GÁLATAS 5
5
Ña'a̱ ti tya tyi'i̱ tso'o ti na chalyuu lacua
1Cua ngua'ni lyaá Cristo ji'na, cha' taca tyi'i̱ tso'o ti na chalyuu. Bi' cha' ña'a̱ ti tya tyi'i̱ tso'o ti ma̱ chalyuu lacua; nga'aa ta ma̱ tyempo cha' caca loo xa' ñati̱ ji'i̱ ma̱, ñi'ya̱ si cua ngüi'ya ngu' ji'i̱ ma̱ cha' cua'ni ma̱ cña ji'i̱ ngu'.
2Cua'a̱ jyaca̱ ma̱ ji'i̱ cha' nu nchcui' na' lo'o ma̱. Pablo laca na' nu nda na' cha' re lo'o ma̱. Ndi'ya̱ nacui̱ na' ji'i̱ ma̱: Nga'aa caca xtyucua Cristo ji'i̱ ma̱ si ta ma̱ chacuayá' cha' si'yu ngu' quiji̱ ma̱ ñi'ya̱ nu ndu'ni ngu' judío cha' culacua̱ ngu'. 3Tya chcui' na' cha' bi' lo'o ma̱ chaca quiya': Lo'o ngulacua̱ ma̱ ñi'ya̱ si laca ma̱ sca ngu' judío, li' ntsu'u cha' cua'ni ma̱ lcaa ña'a̱ cha' nu nscua lo quityi cusu' cuentya ji'i̱ ngu' judío bi'. 4Nu cu'ma̱ nu jlya tsa ti' ma̱ cha' caca tso'o cresiya ji'i̱ ma̱ cuentya ji'i̱ ycui' Ndyosi si ndu'ni tacati ma̱ ji'i̱ cha' cusu' bi', na cua ngulochu̱' ma̱ ji'i̱ Cristo; nga'aa ndube ti' ma̱ cha' ntsu'u tsa tyiquee ycui' Ndyosi ña'a̱ Ni ji'i̱ ma̱ si jua'a̱ ndu'ni ma̱. 5Pana nu na ni, tso'o tsa ntsu'u tyiquee na ndu̱ ti' na cha' cua'ni Ni cha' ca tso'o lijyi cresiya ji'na cuentya ji'i̱ ycui' Ni, nu lo'o tsaa na tsaa tyi'i̱ na lo'o Ni. Bi' laca cña nu ndu'ni Xtyi'i ycui' Ni ne' cresiya ji'na, xqui'ya cha' ngusñi na cha' ji'i̱ Cristo. 6Lo'o jua'a̱ si chañi cha' stu'ba ntsu'u cha' ji'na lo'o Jesucristo, li' ná ndu'ni cha' masi ngulacua̱ na, masi ná ngulacua̱ na. Sca ti cha' ndulo tsa ji'na cha' cua'ni na, cha' xñi tso'o la na cha' ji'i̱ ycui' Ni; lo'o li' caca cua'ni na cha' tso'o ti tyu'u tyiquee na ña'a̱ na ji'i̱ tya'a ñati̱ na.
7Tso'o tsa ndyu'ni ma̱ nquicha'. ¿Tilaca laca nu ndacu̱' cha' ji'i̱ ma̱, cha' nga'aa taquiya' la ma̱ ji'i̱ cha' liñi nu cua nda Cristo lo'o ma̱? 8Ycui' Ndyosi ngusubi ji'i̱ ma̱ tya clyo, pana si'i ycui' Ni laca nu ngua'ni cha' nñilo'o ngu' ji'i̱ ma̱ juani. 9Culacua xi ti' ma̱ ni cña cua'ni xi ca ti scua̱ tiye', nu lo'o su'ba ngu' ji'i̱ lo quiña'a̱ catyá xlyá; la cui' jua'a̱ cña nu cua'ni cha' cuxi nu nda ngu' bi' lo'o ma̱. 10Cuentya jna', ndyi'u tsa ti' na' ji'i̱ ma̱ xqui'ya ycui' nu Xu'na na, cha' jlya ti' na' cha' stu'ba ti ntsu'u tyiquee ma̱ lo'o cha' nu cua nchcui' ca na'. Ná ndu'ni cha' tilaca laca nu ndya'a̱ nchcui' cha' cuiñi lo'o ma̱ cha' xcutsi̱i̱ ji'i̱ ma̱, xcube' tsa ycui' Ndyosi ji'i̱ ñati̱ bi'.
11Cu'ma̱ tya'a ngusñi na cha' ji'i̱ Cristo, jlo ti' ma̱ cha' nga'aa cua'ni lya' ti' ngu' judío 'na si cacha' na' ji'i̱ ma̱ cha' culacua̱ ma̱ ñi'ya̱ ndu'ni ngu' bi'; pana ña'a̱ ti ti'í ti' ngu' bi' jna', xqui'ya cha' ná nda na' cha' bi' lo'o ma̱, cha' sca ti nchcui' na' lo'o cu'ma̱ ñi'ya̱ ndyu'u cha' lo'o ngujuii Jesús lo crusi. 12Nu ngu' nu ndya'a̱ ndatsaa ji'i̱ ma̱ cha' culacua̱ ma̱ cuentya ji'i̱ ngu', tso'o la masi tye cuaña' ycui' ca ngu' si'yu ngu', si jua'a̱ nti' ngu'.
13Cua ngusubi ycui' Ndyosi ji'i̱ ma̱ cha' caca tyi'i̱ tso'o ti ma̱ chalyuu. Tsa bi' ti cha', tii ti ti' ma̱ tyi'i̱ ma̱ chalyuu; ná clyana ma̱ cha' cuxi nu cua'ni ma̱ laja lo'o ndi'i̱ tso'o ti ma̱, cha' si'i na ndi'i̱ tso'o ti na cha' culiji na na nu ntsu'u ji'na jua'a̱ ti. Ntsu'u cha' xtyucua na ji'i̱ tya'a ñati̱ na xqui'ya cha' ntsu'u tsa tyiquee na ña'a̱ na ji'i̱ ngu', bi' cha' ndi'i̱ tso'o ti na. 14Li' taca cua'ni na lcaa cña nu nti' ycui' Ndyosi cha' cua'ni na, si taquiya' na ji'i̱ sca ti cha'cña nu nchcui' ndi'ya̱: “Nga'a̱ cha' tso'o ti tyu'u tyiquee na ña'a̱ na ji'i̱ xa' la ñati̱, ñi'ya̱ nu tso'o tsa ntsu'u tyiquee na ña'a̱ na ji'i̱ ycui' ca ti na”. 15Pana si xcui' cha' cusu̱u̱ ntsu'u ji'i̱ ma̱ lo'o tya'a ma̱, si xcui' na cua'ni ñu'u̱ ma̱ ji'i̱ tya'a ma̱ nti' ma̱, ná tyiquee' tye cha' ji'i̱ ma̱ lo'o tya'a ma̱ tsiya' ti. Nga'a̱ cha' cui'ya ma̱ cuentya cha' ná cua'ni ma̱ jua'a̱.
Tso'o la si cube ti' na ji'i̱ cha' nu nda Xtyi'i ycui' Ndyosi cha' tyanu ne' cresiya ji'na
16Ndi'ya̱ cha' ta na' lo'o ma̱: Ta ma̱ chacuayá' cha' caca Xtyi'i ycui' Ndyosi loo ne' cresiya ji'i̱ ma̱ ca su ndi'i̱ ma̱; li' nga'aa jña ti' tyiquee ma̱ cha' cua'ni ma̱ cua ña'a̱ ca cha' cuxi nu ndiya ti' ma̱, cha' laca ma̱ ñati̱ chalyuu. 17Nu cha' cuxi nu ndiya ti' na ni, nxu̱u̱ tya'a cha' bi' lo'o cha' nu nda Xtyi'i ycui' Ndyosi cha' tyanu ne' cresiya ji'na. Lo'o jua'a̱ Xtyi'i ycui' Ndyosi ni, bi' laca nu nxu̱u̱ tya'a lo'o cha' cuxi nu ndiya ti' na cha' cua'ni na, cha' laca na ñati̱ chalyuu. Ná stu'ba cha' bi' tsiya' ti; bi' cha' nga'aa caca cua'ni ma̱ cua ña'a̱ ca cha' cuxi nu ndiya ti' ma̱, nu ngua'ni ma̱ cua tsubi' la. 18Lo'o taquiya' ma̱ ji'i̱ cha' nu nda Xtyi'i ycui' Ndyosi cha' tyanu ne' cresiya ji'i̱ ma̱, li' nga'aa si'i cha' cusu' nu nda ñati̱ ti nu caca loo ji'i̱ ma̱ li'.
19Ndi'ya̱ laca cha' cuxi nu ndiya ti' ñati̱ chalyuu, si ná ta ngu' chacuayá' cha' caca Xtyi'i ycui' Ndyosi loo ne' cresiya ji'i̱ ngu': xcui' na nñilo'o ti ngu' ji'i̱ nu cuna'a̱, xcui' na ndu'ni suba' ngu' lo'o ñati̱, cuxi tsa ndu'ni ngu' lo'o tya'a ñati̱ ngu'; 20jua'a̱ ndu'ni tlyu ngu' ji'i̱ lcui̱ jo'ó; jua'a̱ ndu'ni cucha'a̱ ngu' bi' ji'i̱ tya'a ñati̱ ngu', lo'o jua'a̱ liye' ti' ngu' ña'a̱ ngu' ji'i̱ tya'a ñati̱ ngu', lye tsa nxu̱u̱ tya'a ngu'; jua'a̱ ndacui tsa ti' ngu' ji'i̱ cha' tso'o nu ntsu'u ji'i̱ tya'a ñati̱ ngu', cha' xi ndaca tsa nchca ñasi̱' ngu'; ná ntaja'a̱ ngu' tsiya' ti tya'a̱ tyiquee ngu' cha' ji'i̱ tya'a ñati̱ ngu', tsa cu' ti ndya'a̱ tyiquee ngu' cha' ji'i̱ ycui' ca ngu'; jua'a̱ nclyana tsa ngu' cha' cusu̱u̱ lo'o tya'a ñati̱ ngu', ndatsaa ngu' ji'i̱ tya'a ñati̱ ngu' cha' ná cua'ni stu'ba cha' ji'i̱ ngu' lo'o xa' la tya'a ngu'; 21la cui' jua'a̱ xcui' na nxlyaá ti ngu' na nu ntsu'u ji'i̱ tya'a ñati̱ ngu', ndujuii ngu' ji'i̱ tya'a ngu'; xcui' na cu'bi ti ngu', lo'o jua'a̱ ntsu'u ngu' nu chcu̱' tsa ndacu, cha' quiña'a̱ tsa na nti' ngu' bi' cacu ngu'; lo'o jua'a̱ tya ntsu'u xa' la cha' cuxi nu ndu'ni ngu'. Liñi tsa cha' nu ta na' lo'o ma̱ juani ñi'ya̱ nu ni na' ji'i̱ ma̱ tya tsubi' la, cha' ná caca tyu'u cha' ji'na lo'o ycui' Ndyosi nu lo'o caca ycui' Ni loo ca nde loo la, si tsa cu' ti cua'ni na cha' cuxi jua'a̱.
22Xa' ña'a̱ cña ndu'ni Xtyi'i ycui' Ndyosi ne' cresiya ji'na: ndu'ni Ni cha' tyu'u tyiquee na ña'a̱ na ji'i̱ tya'a ñati̱ na; jua'a̱ ndu'ni Ni cha' chaa ti' na cuentya ji'i̱ Ni, cha' ti̱ ti tyi'i̱ tyiquee na, cha' talo tyiquee na ji'i̱ tya'a ñati̱ na; jua'a̱ ndu'ni Ni cha' ca tya'na ti' na ña'a̱ na ji'i̱ ñati̱, cha' xcui' tso'o ti cua'ni na lo'o ñati̱, cha' liñi ti cua'ni na lo'o ñati̱; 23jua'a̱ ndu'ni Xtyi'i ycui' Ndyosi lo'o na cha' ná quiña'a̱ cha' ntsu'u tyiquee na cuentya ji'i̱ ycui' ca na, ndu'ni Ni cha' taca ji'na cua'a na ji'i̱ ycui' ca na li'. Nga'aa ntsu'u cha' sta ycui' Ndyosi qui'ya ji'na, si cua'ni na jua'a̱. 24Cua ngujuii Cristo lo crusi cha' cati̱ qui'ya nu ntsu'u ji'na; bi' cha' cua ngua'ni tye na ji'i̱ lcaa cha' cuxi nu ntsu'u ne' cresiya ji'na tya tsubi' la, lcaa na nu ndacui ti' na ji'i̱ nquicha', ngua'ni tye na ji'i̱ xqui'ya cha' ntsu'u cha' ji'na lo'o ycui' Cristo. Lo'o jua'a̱ lcaa cha' nu tiji̱' ti' na ji'i̱, cua nguxtyanu na ji'i̱ cha' cuxi bi' juani. 25Tya lo'o ngusñi na cha' bi' clyo, li' ngujui chalyuu tso'o ji'na xqui'ya Xtyi'i ycui' Ndyosi. Juani tso'o la si taquiya' na cha' nu nda Xtyi'i ycui' Ndyosi lo'o na cha' tyanu ne' cresiya ji'na lcaa se'i̱ su ndi'i̱ na.
26La cui' ti ná tso'o si chcui' tyucuaa ti' na lo'o ñati̱, cha' jua'a̱ caja quiña'a̱ tsa cha' cusu̱u̱ ji'na lo'o tya'a ñati̱ na li', cha' tyixi tyiquee na. Lo'o jua'a̱ ná tso'o si ña'a̱ ti'í na ji'i̱ tya'a na.
Currently Selected:
GÁLATAS 5: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.