SAN JUAN 5
5
Ngu' nu nchcu̱' tyucuí̱ nu ntsiya to' tayu'
1Chaca yija̱ lo'o ngua ta'a nde Jerusalén cuentya ji'i̱ ngu' judío, ndyaa Jesús ta'a chaca quiya' li'. 2Nde Jerusalén bi' ntsu'u sca to' lo'o quichi̱ su naa to' lo'o ji'i̱ xlya'. Ca bi' nscua sca tayu' piti, Betesda naa tayu' bi' cha'cña ji'i̱ ngu' judío bi'. 3Tyi'i̱ ca to' tayu' piti bi' ndacui ca'yu tya'a corredor su ndi'i̱ quiña'a̱ tsa ngu' quicha; nu cuityi̱', nu cu' quiya', nu nchcu̱' tyucuí̱, ndi'i̱ ngu' ca bi' ntajatya ngu' ña'a̱ cuayá' nu quiña lo hitya tayu' bi'. 4Nda ti' ngu' quichi̱ bi', cha' tyijyu' ndacui cuayá' ti nda'ya sca xca̱ ji'i̱ ycui' Ndyosi nu yaa̱ nde cua̱, ndyaa ne' hitya tayu' bi', cha' xquiña lo hitya bi'; nu quicha nu ndyaa yala la ndyaata chcu to' hitya bi' lo'o nguiña ca ti lo hitya, bi' laca nu ndyaca tso'o ji'i̱ cua ña'a̱ ca quicha nu ntsu'u ji'i̱, nacui̱ ngu'. 5Cua ntsiya sca nu quicha quiya' ca bi'; cua calaa tyii ntucua snu' yija̱ ntsiya quicha. 6Lo'o na'a̱ Jesús ji'i̱ nu quicha bi' ca su ntsiya, li' ngua cuayá' ti' yu cha' cua sa'ni ntsiya. Li' nchcuane Jesús ji'i̱ nu quicha bi' si chañi cha' nti' tyaca tso'o.
7―Cusu' ―nacui̱ ji'i̱ Jesús―, ná tucui ntsu'u 'na nu caca xtyucua xi 'na cha' tsaa lo'o 'na to' hitya lo'o nguiña lo hitya bi'. Ndatu̱ ca na' lo'o yala la ndyaa xi xa' ñati̱ lo tayu' cua.
8―Tyatu̱ clya nu'u̱ juani ―nacui̱ Jesús li'―, xcu̱' late' cua hi̱ lo'o jaa' cua, tyaa lo'o ji'i̱ to' tyi.
9Lo'o li' jua'a̱ ngua, hora ti ndyaca tso'o nu quicha bi'. Li' nguxana ndu'u ta'a̱, ndyaa lo'o ji'i̱ jaa' ji'i̱. Tsa̱ saru ngua li'. Tacati tsa tsa̱ bi' ji'i̱ ngu' judío, nga'aa ndu'ni ngu' cña li'. 10Bi' cha' nchcui' nu ngu' judío bi' lo'o nu ngua quicha bi':
―Tsa̱ nu ndi'i̱ cña' ngu' laca juani ―nacui̱ ngu' bi' ji'i̱―. Ná ntsu'u chacuayá' jinu'u̱ tsiya' ti cha' tya'a̱ lo'o ji'i̱ jaa' cua hi̱ juani.
11Li' nguxtyacui nu ngua quicha cha' lo'o ngu':
―Nu ngua'ni jo'o 'na, bi' laca nu ngulo cña 'na cha' tya'a̱ na' tyaa lo'u̱ ji'i̱ jaa' re toni'i̱ 'na li' ―nacui̱.
12―¿Tilaca ngulo cña hi̱ cha' tyaa lo'o ji'i̱ jaa' cua hi̱? ―nacui̱ ngu' bi'.
13Ná jlo ti' nu ngua quicha quiya' bi' tilaca ngua'ni jo'o ji'i̱. Nguti'i̱ tsa ngu' ca bi', lo'o ná tucui na'a̱ ji'i̱ Jesús lo'o ngutu'u ndyaa. 14Ca ngusi̱i̱ la xa' ndyacua tya'a Jesús lo'o nu ngua quicha bi' lo'o ndya'a̱ yu ne' laa. Li' nacui̱ Jesús ji'i̱:
―Cua ndyaca tso'o nu'u̱ juani ―nacui̱ yu―, bi' cha' xtyanu nu'u̱ tyucui̱i̱ cuxi cua hi̱ cha' nga'aa tyacua xa' quicha tlyu la hi̱.
15Ndyaa nu ngua quicha bi' li', ndyaa ndacha' ji'i̱ ngu' judío bi', cha' Jesús naa nu ngua'ni cha' ndyaca tso'o. 16Ngua cuayá' ti' ngu' bi' li', cha' ngua'ni Jesús cha' tlyu lo'o nu quicha bi' tsa̱ ta'a lo'o ndi'i̱ cña' ngu', bi' cha' ngunasi̱' tsa ngu' judío bi' ji'i̱ Jesús. Nguxana ngu' bi' ngulacua cuxi ti' ngu' ña'a̱ ngu' ji'i̱ yu, ngua ti' ngu' cujuii ngu' ji'i̱ yu. 17Pana nguxtyacui Jesús cha' lo'o ngu' li':
―Tya lyiji tye cua'ni Sti na' cña ―nacui̱ Jesús―, lo'o jua'a̱ na', tya ndyu'ni na' cña.
18Bi' cha' chi̱i̱ tsa ntsu'u tyiquee ngu' judío bi' ña'a̱ ngu' ji'i̱ Jesús, ntsu'u tsa ngu' bi' nu nti' cujuii ji'i̱ Jesús li'. Ti'í ti' ngu' bi' ña'a̱ ngu' ji'i̱ yu, cha' ná ndaquiya' yu tsa̱ ta'a ji'i̱ ngu', nacui̱ ngu'. Ná ndiya ti' ngu' tsiya' ti cha' nacui̱ Jesús cha' ycui' Ndyosi laca Sti yu, cha' stu'ba nti' ycui' ca yu lo'o ycui' Ndyosi.
Ycui' Ndyosi Sti yu laca nu cua nda chacuayá' ji'i̱ Jesús
19Li' nguxacui̱ Jesús cha' ji'i̱ ngu' judío bi':
―Ta na' sca cha' liñi lo'o ma̱ juani ―nacui̱ yu―. Ná sca cña caca cua'ni na' ycui' ti na', na' nu laca̱ Sñi' ycui' Ndyosi. Ñi'ya̱ cña nu ña'a̱ na' cha' ndu'ni Sti na', jua'a̱ ti cña ndu'ni na' ―nacui̱―. 20Ycui' Sti na' ni, ntsu'u tsa tyiquee Ni ña'a̱ Ni jna', cha' Sñi' ycui' Ni laca na' ―nacui̱ Jesús―. Lcaa cña nu ndu'ni Sti na', nclu'u Ni jna'. Lo'o jua'a̱ tya cua'ni la Ni cña tonu nu bilya ña'a̱ ma̱ ji'i̱, cha' cube ti' ma̱ ji'i̱ ycui' Ni. 21Xa' ta ycui' Ndyosi chalyuu ji'i̱ ngu' chaca quiya', ji'i̱ cua ña'a̱ ca ñati̱ nu nti' Ni cha' ta Ni chalyuu ji'i̱; lo'o jua'a̱ la cui' cña ndu'ni na' nu laca̱ Sñi' ycui' Ni, ta na' chaca chalyuu ji'i̱ lcua ti ñati̱ nu nti' na' cha' ta̱ ji'i̱ ―nacui̱ Jesús ji'i̱ ngu'―. 22Ná ndu'ni cuayá' Sti na' ji'i̱ ñati̱ chalyuu; na cua nda Ni chacuayá' jna', cha' Sñi' ycui' Ni laca̱, cha' cua'ni cuayá' na' ji'i̱ lcaa ñati̱. 23Cua nti' Ni cha' cua'ni chi̱ lcaa ñati̱ loo na' ñi'ya̱ nu ndu'ni chi̱ ngu' loo ycui' Ni. Pana si ná tyaja'a̱ ñati̱ cua'ni chi̱ ngu' loo na' nu laca̱ Sñi' ycui' Ni, la cui' jua'a̱ ná taca cua'ni chi̱ ngu' loo ycui' Ndyosi nu nda 'na lijya̱a̱.
24’Liñi tsa cha' nu ta na' lo'o ma̱ juani: Cua ña'a̱ ca ñati̱ nu taquiya' ji'i̱ lcaa cha' nu chcui' na' lo'o ngu', lcaa ñati̱ nu jlya ti' ji'i̱ ycui' Ndyosi Sti na' nu nda jna' lijya̱a̱, bi' ngu' laca nu ná nga'a̱ cha' tye chalyuu tso'o nu ta ycui' Ndyosi ji'i̱ ngu' bi'. Ná cua'ni cuayá' Ni ji'i̱ ngu' bi', ná nscua cha' cajaa ngu' bi'; lcaa tyempo tyi'i̱ ngu' bi' lo'o ycui' Ndyosi ―nacui̱ Jesús ji'i̱ ngu'―. 25Lo'o jua'a̱ ta na' chaca cha' liñi lo'o ma̱ ―nacui̱―. Cua ngulala ti hora, cua la cui' hora ndyalaa juani, cha' xi'ya na' nu laca̱ Sñi' ycui' Ndyosi ji'i̱ lcaa ñati̱ nu ndi'i̱ chalyuu; ñi'ya̱ laca si na cua ngujuii ngu' laca, xqui'ya cha' cuxi nu ntsu'u ji'i̱ ngu'. Lo'o cuna ngu' bi' cha' nu chcui' na' lo'o ngu', li' caja chalyuu tso'o ji'i̱ ngu', lcaa ñati̱ nu xñi cha' jna' ―nacui̱ Jesús ji'i̱ ngu'―. 26Nchca ji'i̱ ycui' Ndyosi Sti na' cua'ni cha' xtyacui cresiya ji'i̱ ngu' cuxi bi', nchca ji'i̱ Ni ta Ni chalyuu nu ná nga'a̱ cha' tye ji'i̱ ngu'. Lo'o jua'a̱ stu'ba nchca jna' lo'o Sti na', cha' cua nda Sti na' chacuayá' cha' cua'ni na' jua'a̱ ―nacui̱ Jesús―. 27Lo'o jua'a̱ ntsu'u chacuayá' jna' cha' cua'ni cuayá' na' ji'i̱ ñati̱ chalyuu, xqui'ya cha' cua lijya̱ na' chalyuu laca na' ñati̱. 28Ná quiña'a̱ tsa cha' culacua ti' ma̱; chañi cha' tyalaa hora lo'o cañi xi'ya ycui' Ndyosi Sti na' ji'i̱ lcaa jyo'o ca su ndi'i̱ ngu' nguatsi' ngu'. Li' taquiya' ngu' bi' cha' nu chcui' Ni, tyu'u ngu' ne' cuaá tyaa ngu' mala su ntsu'u cha' tsaa ngu'. 29Ñati̱ nu ngua tso'o cresiya ji'i̱ ni, tyaa ngu' bi' tyi'i̱ ngu' lo'o ycui' Ndyosi; pana ñati̱ nu ntsu'u cha' cuxi ji'i̱, tyaa ngu' bi' ca su xcube' Ni ji'i̱ ngu', su tye tsiya' ti cha' ji'i̱ ngu' ―nacui̱ Jesús―.
Chañi cha' stu'ba cha' nu ntsu'u ji'i̱ Jesús lo'o ycui' Ndyosi Sti yu
30’Ná sca cña caca 'na si sca ti na' ―nacui̱ Jesús―. Lo'o ndyu'ni cuayá' na' ji'i̱ ñati̱, ndu'ni na' ñi'ya̱ nu nacui̱ Sti na' 'na cha' cua'ni na'. Stu'ba ndu'ni cuayá' na' ji'i̱ cua ña'a̱ ca ñati̱, cha' ndu'ni na' ñi'ya̱ nu nti' ycui' Sti na' nu nda 'na lijya̱a̱ chalyuu; ná ndu'ni na' sca cha' nu nda'ya hique ti na' ―nacui̱ Jesús li'―. 31Ni si'i na ngulo hique ti na' cha' nu nchcui' na' lo'o ma̱. Ná jlya ti' xa' ñati̱ si jua'a̱ ti chcui' na'. 32Ntsu'u chaca nu jlo ti' cha' liñi laca cha' nu nchcui' na', lo'o jua'a̱ jlo ti' na' cha' liñi nchcui' nu bi' ―nacui̱―. 33Cua nda ma̱ msu nu ndyaa slo nu Juan bi', lo'o chañi cha' nu nchcui' Juan lo'o msu bi' cuentya jna'. 34Pana ná ntsu'u cha' caja sca nu chcui' cha' liñi cuentya jna'. Na nda ti na' cha' bi' lo'o ma̱ cha' caja ñi'ya̱ clyaá ycui' ma̱ tsa̱ bi' lo'o caca cuayá' ji'i̱ ma̱ slo ycui' Ndyosi. 35Nu Juan ni ―nacui̱ Jesús li'―, nda yu cha' jna' lo'o ngu' ñi'ya̱ si laca yu sca xee nu ndubi tsa, nu nda xee tyi'i̱ ca chu̱' su ndi'i̱ yu bi'. Lo'o jua'a̱ tso'o xi ngua ti' ma̱ lo'o nchcui' Juan lo'o ma̱ li' ―nacui̱―. 36Pana xti ti cha' 'na nchcui' Juan lo'o ma̱; cua quiña'a̱ la cha' caca ña'a̱ ma̱ juani cuentya jna', nu lo'o ña'a̱ ma̱ cña tonu nu nda Sti na' 'na cha' cua'ni na'. Tya cua'ni na' cña bi' ña'a̱ cuayá' tye bi'. Xqui'ya cña bi' caca cuayá' ti' ma̱ cha' ycui' Sti na' ngulo cña jna' cha' ca̱a̱ na' nde chalyuu re ―nacui̱ Jesús―. 37Jua'a̱ ngulu'u liñi Sti na' cha' 'na ji'i̱ ma̱, cha' la cui' Sti na' laca nu cua nda jna' lijya̱a̱. Lo'o cu'ma̱ ni, bilya cuna ma̱ cha' nu nchcui' Ni, bilya ña'a̱ ma̱ ji'i̱ ycui' Ni. 38Ná ndyanu cha' nu nchcui' Sti na' ne' cresiya ji'i̱ ma̱, cha' ná jlya ti' ma̱ jna' cha' laca na' Sñi' ycui' Ndyosi nu cua nda Ni 'na lijya̱a̱ chalyuu ―nacui̱―. 39Lcaa tsa̱ nchcui' tsa ma̱ lo quityi cusu' ji'i̱ ycui' Ndyosi; nti' ma̱ cha' lo'o chcui' ma̱ lo quityi bi', li' caja chalyuu nu ná nga'a̱ cha' tye ji'i̱ ma̱. Chañi cha' nu nscua lo quityi bi', jua'a̱ taca tyuloo ñati̱ jna' lo'o chcui' ngu' lo quityi bi'. 40Pana ná ntaja'a̱ ma̱ jña ma̱ chalyuu tso'o bi' jna'.
41’Si'i na nti' na' cha' cua'ni chi̱ ñati̱ loo na' ―nacui̱ Jesús ji'i̱ ngu'―. 42Pana cu'ma̱ ni, jlo ti' na' cha' xa' ña'a̱ ndu'ni cu'ma̱, xqui'ya cha' ná ntsu'u tyiquee ma̱ tsiya' ti ji'i̱ ycui' Ndyosi Sti na'. 43Cua nda ycui' Ndyosi 'na lijya̱ na' cha' cua'ni na' cña ji'i̱ Ni, pana ná ndaca'a̱ jyaca̱ ma̱ ji'i̱ cha' nu nchcui' na' lo'o ma̱. Si ca̱a̱ xa' ñati̱ nu cua'ni cña ji'i̱ ycui' ca ti ngu', hora ti xni ma̱ cha' ji'i̱ ngu' bi' li'. 44Bi' cha' ná caja ñi'ya̱ caca xñi ma̱ cha' ji'i̱ ycui' Ndyosi ―nacui̱ Jesús―. Ndulo cha' ji'i̱ ma̱ cha' tso'o ti chcui' ñati̱ ji'i̱ ma̱, pana ná ndulo cha' ji'i̱ ma̱ cha' tso'o ti cua'ni ycui' Ndyosi lo'o ma̱. 45Si'i na' nu sta̱ qui'ya ji'i̱ ma̱ slo ycui' Ndyosi ―nacui̱ Jesús ji'i̱ ngu'―. Cua laca nscua qui'ya ji'i̱ ma̱ xqui'ya cha' nu cua nda jyo'o Moisés lo'o ma̱ nu ngua tya sa'ni bi', la cui' cha' nu jlya tsa ti' ma̱ ji'i̱, nacui̱ ma̱. 46Yala ti xñi ma̱ cha' jna' si chañi cha' ngusñi ma̱ cha' nu nda jyo'o Moisés bi' lo'o ma̱ ―nacui̱ Jesús li'―. Cha' jna' nguscua jyo'o bi' lo quityi bi', 47pana ná ngusñi ma̱ tsiya' ti cha' nu nguscua jyo'o bi'. Lo'o jua'a̱ ¿ñi'ya̱ cua'ni ma̱ cha' xñi ma̱ cha' nu chcui' na' lo'o ma̱ lacua?
Currently Selected:
SAN JUAN 5: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.