti' ngu' ña'a̱ ji'i̱ tya'a ngu'. Xqui'ya cu'ma̱ nga'a̱ cha' cañi cha' ji'i̱ Jesús lcaa su ndi'i̱ ñati̱ bi'; ñi'ya̱ nu ntyiji'i̱ xee cuii nde talya, jua'a̱ caca ma̱ xee nde chalyuu, 16nu lo'o ta ma̱ cha' lo'o ngu', si chcui' ma̱ cha' tso'o ji'i̱ Cristo nu taca ta chalyuu nu ná nga'a̱ cha' tye ji'i̱ ngu'. Si jua'a̱ cua'ni ma̱, tso'o tsa caca tyiquee na' ña'a̱ na' ji'i̱ ma̱ lo'o tyalaa tsa̱ nu cua'ni cuayá' Cristo ji'i̱ lcaa ñati̱. Li' taca ca cuayá' ti' na' cha' tso'o ti ngutu'u scua cña bi' 'na, si'i na nguliji yu'u cña bi' jua'a̱ ti. 17-18Jlo ti' na' cha' si'i cha' xca ti laca nu ngua'ni ma̱ lo'o ngusñi ma̱ cha' ji'i̱ ycui' Ndyosi; quiña'a̱ tsa na nguxtyanu ma̱, tyu̱u̱ quiya' cua nda ma̱ tyucui ña'a̱ ma̱ cha' caca ma̱ cña ji'i̱ Cristo, xqui'ya cha' cua ngusñi ma̱ cha' ji'i̱ Ni. Lo'o juani lo'o na' ni, cujuii ngu' 'na, nti' na'; chcuna' chalyuu 'na jua'a̱ ti cuentya ji'i̱ cu'ma̱. Pana ná ntsi̱i̱ na'; masi jua'a̱ caca 'na, chaa tsa ti' na' ndi'i̱i̱. Lo'o jua'a̱ nti' na' cha' ca chaa ti' cu'ma̱, cha' stu'ba ti ca chaa ti' na' lo'o cu'ma̱.
Nchcui' Pablo cha' ji'i̱ Timoteo lo'o ji'i̱ Epafrodito
19Chacuayá' ji'i̱ Jesús nu Xu'na na, ná tyiquee' ta na' ji'i̱ yu Timoteo cha' tsaa yu ca su ndi'i̱ ma̱ yala ti, cha' quije xi cha' 'na ñi'ya̱ nu ndi'i̱ ca ma̱; tso'o tsa caca tyiquee na' lo'o cuna na' cha' bi'. 20Sca ti yu bi' laca nu chañi cha' stu'ba ti nti' yu lo'o na', nu chañi cha' ntsu'u tyiquee yu ña'a̱ yu ji'i̱ cu'ma̱; 21ná ndi'i̱ xa' la ngu' tya'a na ca nde nu ndube ti' ñi'ya̱ ndyaca cña ji'i̱ Jesucristo ca su ndi'i̱ ma̱, xcui' na ntsu'u la tyiquee ngu' ji'i̱ cña ji'i̱ ycui' ca ngu'. 22Lo'o cu'ma̱, cua jlo ti' ma̱ cha' lubii tsa cña nu ndyu'ni yu Timoteo bi'. Stu'ba ti ndyu'ni yu cña lo'o na' ñi'ya̱ nti' si cua laca yu sñi' na', stu'ba ti ndya'a̱ ya nchcui' ya cha' tso'o ji'i̱ Jesús lo'o xa' ñati̱. 23Lo'o tye caca cuayá' jna', li' ta na' ji'i̱ yu cha' hora ti tsaa yu ca su ndi'i̱ ma̱, 24masi nda ti' na' cha' lo'o ycui' na' taca ca̱a̱ na' yala ti ca su ndi'i̱ ma̱ chacuayá' ji'i̱ ycui' nu Xu'na na.
25Lo'o jua'a̱ ndu'ni tsa cha' ca̱a̱ chaca yu ca slo ma̱, nti' na'; Epafrodito laca yu bi'. La cui' yu tya'a ndya'a̱ ya cña laca yu, lo'o jua'a̱ nguula tsa cña ngua'ni yu lo'o ya lo'o nguxacui̱ ya cha' ji'i̱ ngu' cuxi. La cui' yu bi' laca nu nda ma̱ ya̱a̱ ca slo na' tya tsubi' la, cha' xtyucua yu 'na lo'o na laca nu lyiji xi 'na cha' tyiji̱ yu'u 'na chalyuu. 26Tiji̱' tsa ti' yu ji'i̱ cu'ma̱, bi' cha' nti' yu ca̱a̱ na'a̱ yu ji'i̱ ma̱ chaca quiya'; ngulacua tsa ti' yu lo'o ngujui cha' ji'i̱ yu cha' cua ndyuna ma̱ cha' quicha tsa yu. 27Chañi tsa cha' quicha tsa yu nu ngua li', cua cajaa ti yu ngua; pana ycui' Ndyosi ngua'ni tya'na ti' Ni ji'i̱ yu. La cui' jua'a̱ ngua tya'na ti' Ni ña'a̱ Ni 'na, cha' cua laca ngujui tsa cha' xñi'i̱ ti' 'na ca nde; lo'o li' lye la ngua xñi'i̱ ti' na' si cua ngujuii yu, pana ndyaca tso'o yu li'. 28Bi' cha' tso'o tsa nti' na' juani si yala ti ca̱a̱ yu ca slo cu'ma̱, cha' lo'o cu'ma̱ caca chaa tsa ti' ma̱, nu lo'o ña'a̱ ma̱ ji'i̱ yu chaca quiya'. Nga'aa culacua tsa ti' na' cuentya ji'i̱ cu'ma̱ li'. 29Caca chaa ti' ma̱ lo'o yu lacua; tso'o tsa chcui' ma̱ lo'o yu lo'o tyalaa yu ca slo ma̱, cha' laca yu tya'a ngusñi ma̱ cha' ji'i̱ nu Xu'na na. Lo'o jua'a̱ cua'ni chi̱ ma̱ loo cua ña'a̱ ca ñati̱ nu cua'ni ñi'ya̱ nu ngua'ni yu bi'; 30ná ndyutsi̱i̱ yu, masi cua cajaa ti yu laja lo'o nguxtyucua yu ji'i̱ ya lo'o cña ji'i̱ Cristo re tya tsubi'. Masi ná ngua ca̱a̱ cu'ma̱ ca nde, pana cua nda ma̱ ji'i̱ ycui' yu lijya̱ yu cha' cua'ni yu la cui' cña nu ná ngua cua'ni cu'ma̱, nu nxtyucua tsa ji'i̱ ya li'.
Currently Selected:
FILIPENSES 2: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.