SAN MARCOS 14
14
Cuaana ti ngüiñi cha' ji'i̱ ngu' lo'o tya'a ngu' cha' xñi ngu' ji'i̱ Jesús
1Tya lyiji tya tyucuaa tsa̱ cha' caca ta'a pascua, li' ndyaca ta'a su ndacu ngu' xlyá nu ná ndya' lo'o scua̱ tiye'. Nclyana sti jo'ó nu laca loo, nclyana mstru cha' jo'ó, ñi'ya̱ nu cua'ni ngu' cha' caca tejeya' ngu' ji'i̱ Jesús cuaana ti, cha' cujuii ngu' ji'i̱. 2Nchcui' ngu' lo'o tya'a ngu' ñi'ya̱ cua'ni ngu' cña bi':
―Ná tso'o tejeya' na ji'i̱ yu tsa̱ ta'a ―nacui̱ ngu'―. Caca ñasi̱' tsa lcaa ñati̱ nu ndi'i̱ ta'a si jua'a̱, tlyu tsa cha' cusu̱u̱ caca bi' li'.
Nda'a̱ sca nu cuna'a̱ setye hique Jesús
3Lo'o li' nga'a̱ Jesús to' tyi Simón nu ngusñi quicha ndyatsu' cuaña'. Ca quichi̱ Betania ntucua tyi nu Simón bi'. Lo'o nga'a̱ ngu' to' mesa ndyacu ngu', li' ndyalaa sca nu cuna'a̱ slo ngu' lo'o sca caatya̱ quee alabastro, nu ngutsa'á̱ lo'o setye tyixi xtyi'i nu laca setye nardo; quiña'a̱ tsa nga'a̱ setye bi'. Li' ngucha nu cuna'a̱ bi' tu'ba caatya̱, ngusalú setye lo xlya hique Jesús su ntucua yu. 4Bi' cha' ngua ñasi̱' xi ñati̱ tya'a ndyacu ngu' nu lo'o na'a̱ ngu' cha' bi':
―¿Ni cha' ngusalú nu cuna'a̱ setye cua jua'a̱ ti? ―nacui̱ ngu'―. 5¿Ni cha' ná ndyujui' ji'i̱ cha' caja xi cñi cha' ta ji'i̱ ngu' ti'i? Sna siyento cñi plata nga'a̱ tsa lo cua setye tyixi xtyi'i bi' ―nacui̱ ngu' ji'i̱ tya'a ngu'.
Lye tsa nchcui' ngu' lo'o nu cuna'a̱ bi' li'.
6―Nga'aa chcui' lye ma̱ lo'o nu cuna'a̱ re ―nacui̱ Jesús ji'i̱ ngu'―. Ná cua'a ma̱ ji'i̱. Tso'o tsa cña nu ngua'ni nu cuna'a̱ re cuentya jna'. 7Lcaa tsa̱ ndi'i̱ ngu' ti'i lo'o ma̱ nde chalyuu, bi' cha' taca cua'ni ma̱ cha' tso'o lo'o ngu' ti'i ni jacua' nu nti' ti ma̱; pana nu na' ni, cua tye ti tsa̱ nu tyi'i̱ na' lo'o ma̱. 8Cua ngua'ni nu cuna'a̱ re lcaa ña'a̱ cha' nu nchca ji'i̱. Na cua ngua'ni ma' cha' caca tyixi xtyi'i loo na' juani; masi tya lyiji cajaa na', yala la ngua'ni cho'o ma' ji'i̱ tyucui ña'a̱ na' cha' xatsi' ngu' 'na. 9Chañi cha' nu chcui' na' lo'o ma̱ juani, cha' lcaa su cañi cha' jna' tyucui ña'a̱ chalyuu, ca bi' cuna ñati̱ lcaa cha' nu ngua'ni nu cuna'a̱ re juani, cha' tyi'u ti' ngu' cha' tso'o tsa cña nu ngua'ni nu cuna'a̱ re.
Ndyujui' Judas cresiya ji'i̱ Jesús ji'i̱ ngu' xña'a̱
10Lo'o Judas Iscariote ni, la cui' tya'a ngu' nu ndyaca tsa'a̱ ji'i̱ Jesús laca bi'. Li' ndu'u nu Judas bi' ndyaa slo sti jo'ó nu laca loo, cha' cujui' cresiya ji'i̱ Jesús ji'i̱ ngu' bi'. 11Tso'o tsa ntsu'u tyiquee nu ngu' tlyu bi' lo'o ndyuna ngu' cha' nu nchcui' Judas lo'o ngu', bi' cha' nacui̱ ngu' tlyu bi' ji'i̱ cha' ta ngu' cñi ji'i̱. Li' nclyana Judas ni hora caca ji'i̱ ta ji'i̱ Jesús ya' ngu' xña'a̱ bi'.
Chaca tya quiya' ndyacu Jesús si̱i̱ lo'o nu ngu' nu ndyaca tsa'a̱ ji'i̱
12Lo'o ngua tsa̱ clyo ji'i̱ ta'a nu ndacu ngu' xlyá nu ná lo'o scua̱ tiye' ndya' bi', tsa̱ bi' ndujuii ngu' xlya' cuañi' cha' cacu ngu' ta'a pascua. Li' nchcuane ngu' nu ndyaca tsa'a̱ ji'i̱ Jesús:
―¿Macala cua'ni cho'o ya na cha' cacu na si̱i̱ nu cuentya ji'i̱ ta'a pascua? ―nacui̱ ngu' ji'i̱ yu.
13Li' ngulo Jesús cña ji'i̱ tucua tya'a ngu' nu ndyaca tsa'a̱ ji'i̱:
―Yaa clya ma̱ lquichi̱ ―nacui̱ yu ji'i̱ ngu' bi'―. Cajua tyacua tya'a ma̱ lo'o sca nu qui'yu nu ntucua sca te'í̱ hitya scu̱ yu. Tsaa lca'a̱ ma̱ ji'i̱ yu bi'. 14Su tyatí̱ yu ni'i̱, ndi'ya̱ chcui' ma̱ lo'o nu laca xu'na ni'i̱ bi': “Ndi'ya̱ nacui̱ nu mstru ji'na jinu'u̱: Cua'ni nu'u̱ cha' tso'o cacha' nu'u̱ 'na, ¿macala ntsu'u su ca̱a̱ na' cha' cacu na' si̱i̱ lo'o nu ngu' nu ndyaca tsa'a̱ 'na, cha' cua'ni ya ta'a pascua?” Jua'a̱ ñacui̱ ma̱ ji'i̱ ngu' nu ca tyi bi'. 15Li' culu'u yu sca se'i̱ tlyu ji'i̱ ma̱, sca ba'a ni'i̱ nde cua̱ nu cua laca ngua tso'o, nu ntsu'u lcaa na nu cua'nijo'o ji'na li'. Ca bi' cua'ni cho'o ma̱ si̱i̱ cacu na ―nacui̱ Jesús.
16Lo'o li' ndu'u ngu' ndyaa ngu' lquichi̱ ndyalaa ngu' to' ni'i̱ bi', lo'o ñi'ya̱ nu nacui̱ Jesús ji'i̱ ngu', jua'a̱ ngua cha' bi'. Ngua'ni cho'o ngu' na cacu ngu' si̱i̱ cuentya ji'i̱ ta'a pascua li'.
17Lo'o cua ngusi̱i̱, li' lijya̱ Jesús lo'o nu tii tyucuaa tya'a ngu' nu ndyaca tsa'a̱ ji'i̱. 18Laja lo'o nga'a̱ ngu' ndyacu ngu', li' nchcui' Jesús lo'o ngu':
―Chañi cha' nu nchcui' na' lo'o ma̱ ―nacui̱ Jesús―; ntsu'u tsaca cu'ma̱ nu stu'ba ti ndyacu lo'o na juani, nu cua cujui' ti cresiya 'na ji'i̱ ngu' xña'a̱.
19Xñi'i̱ xi ti' ngu' ndi'i̱ ngu' li'. Hora ti lcaa ngu' lo'o tya'a ngu', nguxana nchcui' ngu' lo'o Jesús:
―¿Ha na' nu ta̱ jinu'u̱ ya' ngu' xña'a̱? ―nacui̱ tsaca ji'i̱.
―¿Ha na'? ―nacui̱ chaca ji'i̱ li'.
20―Sca yu tya'a nu tii tyucuaa tya'a ma̱, bi' laca nu cujui' cresiya 'na ji'i̱ ngu' xña'a̱ ―nacui̱ Jesús ji'i̱ ngu'―. Sca yu tya'a ma̱ nu stu'ba ti ndyacu lo'o na ne' sca ti ca'ña scuaa re ―nacui̱―. 21Na' nu cua nda Ni 'na lijya̱a̱ cha' caca na' ñati̱ ni, caca cha' jna' ñi'ya̱ nu nscua cha' lo quityi cuentya jna' cua sa'ni la. Pana tya'na tsa ñati̱ nu ta 'na ya' ngu' xña'a̱ li', tso'o la ngua ji'i̱ yu masi ná ngula yu chalyuu tsiya' ti.
22Tya ndyacu ngu' si̱i̱ bi' lo'o ntejeya' Jesús ji'i̱ sca xlyá, ndya yu xlya'be ji'i̱ ycui' Ndyosi cuentya ji'i̱ xlyá bi', ngusa'be yu ji'i̱, cha' tacha ji'i̱ ngu' cha' cacu ngu'.
―Cacu ma̱ xlyá re ―nacui̱ Jesús ji'i̱ ngu'―, cha' ñi'ya̱ nti' cuaña' na', jua'a̱ nti' nu nde.
23Li' ntejeya' Jesús ji'i̱ sca vaso vino, ndya yu xlya'be ji'i̱ ycui' Ni, nda yu vaso ji'i̱ ngu' cha' co'o ngu' li'. Ndyo'o lcaa ngu' vino bi' li'.
24―Ñi'ya̱ nti' tañi na', jua'a̱ nti' nu nde ―nacui̱ Jesús ji'i̱ ngu'―. Tyalú tañi na' cha' caja ñi'ya̱ cuityi̱ qui'ya nu ntsu'u ji'i̱ lcaa ñati̱, cha' jua'a̱ quiñi cha' ji'i̱ ycui' Ndyosi lo'o ñati̱ chalyuu chaca quiya'. 25Chañi cha' nu nchcui' na' lo'o ma̱, cha' nga'aa co'o na' vino chaca quiya', ña'a̱ cuayá' tyalaa tsa̱ bi' lo'o co'o na' vino cucui lo'o cu'ma̱ ca su laca ycui' Ndyosi loo; xa' co'o na' ji'i̱ li'.
Chcui' Pedro lo'o ngu' cha' ná nslo ji'i̱ Jesús tsiya' ti
26Lo'o ndyula tu'ba ngu' sca ji̱i̱ ji'i̱ ycui' Ndyosi, li' ndu'u ngu' ndyaa ngu' nde ca'ya Olivos. 27Xa' nchcui' Jesús lo'o nu ngu' nu ndyaca tsa'a̱ ji'i̱ li':
―Caca tyuju'u ti' lcaa cu'ma̱ ña'a̱ ma̱ 'na ―nacui̱ Jesús ji'i̱ ngu'―. Xtyanu ma̱ xi 'na ca ndyi la. Li' caca cha' nu nscua lo quityi ji'i̱ ycui' Ndyosi ndi'ya̱: “Lo'o cujuii na' ji'i̱ nu ña'a̱si̱i̱ ji'i̱ xlya' bi', xna lcaa xlya' tyaa ni' li'”. Jua'a̱ nchcui' quityi. 28Pana nu lo'o tyu'ú na' chaca quiya', tsa'a na' nde Galilea nu tya lyiji tsaa cu'ma̱.
29―Masi lcaa ngu' xtyanu ngu' jinu'u̱, pana nu na' ni, ná xtyanu na' jinu'u̱ tsiya' ti ―nacui̱ Pedro ji'i̱ Jesús li'.
30―Chañi cha' nu nchcui' na' lo'o nu'u̱ ―nacui̱ Jesús ji'i̱ Pedro―. Ca ndyi sna quiya' chcui' nu'u̱ lo'o ñati̱ cha' ná nslo nu'u̱ 'na. Jua'a̱ cha' ta nu'u̱ lo'o ñati̱ nu lo'o bilya xi'ya ndye'e tucua quiya' talya ndyi.
31―Ná chcui' na' lo'o ñati̱ cha' ná nslo na' jinu'u̱ ―nacui̱ Pedro ji'i̱ Jesús―. Masi cujuii ngu' jinu'u̱, masi cua cujuii ti ngu' 'na, ná xacui̱ na' cha' ji'i̱ ñati̱ cha' ná nslo na' jinu'u̱ ―nacui̱.
Lye tsa nchcui' Pedro, lo'o jua'a̱ lcaa tya'a ngu', stu'ba ti nchcui' ngu'.
Nchcui' Jesús lo'o ycui' Ndyosi Sti yu ca Getsemaní
32Lo'o li' ndyaa ngu' sca ne' lo'o su ndu̱ xi yaca tyacala' ca su naa Getsemaní.
―Cua'a̱ ma̱ xi ca ndacua ti ―nacui̱ Jesús ji'i̱ ngu' nu ndyaca tsa'a̱ ji'i̱―. Tsa'a na' ca nde la xi cha' chcui' na' lo'o ycui' Ndyosi Sti na' ―nacui̱ yu.
33Ndyaa yu la xi li', ndyaa lo'o yu ji'i̱ Pedro lo'o Jacobo lo'o Juan. Li' lye tsa ngua xñi'i̱ ti' Jesús, ndya'a̱ tsa cha' tyiquee yu xqui'ya cña tlyu nu cua tyacua ti ji'i̱ yu.
34―Xñi'i̱ tsa ti' na' juani ―nacui̱ Jesús ji'i̱ ngu'―, nga'aa talo na' cha' xñi'i̱ tsa ti' na'. Tyanu ma̱ ca nde ti, tii ti ti' ma̱ tyi'i̱ ma̱ ―nacui̱.
35Tya ndyaa Jesús la xi ca nde bi' la, ndyatu̱ sti̱' yu lo yuu ti, ngüijña yu ji'i̱ ycui' Ndyosi si caja ñi'ya̱ nu caca cha' ná tyacua cha' cuxi ji'i̱ yu.
36―Sti na' ―nacui̱ Jesús ji'i̱ ycui' Ndyosi―, lcaa lo cña nchca cua'ni nu'u̱. Bi' cha' juani, ná ta nu'u̱ chacuayá' tyacua cha' cuxi re 'na, si cajá la ñi'ya̱ nu caca cua'ni na' cña re ―nacui̱ Jesús ji'i̱ ycui' Ndyosi Sti yu―. Pana si'i ñi'ya̱ nu nti' na' cha' caca, masi cua'ni nu'u̱ lo'o na' ñi'ya̱ nu nti' ycui' nu'u̱.
37Li' ñaa Jesús chaca quiya' su nga'a̱ nu sna tya'a ngu'. Na laja' ti ngu' bi' li'.
―Simón ―nacui̱ yu ji'i̱ Pedro―, ¿ha laja' tsa nu'u̱? ―nacui̱―. ¿Ha ná nchca talo nu'u̱ ni sca hora tii ti nu'u̱ xi? 38Tii ti ti' ma̱ tyi'i̱ ma̱ juani. Chcui' ma̱ lo'o ycui' Ndyosi cha' ná cua'ni nu cuiñaja ngana ji'i̱ ma̱. Jlo ti' na' cha' tyucui tyiquee ma̱ ntaja'a̱ ma̱ cua'ni ma̱ cña re 'na; pana ná tyu'u scua juersa ji'i̱ ma̱, bi' cha' yala tsa ndyaja' ma̱.
39Xa' ndyaa Jesús xi, la cui' ti cha' ngüijña yu ji'i̱ ycui' Ndyosi Sti yu chaca quiya'. 40Li' ñaa yu chaca quiya' slo ngu' bi'; pana xa' laja' ngu' bi', cha' lye tsa ndyu'u xcalá ngu'. Li' nga'aa jlo ti' ngu' ñi'ya̱ xacui̱ ngu' cha' ji'i̱ yu. 41Xa' ndyaa Jesús li'. La cui' jua'a̱ sna quiya' ñaa Jesús su ndi'i̱ ngu'.
―¿Tya laja' ma̱? ¿Tya ntsiya cña' ma̱? ―nacui̱ Jesús ji'i̱ ngu'―. Cuayá' juani, cua ndyalaa hora nu tyaa lo'o ngu' jna' nu cua nda Ni 'na lijya̱a̱ cha' caca na' ñati̱. Cua ta ti ñati̱ jna' ya' ngu' xña'a̱ juani. 42Tyatu̱ ma̱, cha' tyaa na lacua, cha' cua ndyalaa yu nu cua ndyujui' cresiya jna' ji'i̱ ngu' xña'a̱.
Ndyaa lo'o ngu' ji'i̱ Jesús preso
43Laja lo'o nchcui' Jesús, li' ndyalaa nu Judas bi' slo, la cui' tya'a ngu' nu ndyaca tsa'a̱ ji'i̱ Jesús laca nu Judas bi'. Quiña'a̱ tsa ngu' tyaala ndya'a̱ ngu' lo'o Judas, ñati̱ nu cua ngulo ngu' tisiya cña ji'i̱ cha' ca̱a̱ ca̱qui'ya ngu' ji'i̱ Jesús; lo'o maxtyi cusu̱u̱, lo'o yaca ndyi'ya ngu' lijya̱ ngu'. Sti jo'ó nu laca loo, lo'o mstru cha' jo'ó, lo'o ngu' cusu', bi' laca nu ngulo cña ji'i̱ ngu' tyaala bi'. 44Judas nu cua ta ti ji'i̱ Jesús ya' ngu' cuxi bi' ni, cua nchcui' lo'o nu ngu' tyaala bi' cua tsa̱ la, ñi'ya̱ nu cua'ni:
―Chcuicha' na' ji'i̱ nu qui'yu bi', cuati cacu na' saca' yu ―nacui̱ Judas ji'i̱ ngu' tyaala―. Xñi ma̱ ji'i̱ hora ti, yaa lo'o clya ma̱ ji'i̱ yu bi' ―nacui̱.
45Bi' cha' lijya̱ Judas bi' juani, ndyaa ca su ndu̱ Jesús cha' chcuicha' ji'i̱ yu.
―Nde ti ndu̱ nu'u̱, mstru ―nacui̱ Judas.
Ndyacu Judas saca' Jesús li'. 46Hora ti ntejeya' nu ngu' tyaala ji'i̱ Jesús li', cha' tyaa lo'o ngu' ji'i̱ yu.
47Lo'o li' sca ngu' nu tya'a ndya'a̱ Jesús ngusicua̱ maxtyi ji'i̱, ngusi'yu cu' jyaca̱ sca msu ji'i̱ sti jo'ó nu laca loo la. 48Li' nchcui' Jesús lo'o nu ngu' tyaala bi':
―¿Ha lo'o maxtyi cusu̱u̱ lo'o yaca ndya'a̱ ma̱ cha' tejeya' ma̱ 'na? ―nacui̱ Jesús ji'i̱ ngu' bi'―. ¿Ha sca ñati̱ cuaana laca na' lacua? 49Tyu̱u̱ tsa tsa̱ na'a̱ ma̱ 'na lo'o nga'a̱ na' ne' laa tonu, ngulu'u na' cha' ji'i̱ ycui' Ndyosi ji'i̱ ñati̱, pana ná ntejeya' ma̱ 'na li'. Jlo ti' na' ñi'ya̱ nu ndyaca juani, cha' la cui' ña'a̱ cha' nu nscua lo quityi ji'i̱ ycui' Ndyosi cuentya jna', jua'a̱ ndyaca juani.
50Li' nguxtyanu lcaa tya'a ndya'a̱ Jesús ji'i̱ yu, ngusna ngu'. 51Sca ti yu cuañi' ndyanu, ndya'a̱ lca'a̱ ji'i̱ ngu' nu ndyaa lo'o ji'i̱ Jesús. Sca tasá ti ngüixi̱i̱ chu̱' yu cuañi' bi'. Lo'o jua'a̱ ngua ti' ngu' tyaala tejeya' ngu' ji'i̱ yu cuañi' bi'; 52bi' cha' nguxtyanu ji'i̱ tasá ji'i̱ ya' ngu', ngusna masi quichi' ti.
Ndu̱ Jesús slo ngu' tisiya
53Lo'o li' ndyaa lo'o ngu' ji'i̱ Jesús slo xu'na sti jo'ó. Cua ndyu'u ti'i̱ lcaa sti jo'ó nu laca loo lo'o ngu' cusu' lo'o mstru cha' jo'ó cajua, cua ndyu'u ti'i̱ ngu' slo xu'na sti jo'ó bi'. 54Tyijyu' ti ndyu'u lca'a̱ Pedro chu̱' ngu' tyaala ña'a̱ cuayá' nu ndyalaa ngu' ne' lo'o ji'i̱ xu'na sti jo'ó. Li' ngua'a̱ Pedro slo ngu' nu nga'a̱ cua̱ ca ni'i̱ bi' su nga'a̱ ngu' to' lquii' cha' caca chcatsu̱ ngu'.
55Ngua ti' sti jo'ó nu laca loo lo'o lcaa ngu' tisiya bi' sta ngu' qui'ya ji'i̱ Jesús cha' cujuii ngu' ji'i̱ yu, pana ná nquije ñi'ya̱ nu cujuii cuañi' ngu' ji'i̱ yu. 56Ndya'a̱ tsa ngu' cuiñi slo ngu' cha' sta ngu' qui'ya ji'i̱ Jesús, pana ná stu'ba nchcui' ngu' bi'. 57Su cua ndye li' ndu̱ xi ngu' cuiñi, nchcui' ngu' lo'o nu ngu' tlyu bi':
58―Cua ndyuna ya sca cha' nu nchcui' nu qui'yu re ―nacui̱ sca ngu' cuiñi bi'―. Ndi'ya̱ nchcui' yu: “Cuityi̱ na' ji'i̱ laa tonu re nu ngüiñá ñati̱ chalyuu ti. Chu̱' sna tsa̱ ti cua'ni na' cha' tya' chaca nu ná cuiñá ñati̱ chalyuu”, nacui̱ Jesús re. Cua ndyuna ya cha' jua'a̱ nchcui' yu ―nacui̱ ngu' cuiñi bi'.
59Pana ná stu'ba nchcui' nu ngu' cuiñi bi'.
60Lo'o li' ndyatu̱ sti jo'ó nu laca loo la slo lcaa ngu' tlyu, nchcui' lo'o Jesús:
―¿Ha nga'aa ntsu'u cha' nu xacui̱ nu'u̱ ji'i̱ cua, cha' tyu'u lubii nu'u̱ cuentya ji'i̱ qui'ya nu ngusta ngu' jinu'u̱? ―nacui̱ sti jo'ó bi' ji'i̱ Jesús.
61Ti̱ ti ndu̱ Jesús, ni sca cha' ná nguxacui̱ yu tsiya' ti. Bi' cha' xa' nchcuane sti jo'ó nu laca loo la ji'i̱ yu li':
―¿Ha chañi cha' Cristo laca nu'u̱? ―nacui̱―. ¿Ha nu'u̱ laca nu sca ti Sñi' ycui' Ndyosi nu ndu'ni tlyu na ji'i̱? ―nacui̱ sti jo'ó bi' ji'i̱ Jesús.
62―Chañi cha' nu nda ma̱, na' laca̱ nu bi' ―nacui̱ Jesús ji'i̱ ngu' li'―. Lo'o jua'a̱ nde loo la ña'a̱ ma̱ 'na nu cua nda Ni 'na lijya̱a̱ cha' caca na' ñati̱; ña'a̱ ma̱ 'na lo'o ntucua na' la'a tsu' cui̱ su tlyu bi', ca su ntucua ycui' Ndyosi Sti na' nu lcaa tsiya' ti cña nchca ji'i̱ Ni; ña'a̱ ma̱ 'na lo'o ca̱a̱ na' chaca quiya' laja coo nde cua̱ li'.
63Ñasi̱' tsa sti jo'ó nu laca loo la, bi' cha' ngusaa' ste' ycui' slo ngu'.
―Nga'aa nti' na cha' sta xa' la ñati̱ qui'ya ji'i̱ nu qui'yu re ―nacui̱ sti jo'ó bi' ji'i̱ ngu'―. 64Na cua ndyuna ma̱ cha' tonu tsa cha' suba' nu nchcui' yu re ji'i̱ ycui' Ndyosi, nu lo'o nacui̱ yu cha' nu sca ti Sñi' ycui' Ndyosi laca ycui' yu. ¿Ñi'ya̱ chcui' ma̱ ji'i̱ cha' bi'?
Lcaa ngu' nguxacui̱ ngu' cha' ji'i̱ nu laca loo bi', cha' nga'a̱ cha' cajaa Jesús.
65Li' nguxana ngu' ndyu'ni lya' ti' ngu' ji'i̱ Jesús; ngutu'u hitya sañi' ngu' loo yu, jua'a̱ ndyiji'i̱ ngu' ji'i̱ laja lo'o ndyacu̱' loo yu lo'o sca late'.
―Juani ni, cua'ni nu'u̱ cha' ca tii nu'u̱ ―nacui̱ ngu' ji'i̱ Jesús li'―, cacha' nu'u̱ ji'i̱ ya, ¿tilaca laca nu ngujui'i̱ hi̱?
Lo'o nu ngu' nu ndu̱ cua̱ bi', ngujui'i̱ ngu' ndacu̱' ji'i̱ yu li'.
Nacui̱ Pedro cha' ná nslo ji'i̱ Jesús tsiya' ti
66Tya nga'a̱ Pedro to' ni'i̱ ji'i̱ xu'na sti jo'ó, lo'o li' ndyu'u tucua sca nu cuna'a̱ cua' nu ndu'ni cña ji'i̱ sti jo'ó bi'. 67Nxña'a̱ nu cuna'a̱ bi' ji'i̱ Pedro su nga'a̱ to' lquii', li' xa' nxña'a̱ tso'o ca ji'i̱ chaca quiya'.
―Lo'o nu'u̱ ndya'a̱ lo'o Jesús Nazaret bi' ―nacui̱ nu cuna'a̱ bi' ji'i̱.
68―Si'i na' ―nacui̱ Pedro―. Ná jlo ti' na'. Ná nchca cuayá' ti' na' ni cha' nchcui' nu'u̱ ―nacui̱ Pedro ji'i̱ nu cuna'a̱ bi'.
Li' ndu'u Pedro ndyaa to' lo'o ti. Nxi'ya ndye'e li'. 69Xa' na'a̱ nu cuna'a̱ bi' ji'i̱ chaca quiya', nguxana nchcui' lo'o ngu' nu ndu̱ cacua ti:
―Lo'o nu qui'yu jua laca tya'a ngu' bi' ―nacui̱ nu cuna'a̱ bi'.
70Xa' nchcui' Pedro cha' ná lo'o ycui'. Pana ca tiya' la xi nchcui' ngu' nu ndu̱ cacua ti lo'o Pedro:
―Chañi cha' tya'a ndya'a̱ ngu' bi' laca nu'u̱ ―nacui̱ ngu'―, cha' lo'o nu'u̱ laca ngu' Galilea ―nacui̱ ngu' ji'i̱ Pedro.
71Li' nguxana Pedro ngua'ni jura cha' xcube' ycui' Ni ji'i̱ si cha' cuiñi chcui' lo'o ngu'.
―Ná nslo na' ji'i̱ nu qui'yu nu nchcui' tsa ma̱ cha' ji'i̱ ―nacui̱ Pedro ji'i̱ ngu'.
72Hora ti xa' ngusi'ya ndye'e. Li' ntsu'u ti' Pedro ñi'ya̱ ngua cha' nu cua nchcui' Jesús lo'o tsa̱: “Ndi'ya̱ cua'ni nu'u̱ ndyi, Pedro; chcui' nu'u̱ lo'o ñati̱ sna quiya' cha' ná nslo nu'u̱ 'na, nu lo'o tya lyiji xi'ya ndye'e tucua quiya'”. Bi' cha' nxi'ya tsa Pedro li'.
Currently Selected:
SAN MARCOS 14: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.