SAN JUAN 16
16
1’Yala la nchcui' na' lcaa cha' bi' lo'o ma̱, cha' ná xtyanu ma̱ cha' jna' lo'o cua'ni lya' ti' ngu' ji'i̱ ma̱, 2masi ná ta ngu' chacuayá' ji'i̱ ma̱ cha' tsaa ma̱ ne' laa ji'i̱ ngu' li' ―nacui̱ Jesús―. Tyalaa sca tyempo nu culacua ti' ngu' cha' cña tacati cua'ni ngu' si cujuii ngu' ji'i̱ ngu' tya'a ma̱. 3Jua'a̱ cua'ni ngu' bi', cha' ná nslo ngu' ji'i̱ ycui' Ndyosi Sti na'; la cui' jua'a̱ ná nslo ngu' jna' ―nacui̱ Jesús―. 4Cua nchcui' na' lcaa cha' bi' lo'o ma̱ juani, cha' nu lo'o tyalaa tyempo cuxi bi', li' taca tyi'u ti' ma̱ ñi'ya̱ nu cua nchcui' na' lo'o ma̱ juani.
Cña nu ndu'ni Xtyi'i ycui' Ndyosi
’Tya clyo ná nda na' cha' bi' lo'o ma̱, cha' tya ndi'i̱ na' lo'o ma̱ ―nacui̱ Jesús―. 5Pana juani cua tsa'a ti na' ca su ndi'i̱ ycui' Ndyosi Sti na' nu nda 'na lijya̱a̱, masi bilya xcuane ma̱ jna' ma nde tsa'a̱. 6Xñi'i̱ tsa ti' ma̱ xqui'ya cha' nu nda na' lo'o ma̱ tsa̱. 7Pana ná cube tsa ti' ma̱. Cha' liñi nda na' lo'o ma̱ juani ―nacui̱ Jesús―, cha' tso'o la tyi'i̱ ma̱ si cua ndya'a na'. Ná ca̱a̱ Xtyi'i ycui' Ni nu xtyucua ji'i̱ ma̱ lcaa tsa̱ si ná tya'a na', cha' nu lo'o tya'a na', li' ta na' ji'i̱ nu bi' ca̱a̱ Ni. 8Nu lo'o ca̱a̱ Xtyi'i ycui' Ndyosi lo yuu chalyuu ―nacui̱ Jesús―, cua'ni Ni cha' cube ti' lcua ti tya'a ñati̱ chalyuu cha' ntsu'u qui'ya nu ngusta ycui' Ndyosi ji'i̱ ngu'; jua'a̱ cua'ni Ni cha' tyi'u ti' ñati̱ jna', cha' liñi tsa laca ycui' na'; jua'a̱ cua'ni Ni cha' ca cuayá' ti' ñati̱ cha' ntsu'u cha' cua'ni cuayá' ycui' Ndyosi ji'i̱ lcaa ñati̱ chalyuu ―nacui̱―. 9Cua'ni Xtyi'i ycui' Ni cha' cube ti' ngu' cha' ntsu'u qui'ya ji'i̱ ngu' cuentya ji'i̱ ycui' Ndyosi, xqui'ya cha' jlo ti' ngu' cha' ná ndaquiya' ngu' ji'i̱ cha' nu nchcui' na' ―nacui̱ Jesús―. 10Lo'o jua'a̱ cua'ni Ni cha' tyi'u ti' ngu' jna' cha' liñi tsa ndu'ni na', cha' liñi tsa cha' nu nchcui' na'; pana cua tsa'a ti na' slo ycui' Ndyosi Sti na', lo'o li' nga'aa ña'a̱ ma̱ 'na ―nacui̱―. 11Jua'a̱ cua'ni Ni cha' ca cuayá' ti' ngu' cha' ntsu'u cha' cua'ni cuayá' ycui' Ndyosi ji'i̱ lcaa ñati̱ chalyuu, xqui'ya cha' cua ngusta Ni yabe' hichu̱' nu xña'a̱ nu laca loo ji'i̱ ñati̱ chalyuu.
12’Tya quiña'a̱ la cha' ntsu'u cha' nti' na' chcui' na' lo'o ma̱ nquicha' ―nacui̱ Jesús ji'i̱ ñati̱ nu ndyaca tsa'a̱ ji'i̱―, pana ná talo ma̱ cua'a̱ jyaca̱ ma̱ ji'i̱ cha' bi' juani, cha' tucui tsa cha' bi'. 13Nu lo'o ca̱a̱ Xtyi'i ycui' Ndyosi nu tyu'u nde slo ycui' Ni, li' culu'u nu bi' lcaa cha' nu liñi ca ji'i̱ ma̱; li' chcui' liñi nu bi' lo'o ma̱ lcaa cha' nu cuentya 'na ―nacui̱―. Ná chcui' nu bi' chacuayá' ji'i̱ ycui' ca Ni; tsa ña'a̱ cha' nu cua ndyuna ti Ni ca slo ycui' Ndyosi, bi' ti cha' ta nu bi' lo'o ma̱ ―nacui̱ Jesús―. Lo'o jua'a̱ ta nu bi' cha' lo'o ma̱, lcaa cha' nu caca jna'. 14Cua'ni tlyu Xtyi'i ycui' Ni jna'. Lcaa cha' nu culu'u nu bi' ji'i̱ ma̱, cha' jna' laca bi'; na' laca̱ su̱u̱ cha' bi' ―nacui̱ Jesús ji'i̱ ngu' nu ndyaca tsa'a̱ ji'i̱―. 15Lcaa cha' nu ntsu'u ji'i̱ ycui' Ndyosi Sti na' cua nda Ni 'na; bi' cha' ni na' ji'i̱ ma̱ lacua, cha' lcaa cha' nu culu'u Xtyi'i ycui' Ndyosi ji'i̱ ma̱, cha' jna' laca bi'.
Caca chaa ti' na, masi xñi'i̱ tsa ti' na ndi'i̱ na
16’Ca tiya' la xi, nga'aa ña'a̱ ma̱ jna', xqui'ya cha' tya'a na' slo ycui' Ndyosi Sti na'; pana tiya' la li' ña'a̱ ma̱ jna' chaca quiya' ―nacui̱ Jesús.
17Lo'o li' ntsu'u xi ngu' nu ndyaca tsa'a̱ ji'i̱ Jesús nu ndi'ya̱ nchcui' ngu' lo'o tya'a ngu':
―Nacui̱ nu cusu' cha' ngulala ti cha' nga'aa ña'a̱ na ji'i̱ ycui' yu ―nacui̱ ngu' bi'―. Lo'o li' nacui̱ yu cha' tiya' la ña'a̱ na ji'i̱ yu chaca quiya'. Lo'o jua'a̱ chaca cha' nacui̱ nu cusu', cha' tsaa yu ca slo ycui' Ndyosi Sti yu. 18¿Ñi'ya̱ ntsu'u ta cha' nu nchcui' nu cusu' jua cha' “tiya' la xi”? ―nchcuane ngu' ji'i̱ tya'a ngu'―. Ná jlo ti' na ni cha' laca nchcui' nu cusu' jua'a̱.
19Cua jlo ti' Jesús lcaa ña'a̱ cha' nu nti' ngu' xcuane ngu' ji'i̱, bi' cha' nguxtyacui yu cha' lo'o ngu' bi' li':
―Cua nacui̱ na' ji'i̱ ma̱ cha' ca tiya' la xi nga'aa ña'a̱ ma̱ jna', lo'o jua'a̱ ca tiya' la, li' ña'a̱ ma̱ jna' chaca quiya'. ¿Ha xqui'ya cha' bi' nchcui' tsa ma̱ lo'o tya'a ma̱? 20Liñi tsa cha' nu ta na' lo'o ma̱ juani ―nacui̱ Jesús ji'i̱ ngu' bi' li'―, cha' chañi xi'ya ma̱, chañi cunaa ma̱ nu lo'o cua ndya'a na', masi chaa ti' xa' la ñati̱ chalyuu. Pana ná cube tsa ti' ma̱, masi xñi'i̱ ti' ma̱; caca chaa ti' ma̱ lo'o tyu'ú na' chaca quiya' li'. 21Lo'o cua ndyalaa hora cha' cala sñi' sca nu cuna'a̱ ni ―nacui̱ Jesús―, ti'í tsa cña caca ji'i̱ nu cuna'a̱ bi'; pana lo'o ngula cubi' bi', li' cjlyaa ti' nu cuna'a̱ bi' cha' ti'í tsa cña bi' ji'i̱, tso'o tsa ntsu'u tyiquee cha' cua laca ngula sca ñati̱. 22Lo'o jua'a̱ cu'ma̱ ―nacui̱―, xti ti tyempo caca xñi'i̱ ti' ma̱; pana ca̱a̱ na' ca̱a̱ na'a̱ na' ji'i̱ ma̱ chaca quiya', lo'o li' caca chaa ti' ma̱ chaca quiya'. Ná tucui taca cua'a ji'i̱ ma̱ cha' ná caca chaa ti' ma̱ li'.
23’Nu lo'o tyalaa tyempo bi', nga'aa si'i jna' jña ma̱ sca cha' ―nacui̱ Jesús―. Liñi tsa cha' nu ta na' lo'o ma̱, cha' lcaa cha' nu jña ma̱ ji'i̱ ycui' Ndyosi Sti na' chacuayá' 'na, ta Ni cha' bi' ji'i̱ ma̱ ―nacui̱―. 24Si'i chacuayá' 'na ngüijña ma̱ cha' ji'i̱ ycui' Ndyosi Sti na' sa'ni la; pana jua'a̱ jña ma̱ cha' ji'i̱ Ni juani, cha' caja cha' bi' ji'i̱ ma̱, cha' xcui' na caca chaa ti' ma̱ su ndi'i̱ ma̱ li'.
Cua ntiji̱loo Jesús ji'i̱ nu xña'a̱
25’Xcui' cui̱i̱ ti nda na' lo'o ma̱ ―nacui̱ Jesús―, cha' caca cuayá' ti' ma̱ scaa cha'; pana tyalaa sca tsa̱ lo'o nga'aa si'i cui̱i̱ ti chcui' na' lo'o ma̱ li', liñi ti ta na' cha' lo'o ma̱ cha' ji'i̱ ycui' Ndyosi Sti na'. 26Nu lo'o tyalaa tyempo bi' ―nacui̱―, li' taca jña ma̱ cha' ji'i̱ ycui' Ndyosi Sti na' chacuayá' 'na. Ná ni na' ji'i̱ ma̱ cha' chcui' na' lo'o Sti na' cuentya ji'i̱ ma̱, cha' jua'a̱ ta Ni lcaa cha' nu jña ma̱ ji'i̱ Ni; 27la cui' ycui' Ndyosi Sti na' ntsu'u tsa tyiquee Ni ña'a̱ Ni ji'i̱ ma̱. Ntsu'u tyiquee ma̱ ña'a̱ ma̱ jna', jua'a̱ jlya ti' ma̱ cha' ca slo ycui' Ndyosi ngutu'u na', bi' cha' ntsu'u tyiquee Ni ña'a̱ Ni ji'i̱ ma̱ ―nacui̱―. 28Nde su ndi'i̱ Sti na' ngutu'u na' lijya̱ na' nde chalyuu; lo'o juani cua tyu'u ti na' chalyuu, tsa'a na' ca slo Sti na' chaca quiya'.
29Li' nchcui' ngu' nu ndyaca tsa'a̱ bi' lo'o Jesús:
―Tso'o tsa nchca cuayá' ti' ya cha' nu nda nu'u̱ lo'o ya juani ―nacui̱ ngu' ji'i̱―, nga'aa si'i ñi'ya̱ nchcui' sca cui̱i̱ ti nda nu'u̱ cha', 30bi' cha' ná ntsu'u cha' xcuane ngu' ni tsaca cha' jinu'u̱. Juani tso'o tsa nchca cuayá' ti' ya cha' jlo ti' nu'u̱ lcaa ca cha', bi' cha' jlya ti' ya cha' ca slo ycui' Ndyosi ngutu'u nu'u̱.
31Li' nacui̱ Jesús ji'i̱ ngu':
―¿Ha jlya ti' ma̱ jna' juani? ―nacui̱ Jesús―. 32Cua'a̱ jyaca̱ ma̱ xi ji'i̱ cha' nu chcui' na' re lacua: Cua ngulala ti hora, cua la cui' hora ndyaca juani cha' tyaa ma̱ toni'i̱ ji'i̱ scaa ma̱. Li' tyanu na' ycui' ti na' ―nacui̱―, pana si'i sca ti na' tyanu na', cha' stu'ba ndi'i̱ Sti na' lo'o na'. 33Cua nda na' lcaa cha' bi' lo'o ma̱ cha' ti̱ ti tyi'i̱ tyiquee ma̱ xqui'ya na' ―nacui̱―. Nde chalyuu ti'í ti' ñati̱ ña'a̱ ji'i̱ ma̱. Pana ná cube ti' ma̱, cua'ni tlyu tyiquee ma̱; na' laca̱ loo nde chalyuu, cha' cua ntiji̱loo na' tsiya' ti ji'i̱ nu xña'a̱.
Currently Selected:
SAN JUAN 16: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.