SAN LUCAS 22
22
Cuaana ti ngüiñi cha' ji'i̱ ngu' lo'o tya'a ngu' cha' xñi ngu' ji'i̱ Jesús
1Cua ngulala ta'a nu lo'o ndacu ngu' judío sca lo xlyá nu ná lo'o scua̱ tiye' ndya'; ta'a pascua, jua'a̱ naa ta'a bi'. 2Lo'o nu ngu' sti jo'ó nu laca loo lo'o mstru cha' jo'ó bi' ni, nclyana ngu' ñi'ya̱ caca cha' cujuii ngu' ji'i̱ Jesús, masi ntsi̱i̱ ngu' ji'i̱ ñati̱ quichi̱.
3Li' ndyatí̱ ycui' nu xña'a̱ nu naa Satanás ne' cresiya ji'i̱ Judas Iscariote, masi la cui' tya'a ngu' nu ndyaca tsa'a̱ ji'i̱ Jesús laca yu bi'. 4Bi' laca nu ndyaa, ndyaa na'a̱ ji'i̱ ngu' sti jo'ó nu laca loo lo'o ji'i̱ ngu' nu laca cña ne' laa. Li' nchcui' yu lo'o ngu' bi' ñi'ya̱ nu cua'ni yu cha' tya yu ji'i̱ Jesús ya' policía, cha' tya̱a̱ lo'o ngu' ji'i̱ slo sti jo'ó bi'. 5Tso'o tsa ngua ti' ngu' sti jo'ó bi'. Lo'o li' nacui̱ ngu' bi' ji'i̱ yu cha' ta ngu' cñi ji'i̱; 6ngüiñi cha' ji'i̱ yu lo'o ngu', bi' cha' nguxana yu ngulana yu ñi'ya̱ nu cua'ni yu cha' tya̱a̱ lo'o yu ji'i̱ Jesús laja lo'o ná ndi'i̱ ñati̱.
Chaca tya quiya' ndyacu Jesús si̱i̱ lo'o ngu' nu ndyaca tsa'a̱ ji'i̱
7Li' ndyalaa tsa̱ ta'a nu ndacu ngu' xlyá tiji; la cui' tsa̱ bi' ntsu'u cha' cujuii ngu' xlya' cuañi' cha' cacu ngu' si̱i̱ ta'a pascua bi'. 8Li' ngulo Jesús cña ji'i̱ Juan lo'o ji'i̱ Pedro:
―Yaa clya ma̱ cha' cua'ni cho'o ma̱ si̱i̱ nu cacu na cuentya ji'i̱ ta'a pascua ―nacui̱ yu ji'i̱ ngu' bi'.
9Li' nchcuane ngu' bi' ji'i̱ yu:
―¿Macala nti' nu'u̱ cha' cua'ni cho'o ya si̱i̱ bi'?
10Nguxacui̱ Jesús cha' ji'i̱ ngu' bi' li':
―Nu lo'o tyalaa ma̱ to' quichi̱, li' tyacua tya'a ma̱ lo'o sca nu qui'yu nu ntucua sca te'í̱ hitya scu̱ yu ―nacui̱ Jesús―. Tyu'u lca'a̱ ma̱ ji'i̱ yu ña'a̱ cuayá' nu tyalaa ma̱ toni'i̱ su tyatí̱ yu ni'i̱. 11Li' chcui' ma̱ lo'o ngu' ca tyi bi': “Ndi'ya̱ ñacui̱ mstru ji'na jinu'u̱: ¿Macala ntucua cuarto su ca̱a̱ na' cha' cacu na' si̱i̱ lo'o ngu' nu ndyaca tsa'a̱ 'na, cha' cua'ni ya ta'a pascua re?” ñacui̱ ma̱ ji'i̱ yu. 12Li' culu'u yu sca cuarto ji'i̱ ma̱, sca cuarto tlyu ca cua̱ la nu cua laca ngua tso'o. Ca bi' cua'ni cho'o ma̱ si̱i̱ bi' ―nacui̱ Jesús ji'i̱ ngu'.
13Ndu'u ngu' ndyaa ngu' bi' li'; lo'o ñi'ya̱ nu nacui̱ Jesús ji'i̱ ngu' cha' caca cha' bi', jua'a̱ ngua cha'. Li' ngua'ni cho'o ngu' si̱i̱ cuentya ji'i̱ ta'a pascua bi'.
14Nu lo'o ndyalaa hora cha' cacu ngu' si̱i̱, li' ndyaa tucua Jesús to' mesa lo'o nu ngu' nu ndyaca tsa'a̱ ji'i̱ bi'. 15Li' nacui̱ yu ji'i̱ ngu' bi':
―Tya sa'ni nti' tsa na' cha' cacu na' si̱i̱ ta'a pascua re lo'o cu'ma̱, nu lo'o tya lyiji ti cajaa na' ―nacui̱ Jesús―. 16Nti' na' cacha' na' ji'i̱ ma̱ cha' ni chaca quiya' nga'aa cua'ni na' ta'a re lo'o cu'ma̱ ña'a̱ cuayá' nu tye chalyuu, lo'o li' cacu na stu'ba ti lo'o caca ycui' Ndyosi loo ji'i̱ lcaa ñati̱.
17Li' ngusñi Jesús sca vaso vino, ndya xlya'be ji'i̱ ycui' Ndyosi li'. Ndi'ya̱ nacui̱ yu ji'i̱ nu ngu' nu ndyaca tsa'a̱ ji'i̱ bi' li':
―Co'o ma̱ vino nu ntsu'u ne' vaso re, lo'o jua'a̱ ta ma̱ vino re co'o ca ta'a tya'a ma̱ ―nacui̱ Jesús li'―. 18Chañi cha' nu ndacha' na' ji'i̱ ma̱, cha' nga'aa co'o na' vino lo'o ma̱ ña'a̱ cuayá' nu caca ycui' Ndyosi loo ji'i̱ lcaa ñati̱.
19Nu lo'o cua ntsu'u xlyá bi' ya' Jesús, li' ndya xlya'be ji'i̱ ycui' Ndyosi, cuati ngusa'be yu xlyá bi', cha' tacha ji'i̱ ngu'. Li' nchcui' yu lo'o ngu':
―Nde laca na', ycui' cuaña' na' laca re. Na cua nda ycui' Ndyosi Sti na' 'na cha' cajaa na' cha' caca tso'o cha' ji'i̱ cu'ma̱. Tyi'u ti' ma̱ 'na lo'o cacu ma̱ xlyá re.
20La cui' jua'a̱ ngua'ni Jesús lo'o vaso bi' lo'o ndye ndyacu ngu'.
―Lo'o co'o ma̱ vino re tyi'u ti' ma̱ ji'i̱ cha' cucui nu cua quiñi ti ji'i̱ ycui' Ndyosi lo'o ma̱ ―nacui̱ Jesús li'―. Nu lo'o cajaa na' lo crusi, li' tyalú tañi na' xqui'ya cu'ma̱.
21’Pana nga'a̱ yu juani la cui' yu nu cujui' cresiya 'na ji'i̱ ngu' cuxi; stu'ba ti nga'a̱ yu bi' to' mesa re lo'o na' ―nacui̱ Jesús li'―. 22Nga'a̱ cha' tsa'a na' nu cua lijya̱a̱ cha' caca na' ñati̱, tsa'a̱ tyucui̱i̱ su cua nscua cuayá' cha' tsa'a̱ cuentya ji'i̱ ycui' Ndyosi Sti na'. Pana tya'na tsa nu qui'yu nu cua cujui' ti cresiya 'na ji'i̱ ngu' cuxi bi'.
23Li' nguxana ngu' nchcui' ngu' lo'o tya'a ndi'i̱ ti ngu':
―¿Tilaca laca nu tya ji'i̱ mstru ji'na re ya' ngu' xña'a̱? ―nacui̱ ngu'.
Nchcui' tyucuaa ti' ngu' lo'o tya'a ndyaca tsa'a̱ ti ngu'
24Lo'o ti nguxana ngu' nchcui' tyucuaa ti' ngu' lo'o tya'a ndyaca tsa'a̱ ti ngu', nchcui' ngu' cha' ji'i̱ tilaca nu caca loo la ji'i̱ tya'a ngu'. 25Laja li' xa' nchcui' Jesús lo'o ngu' chaca quiya':
―Cua ña'a̱ ca xu'na chalyuu, tso'o tsa nclyo bi' cña ji'i̱ ñati̱ ji'i̱; ñati̱ nu tso'o tsa ndu'ni laca nu laca loo bi', nacui̱ ngu' li'. 26Pana cu'ma̱ ni, ná ntsu'u cha' cua'ni ma̱ jua'a̱ lo'o tya'a ma̱. Ndi'ya̱ cua'ni ma̱ tso'o la: nu lo'o nti' ma̱ cha' ndulo la cha' ji'i̱ ma̱ que cha' ji'i̱ tya'a ma̱ ni, li' nga'a̱ cha' cua'ni ma̱ ñi'ya̱ si laca ma̱ nu cuañi' la ji'i̱ tya'a ma̱ ―nacui̱ Jesús ji'i̱ ngu' bi'―. Jua'a̱ cu'ma̱ nu nti' ma̱ culo ma̱ cña ji'i̱ tya'a ma̱ ni, nga'a̱ cha' cua'ni ma̱ cña cuentya ji'i̱ lcaa tya'a ma̱. 27¿Tilaca laca nu ndulo la cha' ji'i̱ lacua? ¿Ha nu ntucua to' mesa cha' cacu? ¿Ha msu nu nxacu ji'i̱ yu? Chañi cha' yu nu ntucua to' mesa ni, bi' laca nu ndulo la cha' ji'i̱, cha' bi' laca xu'na ngu'. Pana nu na' ni, ñi'ya̱ si laca na' sca msu ji'i̱ ma̱, jua'a̱ ti ndi'i̱ na' laja cu'ma̱ ―nacui̱ Jesús―.
28’Cu'ma̱ ni, cua ndi'i̱ ma̱ lo'o na' lcaa tyempo lo'o nchcube' na' ndi'i̱ na' chalyuu re, 29bi' cha' ta na' sca cña tso'o nu cua'ni ma̱ cha' caca ma̱ cña lo'o na'; cña bi' caca ñi'ya̱ laca cña nu nda Sti na' 'na, cha' caca na' loo. 30Nga'a̱ cha' stu'ba ti cacu ma̱ co'o ma̱ lo'o na' ca su tlyu bi' su tyucua na'; nga'a̱ cha' stu'ba ti tyi'i̱ ma̱ lo'o na' nu lo'o cua'ni cuayá' na' ji'i̱ lcaa ñati̱; lo'o jua'a̱ cua'ni cuayá' ma̱ ji'i̱ tya'a ñati̱ ma̱, nu tii tyucuaa tya'a taju ngu' Israel tya'a na.
Chcui' Pedro lo'o ngu' cha' ná nslo yu ji'i̱ Jesús tsiya' ti
31Lo'o li' nchcui' Jesús lo'o Simón Pedro bi':
―Simón ―nacui̱―, laca cha' ñi'ya̱ laca si cua ngüijña Satanás chacuayá' cha' cua'ni lya' ti' ji'i̱ lcaa cu'ma̱; cua nti' yu cua'ni cuayá' yu ji'i̱ ma̱, cha' xcutsi̱i̱ yu ji'i̱ ma̱. Ñi'ya̱ laca lo'o nscui̱i̱ ngu' ji'i̱ si'yu trigo cha' tyubii ji'i̱, jua'a̱ cua'ni yu lo'o ma̱, nti' yu. 32Pana cua ngüijña na' ji'i̱ ycui' Ndyosi Sti na' cha' jinu'u̱ Pedro, cha' ná tye cha' jlya ti' nu'u̱ 'na. Lo'o cua nteje tacui cha' cuxi bi' hi̱, nu lo'o xa' chcui' nu'u̱ cha' 'na, li' taca xtyucua nu'u̱ ji'i̱ xa' la tya'a ma̱ cha' tso'o la xñi ngu' cha' 'na.
33―Cusu' ―nacui̱ Simón li'―, ná ndu'ni cha' jna' masi tsa'a̱ lo'o nu'u̱ ne' chcua̱, masi cajaa na' lo'o nu'u̱ ―nacui̱ ji'i̱ Jesús.
34―Ndi'ya̱ nchcui' na' lo'o nu'u̱ juani, Pedro ―nacui̱ Jesús ji'i̱―, cha' nu lo'o tya lyiji xi'ya ndye'e talya juani, li' sna quiya' ñacui̱ nu'u̱ cha' ná nslo nu'u̱ 'na.
Cua ngulala ti hora nu chcube' Jesús
35Li' nchcuane Jesús ji'i̱ ngu':
―Nu lo'o ngulo na' cña ji'i̱ ma̱ cha' tsaa ma̱ xa' quichi̱ nu ná lo'o cujui̱ cñi ji'i̱ ma̱, ná lo'o xa' cujui̱, ná lo'o caña ji'i̱ ma̱, ¿ha ntsu'u na nu lyiji ji'i̱ ma̱ li'?
―Ná sca na lyiji ji'i̱ ya li' ―nguxacui̱ ngu' cha' ji'i̱.
36Li' nacui̱ Jesús ji'i̱ ngu':
―Jua'a̱ ngua tu'ni, pana xa' ña'a̱ nga'a̱ cha' cua'ni ma̱ juani. Nu cu'ma̱ nu ntsu'u cujui̱ cñi ji'i̱ ma̱ ni, lo'o bi' cui'ya ma̱ tsaa ma̱, lo'o xa' cujui̱ lo'o; si ná ntsu'u maxtyi cusu̱u̱ ji'i̱ ma̱, nga'a̱ cha' cujui' ma̱ ste' ma̱ cha' cui'ya ma̱ maxtyi. 37Jua'a̱ cha' nchcui' na' lo'o ma̱ cha' nga'a̱ cha' tyu'u tucua cha' cuxi nu nchcui' quityi cusu' cha' caca 'na. Ndi'ya̱ nscua cha': “Ñi'ya̱ nu ndu'ni ngu' lo'o ñati̱ cuxi, jua'a̱ cua'ni ngu' lo'o ycui' Cristo”. Lcaa cha' nu nscua cha' caca 'na, jua'a̱ caca 'na tu'ni ―nacui̱ Jesús ji'i̱ ngu'.
38Li' nacui̱ ngu' bi' ji'i̱:
―Cusu', nde ntsu'u tucua tya'a maxtyi cusu̱u̱ ―nacui̱ ngu'.
―Cuayá' cua lacua ―nacui̱ Jesús li'.
Nchcui' Jesús lo'o ycui' Ndyosi Sti yu ca Getsemaní
39Li' ndu'u Jesús ndyaa yu ca lo ca'ya Olivos, ñi'ya̱ nu ndu'ni ti yu. Lo'o nu ngu' nu ndyaca tsa'a̱ ji'i̱ bi', ndu'u lca'a̱ ngu' ji'i̱ yu li'. 40Nu lo'o ndyalaa ngu' ca bi', li' nacui̱ Jesús ji'i̱ ngu':
―Chcui' ma̱ lo'o ycui' Ndyosi Sti na' cha' ná tyiji̱loo nu xña'a̱ ji'i̱ ma̱ ―nacui̱.
41Li' ndu'utsu' Jesús nde slo ngu' ña'a̱ cuayá' nu tyalaa sca quee cu̱ na, ca bi' ndyatu̱ sti̱' Jesús cha' chcui' lo'o ycui' Ndyosi.
42―Sti na' ―nacui̱ yu―, ¿ha ná ntsu'u xi xa' la ña'a̱ nu caca cua'ni na' cña re, cha' nga'aa chcube' la na' lo'o cña tlyu re jinu'u̱? ―nacui̱ Jesús ji'i̱ ycui' Ndyosi Sti yu―. Pana nti' na' cha' cua'ni na' cua ña'a̱ ca cña nu nti' nu'u̱ cha' cua'ni na'.
43Li' ndu'u tucua sca xca̱ nu ngutu'u slo ycui' Ndyosi nde cua̱, cha' ta la juersa ji'i̱ Jesús. 44Nu lo'o lye tsa nchcube' Jesús, li' lye la nchcui' yu lo'o ycui' Ndyosi. Lo'o li' ntyucua jatá Jesús, ndyalú nchcua' lo yuu; ñi'ya̱ si nchcua' tañi ycui', jua'a̱ ña'a̱.
45Ndye nchcui' Jesús lo'o ycui' Ndyosi Sti yu, li' nguxtyu̱u̱ yu ñaa yu slo nu ngu' nu ndyaca tsa'a̱ ji'i̱ yu. Li' nquije ngu' ji'i̱ yu, ndi'i̱ ngu' laja' ngu' cha' ndye juersa ji'i̱ ngu', cha' xñi'i̱ tsa ti' ngu'. 46Li' nacui̱ yu ji'i̱ ngu':
―¿Ni cha' laca ndi'i̱ ma̱ laja' ti ma̱? Tyatu̱ clya ma̱ cha' chcui' ma̱ lo'o ycui' Ndyosi, cha' ná tyiji̱loo nu xña'a̱ ji'i̱ ma̱.
Ndyaa lo'o ngu' ji'i̱ Jesús preso
47Tya nchcui' ca Jesús lo'o ngu' bi', li' ndyalaa quiña'a̱ tsa ñati̱. Nu naa Judas bi', tsaca yu tya'a nu tii tyucuaa tya'a ngu' nu ndyaca tsa'a̱ ji'i̱ Jesús ni, ngulu'u yu tyucui̱i̱ ji'i̱ ngu' quiña'a̱ bi'. Ñaa yu ca slo Jesús cha' chcuicha' yu saca' Jesús. 48Li' nchcui' Jesús lo'o yu bi':
―Judas ―nacui̱―, ¿ha bi' cha' chcuicha' nu'u̱ 'na cha' tya nu'u̱ 'na ya' ngu' cuxi, na' nu cua nda Ni 'na lijya̱a̱ cha' caca na' ñati̱?
49Lo'o na'a̱ ngu' nu ndu̱ lo'o Jesús ñi'ya̱ caca cha' bi', li' nchcuane ngu' ji'i̱ yu:
―Cusu' ―nacui̱ ngu'―, ¿ha cua'a ya jinu'u̱ lo'o maxtyi, cha' ná ca̱a̱ ngu' cua?
50Li' ngusicua̱ tsaca tya'a ngu' bi' maxtyi ji'i̱ yu, ngusi'yu yu jyaca̱ sca msu ji'i̱ xu'na sti jo'ó; ngusi'yu cu' yu scua' jyaca̱ la'a tsu' cui̱ ji'i̱ yu. 51Li' nacui̱ Jesús ji'i̱ ngu':
―Cuayá' tsa lo cua ti. Ta ti'i̱ ma̱ maxtyi ji'i̱ ma̱.
Li' ngusta ya' Jesús lo scua' jyaca̱ msu bi', ngua tso'o ca scua' jyaca̱ yu li'. 52Lo'o ti nchcui' Jesús lo'o ngu' sti jo'ó nu laca loo, lo'o ngu' nu laca cña ne' laa, jua'a̱ lo'o ngu' cusu' ji'i̱ quichi̱, lcaa ngu' nu ñaa cha' tyaa lo'o ngu' ji'i̱:
―¿Ha na ndu'u cu'ma̱ lijya̱ ma̱ lo'o maxtyi ji'i̱ ma̱, lo'o yaca ji'i̱ ma̱, cha' quiji'i̱ yaca ma̱ 'na ñi'ya̱ nu ntyiji'i̱ na ji'i̱ sca cuaana? 53Lcaa tsa̱ lo'o nguti'i̱ na' lo'o cu'ma̱ ne' laa tonu bi', ni sca quiya' ná ngusacui̱ ya' cu'ma̱ 'na. Pana cua ngujui xi tyempo ji'i̱ ma̱ cha' cua'ni ma̱ cha' cuxi bi' juani, cha' cua nda nu xña'a̱ chacuayá' ji'i̱ ma̱; la cui' nu bi' laca loo ji'i̱ ma̱.
Lye tsa nchcui' Pedro cha' ná nslo yu ji'i̱ Jesús
54Lo'o li' ngusñi ngu' ji'i̱ Jesús cha' caca preso, ndyaa lo'o ngu' ji'i̱ nde toni'i̱ ji'i̱ xu'na sti jo'ó. Lo'o Pedro ni, ndyaa lca'a̱ yu ji'i̱ ngu' tyijyu' ti li'. 55Ca bi' nguxtyu'u ngu' xi quii' cla'be la su laja to' ni'i̱, lo'o li' ndyu'u ti'i̱ ngu' to' lquii' bi'; lo'o Pedro ndyaca'a̱ laja ngu'. 56Li' na'a̱ sca nu cuna'a̱ cua' ji'i̱ ngu' cha' lo'o Pedro nga'a̱ to' lquii' bi'. Ña'a̱ tsa nu cuna'a̱ bi' ji'i̱ yu, li' nchcui' lo'o ngu':
―Lo'o nu qui'yu re ndya'a̱ lo'o nu Jesús bi' ―nacui̱ ji'i̱ ngu'.
57Hora ti nguxacui̱ Pedro cha' ji'i̱ nu cuna'a̱ bi':
―Ma' cusu', ná nslo na' ji'i̱ yu jua ―nacui̱ Pedro li'.
58Ca tiya' la xi na'a̱ chaca ñati̱ ji'i̱.
―Lo'o nu'u̱ laca tya'a ndya'a̱ ngu' jua ―nacui̱ ñati̱ bi' ji'i̱ Pedro.
―Si'i na' ―nacui̱ yu―. Ná laca na' tya'a ndya'a̱ ngu' jua ―nacui̱ Pedro ji'i̱ ngu'.
59Cua nteje tacui sca hora, li' nchcui' chaca ñati̱ lo'o tya'a ndya'a̱ ti yu ndacua:
―Chañi cha' lo'o nu qui'yu re ndya'a̱ lo'o preso jua, cha' lo'o yu re laca ngu' Galilea ―nacui̱ yu li'.
60―Chocue ―nacui̱ Pedro li'―, ná jlo ti' na' ni cha' nchcui' nu'u̱.
La cui' hora nu lo'o tya ndu̱ Pedro nchcui', li' ngusi'ya sca ndye'e. 61Li' nguxtyacui loo Jesús su ndu̱ ne' ni'i̱, cha' ña'a̱ ji'i̱ Pedro. Hora ti ndyi'u ti' Pedro cha' nu cua nchcui' Jesús lo'o yu tya tsa̱ la. Ndi'ya̱ ngua cha' bi': “Nu lo'o tya lyiji xi'ya ndye'e talya juani, li' sna quiya' ñacui̱ nu'u̱ cha' ná nslo nu'u̱ 'na”, nacui̱ Jesús tya li'. 62Li' ndu'u Pedro nde liya', lye tsa ndyunaa yu cha' ngua xñi'i̱ tsa ti' yu.
Nxtyí lo'o ngu' ji'i̱ Jesús
63Lo'o ngu' nu ndu̱ cua̱ ji'i̱ Jesús ni, nxtyí lo'o tsa ngu' ji'i̱ Jesús, lo'o jua'a̱ ngujui'i̱ ngu' ji'i̱ yu. 64Ndacu̱' ngu' cloo Jesús lo'o sca late', cuati ngujui'i̱ ya' ngu' saca' yu. Li' nacui̱ ngu' ji'i̱ yu:
―Ca tii nu'u̱, ¿tilaca laca nu ngujui'i̱ jinu'u̱ lacua?
65Lo'o jua'a̱ quiña'a̱ la cha' suba' nchcui' ngu' bi' lo'o Jesús li'.
Ndu̱ Jesús nde loo ngu' nu laca cña
66Lo'o nguxee, li' ndyu'u ti'i̱ ngu' cusu' ji'i̱ ngu' judío, lo'o ngu' sti jo'ó nu laca loo, lo'o ngu' mstru cha' jo'ó; ndyaa lo'o ngu' ji'i̱ Jesús nde loo ña'a̱ taju ngu' tisiya bi'. Ca bi' nguxana ngu' ndacha' ngu' ji'i̱ yu:
67―Cuacha' clya nu'u̱ ji'i̱ ya si nu'u̱ laca Cristo ―nacui̱ ngu' ji'i̱ yu.
Nguxacui̱ Jesús cha' ji'i̱ ngu' li':
―Masi ñacui̱ na' ji'i̱ ma̱ jua'a̱, ná jlya ti' ma̱ 'na. 68Masi xcuane na' sca cha' ji'i̱ ma̱, ná xacui̱ ma̱ cha' 'na. Cua jlo ta̱' cha' ná culaá ma̱ 'na. 69Pana nde loo la tyucua na' nu lijya̱a̱ cha' caca na' ñati̱, tyucua na' nde la'a tsu' cui̱ ji'i̱ ycui' Ndyosi nu lcaa tsiya' ti cña nchca ji'i̱ Ni.
70Lo'o ti nchcuane lcaa ngu' tonu ji'i̱ yu:
―¿Ha nu'u̱ laca Sñi' ycui' Ndyosi lacua?
Li' xa' nguxacui̱ Jesús cha' ji'i̱ ngu' chaca quiya':
―Chañi cha' nu nchcui' cu'ma̱ lo'o nacui̱ ma̱ cha' bi' laca na' ―nacui̱ yu ji'i̱ ngu'.
71―Nga'aa nti' culana na xa' la ñati̱ nu jlo ti' ―nacui̱ ngu' li'―. Cua ndyuna lcaa na cha' nu nchcui' yu re. Tu'ba ycui' ca yu cua ndu'u cha' cuiñi.
Currently Selected:
SAN LUCAS 22: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.